ಪ್ರಥಮ ಪಿಯುಸಿ ಆನ್ಲೈನ್ ಫಲಿತಾಂಶ ಪ್ರಕಟ
ದ.ಕ.ಜಿಲ್ಲೆಯಲ್ಲಿ ಶೇ.90.5 ಸಾಧನೆ
ಮಂಗಳೂರು, ಮಾ.19: ಫೆಬ್ರವರಿಯಲ್ಲಿ ನಡೆದ ಪ್ರಥಮ ಪಿಯುಸಿ ಪರೀಕ್ಷೆಯ ಫಲಿತಾಂಶವು ಸೋಮವಾರ ಜಿಲ್ಲಾದ್ಯಂತ ಆನ್ಲೈನ್ನಲ್ಲಿ ಪ್ರಕಟಗೊಂಡಿದೆ. ಇದು ರಾಜ್ಯದಲ್ಲೇ ಪ್ರಥಮ ಎಂಬ ಇತಿಹಾಸ ಬರೆದಿದೆ. ಈವರೆಗೆ ರಾಜ್ಯದ ಯಾವ ಜಿಲ್ಲೆಯಲ್ಲೂ ಕೂಡ ಪ್ರಥಮ ಪಿಯುಸಿ ಪರೀಕ್ಷೆಯು ಆನ್ಲೈನ್ನಲ್ಲಿ ಪ್ರಕಟಗೊಂಡಿಲ್ಲ. ಮೊದಲು ಆನ್ಲೈನ್ನಲ್ಲಿ ಪ್ರಕಟಿಸಿದ ಹೆಗ್ಗಳಿಕೆ ದ.ಕ.ಜಿಲ್ಲೆಗೆ ಸಂದಿದೆ.
ಜಿಲ್ಲೆಯಲ್ಲಿ ಪರೀಕ್ಷೆ ಬರೆದ 38,306 ವಿದ್ಯಾರ್ಥಿಗಳ ಪೈಕಿ 34,496 ವಿದ್ಯಾರ್ಥಿಗಳು ಉತ್ತೀರ್ಣಗೊಂಡಿರುತ್ತಾರೆ. ಅದರಲ್ಲಿ 16,779 ಹುಡುಗರು ಹಾಗೂ 17717 ಹುಡುಗಿಯರು ಸೇರಿದ್ದಾರೆ, ಉತ್ತೀರ್ಣರಾದ ವಿದ್ಯಾರ್ಥಿಗಳ ಪೈಕಿ 6,009 ಮಂದಿ ವಿಶಿಷ್ಟ ಶ್ರೇಣಿ, 14,035 ಮಂದಿ ಪ್ರಥಮ ಶ್ರೇಣಿಯಲ್ಲಿ ತೇರ್ಗಡೆ ಹೊಂದಿರುತ್ತಾರೆ. ಈ ಪೈಕಿ ಜಿಲ್ಲೆಯು ಶೇ.90.5 ಫಲಿತಾಂಶ ಪಡೆಯಲು ಸಫಲವಾಗಿದೆ.
ಕಲಾ ವಿಭಾಗದಿಂದ 4,761 ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದು, ಅದರಲ್ಲಿ 3,929 ಮಂದಿ ಉತ್ತೀರ್ಣರಾಗಿ ಶೇ.82.52 ಫಲಿತಾಂಶ ದಾಖಲಿಸಿದರೆ, ವಾಣಿಜ್ಯ ವಿಭಾಗದ 16,104 ವಿದ್ಯಾರ್ಥಿಗಳಲ್ಲಿ 14,154 ವಿದ್ಯಾರ್ಥಿಗಳು ತೇರ್ಗಡೆ ಹೊಂದಿ ಶೇ.87.89 ಹಾಗೂ ವಿಜ್ಞಾನ ವಿಭಾಗದ 17,440 ವಿದ್ಯಾರ್ಥಿಗಳಲ್ಲಿ 16,413 ಮಂದಿ ಉತ್ತೀರ್ಣರಾಗಿ ಶೇ.94.11 ಫಲಿತಾಂಶ ಪಡೆದಿರುತ್ತಾರೆ. 30 ಪುನರಾವರ್ತಿತ ವಿದ್ಯಾರ್ಥಿಗಳಲ್ಲಿ 20 ಮಂದಿ ತೇರ್ಗಡೆ ಹೊಂದಿದ್ದಾರೆ.
ಜಿಲ್ಲೆಯಲ್ಲಿ ಕಲಾ ವಿಭಾಗದಿಂದ ವಿವೇಕಾನಂದ ಪಿಯು ಕಾಲೇಜಿನ ರುಚಿತಾ ಹೆಗ್ಡೆ (576 ಅಂಕ) ಪ್ರಥಮ. ಸಂತ ಆಗ್ನೆಸ್ ಕಾಲೇಜಿನ ಬಿಂದು (575) ದ್ವಿತೀಯ, ಬಂಟ್ವಾಳ ಎಸ್ವಿಎಸ್ ಪಿಯು ಕಾಲೇಜ್ನ ಲಿಖಿತಾ ಜಿ.ಎನ್(572 ಅಂಕ) ತೃತೀಯ ಸ್ಥಾನಿಯಾಗಿದ್ದಾರೆ.
ವಾಣಿಜ್ಯ ವಿಭಾಗದಲ್ಲಿ ಬಂಟ್ವಾಳ ಎಸ್ವಿಎಸ್ ಪಿಯು ಕಾಲೇಜ್ನ ಅಶ್ವಿನಿ ಬಿ. (599 ಅಂಕ) ಪ್ರಥಮ, ಶ್ರೀ ರಾಮಕುಂಜೇಶ್ವರ ಕಾಲೇಜಿನ ಶಾರಧಿ ಕೆ.ಎಸ್. (597ಅಂಕ) ದ್ವಿತೀಯ, ಹಿರಾ ಮಹಿಳಾ ಸಂಯುಕ್ತ ಪದವಿ ಪೂರ್ವ ಕಾಲೇಜ್ನ ಉಝ್ರಿ ಕೈರುನ್ನೀಸಾ (596) ತೃತೀಯ ಸ್ಥಾನಗಳಿಸಿದ್ದಾರೆ.
ವಿಜ್ಞಾನ ವಿಭಾಗದಲ್ಲಿ ಎಕ್ಸಲೆಂಟ್ ವಿಜ್ಞಾನ ಮತ್ತು ವಾಣಿಜ್ಯ ಪಿಯು ಕಾಲೇಜ್ನ ಕಾರ್ತಿಕ್ ವಿ.ಪೈ (596 ಅಂಕ), ಎಕ್ಸ್ ಪರ್ಟ್ ಕಾಲೇಜಿನ ಅಥರ್ವ ಎನ್. ಪಿಳ್ಳೆ (596) ಅಂಕಗಳೊಂದಿಗೆ ಪ್ರಥಮ, ಆಳ್ವಾಸ್ ಕಾಲೇಜಿನ ಎಸ್. ದರ್ಶನ್ ಸಮರ್ಥ್ (595 ಅಂಕ) ಹಾಗೂ ಕೆನರಾ ಕಾಲೇಜಿನ ಸ್ಮೃತಿ ತಿಲಾಕ್ (595 ಅಂಕ) ದ್ವಿತೀಯ, ಎಕ್ಸ್ ಪರ್ಟ್ ಪದವಿ ಪೂರ್ವ ಕಾಲೇಜಿನ ಮೋಕ್ಷಿತ್ ಹೆಗ್ಡೆ (594 ಅಂಕ ) ತೃತೀಯ ಸ್ಥಾನ ಗಳಿಸಿದ್ದಾರೆ.