ಆಂಧ್ರಪ್ರದೇಶ ಕರಾವಳಿಗೆ ಅಪ್ಪಳಿಸಿದ ‘ಅರ್ನಬ್’ ಚಂಡಮಾರುತ: ಪ್ರತಿ ಗಂಟೆಗೆ 150 ಕಿಮೀ ವೇಗದಲ್ಲಿ ಬೀಸುತ್ತಿರುವ ಗಾಳಿ

ಭುವನೇಶ್ವರ: ಬುಧವಾರ ಬೆಳಗ್ಗೆ ಅತ್ಯಂತ ಬಿರುಸಿನ ‘ಅರ್ನಬ್’ ಚಂಡಮಾರುತ ಆಂಧ್ರಪ್ರದೇಶ ಕರಾವಳಿಯನ್ನು ಅಪ್ಪಳಿಸಿದೆ. ಚಂಡ ಮಾರುತದ ತೀವ್ರತೆ ಇನ್ನೂ ಎರಡು ಗಂಟೆ ಮುಂದುವರಿಯುವ ಸಾಧ್ಯತೆ ಇದೆ ಎಂದು ಭಾರತೀಯ ಹವಾಮಾನ ಇಲಾಖೆ ತಿಳಿಸಿದೆ.

ದಕ್ಷಿಣ ಯನಂಗೆ ಸಮೀಪವಿರುವ ಬಾಪಟ್ಲಾ ಮತ್ತು ವಿಶಾಖಪಟ್ಟಣಂ ನಡುವಿನ ಆಂಧ್ರಪ್ರದೇಶ ಕರಾವಳಿಗೆ ಈ ಚಂಡಮಾರುತ ಅಪ್ಪಳಿಸಿದೆ. ಈ ಚಂಡಮಾರುತ ಪ್ರತಿ ಗಂಟೆಗೆ 125-135 ಕಿಮೀ ತೀವ್ರತೆಯಲ್ಲಿ ಪ್ರಾರಂಭಗೊಂಡು, ಪ್ರತಿ ಗಂಟೆಗೆ 150 ಕಿಮೀ ವೇಗದಲ್ಲಿ ಬೀಸಲಿದೆ.

ಬುಧವಾರ (ಅಕ್ಟೋಬರ್ 28) ಮುಂಜಾನೆ ಸುಮಾರು 1.20ರ ಸುಮಾರಿಗೆ ಈ ಚಂಡಮಾರುತ ಆಂಧ್ರ‍ಪ್ರದೇಶ ಕರಾವಳಿಯನ್ನು ಪ್ರವೇಶಿಸಿದೆ.

ಚಂಡಮಾರುತದ ಪ್ರಭಾವದಿಂದಾಗಿ ಆಂಧ್ರ ಪ್ರದೇಶ, ಯನಂ ಮತ್ತು ಒಡಿಶಾದ ಕೆಲ ಭಾಗಗಳಲ್ಲಿ ಭಾರಿ ಮಳೆ ಹಾಗೂ ಪ್ರಬಲ ಗಾಳಿ ಬೀಸುವುದು ಮುಂದುವರಿಯಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಹೇಳಿದೆ.

ನರ್ಸಾಪುರದಿಂದ ಸುಮಾರು 20 ಕಿಮೀ, ದಕ್ಷಿಣ-ನೈರುತ್ಯ ಯನಂನಿಂದ ಸುಮಾರು 40 ಕಿಮೀ, ದಕ್ಷಿಣ-ನೈರುತ್ಯ ಕಾಕಿನಾಡದಿಂದ 60 ಕಿಮೀ ಹಾಗೂ ಪೂರ್ವ-ಈಶಾನ್ಯ ಮಚಲಿಪಟ್ಟಣಂನಿಂದ ಸುಮಾರು 90 ಕಿಮೀ ದೂರದಲ್ಲಿ ಈ ಚಂಡಮಾರುತ ಕೇಂದ್ರೀಕೃತಗೊಂಡಿದೆ.

1.80 ಲಕ್ಷ ಮಂದಿಯ ತೆರವು

‘ಅರ್ನಬ್’ ಚಂಡಮಾರುತದಿಂದಾಗಿ ಆಂಧ್ರಪ್ರದೇಶ ಮತ್ತು ಒಡಿಶಾದ ಹಲವು ಜಿಲ್ಲೆಗಳಲ್ಲಿ ಭಾರಿ ಮಳೆಯಾಗುತ್ತಿದ್ದು, ಅದರ ಆಗಮನಕ್ಕೂ ಮುನ್ನ ಸುಮಾರು 1.80 ಲಕ್ಷ ಮಂದಿಯನ್ನು ಸ್ಥಳಾಂತರಗೊಳಿಸಲಾಗಿದೆ.

ಅಂಧ್ರಪ್ರದೇಶದ ವಿಶಾಖಪಟ್ಟಣಂನಲ್ಲಿ ಬೆಳಗ್ಗೆ 8.30 ಗಂಟೆವರೆಗೆ 315 ಮಿಮೀ ಮಳೆಯಾಗಿದ್ದು, ವಿಜಯನಗರಂನಲ್ಲಿ 301 ಮಿಮೀ, ಅಂಕಪಲ್ಲಿಯಲ್ಲಿ 275 ಮಿಮೀ, ಶ್ರೀಕಾಕುಳಂನಲ್ಲಿ 257 ಮಿಮೀ ಹಾಗೂ ಕೃಷ್ಣದಲ್ಲಿ 223 ಮಿಮೀ ಮಳೆಯಾಗಿದೆ.

ಭಾರಿ ಮಳೆಯಿಂದಾಗಿ ಬುಧವಾರ ವಿವಿಧ ವಿಮಾನ ಯಾನ ಸಂಸ್ಥೆಗಳು ವಿಜಯವಾಡದಿಂದ ವಿಶಾಖಪಟ್ಟಣಂಗೆ ವಿಮಾನ ಸೇವೆಯನ್ನು ರದ್ದುಗೊಳಿಸಿವೆ.

ಒಡಿಶಾದ ಕೋರಾಪುಟ್ ನಲ್ಲಿ 188 ಮಿಮೀ, ಗಂಜಂನಲ್ಲಿ 161 ಮಿಮೀ ಹಾಗೂ ಗಜಪಾಲ್ ನಲ್ಲಿ 135 ಮಿಮೀ ಮಳೆಯಾಗಿದೆ.

ಆದರೆ, ಈವರೆಗೆ ಒಡಿಶಾದಲ್ಲಿ ಯಾವುದೇ ಸಾವು ನೋವು ವರದಿಯಾಗಿಲ್ಲ. ಹೀಗಿದ್ದೂ, ವಿದ್ಯುತ್ ಪೂರೈಕೆ ವ್ಯತ್ಯಯಗೊಂಡಿದ್ದು, ಮರಗಳು ನೆಲಕ್ಕುರುಳಿವೆ. ಭಾರೀ ಮಳೆಯಿಂದಾಗಿ ಕೆಲವು ಶಾಲೆಗಳಿಗೆ ರಜೆ ನೀಡಲಾಗಿದ್ದು, ಕೆಲ ರೈಲುಗಳ ಸೇವೆಯನ್ನು ರದ್ದುಗೊಳಿಸಲಾಗಿದೆ.