ಸೆ.28ಕ್ಕೆ ಹಾಜರಾಗಲು ಮಾಫಿ ಸಾಕ್ಷಿ ಪ್ರದೂಶ್ ಗೆ ನ್ಯಾಯಾಲಯ ಆದೇಶ; ಸುಪ್ರೀಂ ಕೋರ್ಟ್ ಗೆ ಹೋಗಲು ದರ್ಶನ್ ಸಿದ್ದತೆ

ಬೆಂಗಳೂರು: ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ಮಾಫಿ ಸಾಕ್ಷಿಯಾಗಿರುವ ಪ್ರಕರಣದ 14 ನೇ ಆರೋಪಿ ಪ್ರದೂಶ್ ರಾವ್ ಗೆ ಸೆ. 28 ವಿಚಾರಣೆಗೆ ಹಾಜರಾಗಲು 59 ನೇ ಸಿಸಿಹೆಚ್ ನ್ಯಾಯಾಲಯ ಆದೇಶಿಸಿದೆ.

ಗುರುವಾರ ವಿಚಾರಣೆ ಆರಂಭವಾದ ಕೂಡಲೇ ದರ್ಶನ್ ಪರ ವಕೀಲರು, "ಸಮನ್ಸ್ ಜಾರಿ ಅದೇಶ ಮಾಡಬಾರದು, ನಾವು ಹೈಕೋರ್ಟ್ ಅದೇಶವನ್ನು ಪ್ರಶ್ನೆ ಮಾಡಿ ಸುಪ್ರೀಂ ಕೋರ್ಟ್ ಗೆ ಮೇಲ್ಮನವಿ ಸಲ್ಲಿಸಲಿದ್ದೇವೆ" ಎಂದರು. ಆದರೆ ನ್ಯಾಯಾಧೀಶೆ ಸುಜಾತ ಮಡಿವಾಳಪ್ಪ ಸಾಂಬ್ರಾಣಿ ಅವರು ಸುಪ್ರಿಂಕೋರ್ಟ್ ನಿರ್ದೇಶನದಂತೆ ಮೇಲ್ಮನವಿ ಸಲ್ಲಿಸುತ್ತಾರೆ ಎನ್ನುವ ಕಾರಣಕ್ಕೆ ವಿಚಾರಣೆ ಮುಂದೂಡುವಂತಿಲ್ಲ ಎಂದು ಸೆ.28 ವಿಚಾರಣೆಗೆ ಹಾಜರಾಗಲು ಅದೇಶ ಮಾಡಿದರು.

ಈಗಾಗಲೇ ವಿಚಾರಣಾ ನ್ಯಾಯಾಲಯವಾಗಿರುವ ಸಿಸಿಹೆಚ್ 59 ನೇ ನ್ಯಾಯಾಲಯ ಪ್ರದೂಶ್ ರಾವ್ ಮಾಫಿ ಸಾಕ್ಷಿಯಾಗಲು ಅದೇಶ ನೀಡಿದೆ. ಇದನ್ನು ಪ್ರಶ್ನೆ ಮಾಡಿ ದರ್ಶನ್ ಪತ್ನಿ ವಿಜಯಲಕ್ಷ್ಮಿ ಹೈಕೋರ್ಟ್ ಗೆ ಸಲ್ಲಿಸಿದ್ದ ಮೇಲ್ಮನವಿ ಅರ್ಜಿಯೂ ಬುಧವಾರ ವಜಾ ಮಾಡಿ ಹೈಕೋರ್ಟ್ ಆದೇಶ ಮಾಡಿದೆ.

ಹೀಗಾಗಿ ಸೆ.28 ರಂದು ಪ್ರದೂಷ್ ರಾವ್ ನ್ಯಾಯಾಧೀಶರ ಎದುರು ಹಾಜರಾಗಿ ಮಾಫಿ ಸಾಕ್ಷಿ ನುಡಿಯಲಿದ್ದಾರೆ. ಇತ್ತ ಹೈಕೋರ್ಟ್ ಅದೇಶವನ್ನು ಸುಪ್ರೀಂ ಕೋರ್ಟ್ ನಲ್ಲಿ ಪ್ರಶ್ನೆ‌ಮಾಡಲು ದರ್ಶನ್ ಪರ ವಕೀಲರು ಸಿದ್ದತೆ ನಡೆಸಿದ್ದಾರೆ ಎಂದು ತಿಳಿದು ಬಂದಿದೆ.