2ನೇ ಟ್ವೆಂಟಿ-20 ಪಂದ್ಯ : ಆಫ್ರಿಕಾ ತಂಡಕ್ಕೆ 189 ರನ್ ಸವಾಲು
ಪಾಂಡೆ, ಧೋನಿ ಅರ್ಧಶತಕ
ಸೆಂಚೂರಿಯನ್, ಫೆ.21: ದಕ್ಷಿಣ ಆಫ್ರಿಕ ವಿರುದ್ಧದ ಎರಡನೇ ಟ್ವೆಂಟಿ-20 ಕ್ರಿಕೆಟ್ ಪಂದ್ಯದಲ್ಲಿ ಭಾರತ ಮನೀಷ್ ಪಾಂಡೆ ಮತ್ತು ಮಹೇಂದ್ರ ಸಿಂಗ್ ಧೋನಿ ಅವರ ಅರ್ಧಶತಕಗಳ ನೆರವಿನಲ್ಲಿ 20 ಓವರ್ಗಳಲ್ಲಿ 4ವಿಕೆಟ್ ನಷ್ಟದಲ್ಲಿ 188 ರನ್ ಗಳಿಸಿದೆ.
ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ಭಾರತ ಅಲ್ಪ ಮೊತ್ತಕ್ಕೆ ಅಗ್ರ ಸರದಿಯ ವಿಕೆಟ್ಗಳನ್ನು ಕಳೆದುಕೊಂಡರೂ ಐದನೇ ವಿಕೆಟ್ಗೆ ಪಾಂಡೆ ಮತ್ತು ಧೋನಿ ಮುರಿಯದ ಜೊತೆಯಾಟದಲ್ಲಿ 98 ರನ್ ಜಮೆ ಮಾಡಿ ದಕ್ಷಿಣ ಆಫ್ರಿಕ ತಂಡಕ್ಕೆ ಕಠಿಣ ಸವಾಲು ವಿಧಿಸಲು ನೆರವಾದರು.
ಪಾಂಡೆ ಔಟಾಗದೆ 79 ರನ್ (48ಎ, 6ಬೌ,3ಸಿ) ಮತ್ತು ಧೋನಿ ಔಟಾಗದೆ 52 ರನ್ (28ಎ, 4ಬೌ,3ಸಿ) ಗಳಿಸಿದರು. ಶಿಖರ್ ಧವನ್ ಜೊತೆ ಭಾರತದ ಇನಿಂಗ್ಸ್ ಆರಂಭಿಸಿದ ರೋಹಿತ್ ಶರ್ಮಾ ಖಾತೆ ತೆರೆಯದೆ ನಿರ್ಗಮಿಸಿದ್ದಾರೆ. ರೋಹಿತ್ ಶರ್ಮಾ ಅವರನ್ನು ಎರಡನೇ ಓವರ್ನ ಮೊದಲ ಎಸೆತದಲ್ಲಿ ಜೂನಿಯರ್ ಡಾಲಾ ಅವರು ಎಲ್ಬಿಡಬ್ಲು ಬಲೆಗೆ ಬೀಳಿಸಿದರು. ರೋಹಿತ್ ಶರ್ಮಾ ಅವರು ತಾನೆದುರಿಸಿದ ಮೊದಲ ಎಸೆತದಲ್ಲಿ ಖಾತೆ ತೆರೆಯದೆ ಡಾಲಾಗೆ ವಿಕೆಟ್ ಒಪ್ಪಿಸಿದರು. ಕ್ರಿಸ್ ಮೊರಿಸ್ ಅವರ ಮೊದಲ ಓವರ್ನಲ್ಲಿ ಶಿಖರ್ ಧವನ್ ರನ್ ಗಳಿಸುವ ಪ್ರಯತ್ನ ನಡೆಸಲಿಲ್ಲ. ಇದರಿಂದಾಗಿ ಮೊದಲ ಓವರ್ ಮೇಡನ್ ಆಗಿತ್ತು. ಎರಡನೇ ಓವರ್ನ ಮೊದಲ ಎಸೆತದಲ್ಲಿ ಭಾರತ ಮೊದಲ ವಿಕೆಟ್ ಕಳೆದುಕೊಂಡಿತು. ಬಳಿಕ ಧವನ್ಗೆ ಸುರೇಶ್ ರೈನಾ ಜೊತೆಯಾದರು. ಇವರು ಎರಡನೇ ವಿಕೆಟ್ಗೆ 44 ರನ್ಗಳ ಜೊತೆಯಾಟ ನೀಡಿದರು.
4.2ನೇ ಓವರ್ನಲ್ಲಿ ಶಿಖರ್ ಧವನ್ (24) ಅವರು ಡುಮಿನಿಗೆ ವಿಕೆಟ್ ಒಪ್ಪಿಸಿದರು. ನಾಯಕ ವಿರಾಟ್ ಕೊಹ್ಲಿ 1 ರನ್ ಗಳಿಸಿ ಡಾಲಾ ಎಸೆತದಲ್ಲಿ ಕ್ಲಾಸೆನ್ಗೆ ಕ್ಯಾಚ್ ನೀಡಿದರು. ಬಳಿಕ ನಾಲ್ಕನೇ ವಿಕೆಟ್ಗೆ ರೈನಾ ಮತ್ತು ಮನೀಷ್ ಪಾಂಡೆ ಜೊತೆಯಾದರು. ಇವರು ಜೊತೆಯಾಗಿ 45 ರನ್ ಸೇರಿಸಿದರು. 31 ರನ್ ಗಳಿಸಿದ ರೈನಾರನ್ನು ಫೆಹ್ಲುಕ್ವಾಯೊ ಎಲ್ಬಿಡಬ್ಲು ಬಲೆಗೆ ಕೆಡವಿದರು.
ಭಾರತಕ್ಕೆ ಮೂರು ಪಂದ್ಯಗಳ ಸರಣಿಯಲ್ಲಿ 2-0 ಮುನ್ನಡೆಯೊಂದಿಗೆ ಸರಣಿ ಗೆಲುವು ದಾಖಲಿಸಲು ಈ ಪಂದ್ಯದಲ್ಲಿ ಗೆಲ್ಲಬೇಕಾಗಿದೆ.ಆದರೆ ದಕ್ಷಿಣ ಆಫ್ರಿಕ ತಂಡಕ್ಕೆ ಈ ಪಂದ್ಯದಲ್ಲಿ ಜಯ ಗಳಿಸಿದರೆ ಸರಣಿ ಗೆಲುವಿನ ಅವಕಾಶವನ್ನು ಜೀವಂತವಾಗಿರಿಸಲು ಸಾಧ್ಯ.