ರಾಹುಲ್ ಗಾಂಧಿಗೆ ದೇಶ ಮುನ್ನಡೆಸುವ ಸ್ಥಿರತೆ ಇದ್ದಂತಿಲ್ಲ : ಶರದ್ ಪವಾರ್
ಪುಣೆ : ರಾಹುಲ್ ಗಾಂಧಿಯವರಿಗೆ, ದೇಶ ಅವರನ್ನು ನಾಯಕ ಎಂದು ಒಪ್ಪಿಕೊಳ್ಳಲು ಬೇಕಾದ ಸ್ಥಿರತೆ ಇದ್ದಂತಿಲ್ಲ ಎಂದು ಕಾಂಗ್ರೆಸ್ ಮಿತ್ರ ಪಕ್ಷವಾದ ನ್ಯಾಷನಲಿಸ್ಟ್ ಕಾಂಗ್ರೆಸ್ ಪಾರ್ಟಿ (ಎನ್ಸಿಪಿ) ಮುಖ್ಯಸ್ಥ ಶರದ್ ಪವಾರ್ ಹೇಳಿದ್ದಾರೆ.
ಮರಾಠಿ ಪತ್ರಿಕೆ ಲೋಕಮಾತ ಆಯೋಜಿಸಿದ್ದ ಸಮಾರಂಭವೊಂದರಲ್ಲಿ ಮಾತನಾಡಿದ ಅವರು, "ಈ ಬಗ್ಗೆ ಯಾವ ಪ್ರಶ್ನೆಯೂ ಇಲ್ಲ. ಅವರಿಗೆ ಸ್ಥಿರತೆ ಕಡಿಮೆ ಇದ್ದಂತಿದೆ" ಎಂದು ಅಭಿಪ್ರಾಯಪಟ್ಟರು. ಆದರೆ ರಾಹುಲ್ ಬಗ್ಗೆ ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ವ್ಯಕ್ತಪಡಿಸಿದ ಅಭಿಪ್ರಾಯಕ್ಕೆ ತಮ್ಮ ಸಹಮತ ಇಲ್ಲ ಎಂದು ಹೇಳಿದ್ದಾರೆ.
"ಒಬಾಮಾ ತಮ್ಮ ಕೃತಿಯಲ್ಲಿ ಕಾಂಗ್ರೆಸ್ ನಾಯಕ "ನರ್ವಸ್, ಅಪಕ್ವ ಗುಣ"ಗಳನ್ನು ಹೊಂದಿದ್ದಾರೆ ಎಂದು ಬಣ್ಣಿಸಿದ್ದರು. ಜತೆಗೆ ಶಿಕ್ಷಕರ ಮೇಲೆ ಪ್ರಭಾವ ಬೀರಲು ಯತ್ನಿಸುವ ವಿದ್ಯಾರ್ಥಿಯಂತಿದ್ದು, ಯಾವುದೇ ವಿಷಯದಲ್ಲಿ ಆಳವಾದ ಜ್ಞಾನ ಪಡೆಯುವ ಪ್ರವೃತ್ತಿ ಅಥವಾ ಒಲವು ಇಲ್ಲ ಎಂದು ಹೇಳಿದ್ದರು.
ಈ ಬಗ್ಗೆ ಕೇಳಿದಾಗ, "ಪ್ರತಿಯೊಬ್ಬರ ಅಭಿಪ್ರಾಯವನ್ನು ಒಪ್ಪಿಕೊಳ್ಳಬೇಕಾದ ಅಗತ್ಯವಿಲ್ಲ" ಎಂದು ಪ್ರತಿಕ್ರಿಯಿಸಿದರು.