--

ಇಂದು ಮಧುಮೇಹ ದಿನ

‘ಮಧುಮೇಹ’ ಮನುಕುಲದ ಅಗೋಚರ ಶತ್ರು

ನನ್ನ ‘ಮಧುಮೇಹ-ಮನುಕುಲದ ಅಗೋಚರ ಶತ್ರು’ ಕೃತಿ ಆರನೇ ಮುದ್ರಣವನ್ನು ಕಾಣುತ್ತಿದೆ. ಇದರಲ್ಲಿ ವಿಸ್ತೃತ ಹೊಸ ಅಧ್ಯಾಯಗಳನ್ನು ಸೇರಿಸಲಾಗಿದೆ. ಮಧುಮೇಹದಲ್ಲಿ ಮೂರು ವಿಧಗಳುಂಟು ಎಂಬುದನ್ನು ತೋರಿಸಲಾಗುತ್ತಿತ್ತು. ಆದರೆ ಈಗ ಆಹಾರ ಪದ್ಧತಿಗಳು ಬದಲಾಗುತ್ತಿರುವುದರಿಂದಲೂ ಮತ್ತು ಮಾರುಕಟ್ಟೆಯಲ್ಲಿ ದೊರೆಯುವ ಆಹಾರ ಪದಾರ್ಥಗಳಲ್ಲಿ ರಾಸಾಯನಿಕ ವಸ್ತುಗಳು ಸೇರ್ಪಡೆಯಾಗುತ್ತಿರುವುದರಿಂದಲೂ ಕೆಮಿಕಲ್ ಡಯಾಬಿಟಿಸ್ ಎಂಬ ಹೊಸ ವಿಧವಾದ ಮಧುಮೇಹ ಬಂದಿದೆ. ಜೊತೆಗೆ ಹದಿಹರೆಯದವರಲ್ಲಿ ಕಾಣಿಸಿಕೊಳ್ಳುವ (LADA type Diabetes) ಎಂಬುದನ್ನು ಕಂಡುಹಿಡಿಯಲಾಗಿದೆ. ಜೊತೆಗೆ (MODY) ಎಂಬ ಹೆಸರಿನ ಮಧುಮೇಹವನ್ನೂ ಸೇರಿಸಲಾಗಿದೆ.

ಭಾರತದಲ್ಲಿ ಮಧುಮೇಹಿಗಳ ಸಂಖ್ಯೆ ಈಗ 77.9 ಮಿಲಿಯನ್. ಉಪವಾಸದ ವೇಳೆಯಲ್ಲೂ ಕುಗ್ಗದ ಗ್ಲೂಕೋಸ್ (IFG--&Impaired Fasting Glucose) ಹಂತದಲ್ಲಿರುವವರ ಸಂಖ್ಯೆ 24 ಮಿಲಿಯನ್. ಕ್ರಿ.ಶ. 2045ರ ವೇಳೆಗೆ ಈ ಹಂತಕ್ಕೆ ಬರುವವರ ಸಂಖ್ಯೆ 41 ಮಿಲಿಯನ್‌ಗೆ ಏರುವುದೆಂದು ಅಂದಾಜು ಮಾಡಲಾಗಿದೆ. ಅಂದರೆ ಇವರೆಲ್ಲರೂ ಒಂದಲ್ಲ ಒಂದು ದಿನ ಮಧುಮೇಹಿಗಳಾಗಿ ಪರಿವರ್ತನೆಯಾಗುತ್ತಾರೆ ಎಂದರ್ಥ!

ಭಾರತದಲ್ಲಿ ಮಧುಮೇಹದಿಂದ 60 ವರ್ಷಗಳೊಳಗಿನವರು ಪ್ರತಿಶತ 40ರಿಂದ 60ರಷ್ಟು ಜನ ಅಸುನೀಗುತ್ತಿದ್ದಾರೆ. ಜಾಗತಿಕವಾಗಿ 2019ರ ಅಂಕಿಅಂಶಗಳ ಪ್ರಕಾರ ಈಗ 463 ಮಿಲಿಯನ್ ಮಧುಮೇಹಿಗಳಿದ್ದಾರೆ ಮತ್ತು 2040ರ ವೇಳೆಗೆ 642 ಮಿಲಿಯನ್ ಆಗುವ ಸಂಭವವಿದೆ. ಪ್ರತಿ 11 ಯುವಕರಲ್ಲಿ ಒಬ್ಬರಿಗೆ ಮಧುಮೇಹವಿರುವುದು ಪತ್ತೆಯಾಗಿದೆ. ಇದು 2040ರ ವೇಳೆಗೆ ಪ್ರತಿ 10 ಯುವಕರಲ್ಲಿ ಒಬ್ಬರಿಗೆ ಮಧುಮೇಹ ಬರುವ ಸಂಭವವಿದೆ. ಏಳು ಮಂದಿ ಗರ್ಭಿಣಿಯರಲ್ಲಿ ಒಬ್ಬರು ಗರ್ಭಾವಸ್ಥೆಯ ಮಧುಮೇಹಿ (GDM) ಆಗಿರುವುದು ಗೊತ್ತಾಗಿದೆ. ಮಧುಮೇಹವು ದೇಹದ ಯಾವ ಅಂಗದ ಮೇಲೂ ದಯೆದಾಕ್ಷಿಣ್ಯ ತೋರುವುದಿಲ್ಲ. ಮಧುಮೇಹಿಗಳು ಮೂರು ಪಟ್ಟು ಅತಿ ರಕ್ತದೊತ್ತಡ, ನಾಲ್ಕು ಪಟ್ಟು ಹೃದ್ರೋಗಗಳು ಮತ್ತು ನಾಲ್ಕು ಪಟ್ಟು ಪಾರ್ಶ್ಚವಾಯುವಿಗೆ ಬಲಿಯಾಗುತ್ತಾರೆ. ಮಧುಮೇಹವು ಭಾರತೀಯರ ಮೂತ್ರಪಿಂಡಗಳ ಮೇಲೆ ಕೆಟ್ಟ ಪರಿಣಾಮಗಳನ್ನುಂಟು ಮಾಡುವುದು ಬಿಳಿಯರಿಗಿಂತಲೂ 10ರಿಂದ 40ರಷ್ಟು ಹೆಚ್ಚು.

ಹಿಂದಿನ ಕಾಲದಂತೆ ಮಧುಮೇಹ ಕೇವಲ ಶ್ರೀಮಂತರಿಗೆ ಮತ್ತು ವಯೋವೃದ್ಧರಲ್ಲಿ ಅಲ್ಲದೆ, ಬಡವರು ಮತ್ತು ಚಿಕ್ಕ ಮಕ್ಕಳಲ್ಲೂ ಕಾಣಿಸಿಕೊಳ್ಳುತ್ತಿದೆ. ಮಧುಮೇಹ ಬ್ರಿಟನ್ ದೇಶದಲ್ಲಿರುವ ಬಿಳಿಯರಿಗಿಂತಲೂ ಅದೇ ದೇಶದಲ್ಲಿರುವ ಭಾರತೀಯ ಮಕ್ಕಳಲ್ಲಿ ಶೇ. 11ರಷ್ಟು ಹೆಚ್ಚು ಎಂಬುದು ಗೊತ್ತಾಗಿದೆ. ಸೂಕ್ಷ್ಮ ವಿಚಾರ ಏನೆಂದರೆ ಮಧುಮೇಹಿ ಪುರುಷರಲ್ಲಿ ಲೈಂಗಿಕ ಸಮಸ್ಯೆಗಳು ಇತರರಿಗಿಂತಲೂ ಹತ್ತು ವರ್ಷ ಮುಂಚಿತವಾಗಿ ಪ್ರಾರಂಭವಾಗುತ್ತವೆ. ನಿಮಗೆ ಇಷ್ಟವಿಲ್ಲದಿದ್ದರೂ ಈ ದಿನ ಮಧುಮೇಹ ನಿಮ್ಮ ಮನೆ ಬಾಗಿಲಿಗೆ ಬರುತ್ತಿರುವುದರಿಂದ ಇದು ಮನೆಮಾತಾಗಿದೆ. ಮಧುಮೇಹದಿಂದ ನಿಸ್ಸಂದೇಹವಾಗಿ ಭಾರತಕ್ಕೆ ದೊಡ್ಡ ಆರ್ಥಿಕ ಹೊರೆ ಬೀಳುತ್ತದೆ. ಇದನ್ನು ತಡೆಯದಿದ್ದರೆ ಇದು ಮಾನವನು ತನಗೆ ತಾನೇ ಸೃಷ್ಟಿಸಿಕೊಂಡ ಅತಿ ದೊಡ್ಡ ಗಂಡಾಂತರವಾಗುತ್ತದೆ. ಇದಕ್ಕೆ ಕಾರಣ ನಾವೇ! ನಮ್ಮ ಸ್ವಯಂಕೃತ ಅಪರಾಧದಿಂದ ನಾವು ಮಧುಮೇಹಿಗಳಾಗುತ್ತಿದ್ದೇವೆ. ಏಕೆಂದರೆ ನಾವು ಮಧುಮೇಹವನ್ನು ತರಬಲ್ಲ ನಮ್ಮ ವಂಶವಾಹಿಗಳನ್ನು ಬಡಿದೆಬ್ಬಿಸುತ್ತಿದ್ದೇವೆ. ಈಗ ನಾವು ನಮ್ಮ ಜೀವನ ಶೈಲಿಯನ್ನು ಆರೋಗ್ಯದ ದಿಕ್ಕಿನಿಂದ ಅನಾರೋಗ್ಯದ ದಿಕ್ಕಿಗೆ ಬದಲಾಯಿಸಿಕೊಳ್ಳುತ್ತಿದ್ದೇವೆ. ಮೂರು ಸಾವಿರ ವರ್ಷಗಳ ಹಿಂದೆ ಚರಕಸಂಹಿತೆಯಲ್ಲಿ ಹೇಳಿರುವ ಆಚಾರ, ಆಹಾರ, ಪ್ರಾಣಾಯಾಮ ಮತ್ತು ಶಾಂತಚಿತ್ತದಿಂದ ಕೂಡಿದ ಆರೋಗ್ಯದ ಸೂತ್ರಗಳನ್ನು ಮರೆತು, ಕೇವಲ ಆಧುನಿಕ ಶೈಲಿಯನ್ನೇ ಅನುಸರಿಸುತ್ತಿರುವುದರಿಂದ ಮಧುಮೇಹವು ಸಾಂಕ್ರಾಮಿಕ ವ್ಯಾಧಿಯ ರೂಪದಲ್ಲಿ ತಲೆ ಎತ್ತುತ್ತಿರುವುದಕ್ಕೆ ಕಾರಣವಾಗಿದೆ.

ನಾವು ಅವಶ್ಯಕತೆಗಿಂತಲೂ ಹೆೆಚ್ಚಿಗೆ ತಿನ್ನುತ್ತಿದ್ದೇವೆ. ಕಡಿಮೆ ಪೌಷ್ಟಿಕಾಂಶದ ‘ಜಂಕ್ ಫುಡ್‌‘ ಅನ್ನು ಸೇವಿಸುತ್ತಿದ್ದೇವೆ. ನಮ್ಮ ಸ್ವಭಾವದಿಂದಲೋ ನಗರ ಜೀವನದ ಅನಿವಾರ್ಯತೆಗಳಿಂದಲೋ ಜನತೆ ಈಗ ಮಾನಸಿಕ ಒತ್ತಡಗಳಿಗೆ ಗುರಿಯಾಗುತ್ತಿದೆ. ಇದರಿಂದ ಮಧುಮೇಹ ಶೀಘ್ರಗತಿಯಲ್ಲಿ ಬೆಳೆಯುತ್ತಿದೆ. ಮಧುಮೇಹ ಬಗ್ಗೆ ಸಮಗ್ರ ತಿಳುವಳಿಕೆ ನೀಡುವುದೇ ಈ ಕೃತಿಯ ಉದ್ದೇಶ. ಈ ಗ್ರಂಥರಚನೆಯಲ್ಲಿ ನನ್ನ ಪುತ್ರ ಡಾ.ಸೂರಜ್ ತೇಜಸ್ವಿ ಅಮೆರಿಕದ ಕ್ಯಾಲಿಪೋರ್ನಿಯ ವಿಶ್ವವಿದ್ಯಾನಿಲಯದಲ್ಲಿ ಗ್ಯಾಸ್ಟ್ರೋಎಂಟರಾಲಜಿ ಮತ್ತು ಹೆಪಟಾಲಜಿ ವಿಭಾಗದಲ್ಲಿ ಸೇವೆ ಸಲ್ಲಿಸುತ್ತಿದ್ದು, ಮಧುಮೇಹ ಕುರಿತು ಮಹತ್ವಪೂರ್ಣ ವೈಜ್ಞಾನಿಕ ಸಂಗತಿಗಳನ್ನು ಕಲೆಹಾಕುವಲ್ಲಿ ನೆರವಾಗಿದ್ದಾರೆ. ನಾವಿಬ್ಬರೂ ಸೇರಿ ಮಧುಮೇಹ ಕುರಿತಂತೆ ಪ್ರಪಂಚದಲ್ಲಿ ಲಭ್ಯವಿರುವ ವೈಜ್ಞಾನಿಕ ಆಧಾರಗಳನ್ನು ಪರಿಶೀಲನೆ ಮಾಡಿದ್ದೇವೆ. ಮಧುಮೇಹ ವ್ಯಾಧಿಯಲ್ಲಿ 20ವರ್ಷಗಳ ಆಳವಾದ ಅನುಭವ, ದಿಲ್ಲಿಯ ಅಖಿಲ ಭಾರತ ವೈದ್ಯವಿಜ್ಞಾನ ಸಂಸ್ಥೆಯಲ್ಲಿ ನಡೆಸಿರುವ ಸಂಶೋಧನೆಗಳ ಆಧಾರ, ಶ್ರೀಹರಿ ಡಯಾಬಿಟಿಸ್ ಸಂಸ್ಥೆ, ಕುವೆಂಪುನಗರ, ಮೈಸೂರು ಇಲ್ಲಿ ನಡೆಸಿರುವ ಸಂಶೋಧನೆಗಳು ಹಾಗೂ ಮಧುಮೇಹ ವ್ಯಾಧಿಯ ಕುರಿತು ಆಸ್ಟ್ರೇಲಿಯ ದೇಶದ ನ್ಯೂಕ್ಯಾಸಲ್ ವಿಶ್ವವಿದ್ಯಾನಿಲಯದಲ್ಲಿ ನಡೆಸಿದ ಆಳವಾದ ಅಧ್ಯಯನದ ಫಲ ಈ ಕೃತಿಯಲ್ಲಿ ಮುಪ್ಪುರಿಗೊಂಡಿದೆ.

ಕೃತಿಯ ವಿಷಯವನ್ನು ಮೂರು ಭಾಗಗಳಾಗಿ ವಿಂಗಡಿಸಲಾಗಿದೆ. 1ನೆಯ ಭಾಗದಲ್ಲಿ ಮಧುಮೇಹ ಕುರಿತ ಮೂಲಭೂತ ಆಧಾರ ತತ್ವಗಳ ತಿಳುವಳಿಕೆಗಳನ್ನು, 2ನೆಯ ಭಾಗದಲ್ಲಿ ಮಧುಮೇಹದಿಂದ ಉದ್ಭವಿಸುವ ತೊಡಕುಗಳನ್ನು ಮತ್ತು 3ನೆಯ ಭಾಗದಲ್ಲಿ ಪರಿಹಾರಗಳನ್ನು ಒಟ್ಟು 29 ಅಧ್ಯಾಯಗಳಲ್ಲಿ ಪರಿಶೀಲಿಸಲಾಗಿದೆ. ಈ ಕೃತಿಯಲ್ಲಿ ಅತ್ಯಂತ ಸುಲಭವಾಗಿ, ಆದರೆ ಅತ್ಯಂತ ಪರಿಣಾಮ ಕಾರಿಯಾಗಿ ಮಧುಮೇಹವನ್ನು ಎದುರಿಸುವ ವಿಧಾನವನ್ನು ತಿಳಿಸಲಾಗಿದೆ. ಉದಾಹರಣೆಗೆ ಮಧುಮೇಹದ ಆಹಾರದಲ್ಲಿ ಮಂದಗತಿಯಲ್ಲಿ ಜೀರ್ಣವಾಗುವ ಗುಣವಿರುವ ಪಿಷ್ಟ ಪದಾರ್ಥಗಳು ಶೀಘ್ರಗತಿಯಲ್ಲಿ ಜೀರ್ಣವಾಗುವ ಪಿಷ್ಟ ಪದಾರ್ಥಗಳಿಗಿಂತಲೂ ಉತ್ತಮವಾದವುಗಳು ಮತ್ತು ಇವುಗಳಿಂದ ಮೇದೋಜೀರಕಾಂಗದ ಮೇಲೆ ಒತ್ತಡ ಬೀಳುವುದೂ ಕಡಿಮೆ ಎಂಬ ವಿಚಾರ; ಹಾಗೂ ಸಸ್ಯಜನ್ಯ ಪ್ರೋಟೀನ್- ಉದಾಹರಣೆಗೆ ಬೇಳೆಕಾಳು- ಇತ್ಯಾದಿಗಳಿಂದ ಹಸಿವು ಕಡಿಮೆಯಾಗಿ ಆಹಾರ ಸೇವನೆ ಕಡಿಮೆ ಆಗುತ್ತದೆಂಬುದನ್ನೂ ಮತ್ತು ಸಕ್ಕರೆ ಅಂಶ ಕಡಿಮೆ ಆಗುವುದರಿಂದ ಮಧುಮೇಹ ಕಡಿಮೆ ಆಗುತ್ತದೆಂಬ ವಿಚಾರಗಳನ್ನೂ ತಿಳಿಸಲಾಗಿದೆ. ಆರೋಗ್ಯಕರವಾದ ಎಣ್ಣೆಗಳು ಭಾರತೀಯ ಸಂಬಾರ ಪದಾರ್ಥಗಳಾದ ಜೀರಿಗೆ, ಮೆಂತ್ಯ, ಮೆಣಸು, ಸಾಸುವೆ ಎಣ್ಣೆ ಇವುಗಳ ಬಳಕೆಯಿಂದ ಸಕ್ಕರೆ ಅಂಶ ಕಡಿಮೆ ಆಗುತ್ತದೆಂಬುದನ್ನೂ, ವ್ಯಾಯಾಮ ಮಾಡುವುದರಿಂದ ಶೇ.71 ಮಧುಮೇಹ ಬರುವುದನ್ನು ತಡೆಗಟ್ಟಬಹುದೆಂಬುದನ್ನೂ, ಪ್ರತಿ ಕಿಲೋಗ್ರಾಂ ತೂಕವನ್ನು ತಗ್ಗಿಸುವುದರಿಂದ ಶೇ.16ರಷ್ಟು ಮಧುಮೇಹ ಬರುವುದನ್ನು ತಡೆಗಟ್ಟಬಹುದೆಂಬುದನ್ನೂ ವೈಜ್ಞಾನಿಕ ಆಧಾರಗಳ ಮೂಲಕ ಈ ಕೃತಿಯಲ್ಲಿ ತಿಳಿಸಲಾಗಿದೆ. ಯೋಗಾಭ್ಯಾಸದಿಂದ 3 ತಿಂಗಳ ಅವಧಿಯಲ್ಲಿ ಸಕ್ಕರೆ ಅಂಶ ಕಡಿಮೆ ಆಗುತ್ತದೆ ಎಂಬ ವೈಜ್ಞಾನಿಕ ಅಂಶವನ್ನು ಸಂಕ್ಷಿಪ್ತವಾಗಿ ಈ ಕೃತಿಯಲ್ಲಿ ತಿಳಿಸಲಾಗಿದೆ.

ಡಾ.ವಿ.ಲಕ್ಷ್ಮೀನಾರಾಯಣ್ (ಮುನ್ನುಡಿಯಿಂದ)

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top