ಅಮ್ಮಚ್ಚಿಯ ನೆನಪಿನಲ್ಲಿ ರಾಜ್ ಶೆಟ್ಟಿ
ತನ್ನ ಚೊಚ್ಚಲ ಚಿತ್ರ ‘ಒಂದು ಮೊಟ್ಟೆಯ ಕಥೆ’ಯ ಮೂಲಕ ಪ್ರೇಕ್ಷಕರ ಮನಗೆದ್ದಿರುವ ರಾಜ್ ಬಿ.ಶೆಟ್ಟಿಗೆ ಈಗ ಸ್ಯಾಂಡಲ್ವುಡ್ನಲ್ಲಿ ಎಲ್ಲಿಲ್ಲದ ಬೇಡಿಕೆ. ಮೊದಲ ಚಿತ್ರದಲ್ಲೇ ನಿರ್ದೇಶಕನಾಗಿ ನಟನಾಗಿ ಮಿಂಚಿರುವ ರಾಜ್ ಶೆಟ್ಟಿಗೆ ಕನ್ನಡದ ಹಲವಾರು ಪ್ರತಿಷ್ಠಿತ ಬ್ಯಾನರ್ಗಳಿಂದ ಆಹ್ವಾನಗಳು ಬರತೊಡಗಿವೆ.
ಈ ಮಧ್ಯೆ ರಾಜ್ಶೆಟ್ಟಿ ಸದ್ದಿಲ್ಲದೆಯೇ ತನ್ನ ಎರಡನೆ ಚಿತ್ರದ ಕೆಲಸವನ್ನು ಪೂರ್ಣಗೊಳಿಸಿದ್ದಾರೆ. ‘ಅಮ್ಮಚ್ಚಿ ಎಂಬ ನೆನಪು’ ಎಂದು ಹೆಸರಿಡಲಾದ ಈ ಚಿತ್ರವನ್ನು ರಾಜ್ಶೆಟ್ಟಿ ನಿರ್ದೇಶಿಸಿಲ್ಲ ವಾದರೂ, ಅದರಲ್ಲಿ ನಾಯಕನಾಗಿ ನಟಿಸಿದ್ದಾರೆ. ‘ಅಕ್ಕು’, ‘ಅನಭಿಜ್ಞ ಶಾಕುಂತಲ’, ‘ಗಾಂಧಿ ಬಂದ’ ಅಂತಹ ಮನೋಜ್ಞ ನಾಟಕಗಳ ನಿರ್ದೇಶಕಿ, ನಟಿ ಚಂಪಾ ಶೆಟ್ಟಿ ಈ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಅಂದಹಾಗೆ ‘ಅಮ್ಮಚ್ಚಿ ಎಂಬ ನೆನಪು’ ಮಹಿಳಾ ಪ್ರಧಾನ ಕಥೆಯನ್ನು ಹೊಂದಿದೆಯೆಂಬ ಮಾತುಗಳೂ ಕೇಳಿಬರುತ್ತಿವೆ.
70ರ ದಶಕದ ಹಿನ್ನೆಲೆಯಲ್ಲಿ ನಡೆಯುವ ಕಥಾವಸ್ತುವನ್ನು ಒಳ ಗೊಂಡ ಈ ಚಿತ್ರದಲ್ಲಿ ರಾಜ್ಶೆಟ್ಟಿ, ಓರ್ವ ಸಂಪ್ರದಾಯಸ್ಥ ಬ್ರಾಹ್ಮಣ ಯುವಕನ ಪಾತ್ರದಲ್ಲಿ ನಟಿಸಿದ್ದಾರೆ. ಕಳೆದ ವರ್ಷ ‘ಒಂದು ಮೊಟ್ಟೆಯ ಕತೆ’ಯ ಮೂಲಕ ಪ್ರೇಕ್ಷಕರ ಮನಸೂರೆಗೊಂಡ ರಾಜ್ ಶೆಟ್ಟಿ, ಈ ವರ್ಷ ‘ಅಮ್ಮಚ್ಚಿ ಎಂಬ ನೆನಪು’ ಚಿತ್ರದಲ್ಲಿ ಯಾವ ಮೋಡಿ ಮಾಡಲಿದ್ದಾರೆಂಬ ಕುತೂಹಲ ಕನ್ನಡಚಿತ್ರ ಪ್ರೇಮಿಗಳನ್ನು ಕಾಡುತ್ತಿದೆ.