ನ್ಯೂಝಿಲ್ಯಾಂಡ್ನ ಆಲ್ರೌಂಡರ್ ಆ್ಯಂಡರ್ಸನ್ ಅಂತರ್ ರಾಷ್ಟ್ರೀಯ ಕ್ರಿಕೆಟ್ನಿಂದ ನಿವೃತ್ತಿ
ಕ್ರೈಸ್ಟ್ಚರ್ಚ್: ನ್ಯೂಝಿಲ್ಯಾಂಡ್ನ ಆಲ್ರೌಂಡರ್ ಕೋರೆ ಆ್ಯಂಡರ್ಸನ್ ಅಂತರ್ರಾಷ್ಟ್ರೀಯ ಕ್ರಿಕೆಟ್ ವೃತ್ತಿಗೆ ವಿದಾಯ ಘೋಷಿಸಿದ್ದಾರೆ.
ಅಂತರ್ರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಹೇಳಿದ್ದರೂ, ಅಮೆರಿಕ ಮೇಜರ್ ಲೀಗ್ ಕ್ರಿಕೆಟ್ (ಎಂಎಲ್ಸಿ) ನೊಂದಿಗೆ ಮೂರು ವರ್ಷಗಳ ಕಾಲ ಆಡುವ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ.
ನ್ಯೂಝಿಲ್ಯಾಂಡ್ ಪರ 13 ಟೆಸ್ಟ್, 49 ಏಕದಿನ ಮತ್ತು 31 ಟ್ವೆಂಟಿ-20 ಪಂದ್ಯಗಳನ್ನು ಆಡಿರುವ 29ರ ಹರೆಯದ ಆ್ಯಂಡರ್ಸನ್ ಕಳೆದ ಎರಡು ವರ್ಷಗಳಿಂದ ನ್ಯೂಝಿಲ್ಯಾಂಡ್ ತಂಡದ ಪರ ಯಾವುದೇ ಮಾದರಿಯ ಕ್ರಿಕೆಟ್ನಲ್ಲೂ ಆಡಿರಲಿಲ್ಲ. 93 ಅಂತರ್ರಾಷ್ಟ್ರೀಯ ಪಂದ್ಯಗಳಲ್ಲಿ, ಅವರು ಎರಡು ಶತಕ ಮತ್ತು 10 ಅರ್ಧಶತಕಗಳೊಂದಿಗೆ 2,277 ರನ್ ಗಳಿಸಿದ್ದಾರೆ. 90 ವಿಕೆಟ್ಗಳನ್ನು ಪಡೆದಿದ್ದಾರೆ.
‘‘ನನಗೆ ನ್ಯೂಝಿಲ್ಯಾಂಡ್ ತಂಡವನ್ನು ಪ್ರತಿನಿಧಿಸಲು ತುಂಬಾ ಹೆಮ್ಮೆಯಾಗಿತ್ತು. ಇದು ಒಂದು ದೊಡ್ಡ ಗೌರವವಾಗಿದೆ’’ ಎಂದು ಆ್ಯಂಡರ್ಸನ್ ಹೇಳಿದ್ದಾರೆ. 2014ರಲ್ಲಿ ಹೊಸ ವರ್ಷದ ದಿನದಂದು ವೆಸ್ಟ್ ಇಂಡೀಸ್ ವಿರುದ್ಧ ಏಕದಿನ ಪಂದ್ಯದಲ್ಲಿ ಆ್ಯಂಡರ್ಸನ್ 36 ಎಸೆತಗಳಲ್ಲಿ ಶತಕ ದಾಖಲಿಸಿದ್ದರು. ಎಬಿ ಡಿವಿಲಿಯರ್ಸ್ ಬಳಿಕ 31 ಎಸೆತಗಳಲ್ಲಿ ಶತಕ ದಾಖಲಿಸುವ ಮೂಲಕ ಈ ದಾಖಲೆಯನ್ನು ಮುರಿದಿದ್ದರು. ತಮ್ಮ ದೇಶಕ್ಕಾಗಿ ಹೆಚ್ಚು ಅಂತರ್ರಾಷ್ಟ್ರೀಯ ಪಂದ್ಯಗಳನ್ನು ಆಡಲು ಸಾಧ್ಯವಾಗದಿರುವುದಕ್ಕೆ ಆ್ಯಂಡರ್ಸನ್ ವಿಷಾದ ವ್ಯಕ್ತಪಡಿಸಿದರು.
ಆ್ಯಂಡರ್ಸನ್ ಐಪಿಎಲ್ನಲ್ಲಿ ದಿಲ್ಲಿ ಡೇರ್ಡೆವಿಲ್ಸ್, ಮುಂಬೈ ಇಂಡಿಯನ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಆಡಿದ್ದರು.2015ರ ವಿಶ್ವಕಪ್ನಲ್ಲಿ ಎರಡನೇ ಸ್ಥಾನ ಪಡೆದ ನ್ಯೂಝಿಲ್ಯಾಂಡ್ ತಂಡದಲ್ಲಿದ್ದರು. ಆದಾಗ್ಯೂ ಆ್ಯಂಡರ್ಸ್ನ ಕ್ರಿಕೆಟ್ ಬದುಕಿನಲ್ಲಿ ಹಲವು ಬಾರಿ ಗಾಯದ ಸಮಸ್ಯೆ ಎದುರಿಸಿದ್ದರು. 2018ರ ನವೆಂಬರ್ನಲ್ಲಿ ನ್ಯೂಝಿಲ್ಯಾಂಡ್ ಪರ ಕೊನೆಯ ಬಾರಿ ಟ್ವೆಂಟಿ-20 ಪಂದ್ಯವನ್ನು ಆಡಿದ್ದರು.
‘‘ಇದು ಸುಲಭದ ನಿರ್ಧಾರವಲ್ಲ. ನಾನು ಯೋಚಿಸಿಯೇ ನಿವೃತ್ತಿಯ ನಿರ್ಧಾರ ಕೈಗೊಂಡಿದ್ದೇನೆ. ನಾನು ಈಗ ಏನು ಮಾಡಲು ಬಯಸುತ್ತೇನೆ ಅಥವಾ ಮುಂದಿನ ಎರಡು ವರ್ಷಗಳಲ್ಲಿ, ಐದು ವರ್ಷಗಳಲ್ಲಿ, 10 ವರ್ಷಗಳಲ್ಲಿ ನಾನು ಏನು ಸಾಧಿಸಲು ಬಯಸುವೆನು? ಎಂಬ ವಿಚಾರದಲ್ಲಿ ಚಿಂತಿಸಿ ನಿರ್ಧಾರ ಕೈಗೊಂಡಿರುವೆನು’’ ಅವರು ಹೇಳಿದರು.
‘‘ಎಲ್ಲರೂ ವಯಸ್ಸಾದಂತೆ ಜೀವನದ ಬಗ್ಗೆ ಸ್ವಲ್ಪ ಹೆಚ್ಚು ವಿಶಾಲವಾಗಿ ಯೋಚಿಸುತ್ತಿದ್ದಾರೆ. ಅಮೆರಿಕದಲ್ಲಿ ಹುಟ್ಟಿ ಬೆಳೆದ ಪತ್ನಿ ಮೇರಿ ಮಾರ್ಗರೇಟ್ ತಮಗಾಗಿ ತುಂಬಾ ತ್ಯಾಗ ಮಾಡಿದ್ದಾರೆ. ಆಕೆಯೊಂದಿಗೆ ಮುಂದೆ ಅಮೆರಿಕದಲ್ಲಿ ನೆಲೆಸುವುದಾಗಿ ಆ್ಯಂಡರ್ಸನ್ ಹೇಳಿದ್ದಾರೆ. ಅವರು ಕಳೆದ ಆಗಸ್ಟ್ನಲ್ಲಿ ಕೆರಿಬಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಬಾರ್ಬಡಾಸ್ ತಂಡದ ಪರ ಕಾಣಿಸಿಕೊಂಡಿದ್ದರು.