ಹುಲಸೂರು | ಶರಣರು ಮರಣಕ್ಕೆ ಹೆದರಿದವರಲ್ಲ, ಮರಣವನ್ನೇ ಮಹಾನವಮಿ ಎಂದವರು: ಪ್ರಭುದೇವ ಮಹಾಸ್ವಾಮಿ

ಹುಲಸೂರು: ಶರಣರು ಮರಣಕ್ಕೆ ಹೆದರಿದವರಲ್ಲ. ಮರಣವನ್ನೇ ಮಹಾನವಮಿ ಎಂದು ಅವರು ಸಾರಿದ್ದಾರೆ. ಕಲ್ಯಾಣ ಕ್ರಾಂತಿಯ ಸಂದರ್ಭದಲ್ಲಿ ಶರಣರು ಕಲ್ಯಾಣ ತೊರೆದಿದ್ದು ಪ್ರಾಣರಕ್ಷಣೆಗಾಗಿ ಅಲ್ಲ, ವಚನ ಸಾಹಿತ್ಯದ ಸಂರಕ್ಷಣೆಗಾಗಿ ಎಂದು ಗೋರಟಾ ಲಿಂಗಾಯತ ಮಹಾಮಠದ ಪೀಠಾಧಿಪತಿ ಪ್ರಭುದೇವ ಮಹಾಸ್ವಾಮಿ ಹೇಳಿದರು.

ಗೋರಟಾದಲ್ಲಿ ನಡೆದ ‘ಮರಣವೇ ಮಹಾನವಮಿ ಕಲ್ಯಾಣ ಕ್ರಾಂತಿ ವಿಜಯೋತ್ಸವ’ ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿ ಅವರು ಮಾತನಾಡಿದರು.

ಶರಣರ ತ್ಯಾಗ, ಬಲಿದಾನ ಹಾಗೂ ವಚನ ಸಾಹಿತ್ಯದ ಮಹತ್ವವನ್ನು ಮುಂದಿನ ಪೀಳಿಗೆಗೆ ಪರಿಚಯಿಸಬೇಕಿದೆ. ಈ ನಿಟ್ಟಿನಲ್ಲಿ ಮಹಾಮಠದ ವತಿಯಿಂದ ಹತ್ತು ದಿನಗಳ ಕಾಲ ಮಕ್ಕಳಿಗಾಗಿ ವಿಶೇಷ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ. ಮಕ್ಕಳಿಂದಲೇ ವಚನ ಚಿಂತನೆ, ಅನುಭಾವ, ವಚನ ಪಠಣ, ಗಾಯನ ಹಾಗೂ ನೃತ್ಯಗಳನ್ನು ಪ್ರಸ್ತುತಪಡಿಸುವ ಮೂಲಕ ಅವರಲ್ಲಿ ಸಂಸ್ಕಾರ ಮತ್ತು ತತ್ವಜ್ಞಾನ ಬೆಳೆಸಲಾಗುತ್ತಿದೆ. ವಚನ ಸಾಹಿತ್ಯದಲ್ಲಿನ ಮಾನವೀಯ ಮೌಲ್ಯಗಳನ್ನು ವಿಶ್ವಕ್ಕೆ ತಲುಪಿಸುವ ಕಾರ್ಯವಾಗಬೇಕು ಎಂದು ಹೇಳಿದರು.

ಅನುಭಾವ ನೀಡಿದ ಅನಿಮಿಷಾನಂದ ಸ್ವಾಮೀಜಿ ಮಾತನಾಡಿ, ಅಕ್ಕ ಅನ್ನಪೂರ್ಣತಾಯಿಯವರು ಹಾಕಿಕೊಟ್ಟ ಮಾರ್ಗದಲ್ಲಿ ಪ್ರಭುದೇವ ಮಹಾಸ್ವಾಮೀಜಿ ಮುನ್ನಡೆಯುತ್ತಿದ್ದಾರೆ. ಮಕ್ಕಳಲ್ಲಿ ಸಂಸ್ಕಾರ ಬಿತ್ತುವ ಇಂತಹ ಕಾರ್ಯಕ್ರಮಗಳು ಭವಿಷ್ಯದಲ್ಲಿ ವಚನ ತತ್ವಗಳನ್ನು ವಿಶ್ವಕ್ಕೆ ಪರಿಚಯಿಸುವ ಪೀಳಿಗೆಯನ್ನು ರೂಪಿಸಲಿವೆ ಎಂದು ನುಡಿದರು.

ಅನುಭಾವ ನೀಡಿದ ಸೃಜನ ಶರಣಬಸವ ಪೊಲೀಸ್ ಪಾಟೀಲ ಮಾತನಾಡಿ, ಪ್ರೀತಿಯ ಅಭಾವವೇ ಅಸಹ್ಯದ ಮೂಲ. ನಾನೇ ಶ್ರೇಷ್ಠ, ನನ್ನದೇ ಪವಿತ್ರ ಎಂಬ ಅಹಂಕಾರದಿಂದ ಇತರರನ್ನು ಕೀಳಾಗಿ ಕಾಣುವ ಮನೋಭಾವ ಬೆಳೆಯುತ್ತದೆ. ಮಗು ಕೊಳಕಾಗಿದ್ದರೂ ತಾಯಿ ಅಸಹ್ಯಪಡದೆ ಪ್ರೀತಿಯಿಂದ ಬೆಳೆಸುತ್ತಾಳೆ. ಅದೇ ರೀತಿ ಎಲ್ಲರನ್ನೂ ಪ್ರೀತಿಯಿಂದ ಕಾಣಬೇಕು. ಅಸಹ್ಯಪಡುವುದು ಪರೋಕ್ಷವಾಗಿ ಅಪಮಾನ ಮಾಡಿದಂತೆಯೇ ಆಗುತ್ತದೆ ಎಂದು ಹೇಳಿದರು.

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಗುರುನಾಥಪ್ಪ ಹತ್ತೆ ವಹಿಸಿದ್ದರು. ಈ ಸಂದರ್ಭದಲ್ಲಿ ಪೂಜಾ ಗೌರೆ, ರಮೇಶ್ ಪತಂಗೆ, ಜ್ಯೋತಿ ಪೊ. ಪಾಟೀಲ್, ಸುರೇಖಾ ರಾಜೋಳೆ, ಸುಲಭಾ ಮದಕಟ್ಟೆ, ನೀಲಾಂಬಿಕಾ ಪತಂಗೆ, ಮಹಾದೇವಿ ಕನಕಟ್ಟೆ ಹಾಗೂ ಶೃತಿ ರಾಜೋಳೆ ಉಪಸ್ಥಿತರಿದ್ದರು.

ಅಪೂರ್ವ ರವಿ ಕಾದೇಪೂರಿ ನಿರೂಪಿಸಿದರು. ರುದ್ರಾಕ್ಷ ಬಿರಾದರ ವಚನ ಗಾಯನ ಮಾಡಿದರು. ಪೊ. ಪಾಟೀಲ್ ಪ್ರಾರ್ಥಿಸಿದರು. ಅಂಬಿಕಾ ದಿಲಿಪ ವಚನ ಪಠಣ ಮಾಡಿದರು. ಸಿದ್ದೇಶ್ವರಿ ಭದ್ರಪ್ಪ ಸ್ವಾಗತಿಸಿದರು. ವಚನಶ್ರೀ ಮತ್ತು ಸ್ನೇಹ ವಚನ ನೃತ್ಯ ಪ್ರದರ್ಶಿಸಿದರು. ಗೌರಮ್ಮ ಪತಂಗೆ ಭಕ್ತಿ ದಾಸೋಹದ ವ್ಯವಸ್ಥೆ ಮಾಡಿದರು.