ದೇವಸ್ಥಾನದ ಆವರಣದಲ್ಲಿ ಶೂ ಧರಿಸಿ ನಿಂತ ಅಮಿತ್ ಶಾ ಫೋಟೊ ವೈರಲ್: ಕಾಂಗ್ರೆಸ್ ಕಿಡಿ

ಮೈಸೂರು,ಎ.24: ಸೋಮವಾರ ಗುಂಡ್ಲುಪೇಟೆಯಲ್ಲಿ ಪ್ರಚಾರಕ್ಕೆ ತೆರಳುವ ಮುನ್ನ ಕೇಂದ್ರ ಗೃಹ ಸಚಿವ ಅಮಿತ್ ಶಾ  ಮೈಸೂರಿನ ಚಾಮುಂಡಿ ಬೆಟ್ಟಕ್ಕೆ ಭೇಟಿ ನೀಡಿ ವಿಶೇಷ ಪೂಜೆ ಸಲ್ಲಿಸಿದ್ದರು.

ಈ ವೇಳೆ ಅಮಿತ್ ಶಾ ದೇವಸ್ಥಾನದ ಆವರಣದಲ್ಲಿ ಶೂ ಧರಿಸಿ ನಿಂತಿರುದ್ದ ಫೋಟೊ ಒಂದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಜೊತೆಯಲ್ಲಿದ್ದ ಸಂಸದರು, ಶಾಸಕರು ಹಾಗೂ ಭದ್ರತಾ ಸಿಬ್ಬಂದಿಗಳೆಲ್ಲರೂ ಬರಿಗಾಲಲ್ಲೇ ನಿಂತಿರುವಾಗ ಅಮಿತ್ ಶಾ ಮಾತ್ರ ಶೂ ಧರಿಸಿರುವುದು ಈಗ ವಿವಾದದಕ್ಕೆ ಕಾರಣವಾಗಿದೆ. 

ಈ ಕುರಿತು ಟ್ವೀಟ್ ಮಾಡಿರುವ ವಿಪಕ್ಷ ಕಾಂಗ್ರೆಸ್, ''ದೇವಸ್ಥಾನದ ಆವರಣದಲ್ಲಿ ಉಳಿದವರೆಲ್ಲರೂ ಬರಿಗಾಲಲ್ಲಿ ಇರುವಾಗ ಅಮಿತ್ ಶಾ ಒಬ್ಬರೇ ಶೂ ಧರಿಸಿ ನಿಂತಿರುವುದೇಕೆ? ಎಲ್ಲರಿಗಿಂತ ಹೆಚ್ಚಿನ ಧರ್ಮರಕ್ಷಣೆಯ ಆಸ್ಥೆ ಇವರಿಗೆ ಇರಬೇಕಿತ್ತಲ್ಲವೇ? ಬಿಜೆಪಿಯ ಬೂಟಾಟಿಕೆಯನ್ನು "ಬೂಟು" ಬಯಲು ಮಾಡಿದೆ!'' ಎಂದು ಕಿಡಿಕಾರಿದೆ.