ಮುಂಬೈ ಪರ 4,000 ರನ್ ಗಳಿಸಿದ ಎರಡನೇ ಆಟಗಾರ ಸೂರ್ಯ ಕುಮಾರ್ ಯಾದವ್

ಮುಂಬೈ, ಮೇ 24: ರಾಜಸ್ಥಾನ ರಾಯಲ್ಸ್ ವಿರುದ್ಧ ರವಿವಾರ ನಡೆದ ಐಪಿಎಲ್ ಪಂದ್ಯದ ವೇಳೆ ಸೂರ್ಯಕುಮಾರ್‌ ಯಾದವ್ ಮುಂಬೈ ಇಂಡಿಯನ್ಸ್‌ನ ವಿಶೇಷ ಕ್ಲಬ್‌ಗೆ ಸೇರ್ಪಡೆಯಾದರು. ತನ್ನ ವೃತ್ತಿಜೀವನದ ಅತ್ಯಂತ ಕಠಿಣ ಐಪಿಎಲ್ ಋತುವಿನಲ್ಲಿ ಈ ಮೈಲಿಗಲ್ಲು ತಲುಪಿದ್ದಾರೆ.

ಮುಂಬೈ ಬ್ಯಾಟರ್ ಸೂರ್ಯಕುಮಾರ್, ಪ್ರಾಂಚೈಸಿಯ ಇತಿಹಾಸದಲ್ಲಿ ರೋಹಿತ್ ಶರ್ಮಾ ನಂತರ ಐಪಿಎಲ್ ಹಾಗೂ ಚಾಂಪಿಯನ್ಸ್ ಲೀಗ್ ಟಿ-20ಯಲ್ಲಿ 4,000ಕ್ಕೂ ಅಧಿಕ ರನ್ ಗಳಿಸಿದ್ದಾರೆ. ರೋಹಿತ್ 6,432 ರನ್ ಗಳಿಸಿ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ.

ಸೂರ್ಯಕುಮಾರ್ ರಾಜಸ್ಥಾನ ತಂಡದ ವಿರುದ್ಧ 42 ಎಸೆತಗಳಲ್ಲಿ 60 ರನ್ ಗಳಿಸಿದ್ದಾಗ ಈ ಸಾಧನೆ ಮಾಡಿದರು. ಈ ವರ್ಷ ಆಡಿರುವ 13 ಪಂದ್ಯಗಳಲ್ಲಿ ಸೂರ್ಯಕುಮಾರ್ 20.77ರ ಸರಾಸರಿಯಲ್ಲಿ ಕೇವಲ 270 ರನ್ ಗಳಿಸಿದ್ದಾರೆ. ಮುಂಬೈನ ಅತ್ಯಂತ ಪ್ರಮುಖ ಬ್ಯಾಟರ್ ನಿರೀಕ್ಷಿತ ಪ್ರದರ್ಶನ ನೀಡಿಲ್ಲ.

ಸೂರ್ಯಕುಮಾರ್‌ ಅವರ ಕಳಪೆ ಬ್ಯಾಟಿಂಗ್ ಮುಂಬೈ ಇಂಡಿಯನ್ಸ್‌ನ ಈ ವರ್ಷದ ನೀರಸ ಪ್ರದರ್ಶನಕ್ಕೆ ಪ್ರಮುಖ ಕಾರಣವಾಗಿದೆ. ಮುಂಬೈ ತಂಡವು ಪದೇ ಪದೇ ಬ್ಯಾಟಿಂಗ್ ಕುಸಿತ ಹಾಗೂ ಕಳಪೆ ಪವರ್‌ಪ್ಲೇ ಪ್ರದರ್ಶನದಿಂದ ಹೊರಬರುವಲ್ಲಿ ವಿಫವಾಗಿದೆ. ರಾಜಸ್ಥಾನ ವಿರುದ್ಧ ಸೋತ ನಂತರ ಮುಂಬೈ ತಂಡವು ಅಂಕಪಟ್ಟಿಯಲ್ಲಿ 9ನೇ ಸ್ಥಾನ ಪಡೆದು ತನ್ನ ಹೋರಾಟ ಮುಗಿಸಿದೆ.