72ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ | ಅನಂತ್ ನಾಗ್ ಗೆ ದಾದಾಸಾಹೇಬ್ ಫಾಲ್ಕೆ; ಮಮ್ಮೂಟ್ಟಿ, ಕಾರ್ತಿಕ್ ಆರ್ಯನ್, ಯಾಮಿ ಗೌತಮ್ ಗೆ ರಾಷ್ಟ್ರೀಯ ಪ್ರಶಸ್ತಿ ಪ್ರದಾನ

ಏಕ್ತಾ ನಗರ: ಭಾರತೀಯ ಚಿತ್ರರಂಗಕ್ಕೆ ನೀಡಿದ ಕೊಡುಗೆಗಾಗಿ ಹಿರಿಯ ಕನ್ನಡ ನಟ ಅನಂತ್ ನಾಗ್ ಅವರಿಗೆ ಪ್ರತಿಷ್ಠಿತ ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ ಸೇರಿದಂತೆ 2024ನೇ ಸಾಲಿನ 72ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಗಳನ್ನು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಮಂಗಳವಾರ ಪ್ರದಾನ ಮಾಡಿದರು.

ಗುಜರಾತ್ ನ ನರ್ಮದಾ ಜಿಲ್ಲೆಯ ಏಕ್ತಾ ನಗರದಲ್ಲಿ ನಡೆದ ಸಮಾರಂಭದಲ್ಲಿ ಅನಂತ್ ನಾಗ್ ಅವರು ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ ಸ್ವೀಕರಿಸಿದರು.

► ಮಮ್ಮೂಟ್ಟಿಗೆ ನಾಲ್ಕನೇ ರಾಷ್ಟ್ರೀಯ ಪ್ರಶಸ್ತಿ

ಮಲಯಾಳಂನ ‘ಬ್ರಹ್ಮಯುಗಂ’ ಚಿತ್ರದಲ್ಲಿನ ಅಭಿನಯಕ್ಕಾಗಿ ಮಮ್ಮೂಟ್ಟಿ ಅತ್ಯುತ್ತಮ ನಟ (ಪ್ರಧಾನ ಪಾತ್ರ) ಪ್ರಶಸ್ತಿ ಪಡೆದರು. ರಾಹುಲ್ ಸದಾಶಿವನ್ ನಿರ್ದೇಶನದ ಈ ಅಲೌಕಿಕ ಕಥಾಹಂದರದ ಚಿತ್ರದಲ್ಲಿ ಮಮ್ಮೂಟ್ಟಿ ‘ಕೊಡುಮೋನ್ ಪೋಟ್ಟಿ’ ಎಂಬ ದುಷ್ಟ ಮತ್ತು ಶಕ್ತಿಶಾಲಿ ಆತ್ಮದ ಪಾತ್ರ ನಿರ್ವಹಿಸಿದ್ದರು.

ಈ ಪ್ರಶಸ್ತಿ ಮಮ್ಮೂಟ್ಟಿಗೆ ದೊರೆತ ನಾಲ್ಕನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಯಾಗಿದೆ. ಇದರೊಂದಿಗೆ ನಾಲ್ಕು ರಾಷ್ಟ್ರೀಯ ಪ್ರಶಸ್ತಿಗಳನ್ನು ಪಡೆದಿರುವ ಹಿರಿಯ ನಟ ಅಮಿತಾಭ್ ಬಚ್ಚನ್ ಅವರ ದಾಖಲೆಯನ್ನು ಮಮ್ಮೂಟ್ಟಿ ಸರಿಗಟ್ಟಿದ್ದಾರೆ.

► ‘ಆರ್ಟಿಕಲ್ 370’ಗೆ ಅತ್ಯುತ್ತಮ ಚಿತ್ರ

ಆದಿತ್ಯ ಸುಹಾಸ್ ಜಂಭಲೆ ನಿರ್ದೇಶನದ ಹಿಂದಿ ಚಿತ್ರ ‘ಆರ್ಟಿಕಲ್ 370’ ಅತ್ಯುತ್ತಮ ಚಲನಚಿತ್ರ ಪ್ರಶಸ್ತಿಗೆ ಭಾಜನವಾಯಿತು. ಚಿತ್ರದಲ್ಲಿ ಗುಪ್ತಚರ ಅಧಿಕಾರಿಯ ಪಾತ್ರ ನಿರ್ವಹಿಸಿದ್ದ ಯಾಮಿ ಗೌತಮ್ ಅತ್ಯುತ್ತಮ ನಟಿ (ಪ್ರಧಾನ ಪಾತ್ರ) ಪ್ರಶಸ್ತಿ ಪಡೆದರು.

‘ಚಂದು ಚಾಂಪಿಯನ್’ ಚಿತ್ರದಲ್ಲಿ ಪ್ಯಾರಾಲಿಂಪಿಯನ್ ಚಿನ್ನದ ಪದಕ ವಿಜೇತ ಮುರಲಿಕಾಂತ್ ಪೆಟ್ಕರ್ ಅವರ ಪಾತ್ರ ನಿರ್ವಹಿಸಿದ್ದಕ್ಕಾಗಿ ಕಾರ್ತಿಕ್ ಆರ್ಯನ್ ಅತ್ಯುತ್ತಮ ನಟ ಪ್ರಶಸ್ತಿಗೆ ಭಾಜನರಾದರು.

ತಮಿಳು ನಟ ಧನುಷ್ ಅವರಿಗೆ ‘ಕ್ಯಾಪ್ಟನ್ ಮಿಲ್ಲರ್’ ಚಿತ್ರದಲ್ಲಿನ ಅಭಿನಯಕ್ಕಾಗಿ ವಿಶೇಷ ಉಲ್ಲೇಖ ಪ್ರಶಸ್ತಿ ನೀಡಲಾಯಿತು.

ನಟನಿಂದ ನಿರ್ದೇಶಕರಾಗಿ ಬದಲಾಗಿರುವ ರಣದೀಪ್ ಹೂಡಾ ಅವರು ‘ಸ್ವಾತಂತ್ರ್ಯವೀರ್ ಸಾವರ್ಕರ್’ ಚಿತ್ರಕ್ಕಾಗಿ ಅತ್ಯುತ್ತಮ ಚೊಚ್ಚಲ ನಿರ್ದೇಶಕನ ಚಲನಚಿತ್ರ ಪ್ರಶಸ್ತಿ ಪಡೆದರು.

ತಮಿಳು ಚಿತ್ರ ‘ಅಮರನ್’ಗಾಗಿ ರಾಜ್ಕುಮಾರ್ ಪೆರಿಯಸಾಮಿ ಅತ್ಯುತ್ತಮ ನಿರ್ದೇಶನ ಪ್ರಶಸ್ತಿ ಸ್ವೀಕರಿಸಿದರು.

ಸುಮಿರಾ ರಾಯ್ ನಿರ್ದೇಶಿಸಿ ನಿರ್ಮಿಸಿದ ‘ಭಂಗಾರ್’ ಚಿತ್ರ ಅತ್ಯುತ್ತಮ ನಾನ್-ಫೀಚರ್ ಫಿಲ್ಮ್ ಪ್ರಶಸ್ತಿಗೆ ಭಾಜನವಾಯಿತು. ರಾಯ್ ಅವರೇ ಪ್ರಶಸ್ತಿ ಸ್ವೀಕರಿಸಿದರು.

ಹಿಂದಿ ಭಾಷೆಯ ಅತ್ಯುತ್ತಮ ಚಲನಚಿತ್ರ ವಿಮರ್ಶಕ ಪ್ರಶಸ್ತಿಯನ್ನು ಸಂಜೀವ್ ಶ್ರೀವಾಸ್ತವ ಪಡೆದರು.

► ಪೋಷಕ ನಟ-ನಟಿಯರಿಗೆ ಪ್ರಶಸ್ತಿ

ತಮಿಳು ಚಿತ್ರ ‘ಮಹಾರಾಜ’ಕ್ಕಾಗಿ ಸಚನಾ ನಮಿದಾಸ್ ಅತ್ಯುತ್ತಮ ಪೋಷಕ ನಟಿ ಪ್ರಶಸ್ತಿ ಪಡೆದರು. ಕನ್ನಡದ ‘ಮಿಥ್ಯ’ ಚಿತ್ರಕ್ಕಾಗಿ ರೂಪಶ್ರೀ ವರ್ಕಾಡಿ ಇದೇ ವಿಭಾಗದಲ್ಲಿ ಪ್ರಶಸ್ತಿಗೆ ಭಾಜನರಾದರು.

‘ಭಕ್ಷಕ್’ ಚಿತ್ರದಲ್ಲಿನ ಅಭಿನಯಕ್ಕಾಗಿ ಬಾಲಿವುಡ್ ನಟ ಸಂಜಯ್ ಮಿಶ್ರಾ ಅತ್ಯುತ್ತಮ ಪೋಷಕ ನಟ ಪ್ರಶಸ್ತಿ ಪಡೆದರು.

‘ಮೂರು ದಶಕಗಳಿಗೂ ಹೆಚ್ಚು ಕಾಲ ನನಗೆ ಸಿಕ್ಕ ಪ್ರತಿಯೊಂದು ಪಾತ್ರಕ್ಕೂ ಪ್ರಾಮಾಣಿಕವಾಗಿರಲು ಪ್ರಯತ್ನಿಸಿದ್ದೇನೆ. ಈ ಗೌರವವು ನಾನು ಕೆಲಸ ಮಾಡಿದ ನಿರ್ದೇಶಕರು, ನಿರ್ಮಾಪಕರು, ಬರಹಗಾರರು, ತಂತ್ರಜ್ಞರು ಮತ್ತು ಸಹನಟರಿಗೆ ಎಷ್ಟು ಸಲ್ಲುತ್ತದೆಯೋ, ಅಷ್ಟೇ ಪ್ರಮಾಣದಲ್ಲಿ ವರ್ಷಗಳಿಂದ ನನ್ನ ಕೆಲಸವನ್ನು ಪ್ರೀತಿಯಿಂದ ಸ್ವೀಕರಿಸಿದ ಪ್ರೇಕ್ಷಕರಿಗೂ ಸಲ್ಲುತ್ತದೆ. ನಾನು ಅತ್ಯಂತ ಕೃತಜ್ಞನಾಗಿದ್ದೇನೆ’ ಎಂದು ಸಂಜಯ್ ಮಿಶ್ರಾ ಹೇಳಿದರು.

► ‘ಪುಷ್ಪ: ದಿ ರೂಲ್’ಗೂ ಎರಡು ಪ್ರಶಸ್ತಿ

ತೆಲುಗು ಚಿತ್ರ ‘ಪುಷ್ಪ: ದಿ ರೂಲ್’ ಅತ್ಯುತ್ತಮ ವೇಷಭೂಷಣ ವಿನ್ಯಾಸ ಪ್ರಶಸ್ತಿ ಪಡೆಯಿತು. ಇದೇ ಚಿತ್ರಕ್ಕಾಗಿ ಸುಕುಮಾರ್ ಅತ್ಯುತ್ತಮ ಚಿತ್ರಕಥೆ ಪ್ರಶಸ್ತಿ ಪಡೆದರು.

‘ಅಮರನ್’ ಚಿತ್ರಕ್ಕಾಗಿ ಆರ್. ಕಲೈವಣ್ಣನ್ ಅತ್ಯುತ್ತಮ ಸಂಕಲನ ಪ್ರಶಸ್ತಿಗೆ ಭಾಜನರಾದರು.

‘ಧುರಂಧರ್’ ಖ್ಯಾತಿಯ ಶಾಶ್ವತ್ ಸಚ್ದೇವ್ ಅವರು ‘ಆರ್ಟಿಕಲ್ 370’ ಚಿತ್ರದ ಹಾಡುಗಳಿಗಾಗಿ ಅತ್ಯುತ್ತಮ ಸಂಗೀತ ನಿರ್ದೇಶನ ಪ್ರಶಸ್ತಿ ಪಡೆದರು.

‘ಅಮರನ್’ ಚಿತ್ರದ ಹಿನ್ನೆಲೆ ಸಂಗೀತಕ್ಕಾಗಿ ಜಿ.ವಿ. ಪ್ರಕಾಶ್ ಕುಮಾರ್ ಅವರನ್ನು ಗೌರವಿಸಲಾಯಿತು.

‘ನಾನು ಈ ನಗರಕ್ಕೆ ಬರುತ್ತಿರುವುದು ಇದೇ ಮೊದಲು. ಸ್ಟ್ಯಾಚ್ಯೂ ಆಫ್ ಯೂನಿಟಿಯನ್ನು ನೋಡಲು ತುಂಬಾ ಉತ್ಸುಕನಾಗಿದ್ದೇನೆ. ಇದು ನನ್ನ ಮೂರನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ. ಹಾಗಾಗಿ, ಇದನ್ನು ಸ್ವೀಕರಿಸುತ್ತಿರುವುದಕ್ಕೆ ತುಂಬಾ ಸಂತೋಷವಾಗಿದೆ’ ಎಂದು ಜಿ.ವಿ. ಪ್ರಕಾಶ್ ಹೇಳಿದರು.