ಪ್ರತೀ ಸಮಸ್ಯೆಗೂ ಶಾಶ್ವತ ಪರಿಹಾರ ಕಂಡುಕೊಳ್ಳುತ್ತಿದ್ದ ವ್ಯಕ್ತಿ ಮಧುಕರ್ ಶೆಟ್ಟಿ: ಹರ್ಷ ಗುಪ್ತಾ
ಮಧುಕರ್ ಶೆಟ್ಟಿ
ಬೆಂಗಳೂರು, ಡಿ.17: ಐಪಿಎಸ್ ಅಧಿಕಾರಿ ಮಧುಕರ್ ಶೆಟ್ಟಿ ಪ್ರತಿಯೊಂದು ಸಮಸ್ಯೆಗೂ ಶಾಶ್ವತ ಪರಿಹಾರ ಕಂಡುಕೊಳ್ಳುವ ಗುಣವಿದ್ದ ವ್ಯಕ್ತಿಯಾಗಿದ್ದರು ಎಂದು ಬೆಂಗಳೂರು ಪ್ರಾದೇಶಿಕ ಆಯುಕ್ತ ಹರ್ಷ ಗುಪ್ತ ಅಭಿಪ್ರಾಯಪಟ್ಟಿದ್ದಾರೆ.
ಮಂಗಳವಾರ ನಗರದ ರಾಜಕುಮಾರ್ ರಸ್ತೆಯಲ್ಲಿರುವ ಸುಗುಣಾ ಆಸ್ಪತ್ರೆಯಲ್ಲಿ ಆಯೋಜಿಸಿದ್ದ ಡಾ.ಮಧುಕರ್ ಶೆಟ್ಟಿ ಅವರ 48 ನೇ ಹುಟ್ಟಿದ ದಿನಾಚರಣೆ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.
ಇಂದಿನ ದಿನಗಳಲ್ಲಿ ಮಾಡಿದ ಕೆಲಸಕ್ಕೆ ಪ್ರಚಾರ ಪಡೆಯುವವರೇ ಅಧಿಕವಿದ್ದಾರೆ. ಆದರೆ, ಮಧುಕರ್ ಶೆಟ್ಟಿ ಎಂದೂ ಪ್ರಚಾರಕ್ಕೆ ಇಷ್ಟಪಟ್ಟವರಲ್ಲ. ಇಂದಿಗೂ ಗೂಗಲ್‌ನಲ್ಲಿ ನೋಡಿದರೆ ಅವರ ಅತಿಕಡಿಮೆ ಚಿತ್ರಗಳು ಸಿಗುತ್ತವೆ ಎಂದ ಅವರು, ಪ್ರಚಾರದ ಅಬ್ಬರವಿಲ್ಲದೆ, ಸಮಸ್ಯೆಗಳಿಗೆ ನೇರವಾಗಿ ಸ್ಪಂದಿಸುವ ಹಾಗೂ ಅದಕ್ಕೆ ಶಾಶ್ವತ ಪರಿಹಾರಗಳನ್ನು ಕಂಡುಕೊಳ್ಳಲು ಪ್ರಯತ್ನಿಸುತ್ತಿದ್ದರು ಎಂದರು.
ಐಪಿಎಸ್ ಅಧಿಕಾರಿಯಾಗಿದ್ದರೂ ಎಲ್ಲರನ್ನೂ ಅತ್ಯಂತ ಸ್ನೇಹಭಾವದಿಂದ ಕಾಣುತ್ತಿದ್ದರು. ಜನರ ಸಹಭಾಗಿತ್ವದಲ್ಲಿ ಕೆಲಸ ಮಾಡಬೇಕು ಎಂಬ ವಾತಾವರಣವನ್ನು ಸೃಷ್ಟಿಸುತ್ತಿದ್ದರು. ಸಣ್ಣ ವಿಷಯಕ್ಕೂ ದೊಡ್ಡದಾಗಿ ಯೋಚನೆ ಮಾಡುತ್ತಿದ್ದರು. ಅವರೊಂದಿಗೆ ಕೆಲಸ ಮಾಡಿದಷ್ಟು ದಿನಗಳಲ್ಲಿ ಸಾಕಷ್ಟು ಕೆಲಸ ಮಾಡಿದ್ದೇವೆ ಎಂದು ನುಡಿದರು.
ನಕ್ಸಲ್ ಸಮಸ್ಯೆಗೆ ಸಂಬಂಧ ಅವರು ಪರಿಹಾರ ಕಂಡುಕೊಳ್ಳಲು ಯತ್ನಿಸಿದ್ದರು. ಅವರ ವಿರುದ್ಧ ದಾಳಿ ಮಾಡಿದರೆ ಪ್ರತಿದಾಳಿ ಮಾಡುತ್ತಾರೆ. ಅದರ ಬದಲಿಗೆ, ಅವರ ಮನವೊಲಿಕೆಗೆ ಮುಂದಾಗಬೇಕು ಎನ್ನುತ್ತಿದ್ದರು. ಚಿಕ್ಕಮಗಳೂರಿನ ನಕ್ಸಲ್ ಪ್ರದೇಶದಲ್ಲಿ ಭಾಷಣವೊಂದರಲ್ಲಿ ‘ನಿಮಗೆ ದಾಳಿ ಮಾಡಬೇಕು ಎನ್ನಿಸಿದರೆ ನನ್ನ ಮೇಲೆ ಮಾಡಿ, ಪೊಲೀಸರ ಮೇಲೆ ಯಾಕೆ ದಾಳಿ ಮಾಡುತ್ತೀರಾ’ ಎಂದಿದ್ದರು. ಅಷ್ಟೊಂದು ಧೈರ್ಯಶಾಲಿ ವ್ಯಕ್ತಿತ್ವ ಅವರದ್ದಾಗಿತ್ತು ಎಂದು ಹರ್ಷ ಗುಪ್ತ ವಿವರಿಸಿದರು.
ಹೈಕೋರ್ಟ್‌ನ ನಿವೃತ್ತ ಸರಕಾರಿ ವಿಶೇಷ ಅಭಿಯೋಜಕ ಐ.ಎಸ್.ಪ್ರಮೋದ್ ಚಂದ್ರಾ ಮಾತನಾಡಿ, ಅತ್ಯಂತ ಸರಳ ಹಾಗೂ ಸಜ್ಜನ ವ್ಯಕ್ತಿಯಾಗಿದ್ದ ಮಧುಕರ್ ಶೆಟ್ಟಿ, ಕಿರಿಯ ಅಧಿಕಾರಿಗಳಿಂದ ಹಿಡಿದು ಹಿರಿಯ ಅಧಿಕಾರಿಗಳವರೆಗೆ, ಸಾರ್ವಜನಿಕರ ಜತೆಗೂ ಸೌಜನ್ಯದಿಂದ ಮಾತನಾಡುತ್ತಿದ್ದರು. ತುಂಬಾ ಸೂಕ್ಷ್ಮ ವ್ಯಕ್ತಿಯಾಗಿದ್ದ ಅವರು, ಸಣ್ಣ ವಿಷಯವನ್ನು ಸುದೀರ್ಘವಾಗಿ ಯೋಚಿಸುತ್ತಿದ್ದರು ಎಂದರು.
ಮಧುಕರ್ ಶೆಟ್ಟಿ ತನ್ನ ವೈಯಕ್ತಿಕ ವಿಷಯಗಳ ಬಗ್ಗೆ ಎಂದಿಗೂ ಚಿಂತಿಸಿರಲಿಲ್ಲ. ದೇಶ, ರಾಜ್ಯದ ಬಗ್ಗೆ, ಸಮಾಜದ ಬಗ್ಗೆ ಅಪಾರವಾದ ಕಳಕಳಿಯಿತ್ತು. ಲೋಕಾಯುಕ್ತಕ್ಕೆ ಎ.ಜೆ.ಸದಾಶಿವ ಹಾಗೂ ಸಂತೋಷ್ ಹೆಗ್ಡೆ ಹೇಗೆಯೋ, ಪೊಲೀಸ್ ಇಲಾಖೆಗೂ ಮಧುಕರ್ ಶೆಟ್ಟಿ ಸಿಂಹಸ್ವಪ್ನವಾಗಿದ್ದರು ಎಂದು ನುಡಿದರು.
ಮಧುಕರ್ ಶೆಟ್ಟಿ ಗೆಳೆಯ ತಾರಕರಾಮ್ ಮಾತನಾಡಿ, ಎಲ್ಲರೊಂದಿಗೂ ಹೊಂದಿಕೊಂಡು ಹೋಗುತ್ತಿದ್ದ ಅವರು, ಯಾರಿಗೂ ನೋವುಂಟು ಮಾಡಲು ಇಷ್ಟಪಡುತ್ತಿರಲಿಲ್ಲ. ಎಲ್ಲರೂ ಸಮಾನವಾಗಿ ಬದುಕಬೇಕು, ಸಮಾಜ ಹೇಗಿರಬೇಕು ಎಂದು ಯೋಚಿಸುತ್ತಿದ್ದರು. ಸಮಾಜದ ಪ್ರತಿಯೊಂದು ಸಂಗತಿಗಳನ್ನು ಕೂಲಂಕಷವಾಗಿ ಸಿದ್ಧಾಂತೀಕರಿಸುವ ಪ್ರವೃತ್ತಿ ಅವರಲ್ಲಿತ್ತು ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಸುಗುಣಾ ಆಸ್ಪತ್ರೆಯ ಎಂಡಿ ಡಾ.ಆರ್.ರವೀಂದ್ರ, ಭ್ರಷ್ಟಾಚಾರ ನಿಗ್ರಹ ದಳ(ಆಡಳಿತ)ದ ಎಸ್‌ಪಿ ಅಬ್ದುಲ್ ಅಹದ್, ಐಪಿಎಸ್ ಅಧಿಕಾರಿ ಎಸ್.ಗಿರೀಶ್, ಸುಗುಣಾ ಆಸ್ಪತ್ರೆಯ ಹೃದ್ರೋಗ ತಜ್ಞ ಡಾ.ದಿವಾಕರ್ ಕುಂದರ್ ಸೇರಿದಂತೆ ಹಲವರಿದ್ದರು.
ಮಧುಕರ್ ಶೆಟ್ಟಿ ಯಾವುದೇ ಧರ್ಮ, ಜಾತಿಗೆ ಸೇರದೇ ಜಾತ್ಯತೀತ ಮನೋಭಾವವುಳ್ಳ ವ್ಯಕ್ತಿಯಾಗಿದ್ದರು. ಅತ್ಯಂತ ಸರಳ ವ್ಯಕ್ತಿಯಾಗಿದ್ದ ಅವರು, ಪ್ರೀತಿಯಿಂದ ಎಲ್ಲರೊಂದಿಗೂ ಮಾತನಾಡುತ್ತಿದ್ದರು. ಇಲಾಖೆಯಲ್ಲಿ ಸಾಕಷ್ಟು ಒಳ್ಳೆಯ ಕೆಲಸ ಮಾಡಿದವರು ಇದ್ದಾರೆ. ಏನಾದರೂ ಸಹಾಯ ಮಾಡಬೇಕು ಎಂಬ ಮನೋಭಾವದ ವ್ಯಕ್ತಿತ್ವ ಅವರದ್ದಾಗಿತ್ತು. ಅವರ ನೆನಪಿನಲ್ಲಿ ವರ್ಷಪೂರ್ತಿ ವಿವಿಧ ಸ್ಲಂ, ನಿರಾಶ್ರಿತರಿರುವ ಕಡೆಗಳಲ್ಲಿ ಹೃದಯ ಚಿಕಿತ್ಸಾ ಕ್ಯಾಂಪ್‌ಗಳು ನಡೆಸಲು ಉದ್ದೇಶಿಸಿದ್ದೇವೆ.
-ಅಬ್ದುಲ್ ಅಹದ್, ಎಸ್‌ಪಿ(ಆಡಳಿತ) ಭ್ರಷ್ಟಾಚಾರ ನಿಗ್ರಹ ದಳ
ಇಂದಿನ ಸಮಾಜದಲ್ಲಿ ಭ್ರಷ್ಟಾಚಾರದ ವಿರುದ್ಧ ಕಾರ್ಯ ನಿರ್ವಹಿಸುವ ಅಧಿಕಾರಿಗಳನ್ನು ಭ್ರಷ್ಟರೇ ಕಾಲೆಳೆಯಲು ನೋಡುತ್ತಾರೆ. ಇಂತಹ ಸಂದರ್ಭದಲ್ಲಿ ಭ್ರಷ್ಟರ ವಿರುದ್ಧ ಕೆಲಸ ಮಾಡುವ ಪ್ರಾಮಾಣಿಕ ಅಧಿಕಾರಿಗಳನ್ನು ಪ್ರೋತ್ಸಾಹಿಸಬೇಕಿದೆ.
-ಗಿರೀಶ್, ಐಪಿಎಸ್ ಅಧಿಕಾರಿ
