ಸಂವಿಧಾನವನ್ನೇ ಗೌಣಗೊಳಿಸುವ ರಾಷ್ಟ್ರೀಯ ಶಿಕ್ಷಣ ನೀತಿ | Vartha Bharati- ವಾರ್ತಾ ಭಾರತಿ

--

ಸಂವಿಧಾನವನ್ನೇ ಗೌಣಗೊಳಿಸುವ ರಾಷ್ಟ್ರೀಯ ಶಿಕ್ಷಣ ನೀತಿ

‘ರಾಷ್ಟ್ರೀಯ ಶಿಕ್ಷಣ ನೀತಿ-2020’ ಸಂವಿಧಾನವನ್ನು ಬುಡಮೇಲು ಮಾಡುವ ದೊಡ್ಡ ಅಜೆಂಡಾವನ್ನು ತನ್ನ ಒಡಲಿನಲ್ಲಿರಿಸಿಕೊಂಡಿದೆ. ಸಂವಿಧಾನ ಮತ್ತು ಸಾಂವಿಧಾನಿಕ ಮೌಲ್ಯಗಳನ್ನು ತಿಳಿಗೊಳಿಸಿ ಮುಂಬರುವ ದಿನಗಳಲ್ಲಿ ಅದನ್ನು ಪೂರ್ಣವಾಗಿ ತಿರಸ್ಕರಿಸಲು ಅಗತ್ಯ ಭೂಮಿಕೆಯನ್ನು ಶಿಕ್ಷಣ ವ್ಯವಸ್ಥೆಯ ಮೂಲಕ ರೂಪಿಸುವ ದೊಡ್ಡ ಹುನ್ನಾರ ಇದಾಗಿದೆ. ಜನರನ್ನು ಸುಲಭವಾಗಿ ದಾರಿ ತಪ್ಪಿಸಬಹುದಾದ ಪರಿಭಾಷೆಗಳಾದ ಭಾರತೀಯ ಪರಂಪರೆ ಮತ್ತು ಮೌಲ್ಯಗಳಲ್ಲಿ ಬೇರೂರಿರುವ ಗುಣ ಮಟ್ಟದ ಶಿಕ್ಷಣ ವ್ಯವಸ್ಥೆ; ಜಗತ್ತಿನಲ್ಲಿ ಜ್ಞಾನದ ದೊಡ್ಡ ಶಕ್ತಿ; ವಿಶ್ವಗುರು; ಪ್ರತೀ ವಿದ್ಯಾರ್ಥಿಯ ಸಾಮರ್ಥ್ಯಗಳನ್ನು ಗುರುತಿಸುವುದು ಬೆಳೆಸುವುದು; ಬುನಾದಿ ಸಾಕ್ಷರತೆ; ಕಲಿಯುವವರು ತಮ್ಮ ಕಲಿಕೆಯ ಪಥವನ್ನು ಹಾಗೂ ಕಾರ್ಯಕ್ರಮಗಳನ್ನು ಆಯ್ಕೆ ಮಾಡುವ ಸಾಮರ್ಥ್ಯ; ಸೃಜನಶೀಲತೆ ಮತ್ತು ವಿಮರ್ಶಾತ್ಮಕ ಚಿಂತನೆ; ಸ್ವಾವಲಂಬನೆ ಶಿಕ್ಷಣ; ಶಿಕ್ಷಣದಲ್ಲಿ ಜನೋಪಕಾರಿ ಖಾಸಗಿ ಸಂಸ್ಥೆಗಳ ಮತ್ತು ಸಮುದಾಯ ಭಾಗವಹಿಸುವಿಕೆಗೆ ಪ್ರೋತ್ಸಾಹ, ಇತ್ಯಾದಿ ಪದಪುಂಜಗಳಿಂದ ಜನರನ್ನು ವಂಚಿಸಿದೆ.


ಜುಲೈ 29, 2020ರಂದು, ಕೇಂದ್ರ ಸಚಿವ ಸಂಪುಟವು ದಿಢೀರನೆ ರಾಷ್ಟ್ರೀಯ ಶಿಕ್ಷಣ ನೀತಿಯನ್ನು ಅನುಮೋದಿಸುವ ಮೂಲಕ ಹಿಂದಿನ ಶಿಕ್ಷಣದ ರಾಷ್ಟ್ರೀಯ ನೀತಿಯನ್ನು (ಪರಿಷ್ಕೃತ-1992) ಸಮಗ್ರವಾಗಿ ಬದಲಿಸುವ ಪ್ರಕ್ರಿಯೆಗೆ ಚಾಲನೆ ನೀಡಿದೆ. ಅಂದಿನಿಂದ ಇಂದಿನವರೆಗೆ ‘ರಾಷ್ಟ್ರೀಯ ಶಿಕ್ಷಣ ನೀತಿ-2020’ರ ಬಗ್ಗೆ ವ್ಯಾಪಕವಾದ ಚರ್ಚೆಗಳು ನಡೆಯುತ್ತಿವೆ. ಮೇಲ್ನೋಟಕ್ಕೆ, ಈ ಎಲ್ಲಾ ಚರ್ಚೆಗಳು ಸಮಗ್ರ ಶಿಕ್ಷಣ ವ್ಯವಸ್ಥೆಯನ್ನು ರೂಪಿಸಲು ಆಧಾರವಾಗಬೇಕಿದ್ದ ಮೂಲ ತಾಯಿ ಬೇರಾದ ಭಾರತದ ಸಂವಿಧಾನವನ್ನು ಮರೆತು ಕೇವಲ ಕೊಂಬೆಗಳಂತಿರುವ ವರ್ಣರಂಜಿತ ಪ್ರಸ್ತಾವನೆಗಳ ಸುತ್ತವೇ ನಡೆಯುತ್ತಿವೆ. ನವ-ಉದಾರವಾದಿ ಮಾರುಕಟ್ಟೆ ತಂತ್ರವನ್ನು ಬಳಸಿ ಜನರನ್ನು ದಿಕ್ಕುತಪ್ಪಿಸುವಲ್ಲಿ ನೀತಿ ಯಶಸ್ಸನ್ನು ಕಂಡಿದೆ.ಆದರೆ, ಭದ್ರವಾದ ತಳಹದಿಯಿಲ್ಲದೆ ಏನನ್ನೂ ನಿರ್ಮಿಸಲಾಗದು ಎಂಬುದು ಸಾರ್ವತ್ರಿಕ ಸತ್ಯ. ಈ ಲೇಖನದ ಆಶಯ, ಮೂಲ ಬುನಾದಿಯೇನಾಗಬೇಕಿತ್ತೆಂಬುದರ ಬಗ್ಗೆ ಒಂದಷ್ಟು ಒಳಹುಗಳನ್ನು ನೀಡುವುದು.

ಜಗತ್ತಿನ ಉಳಿದೆಲ್ಲ ರಾಷ್ಟ್ರಗಳಂತೆ ಭಾರತ ಕೂಡ ತನ್ನ ದೇಶದ ವಿವಿಧ ವಲಯಗಳ; ಶಿಕ್ಷಣ, ಆರೋಗ್ಯ, ಆರ್ಥಿಕ, ಸಾಮಾಜಿಕ, ಸಾಂಸ್ಕೃತಿಕ, ವಿದೇಶಿ ಇತ್ಯಾದಿ ನೀತಿಗಳನ್ನು ರೂಪಿಸುವಾಗ ಪ್ರಧಾನವಾಗಿ ಅಳವಡಿಸಿಕೊಳ್ಳಬೇಕಾದ ಪ್ರಮಾಣೀಕರಿಸಿದ ಚೌಕಟ್ಟು (Normative Framework)ಭಾರತದ ಸಂವಿಧಾನ ಮತ್ತು ಸಂವಿಧಾನದಲ್ಲಿ ಪ್ರಸ್ತಾಪವಾಗಿರುವ ಮೂಲಭೂತ ತತ್ವಗಳು. ಸಂವಿಧಾನವನ್ನು ಗೌಣಗೊಳಿಸಿ ನೀತಿನಿರೂಪಣೆ ಪ್ರಕ್ರಿಯೆ ನಡೆಯುತ್ತಿದೆಯೆಂದರೆ ಅಲ್ಲೊಂದು ಸಂವಿಧಾನ ಬಾಹಿರ ಗೌಪ್ಯ ಕಾರ್ಯಸೂಚಿ ಇದೆಯೆಂಬುದಕ್ಕೆ ವಿವರಣೆಯ ಅಗತ್ಯವಿಲ್ಲ. ಕಾರಣ, ಸಂವಿಧಾನದ ನೀತಿ-ನಿರೂಪಣೆಗಳನ್ನು ಅನುಸರಿಸದಿರುವುದೇ ಸರಕಾರವೊಂದು ತನ್ನ ಗೌಪ್ಯ ಕಾರ್ಯಸೂಚಿಯನ್ನು ಒಳ ಮಾಡುತ್ತಿದೆ ಎಂಬುದಕ್ಕೆ ಬಲವಾದ ಸಾಕ್ಷಿ. ಆದರೂ, ಕೆಲವೊಂದು ಮುಖ್ಯವಾದ ಅಂಶಗಳನ್ನು ಪ್ರಸ್ತಾಪಿಸಿ ಅವಲೋಕಿಸುವುದು ಶೈಕ್ಷಣಿಕವಾಗಿ ಒಪ್ಪಿತ ತಾರ್ಕಿಕ ವಿಧಾನ.

ಮೊದಲನೆಯದಾಗಿ, 20ನೇ ಶತಮಾನದಲ್ಲಿ ಅಪಾರ ತ್ಯಾಗ-ಬಲಿದಾನಗಳಿಂದ ಕೂಡಿದ ಸ್ವಾತಂತ್ರ್ಯ ಚಳವಳಿಗಳ ಮೂಲಕ ವಿದೇಶಿ ದಾಸ್ಯದಿಂದ ವಿಮೋಚನೆಗೊಂಡು ಸ್ವಾತಂತ್ರ್ಯ ಪಡೆದ ಬಹುತೇಕ ರಾಷ್ಟ್ರಗಳು ಸ್ವಾತಂತ್ರ್ಯಾನಂತರ ತಾವು ಕಟ್ಟಿಕೊಳ್ಳುವ ದೇಶ ಯಾವ ರೀತಿಯದ್ದಾಗಿರಬೇಕೆಂಬುದನ್ನು ತಾವೇ ರೂಪಿಸಿ ಅಳವಡಿಸಿಕೊಂಡ ಸಂವಿಧಾನಗಳಲ್ಲಿ ಸ್ಪಷ್ಟವಾಗಿ ಗುರುತಿಸಿಕೊಂಡಿವೆ. ಭಾರತ ಇದಕ್ಕೆ ಹೊರತಲ್ಲ. ಜೊತೆಗೆ, ಜಗತ್ತಿನಲ್ಲಿಯೇ ಅತೀ ವಿಸ್ತೃತ ಉದ್ದನೆಯ ಲಿಖಿತ ಸಂವಿಧಾನವೆಂಬ ಹೆಗ್ಗಳಿಕೆ ನಮ್ಮದಾಗಿದೆ. ನಮ್ಮ ಸಂವಿಧಾನದ ಮೂಲ ಆಶಯ ಭಾರತವನ್ನು ಒಂದು ಸಾರ್ವಭೌಮ ಸಮಾಜವಾದಿ ಜಾತ್ಯತೀತ ಪ್ರಜಾಪ್ರಭುತ್ವ ಗಣತಂತ್ರವನ್ನಾಗಿಸುವುದು. ಒಂದು ದೇಶದ ರಾಷ್ಟ್ರೀಯ ಶಿಕ್ಷಣ ನೀತಿಯೆಂದರೆ ಅದು ಸಂವಿಧಾನದ ಆಶಯಗಳನ್ನು ಸಾಕಾರಗೊಳಿಸುವ ಒಂದು ಮಹತ್ವದ ಸಾಂವಿಧಾನಿಕ ದಸ್ತಾವೇಜು. ದೇಶದ ಸಾಮಾಜಿಕ, ಶೈಕ್ಷಣಿಕ, ಆರ್ಥಿಕ, ರಾಜಕೀಯ ಮತ್ತು ಸಾಂಸ್ಕೃತಿಕ ಬದುಕನ್ನು ಸುಸ್ಥಿರವಾಗಿ ಕಟ್ಟಿಕೊಡುವುದಲ್ಲದೆ ಅಲ್ಲಿನ ಸಾಂವಿಧಾನಿಕ ಆಶಯ ಮತ್ತು ಉದ್ದೇಶಗಳನ್ನು ಸಾಕಾರಗೊಳಿಸಲು ಒಂದು ಪ್ರಮುಖ ಸಾಧನವಾಗುತ್ತದೆ. ರಾಷ್ಟ್ರೀಯ ಶಿಕ್ಷಣ ನೀತಿಯನ್ನು ಈ ಪ್ರಮಾಣಿತ ಚೌಕಟ್ಟಿನಲ್ಲಿ ವಿಮರ್ಶಿಸಿ ನೋಡಬೇಕಿದೆ.

ಎರಡನೆಯದಾಗಿ, ನೀತಿಯನ್ನು ಸೂಕ್ಷ್ಮವಾಗಿ ವಿಮರ್ಶಿಸಿ ನೋಡಿದಾಗ, ನೀತಿಯು ಸಂವಿಧಾನದ ಆಶಯಗಳನ್ನು ತನ್ನ ಭದ್ರ ಬುನಾದಿ ಹಾಗೂ ಮುಂಗಾಣ್ಕೆಯನ್ನು ಅಳವಡಿಸಿಕೊಳ್ಳುವ ಬದಲು, ‘ಪ್ರಾಚೀನ ಹಾಗೂ ಸನಾತನ ಭಾರತೀಯ ಜ್ಞಾನ ಮತ್ತು ಚಿಂತನೆಯ ಶ್ರೀಮಂತ ಪರಂಪರೆ ನೀತಿಗೆ ಮಾರ್ಗದರ್ಶಕ ದಾರಿದೀಪ’ ಎಂಬ ಪ್ರಸ್ತಾವನೆಯನ್ನು(ಪ್ಯಾರಾ-2,ಪುಟ 4) ಮುಂದಿಡುವ ಮೂಲಕ ಪ್ರಾರಂಭದಲ್ಲಿಯೇ ದೇಶದ ಸಂವಿಧಾನವನ್ನೇ ತಿರಸ್ಕರಿಸುತ್ತದೆ. ಇದಕ್ಕೆ ಅಪವಾದವೆಂಬಂತೆ, 1986ರ ಶಿಕ್ಷಣ ನೀತಿಯು ಪ್ಯಾರಾ 2.2 ರಲ್ಲಿ ‘ಶಿಕ್ಷಣವು ಮಹತ್ವದ ಪಾತ್ರವನ್ನು ಹೊಂದಿದೆ. ಅದು ರಾಷ್ಟ್ರೀಯ ಏಕತೆ, ವೈಜ್ಞಾನಿಕ ಮನೋಭಾವ, ಮನೋ ಸ್ವಾತಂತ್ರ್ಯ ಹಾಗೂ ಸ್ಥೈರ್ಯಗಳಿಗೆ ದೇಣಿಗೆ ನೀಡುವ ದೃಷ್ಟಿ ಹಾಗು ಸೂಕ್ಷ್ಮತೆಯ ಪರಿಶುದ್ಧತೆಯನ್ನು ನೀಡುತ್ತದೆ. ಈ ರೀತಿಯಾಗಿ ನಮ್ಮ ಸಂವಿಧಾನದಲ್ಲಿ ಉಲ್ಲೇಖಗೊಂಡಿರುವ ಗುರಿಗಳಾದ ಸಮಾಜವಾದ, ಜಾತ್ಯತೀತತೆ ಮತ್ತು ಪ್ರಜಾಪ್ರಭುತ್ವದಂತಹ ಗುರಿಗಳನ್ನು ಮುಟ್ಟಲು ಸಹಾಯ ಮಾಡುತ್ತದೆ’ ಎಂದು ದೃಢವಾಗಿ ಹೇಳುತ್ತದೆ.

ಮೂರನೆಯದಾಗಿ, ರಾಷ್ಟ್ರೀಯ ಶಿಕ್ಷಣ ನೀತಿಯು ನಮ್ಮ ಸ್ವಾತಂತ್ರ್ಯ ಚಳವಳಿಯ ತ್ಯಾಗ-ಬಲಿದಾನಗಳ ಹೋರಾಟದ ಉತ್ಪನ್ನವಾದ ಸಂವಿಧಾನವನ್ನು ನಯವಾಗಿ ತಿರಸ್ಕರಿಸುತ್ತಾ ನವವಸಾಹತುಶಾಹಿಯ 2015ರ ಬಣ್ಣದ ಬುಗುರಿಯಾದ ವಿಶ್ವಸಂಸ್ಥೆಯ ಸುಸ್ಥಿರ ಅಭಿವೃದ್ಧಿಯ ಗುರಿಗಳ ಭಾಗವಾಗಿ ಶಿಕ್ಷಣದ ಗುರಿಯನ್ನು (ಗುರಿ 4-ಗುಣಾತ್ಮಕ ಶಿಕ್ಷಣ) ತನ್ನ ಬುನಾದಿಯನ್ನಾಗಿಸಿಕೊಂಡಿದೆ. ಈ ಸುಸ್ಥಿರ ಅಭಿವೃದ್ಧಿಯ ಗುರಿಗಳು ಕಾನೂನಾತ್ಮಕ ದಸ್ತಾವೇಜಲ್ಲ ಎಂಬುದು ಹಲವರಿಗೆ ತಿಳಿದಿಲ್ಲ. ಇದೊಂದು ಆಸೆಯನ್ನು ವ್ಯಕ್ತಪಡಿಸುವ ಇಚ್ಛಾಸೂಚಕವೇ ಹೊರತು ನ್ಯಾಯಬದ್ಧ-ನ್ಯಾಯಯುತ ಹಕ್ಕಲ್ಲ. ಭಾರತದ ಸಂವಿಧಾನದಲ್ಲಿ ಮಕ್ಕಳ ಶಿಕ್ಷಣ, ಆರೈಕೆ, ರಕ್ಷಣೆ, ಪೋಷಣೆಗೆ ಸಂಬಂಧಿಸಿದಂತೆ ಹಲವು ನ್ಯಾಯಯುತ ಹಕ್ಕುಗಳಿವೆ. ಅವುಗಳಲ್ಲಿ ಪ್ರಮುಖವಾದವುಗಳೆಂದರೆ, ಶಿಕ್ಷಣದ ಮೂಲಭೂತ ಹಕ್ಕು (ವಿಧಿ 21ಎ); ಬಾಲ ಕಾರ್ಮಿಕ ಪದ್ಧತಿ ನಿಷೇಧ(ವಿಧಿ 24); ಸ್ವಾತಂತ್ರ್ಯ ಮತ್ತು ಘನತೆಯಿಂದ ವಾತಾವರಣದಲ್ಲಿ ಅವಕಾಶ ಮತ್ತು ಸೌಲಭ್ಯಗಳನ್ನು ನೀಡಿ ಮಕ್ಕಳು ಆರೋಗ್ಯಕರವಾಗಿ ಅಭಿವೃದ್ಧಿ ಹೊಂದಲು ಅವಕಾಶ ಮತ್ತು ಸೌಲಭ್ಯ (ವಿಧಿ 39 ಇ ಮತ್ತು ಎಫ್); ಬಾಲ್ಯ ಪೂರ್ವ ಆರೈಕೆ (ರಕ್ಷಣೆ, ಪೌಷ್ಟಿಕಾಂಶ, ಆರೋಗ್ಯ ಮತ್ತು ಶಿಕ್ಷಣ (ವಿಧಿ 45); ಮತ್ತು ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಮತ್ತು ದುರ್ಬಲ ವರ್ಗಗಳ ಶೈಕ್ಷಣಿಕ ಹಿತಾಸಕ್ತಿಗಳ ರಕ್ಷಣೆ (ವಿಧಿ-46). ಸಂವಿಧಾನದಲ್ಲಿನ ಈ ಎಲ್ಲಾ ಅವಕಾಶಗಳು ಮಕ್ಕಳಿಗೆ ಕಾನೂನು ಬದ್ಧ ಹಕ್ಕುಗಳನ್ನು ಕೊಡಮಾಡುತ್ತದೆ. ಭಾರತದ ಸಂವಿಧಾನ ಬದ್ಧವಾಗಿರುವ ಮಕ್ಕಳ ಎಲ್ಲಾ ಹಕ್ಕುಗಳನ್ನು ಪ್ರಸ್ತಾಪಿಸುವುದು ಸಂವಿಧಾನದ ಆಶಯವನ್ನು ಎತ್ತಿಹಿಡಿಯುತ್ತದೆ ಹಾಗೂ ಅದಕ್ಕೆ ಬದ್ಧವಾಗಿರಬೇಕಾಗುತ್ತದೆ. ರಾಷ್ಟ್ರೀಯ ಶಿಕ್ಷಣ ನೀತಿಯು ಈ ಯಾವ ಅಂಶಗಳನ್ನೂ ಪ್ರಸ್ತಾಪಿಸುವುದಿಲ್ಲ. ಬದಲಿಗೆ, ಸುಸ್ಥಿರ ಅಭಿವೃದ್ಧಿಯ ಗುರಿಗಳನ್ನು ಪ್ರಸ್ತಾಪಿಸುತ್ತದೆ. ಕಾರಣ ಬದ್ಧತೆಯ ಅವಶ್ಯಕತೆಯಿಲ್ಲ. ಇದು ನೀತಿ ಮರೆಮಾಚುವ ನಿಜವಾದ ಸತ್ಯ.

ನಾಲ್ಕನೆಯದಾಗಿ, ದೇಶದಲ್ಲಿ ಸಂವಿಧಾನದ ತೊಟ್ಟಿಲುಗಳಂತಿದ್ದ ಸರಕಾರಿ ಶಾಲೆಗಳನ್ನು ಕಳೆದ ಒಂದು ದಶಕದಿಂದ ವ್ಯವಸ್ಥಿತವಾಗಿ ಮುಚ್ಚುವ ಹುನ್ನಾರ ನಡೆಯುತ್ತಿದೆ. ಸರಕಾರಿ ಶಾಲೆಗಳನ್ನು ದುರ್ಬಲಗೊಳಿಸುವ ಮೂಲಕ ಶಿಕ್ಷಣದ ಖಾಸಗೀಕರಣ ಹಾಗೂ ವ್ಯಾಪಾರೀಕರಣಕ್ಕೆ ರಹದಾರಿ ಒದಗಿಸುವ ಕೆಲಸ ನಿರಂತರವಾಗಿ ನಡೆಯುತ್ತಿದೆ. ಸರಕಾರಿ ಶಾಲೆಗಳು ಸ್ವಲ್ಪಮಟ್ಟಿಗಾದರೂ ಸುಧಾರಣೆಯಾಗಬಹುದೆಂದು ನಿರೀಕ್ಷಿಸಿದ್ದ ಶಿಕ್ಷಣ ಹಕ್ಕು ಕಾಯ್ದೆಯ ಅನುಷ್ಠಾನವನ್ನು ಈ ನೀತಿ ಪೂರ್ಣವಾಗಿ ಹಳಿತಪ್ಪಿಸಿದೆ. ಈ ನೀತಿಯಲ್ಲಿನ ಹೊಸ ಸಂರಚನೆ(5+3+3+4), ಶಾಲಾ ಸಂಕೀರ್ಣ, ಲಘು ಆದರೆ ಬಿಗಿ ನಿಯಂತ್ರಣ ವ್ಯವಸ್ಥೆ ಇತ್ಯಾದಿಗಳು ಸರಕಾರಿ ಶಾಲೆಗಳ ವಿಲೀನ ಅಥವಾ ಮುಚ್ಚುವ ಪ್ರಕ್ರಿಯೆಯನ್ನು ಮತ್ತಷ್ಟು ವೇಗವರ್ಧಕಗೊಳಿಸುತ್ತವೆ. ಸಂವಿಧಾನದ ಆಶಯಗಳನ್ನು ಈಡೇರಿಸಲು ತೊಟ್ಟಿಲಾಗಬೇಕಿದ್ದ ಸಾರ್ವಜನಿಕ ಶಿಕ್ಷಣ ವ್ಯವಸ್ಥೆ ಕೇವಲ ಒಂದು ಆಶಯವಾಗಿ ಉಳಿಯುತ್ತದೆ. ಸಂವಿಧಾನ ಮತ್ತು ಅದರ ಆಶಯಗಳನ್ನು ನೀತಿಯ ತಳಹದಿಯನ್ನಾಗಿಸಿಕೊಳ್ಳುವ ಬದಲು ಕೇವಲ ಕಾಟಾಚಾರಕ್ಕೆ ಅಲ್ಲೊಮ್ಮೆ ಇಲ್ಲೊಮ್ಮೆ ಪ್ರಸ್ತಾಪಿಸುವ ಮೂಲಕ ಸಂವಿಧಾನವನ್ನು ವ್ಯವಸ್ಥಿತವಾಗಿ ಕಡೆಗಣಿಸುವ ಕೆಲಸವನ್ನು ನೀತಿ ಅಚ್ಚುಕಟ್ಟಾಗಿ ಮಾಡಿದೆ. ಹಲವು ಕಡೆ ನೈತಿಕ, ಮಾನವೀಯ ಮತ್ತು ಸಂವಿಧಾನದ ಮೌಲ್ಯಗಳು ಎನ್ನುವ ಅನುಕ್ರಮಣಿಕೆಯಲ್ಲಿ ಸಂವಿಧಾನವನ್ನು ಉಲ್ಲೇಖಿಸುವ ಮೂಲಕ ಸಂವಿಧಾನವನ್ನು ನೈತಿಕ ಮೌಲ್ಯಕ್ಕೆ ಸಮೀಕರಿಸಿದೆ.

ಒಟ್ಟಾರೆ, ‘ರಾಷ್ಟ್ರೀಯ ಶಿಕ್ಷಣ ನೀತಿ-2020’ ಸಂವಿಧಾನವನ್ನು ಬುಡಮೇಲು ಮಾಡುವ ದೊಡ್ಡ ಅಜೆಂಡಾವನ್ನು ತನ್ನ ಒಡಲಿನಲ್ಲಿರಿಸಿಕೊಂಡಿದೆ. ಸಂವಿಧಾನ ಮತ್ತು ಸಾಂವಿಧಾನಿಕ ಮೌಲ್ಯಗಳನ್ನು ತಿಳಿಗೊಳಿಸಿ ಮುಂಬರುವ ದಿನಗಳಲ್ಲಿ ಅದನ್ನು ಪೂರ್ಣವಾಗಿ ತಿರಸ್ಕರಿಸಲು ಅಗತ್ಯ ಭೂಮಿಕೆಯನ್ನು ಶಿಕ್ಷಣ ವ್ಯವಸ್ಥೆಯ ಮೂಲಕ ರೂಪಿಸುವ ದೊಡ್ಡ ಹುನ್ನಾರ ಇದಾಗಿದೆ. ಜನರನ್ನು ಸುಲಭವಾಗಿ ದಾರಿ ತಪ್ಪಿಸಬಹುದಾದ ಪರಿಭಾಷೆಗಳಾದ ಭಾರತೀಯ ಪರಂಪರೆ ಮತ್ತು ಮೌಲ್ಯಗಳಲ್ಲಿ ಬೇರೂರಿರುವ ಗುಣ ಮಟ್ಟದ ಶಿಕ್ಷಣ ವ್ಯವಸ್ಥೆ; ಜಗತ್ತಿನಲ್ಲಿ ಜ್ಞಾನದ ದೊಡ್ಡ ಶಕ್ತಿ; ವಿಶ್ವಗುರು; ಪ್ರತೀ ವಿದ್ಯಾರ್ಥಿಯ ಸಾಮರ್ಥ್ಯಗಳನ್ನು ಗುರುತಿಸುವುದು ಬೆಳೆಸುವುದು; ಬುನಾದಿ ಸಾಕ್ಷರತೆ; ಕಲಿಯುವವರು ತಮ್ಮ ಕಲಿಕೆಯ ಪಥವನ್ನು ಹಾಗೂ ಕಾರ್ಯಕ್ರಮಗಳನ್ನು ಆಯ್ಕೆ ಮಾಡುವ ಸಾಮರ್ಥ್ಯ; ಸೃಜನಶೀಲತೆ ಮತ್ತು ವಿಮರ್ಶಾತ್ಮಕ ಚಿಂತನೆ; ಸ್ವಾವಲಂಬನೆ ಶಿಕ್ಷಣ; ಶಿಕ್ಷಣದಲ್ಲಿ ಜನೋಪಕಾರಿ ಖಾಸಗಿ ಸಂಸ್ಥೆಗಳ ಮತ್ತು ಸಮುದಾಯ ಭಾಗವಹಿಸುವಿಕೆಗೆ ಪ್ರೋತ್ಸಾಹ, ಇತ್ಯಾದಿ ಪದಪುಂಜಗಳಿಂದ ಜನರನ್ನು ವಂಚಿಸಿದೆ. ನಿಜ ಅರ್ಥದಲ್ಲಿ, ನವ-ಉದಾರವಾದಿ ಹಾಗೂ ಭಾರತದಲ್ಲಿ ತನ್ನ ಪಾಲುದಾರನಾಗಿರುವ ಕ್ರೋನಿ ಬಂಡವಾಳಶಾಹಿಯ ಮುಕ್ತ ಮಾರುಕಟ್ಟೆಗೆ ಶಿಕ್ಷಣವನ್ನು ತೆರೆದಿಡುವ ಮೂಲಕ ಅದೆಷ್ಟೋ ಟ್ರಿಲಿಯನ್ ಡಾಲರ್ ವ್ಯಾಪಾರಕ್ಕೆ ಭಾರತದ ಶಿಕ್ಷಣ ವ್ಯವಸ್ಥೆಯನ್ನು ಸಜ್ಜುಗೊಳಿಸುವ ನೀಲಿ ನಕಾಶೆಯಾಗಿದೆ. ಈ ಮೂಲಕ ಭಾರತದ ಯುವಶಕ್ತಿಯನ್ನು ಹೊರಗುತ್ತಿಗೆ ಆಧಾರದಲ್ಲಿ ಕೌಶಲ ಮತ್ತು ಅರೆಕೌಶಲ ವೃತ್ತಿಗೆ ತರಬೇತಿ ಪಡೆದ ಒಂದು ದೊಡ್ಡ ಗುಲಾಮ ವರ್ಗವನ್ನಾಗಿ ಪರಿವರ್ತಿಸುವ ಒಂದು ವ್ಯವಸ್ಥಿತ ಕಾರ್ಯ ಯೋಜನೆಯಾಗಿದೆ. ಭಾರತದ ಸಂವಿಧಾನದಲ್ಲಿ ಅಚಲ ವಿಶ್ವಾಸವಿರುವ, ಶಿಕ್ಷಣ ಸಾಮಾಜಿಕ ಒಳಿತು ಸಾಮಾಜಿಕ ಪರಿವರ್ತನೆಯ ಸಾಧನ ಎಂದು ಭಾವಿಸುವ ಮತ್ತು ಭಾರತವನ್ನು ಒಂದು ಸಮತಾವಾದಿ (Egalitarian) ಸಮಾಜವನ್ನಾಗಿ ಕಟ್ಟಿಕೊಳ್ಳುವ ಆಶಯದಲ್ಲಿ ಬಲವಾದ ನಂಬಿಕೆ ಇರುವ ಪ್ರತಿಯೊಬ್ಬ ನಾಗರಿಕನೂ ಈ ನೀತಿಯನ್ನು ಸೂಕ್ಷ್ಮತೆಯಿಂದ ಓದಿ ಅರ್ಥೈಸಿಕೊಂಡು ತಿರಸ್ಕರಿಸುವ ಮೂಲಕ ಸಂವಿಧಾನವನ್ನು ಉಳಿಸುವ ಹೋರಾಟಕ್ಕೆ ಅಣಿಯಾಗಬೇಕಿದೆ.

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

ಇಂದು ಹೆಚ್ಚು ಓದಿದ್ದು


Back to Top