ಜಿ.ವಿ.-ನಡೆದಾಡುತ್ತಿದ್ದ ಒಂದು ವಿಶ್ವಕೋಶ | Vartha Bharati- ವಾರ್ತಾ ಭಾರತಿ

--

ಜಿ.ವಿ.-ನಡೆದಾಡುತ್ತಿದ್ದ ಒಂದು ವಿಶ್ವಕೋಶ

ತಮ್ಮ ವೃತ್ತಿಯೊಂದಿಗೇ ಕನ್ನಡ ಸಾಹಿತ್ಯಕ್ಕಾಗಿ ನಿರಂತರ ದುಡಿದವರು ‘ಜಿ.ವಿ.’ ನಡೆದಾಡುವ ವಿಶ್ವಕೋಶವೆಂದೇ ಪ್ರಸಿದ್ಧರಾಗಿದ್ದ ಜಿ.ವಿ.ಯವರು ನಮ್ಮ ನಾಡಿನ ಮತ್ತು ದೇಶದ ಪ್ರಕಾಂಡ ಭಾಷಾತಜ್ಞರಲ್ಲಿ ಒಬ್ಬರಾಗಿದ್ದರು. ತಮ್ಮ ನಿರಂತರ ಅಧ್ಯಯನ, ಚಿಂತನಶೀಲತೆ ಮತ್ತು ಸಂಶೋಧನೆಗಳಿಂದ ಕನ್ನಡ ಸಾರಸ್ವತಲೋಕಕ್ಕೆ ಅಮೋಘವಾದ ಕೊಡುಗೆ ನೀಡಿದ ವಿದ್ವಾಂಸರು.


ಸೋಮವಾರ, ಎಪ್ರಿಲ್ 19ರ ಮುಂಜಾನೆ ತಮ್ಮ 108ನೆಯ ವಯಸ್ಸಿನಲ್ಲಿ ಇಹಲೋಕ ತ್ಯಜಿಸಿದ ಪ್ರೊಫೆಸರ್ ಜಿ. ವೆಂಕಟಸುಬ್ಬಯ್ಯರವರು ಜನಿಸಿದ್ದು 1913ರಲ್ಲಿ, ಶ್ರೀರಂಗಪಟ್ಟಣದ ಸಮೀಪದ ಗಂಜಂನಲ್ಲಿ. ಮೈಸೂರಿನ ಮಹಾರಾಜಾ ಕಾಲೇಜಿನಲ್ಲಿ ಕನ್ನಡ ಸ್ನಾತಕೋತ್ತರ ಪದವಿಯಲ್ಲಿ ಚಿನ್ನದ ಪದಕ ಗಳಿಸಿ ಆ ಬಳಿಕ ಸುಮಾರು 40 ವರ್ಷಗಳ ಕಾಲ ವಿವಿಧೆಡೆ ಅಧ್ಯಾಪಕರಾಗಿ ಮತ್ತು ಪ್ರಾಚಾರ್ಯರಾಗಿ ಕೆಲಸ ಮಾಡಿದರು.

 ತಮ್ಮ ವೃತ್ತಿಯೊಂದಿಗೇ ಕನ್ನಡ ಸಾಹಿತ್ಯಕ್ಕಾಗಿ ನಿರಂತರ ದುಡಿದವರು ‘ಜಿ.ವಿ.’ ನಡೆದಾಡುವ ವಿಶ್ವಕೋಶವೆಂದೇ ಪ್ರಸಿದ್ಧರಾಗಿದ್ದ ಜಿ.ವಿ.ಯವರು ನಮ್ಮ ನಾಡಿನ ಮತ್ತು ದೇಶದ ಪ್ರಕಾಂಡ ಭಾಷಾತಜ್ಞರಲ್ಲಿ ಒಬ್ಬರಾಗಿದ್ದರು. ತಮ್ಮ ನಿರಂತರ ಅಧ್ಯಯನ, ಚಿಂತನಶೀಲತೆ ಮತ್ತು ಸಂಶೋಧನೆಗಳಿಂದ ಕನ್ನಡ ಸಾರಸ್ವತಲೋಕಕ್ಕೆ ಅಮೋಘವಾದ ಕೊಡುಗೆ ನೀಡಿದ ವಿದ್ವಾಂಸರು. ಭಾಷಾಶಾಸ್ತ್ರಕ್ಕೆ ಸಂಬಂಧಿಸಿದ ಅವರ ಗ್ರಂಥಗಳು ಅವರ ಅಧ್ಯಯನದ ವಿಸ್ತಾರ ಮತ್ತು ಆಳವನ್ನು ಪ್ರತಿಬಿಂಬಿಸುತ್ತವೆ. ಅವರ ಅವಿರತ ಶ್ರಮದಿಂದ ರಚಿತವಾದ 14 ನಿಘಂಟುಗಳು ಮತ್ತು ಅವಕ್ಕೆ ಸಂಬಂಧಿಸಿದ ಗ್ರಂಥಗಳು ಇದಕ್ಕೆ ಸಾಕ್ಷಿ. ಇದರೊಂದಿಗೆ, ಜಿ.ವಿ.ಯವರು ಅನೇಕ ವಿಮರ್ಶಾ ಪುಸ್ತಕಗಳನ್ನು, ಸಂಪಾದಿತ ಗ್ರಂಥಗಳನ್ನು, ಅನುವಾದಿತ ಕೃತಿಗಳನ್ನು, ಮಕ್ಕಳ ಬರಹಗಳನ್ನು ಮತ್ತು ಸಾಹಿತ್ಯ ಚರಿತ್ರೆಯ ಕುರಿತಾದ ಪುಸ್ತಕಗಳನ್ನು ರಚಿಸಿದರು. ಬಹುಕಾಲದ ವರೆಗೆ ಕನ್ನಡ ಸಾಹಿತ್ಯ ಪರಿಷತ್ತಿನ ಕಾರ್ಯದರ್ಶಿಯಾಗಿ, ಆನಂತರ ಅಧ್ಯಕ್ಷರಾಗಿ, ವಿಭಿನ್ನ ಸಮಿತಿಗಳ ಸದಸ್ಯರಾಗಿದ್ದುದಲ್ಲದೆ, 98ರ ಇಳಿ ವಯಸ್ಸಿನಲ್ಲಿ 2011ರ 77ನೇ ಅಖಿಲ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರಾಗಿ ಕನ್ನಡಕ್ಕಾಗಿ ಸೇವೆ ಸಲ್ಲಿಸಿದರು. ಕನ್ನಡ ಸಾಹಿತ್ಯ ಅಕಾಡಮಿ, ನಾಡೋಜ, ಮಾಸ್ತಿ, ಸೇಡಿಯಾಪು ಮುಂತಾದ ಹಲವು ಪ್ರಶಸ್ತಿಗಳು ಅವರನ್ನು ಅರಸಿಕೊಂಡು ಬಂದಿವೆ. ಪದ್ಮಶ್ರೀ ಪ್ರಶಸ್ತಿಯೂ 2017ರಲ್ಲಿ ಅವರ 103ನೇ ವರ್ಷ ವಯಸ್ಸಿನಲ್ಲಿ ಲಭಿಸಿದೆ.

ಜಿ.ವಿ. ಅವರ ಅಗಾಧವಾದ ಭಾಷಾಜ್ಞಾನಕ್ಕೆ ಕಿರೀಟಪ್ರಾಯವಾದ ಗ್ರಂಥ ಅವರ ‘ಇಗೋ ಕನ್ನಡ’. ಹಿಂದೆ, ಪ್ರಜಾವಾಣಿಯಲ್ಲಿ ಕನ್ನಡದ ಭಾಷೆಯ ಪ್ರಯೋಗಗಳ ಬಗ್ಗೆ ಅಧ್ಯಾಪಕರು ಮತ್ತು ವಿದ್ಯಾರ್ಥಿಗಳ ಪ್ರಶ್ನೆಗಳಿಗೆ ಅಂಕಣ ಬರಹದ ಮೂಲಕ ಉತ್ತರಿಸುತ್ತಿದ್ದ ಅವರ ಲೇಖನಮಾಲೆ ಬಹಳ ಜನಪ್ರಿಯವಾಗಿ ಸಾಮಾನ್ಯ ಓದುಗರ ಗಮನವನ್ನು ಸೆಳೆದಿತ್ತು. ಆರಂಭದಲ್ಲಿ ಒಂದು ಸಂಪುಟದಲ್ಲಿ ಬಂದ ‘ಇಗೋ ಕನ್ನಡ’, ಬೆಳೆಯುತ್ತಾ ಮೂರಾಯಿತು. ಮುಂದೆ ಸಂಯುಕ್ತ ಸಂಪುಟವಾಗಿ ಹೊರಬಂತು.
ಕನ್ನಡದ ಭಾಷಾ ಶ್ರೀಮಂತಿಕೆಯನ್ನು ಸವಿಯುವ ಆಸಕ್ತಿಯುಳ್ಳವರಿಗೆ ಅತ್ಯಂತ ಉಪಯುಕ್ತವಾದ ಇನ್ನೊಂದು ಗ್ರಂಥ ‘ಕನ್ನಡ ಕ್ಲಿಷ್ಟಪದಕೋಶ’. ಶಬ್ದಗಳ ಉಗಮ, ಅವುಗಳ ಬಗ್ಗೆ ನೀಡಿರುವ ವಿವರಣೆಗಳು ಅದರ ಮೌಲ್ಯವನ್ನು ಹೆಚ್ಚಿಸಿವೆ. ಅವರ ಇಂಗ್ಲಿಷ್ ಕನ್ನಡ ನಿಘಂಟು ಮತ್ತೊಂದು ಅಮೂಲ್ಯವಾದ ರಚನೆ. ಈ ಮೂರೂ ಗ್ರಂಥಗಳು ಪ್ರತಿಯೊಬ್ಬ ಕನ್ನಡಪ್ರೇಮಿಯ ಮನೆಯಲ್ಲಿ ಇರಬೇಕಾದ ಕೃತಿಗಳು. ಹೊಸ ಪೀಳಿಗೆಯವರಿಗೆ, ಕನ್ನಡದ ಸರಿಯಾದ ಬಳಕೆಯ ಬಗ್ಗೆ ಕಾಳಜಿ ಇರುವವರಿಗೆ ಇವುಗಳು ಅತ್ಯಂತ ಉಪಯುಕ್ತವಾದ ಗ್ರಂಥಗಳು.

ಜಿ.ವಿ.ಯವರಿಗೆ ದಕ್ಷಿಣ ಕನ್ನಡದಲ್ಲಿ ವಾಡಿಕೆಯಲ್ಲಿರುವ ಭಾಷಾಪ್ರಯೋಗದ ಬಗ್ಗೆ ವಿಶೇಷ ಗೌರವವಿತ್ತು. ನಾನು ಅವರನ್ನು 2015ರಲ್ಲಿ ಬೆಂಗಳೂರಿನ ಅವರ ಮನೆಯಲ್ಲಿ ಭೇಟಿಯಾದಾಗ ಅವರು ಹೇಳಿದ ಮಾತು ಮರೆಯಲು ಸಾಧ್ಯವಿಲ್ಲ. ‘‘ನಿಮ್ಮಲ್ಲಿನ ಶುದ್ಧ ಭಾಷಾಪ್ರಯೋಗದಿಂದಾಗಿ ಕನ್ನಡ ಇನ್ನೂ ಉಳಿದಿದೆ. ತಾಳಮದ್ದಳೆ ಮತ್ತು ಯಕ್ಷಗಾನಗಳ ಮೂಲಕ ನಿಮ್ಮ ಸ್ವಂತಿಕೆಯನ್ನು ಉಳಿಸಿಕೊಂಡಿದ್ದೀರಿ’’ ಅಂದರು. ಅವರ ಮಾತಿನಲ್ಲೂ ಕರಾವಳಿಯ ಭಾಷೆ, ಸಂಸ್ಕೃತಿ ಮತ್ತು ಜನರ ಬಗ್ಗೆ ಇನ್ನಿಲ್ಲದ ಅಭಿಮಾನವನ್ನು ಕಂಡಿದ್ದೆ.

ಓರ್ವ ವ್ಯಕ್ತಿಯ ನೆಲೆಯಲ್ಲಿ ಜಿ.ವಿ.ಯವರು ಸೌಜನ್ಯದ ಪ್ರತೀಕವಾಗಿದ್ದರು. ಅವರ ಭೇಟಿಗೆ ಹೋಗಿದ್ದಾಗ ಮನೆಯ ಬಾಗಿಲಿನ ತನಕ ಬಂದು ನನ್ನನ್ನೂ, ನನ್ನಾಕೆಯನ್ನೂ ಒಳಗೆ ಆಮಂತ್ರಿಸಿದ್ದರು. ವಯಸ್ಸಿನಲ್ಲಿ ಚಿಕ್ಕವರಾಗಿದ್ದ ನಮ್ಮನ್ನು ಬಹಳ ಗೌರವದಿಂದ ಮತ್ತು ಆತ್ಮೀಯವಾಗಿ ಮಾತನಾಡಿಸಿದ್ದರು.
ತಮ್ಮ ಇಳಿವಯಸ್ಸಿನಲ್ಲಿಯೂ ನಿರಂತರ ಕ್ರಿಯಾಶೀಲರಾಗಿದ್ದ, ಸದಾ ಅಧ್ಯಯನ ಹಾಗೂ ಪಾಂಡಿತ್ಯಪೂರ್ಣ ಸಾಹಿತ್ಯದ ಸೃಷ್ಟಿಗೆ ತಮ್ಮ ಜೀವನವನ್ನು ಮುಡಿಪಾಗಿಟ್ಟ ಜಿ.ವಿ.ಯವರ ಜೀವನ ಅನುಕರಣೀಯ, ಹೊಸ ಪೀಳಿಗೆಗೆ ಮಾದರಿ.

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top