ಬಿಬಿಎಂಪಿಯ ಆಡಳಿತ ವ್ಯವಸ್ಥೆ ಸಮಗ್ರವಾಗಿ ಬದಲಾಗಲಿ

ಮಾನ್ಯರೇ,

ಪ್ರತಿದಿನವೂ ಬೆಂಗಳೂರು ನಗರದ ನಾಗರಿಕರು ಒಂದಲ್ಲ ಒಂದು ಸಮಸ್ಯೆಗಳನ್ನು ಅನುಭವಿಸುತ್ತಲೇ ಇದ್ದಾರೆ. ಮಳೆಗಾಲದಲ್ಲಿ ಒಂದು ರೂಪವಾದರೆ, ಬೇಸಿಗೆಯಲ್ಲಿ ಮತ್ತೊಂದು ಸ್ವರೂಪ. ಇನ್ನು ರಸ್ತೆಗಳ ಸ್ಥಿತಿ, ಉದ್ಯಾನವನಗಳ ಸ್ಥಿತಿ, ಆಟದ ಮೈದಾನಗಳ ವ್ಯವಸ್ಥೆ, ಕೆರೆಗಳ ನಿರ್ವಹಣೆ, ಬಡವರು ವಾಸಿಸುವ ಬಡಾವಣೆಗಳ ಪರಿಸ್ಥಿತಿ ಹೇಳತೀರದಾಗಿದೆ. ಇದಕ್ಕೆಲ್ಲ ಕಾರಣ ಸರಿಯಾದ ಸಮಗ್ರವಾದಂತಹ ಆಡಳಿತ ವ್ಯವಸ್ಥೆ ಇಲ್ಲದಿರುವುದು. ಬಿಬಿಎಂಪಿ ವ್ಯಾಪ್ತಿಯಲ್ಲಿ ಉದ್ಯಾನವನಗಳನ್ನು ನಿರ್ವಹಣೆ ಮಾಡುವುದು ತೋಟಗಾರಿಕೆ ಇಲಾಖೆ ಇದಕ್ಕೆ ಹಣ ನೀಡುವುದು ಬಿಬಿಎಂಪಿ. ಇದೇ ರೀತಿಯಲ್ಲಿ ಕೆರೆಗಳ ನಿರ್ವಹಣೆಗೆ ಮತ್ತೊಂದು ಪ್ರಾಧಿಕಾರವಿದೆ. ಇದಕ್ಕೆ ಹಣ ಒದಗಿಸುವುದು ಕೂಡಾ ಬಿಬಿಎಂಪಿ. ಅಲ್ಲದೆ ಕೊಳೆ ಅಭಿವೃದ್ಧಿ ಮಂಡಳಿ ಅಭಿವೃದ್ಧಿಪಡಿಸಿದ ಮನೆಗಳಿಗೆ ಸೌಕರ್ಯ, ಸೌಲಭ್ಯ ನೀಡುವುದು ಕೂಡಾ ಬಿಬಿಎಂಪಿ. ಹೀಗೆ ಬಿಬಿಎಂಪಿಯ ವ್ಯಾಪ್ತಿಯಲ್ಲಿಯೇ ಹಲವಾರು ಇಲಾಖೆಗಳು ತಮ್ಮದೇ ಆದಂತಹ ವ್ಯವಸ್ಥೆಯನ್ನು ಹೊಂದಿವೆೆ. ಆದರೆ ಇವುಗಳ ನಡುವೆ ಸಮನ್ವಯವೇ ಇಲ್ಲದೆ ಎಲ್ಲವೂ ಹಾಳಾಗುತ್ತಿದೆ. ಆದುದರಿಂದ ಬೆಂಗಳೂರು ನಗರದ ಅಭಿವೃದ್ಧಿಗಾಗಿ ಸಮಗ್ರವಾದಂತಹ ಮಸೂದೆಯನ್ನು ಮಂಡಿಸಬೇಕು. ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಆಯುಕ್ತರ ಹುದ್ದೆಯನ್ನು ರಾಜ್ಯದ ಪ್ರಧಾನ ಕಾರ್ಯದರ್ಶಿ ಮಟ್ಟಕ್ಕೆ ಏರಿಸಬೇಕು.

ಜಲಮಂಡಳಿ, ಸ್ಲಂ ಬೋರ್ಡ್, ಕೆರೆಗಳ ಪ್ರಾಧಿಕಾರ, ಯುವಜನ ಇಲಾಖೆ, ಬೆಸ್ಕಾಂ ಹೀಗೆ ಎಲ್ಲ ಇಲಾಖೆಗಳು ಸಹ ಕಾರ್ಯದರ್ಶಿಯ ಅಡಿಯಲ್ಲಿ ಕರ್ತವ್ಯವನ್ನು ನಿರ್ವಹಿಸಬೇಕು. ರಾಜ್ಯಕ್ಕೆ ಪ್ರತ್ಯೇಕವಾದಂತಹ ಈ ಇಲಾಖೆಗಳಿಗೆ ಅಧಿಕಾರಿಯನ್ನು ನೇಮಿಸಿ ಬೆಂಗಳೂರು ನಗರದ ನಿರ್ವಹಣೆಗಾಗಿ ಈ ಎಲ್ಲ ಇಲಾಖೆಗಳಿಗೆ ಪ್ರತ್ಯೇಕವಾದ ಆಯುಕ್ತರನ್ನು ನೇಮಿಸಿ ಅವರನ್ನು ಬಿಬಿಎಂಪಿಯ ಪ್ರಧಾನ ಕಾರ್ಯದರ್ಶಿಯ ಅಡಿಯಲ್ಲಿ ತರಬೇಕು. ಇದರಿಂದ ಸಮನ್ವಯ ಉಂಟಾಗುತ್ತದೆ. ಆಡಳಿತಾತ್ಮಕವಾದಂತಹ ನಿರ್ಧಾರಗಳನ್ನು ಕೈಗೊಳ್ಳಲು ಅನುಕೂಲವಾಗುತ್ತದೆ. ಮುಖ್ಯಮಂತ್ರಿಗಳ ಬಳಿಯಲ್ಲಿಯೇ ಬಿಬಿಎಂಪಿ, ಬಿಡಿಎ, ಜಲಮಂಡಳಿ ಇಲಾಖೆಗಳನ್ನು ಇಟ್ಟುಕೊಳ್ಳುವುದರಿಂದ ಸರಾಗವಾದ ಆಡಳಿತ ನಿರ್ವಹಣೆಗೆ ತೊಂದರೆಯಾಗುತ್ತಿದೆ. ಬೆಂಗಳೂರು ನಗರಕ್ಕೆ ಸಂಪುಟ ದರ್ಜೆಯ ಪ್ರತ್ಯೇಕವಾದಂತಹ ಒಬ್ಬ ಸಚಿವರನ್ನು ನೇಮಿಸಿಬೇಕು, ಸಮನ್ವಯಕ್ಕಾಗಿ ಬಿಬಿಎಂಪಿ ಪ್ರಧಾನಕಾರ್ಯದರ್ಶಿಯವರ ಅಡಿಯಲ್ಲಿ ಎಲ್ಲ ಇಲಾಖೆಯ ಆಯುಕ್ತರ ಸಮಿತಿಯನ್ನು ರಚಿಸಬೇಕು. ಇದರಿಂದ ಬೆಂಗಳೂರು ನಗರದ ಆಡಳಿತ ವ್ಯವಸ್ಥೆ ಸುಧಾರಣೆಯಾಗುತ್ತದೆ. ರಾಜ್ಯ ಸರಕಾರದ ಬೊಕ್ಕಸಕ್ಕೆ ಹೆಚ್ಚಿನ ಪಾಲು ಬೆಂಗಳೂರು ನಗರವೇ ತುಂಬುವುದರಿಂದ ಬೆಂಗಳೂರಿನ ನಿರ್ವಹಣೆ ಅತ್ಯಂತ ಪ್ರಮುಖವಾದದ್ದಾಗಿರುತ್ತದೆ. ಪರಿಸ್ಥಿತಿ ಇದೇ ರೀತಿಯಲ್ಲಿ ಮುಂದುವರಿದರೆ ಬೆಂಗಳೂರಿನ ವೈಭವ ಹಾಳಾಗುತ್ತದೆ, ಇದರ ಘನತೆ ಕುಸಿಯುತ್ತದೆ.