IAFನ ಸಕ್ರಿಯ ರಫೇಲ್ಗಳ ಸಂಖ್ಯೆ 32ಕ್ಕೆ ಇಳಿಕೆ: ಫ್ಲೈಟ್ ಗ್ಲೋಬಲ್ ವರದಿ
35ರಿಂದ 32ಕ್ಕೆ ಪರಿಷ್ಕರಣೆ; ವರದಿಯ ಅಂಕಿಅಂಶಗಳನ್ನು ಪ್ರಶ್ನಿಸಿದ ರಕ್ಷಣಾ ಸಚಿವಾಲಯ
ರಫೇಲ್ ಯುದ್ಧವಿಮಾನ (ಸಾಂದರ್ಭಿಕ ಚಿತ್ರ) | (Photo: PTI)
ಹೊಸದಿಲ್ಲಿ: ಭಾರತೀಯ ವಾಯುಪಡೆಯ (IAF) ಸಕ್ರಿಯ ರಫೇಲ್ ಯುದ್ಧವಿಮಾನಗಳ ಸಂಖ್ಯೆ 35ರಿಂದ 32ಕ್ಕೆ ಇಳಿದಿದೆ ಎಂದು ಬ್ರಿಟಿಷ್ ವಾಯುಯಾನ ಪ್ರಕಟಣೆ 'ಫ್ಲೈಟ್ಗ್ಲೋಬಲ್' (FlightGlobal) ತನ್ನ ಇತ್ತೀಚಿನ 'ವರ್ಲ್ಡ್ ಏರ್ ಫೋರ್ಸಸ್' ಡೈರೆಕ್ಟರಿಯಲ್ಲಿ ತಿಳಿಸಿದೆ. ಆದರೆ, ಈ ವರದಿಯಲ್ಲಿರುವ ಅಂಕಿಅಂಶಗಳು ರಕ್ಷಣಾ ಸಚಿವಾಲಯ ನೀಡಿದ ಮಾಹಿತಿಯಲ್ಲ ಎಂದು ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ ಎಂದು thehindu.com ವರದಿ ಮಾಡಿದೆ.
ಫ್ರಾನ್ಸ್ ನಿಂದ ಭಾರತ ಒಟ್ಟು 36 ರಫೇಲ್ ಯುದ್ಧವಿಮಾನಗಳನ್ನು ಖರೀದಿಸಿತ್ತು. 2025ರ ಕೊನೆಯಲ್ಲಿ ಪ್ರಕಟವಾದ ಫ್ಲೈಟ್ಗ್ಲೋಬಲ್ ನ 2026ರ ಆವೃತ್ತಿಯಲ್ಲಿ 35 ವಿಮಾನಗಳು ಸಕ್ರಿಯವಾಗಿವೆ ಎಂದು ಪಟ್ಟಿ ಮಾಡಲಾಗಿತ್ತು. ಆದರೆ, ಇತ್ತೀಚಿನ ಆವೃತ್ತಿಯಲ್ಲಿ ಈ ಸಂಖ್ಯೆಯನ್ನು 32ಕ್ಕೆ ಇಳಿಸಲಾಗಿದೆ. ಯಾವ ಮೂರು ವಿಮಾನಗಳನ್ನು ಸಕ್ರಿಯ ಪಟ್ಟಿಯಿಂದ ಕೈಬಿಡಲಾಗಿದೆ ಮತ್ತು ಅದಕ್ಕೆ ಕಾರಣವೇನು ಎಂಬುದನ್ನು ವರದಿ ಸ್ಪಷ್ಟಪಡಿಸಿಲ್ಲ.
ಫ್ಲೈಟ್ಗ್ಲೋಬಲ್ ನ ಡೈರೆಕ್ಟರಿಯಲ್ಲಿರುವ ಅಂಕಿಅಂಶಗಳು ಭಾರತೀಯ ವಾಯುಪಡೆಯಿಂದ ಬಂದಿಲ್ಲ ಎಂದು ರಕ್ಷಣಾ ಸಚಿವಾಲಯದ ಹಿರಿಯ ಅಧಿಕಾರಿಗಳು ಹೇಳಿದ್ದಾರೆ. 'ಸಿರಿಯಮ್'ನ ಮಿಲಿಟರಿ ವಿಮಾನಗಳ ಡೇಟಾಬೇಸ್ ಆಧರಿಸಿ ಈ ಮೌಲ್ಯಮಾಪನ ಮಾಡಲಾಗಿದೆ. ನಿರ್ವಹಣೆ, ನವೀಕರಣ ಅಥವಾ ದೊಡ್ಡ ಪ್ರಮಾಣದ ದುರಸ್ತಿ ಕಾರ್ಯಗಳಿಗೆ ಒಳಗಾಗಿರುವ ವಿಮಾನಗಳು ಸಕ್ರಿಯ ಪಟ್ಟಿಯಿಂದ ಹೊರಗುಳಿದಿರಬಹುದು. ಆದರೆ, ಇತ್ತೀಚಿನ ಡೈರೆಕ್ಟರಿಯಲ್ಲಿ ಸಂಖ್ಯೆಯ ಇಳಿಕೆಗೆ ಕಾರಣವನ್ನು ವಿವರಿಸುವ ಮಾಹಿತಿ ನೀಡಲಾಗಿಲ್ಲ.
ಭಾರತವು ಫ್ರಾನ್ಸ್ ನಿಂದ ಖರೀದಿಸಿದ 36 ರಫೇಲ್ ಗಳಲ್ಲಿ 28 ಏಕ-ಆಸನದ 'EH' ಮಾದರಿಯ ಹಾಗೂ ಎಂಟು ದ್ವಿ-ಆಸನದ 'DH' ಮಾದರಿಯ ವಿಮಾನಗಳಿವೆ.
'ಆಪರೇಷನ್ ಸಿಂಧೂರ'ದ ಬಳಿಕ IAF, "ನಷ್ಟಗಳು ಯುದ್ಧದ ಒಂದು ಭಾಗ" ಎಂದು ಹೇಳಿತ್ತು. ಆದರೆ, ಎಷ್ಟು ವಿಮಾನಗಳು ನಷ್ಟವಾಗಿವೆ ಅಥವಾ ಯಾವ ಮಾದರಿಯ ವಿಮಾನಗಳು ನಷ್ಟಕ್ಕೀಡಾಗಿವೆ ಎಂಬ ವಿವರವನ್ನು ಬಹಿರಂಗಪಡಿಸಿರಲಿಲ್ಲ.
36 ವಿಮಾನಗಳಿಗೂ ನಿರ್ವಹಣಾ ಬೆಂಬಲ
ಈ ವರ್ಷದ ಜೂನ್ನಲ್ಲಿ IAF, ತನ್ನ ಎಲ್ಲ 36 ರಫೇಲ್ ವಿಮಾನಗಳಿಗೆ ನಿರ್ವಹಣಾ ಬೆಂಬಲ ಕೋರಿ ಟೆಂಡರ್ ಹೊರಡಿಸಿತ್ತು. ಸಂಪೂರ್ಣ ರಫೇಲ್ ವಿಮಾನಗಳ ಸಮೂಹವು ನಿರ್ವಹಣೆ ಮತ್ತು ಬೆಂಬಲ ವ್ಯವಸ್ಥೆಯ ವ್ಯಾಪ್ತಿಯಲ್ಲಿದೆ ಎಂಬುದನ್ನು ಇದು ಸೂಚಿಸುತ್ತದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಸಾರ್ವಜನಿಕವಾಗಿ ಲಭ್ಯವಿರುವ ವಿಮಾನ ವೀಕ್ಷಣೆ, ಫ್ಲೈಟ್ ಟ್ರ್ಯಾಕಿಂಗ್ ಡೇಟಾ ಮತ್ತು ರಕ್ಷಣಾ ಸಂಬಂಧಿತ ವರದಿಗಳನ್ನು ಬಳಸಿಕೊಂಡು ಸಿರಿಯಮ್ ವೈಯಕ್ತಿಕ ವಿಮಾನಗಳ ಮಟ್ಟದಲ್ಲಿ ಮಿಲಿಟರಿ ವಿಮಾನಗಳನ್ನು ಟ್ರ್ಯಾಕ್ ಮಾಡುತ್ತದೆ. ಸಕ್ರಿಯ ವಿಮಾನಗಳ ಸಂಖ್ಯೆಯಲ್ಲಿನ ವ್ಯತ್ಯಾಸವು ನಿರ್ವಹಣೆ, ನವೀಕರಣ ಅಥವಾ ರಚನಾತ್ಮಕ ದುರಸ್ತಿಗೆ ಒಳಗಾಗಿರುವ ವಿಮಾನಗಳನ್ನು ಪ್ರತಿಬಿಂಬಿಸಬಹುದು. ಆದರೆ, ಇತ್ತೀಚಿನ ಡೈರೆಕ್ಟರಿಯಲ್ಲಿ ಸಂಖ್ಯೆಯ ಇಳಿಕೆಗೆ ಕಾರಣವನ್ನು ವಿವರಿಸುವ ಮಾಹಿತಿ ನೀಡಲಾಗಿಲ್ಲ.
ಇದೇ ಪ್ರಕಟಣೆಯಲ್ಲಿ ಪಾಕಿಸ್ತಾನದ ಸಾಬ್ 2000 ಎರಿಯೇ (Saab 2000 Erieye) ವಾಯುಗಾಮಿ ರಾಡಾರ್ ಎಚ್ಚರಿಕೆ ಮತ್ತು ನಿಯಂತ್ರಣ (AEW&C) ವಿಮಾನಗಳ ಸಂಖ್ಯೆಯನ್ನೂ ಒಂಭತ್ತರಿಂದ ಏಳಕ್ಕೆ ಪರಿಷ್ಕರಿಸಲಾಗಿದೆ.
ಭಾರತವು IAFಗಾಗಿ ಫ್ರಾನ್ಸ್ ನಿಂದ ಹೆಚ್ಚುವರಿ 114 ರಫೇಲ್ ಯುದ್ಧವಿಮಾನಗಳನ್ನು ಖರೀದಿಸಲು ಪ್ರಯತ್ನಿಸುತ್ತಿದೆ. ಪ್ರತ್ಯೇಕವಾಗಿ, ಭಾರತೀಯ ನೌಕಾಪಡೆಯು ತನ್ನ ವಿಮಾನವಾಹಕ ನೌಕೆಗಳಿಂದ ಕಾರ್ಯಾಚರಣೆ ನಡೆಸಲು 26 ರಫೇಲ್-ಮರೈನ್ (Rafale-Marine) ಯುದ್ಧವಿಮಾನಗಳನ್ನು ಖರೀದಿಸುವ ಒಪ್ಪಂದಕ್ಕೆ 2025ರಲ್ಲಿ ಸಹಿ ಹಾಕಿತ್ತು.
ಫ್ಲೈಟ್ಗ್ಲೋಬಲ್ ನ ಡೈರೆಕ್ಟರಿಯು ಜಾಗತಿಕ ಮಿಲಿಟರಿ ವಿಮಾನಗಳ ದಾಸ್ತಾನು ಕುರಿತು ಸ್ವತಂತ್ರ ಮೌಲ್ಯಮಾಪನ ನೀಡುವ ಪ್ರಕಟಣೆಯಾಗಿದ್ದು, ಇದನ್ನು ಭಾರತ ಸರ್ಕಾರದ ಅಧಿಕೃತ ಮಾಹಿತಿ ಅಥವಾ ಬಹಿರಂಗಪಡಿಸುವಿಕೆ ಎಂದು ಪರಿಗಣಿಸಲಾಗುವುದಿಲ್ಲ.