ಬೃಹತ್ ಬಲೂನಿನ ಸಂದಿಗ್ಧ: ಅಮೆರಿಕಾದ ಆಗಸದಲ್ಲಿ ಪತ್ತೆಯಾದ ಚೀನಾದ ಸಂದೇಹಾಸ್ಪದ ಬಲೂನ್

ಇತ್ತೀಚೆಗೆ ನಡೆದ ಬೆಳವಣಿಗೆಯೊಂದರಲ್ಲಿ, ಚೀನಾ ಮೂಲದ್ದೆಂದು ಸಂದೇಹಿಸಲಾದ ಒಂದು ಹೆಚ್ಚಿನ ಎತ್ತರದಲ್ಲಿ ಚಲಿಸುವ ವಿಚಕ್ಷಣಾ ಬಲೂನ್ ಅಮೆರಿಕದಾದ್ಯಂತ ಸಂಚರಿಸುವುದು ಕಂಡುಬಂತು. ಈ ಕುರಿತು ತನ್ನ ಅಧಿಕೃತ ಪ್ರತಿಕ್ರಿಯೆ ನೀಡಿದ ಚೀನಾ, ಆ ಬಲೂನು ತನಗೆ ಸೇರಿದ್ದು ಎಂದು ಒಪ್ಪಿಕೊಂಡಿತಾದರೂ, ಅದು ವೈಜ್ಞಾನಿಕ ಸಂಶೋಧನೆಗೆ ಮೀಸಲಾದ ನಾಗರಿಕ ಬಲೂನ್ ಎಂದು ಹೇಳಿಕೆ ನೀಡಿತು. ಆ ಬಲೂನ್ ಎರಡರಿಂದ ಮೂರು ಶಾಲಾ ಬಸ್‌ಗಳ ಗಾತ್ರದಲ್ಲಿದ್ದು, ಅದಕ್ಕೆ ಸಾಕಷ್ಟು ದೊಡ್ಡದಾದ ವಿಚಕ್ಷಣಾ ಉಪಕರಣಗಳನ್ನು ಅಳವಡಿಸಲಾಗಿದೆ. ಈ ಬೆಳವಣಿಗೆಯಿಂದ ಆತಂಕಕ್ಕೊಳಗಾಗಿರುವ ಅಮೆರಿಕಾದ ರಕ್ಷಣಾ ಇಲಾಖೆ ಮತ್ತು ನಾಸಾ ಸಂಸ್ಥೆಗಳು ಸಂವಹನ ನಡೆಸುತ್ತಾ, ಜಂಟಿ ಕಾರ್ಯಾಚರಣೆ ನಡೆಸಿ, ಆ ಬಲೂನನ್ನು ಹೊಡೆದುರುಳಿಸಿದರೆ ಅದರ ಅವಶೇಷಗಳು ಎಲ್ಲೆಲ್ಲ ಬೀಳಬಹುದು ಎಂಬ ಕುರಿತು ಚರ್ಚಿಸುತ್ತಿದೆ. ಚೀನಾ ಅಮೆರಿಕಾದ ವಾಯು ಪ್ರದೇಶದಲ್ಲಿ ತನ್ನ ಬಲೂನ್ ಇರುವ ಕುರಿತು ಮಾಹಿತಿ ನೀಡಿ, ಬಲೂನ್ ನಿಯಂತ್ರಣ ತಪ್ಪಿ ಸಾಗುತ್ತಿದೆ ಹಾಗೂ ನಾವು ಅಮೆರಿಕಾಗೆ ಈ ಕುರಿತು ಮಾಹಿತಿ ನೀಡಿದ್ದೇವೆ ಎಂದಿತು. ಈ ಬಲೂನಿನ ಉಪಸ್ಥಿತಿ ಅಮೆರಿಕಾದ ವಾಯುಪ್ರದೇಶದ ಮೇಲೆ ಪರಿಣಾಮ ಬೀರುವ ಸಾಧ್ಯತೆಗಳಿದ್ದು, ಅಮೆರಿಕಾದ ಸೆಕ್ರೆಟರಿ ಆಫ್ ಸ್ಟೇಟ್ ಆ್ಯಂಟನಿ ಬ್ಲಿಂಕನ್ ಅವರ ಚೀನಾ ರಾಜತಾಂತ್ರಿಕ ಪ್ರವಾಸವನ್ನು ಮುಂದೂಡಲಾಗಿದೆ. ಬಲೂನಿನ ಮುಂದಿನ ಹಾದಿ ಇನ್ನೂ ತಿಳಿದಿಲ್ಲ. ಅದರ ಮುಂದಿನ ಪ್ರಯಾಣ ಗಾಳಿಯ ಒತ್ತಡದ ಮೇಲೆ ಅವಲಂಬಿತವಾಗಿದೆ.

ಇಂತಹ ಗೂಢಚರ್ಯೆಯ ಬಲೂನ್‌ಗಳು ಅನ್‌ಮ್ಯಾನ್ಡ್ ಏರಿಯಲ್ ವೆಹಿಕಲ್ (ಯುಎವಿ) ಗಳಾಗಿದ್ದು, ಅವುಗಳನ್ನು ವಿಚಕ್ಷಣೆ, ಗೂಢಾಚಾರ ಮತ್ತು ಮೇಲ್ವಿಚಾರಣೆಗೆ ಬಳಸಲಾಗುತ್ತದೆ. ಅವುಗಳಲ್ಲಿ ಸಾಮಾನ್ಯವಾಗಿ ಸೆನ್ಸರ್‌ಗಳು ಮತ್ತು ಕ್ಯಾಮರಾಗಳನ್ನು ಅಳವಡಿಸಲಾಗಿದ್ದು, ನೆಲದಿಂದ ಮಾಹಿತಿ ಮತ್ತು ಚಿತ್ರಗಳನ್ನು ಸಂಗ್ರಹಿಸುತ್ತವೆ. ಈ ಚಿತ್ರಗಳನ್ನು ಗುರಿಗಳನ್ನು ಗುರುತಿಸಲು, ಅವುಗಳ ಓಡಾಟವನ್ನು ತಿಳಿಯಲು ಬಳಸಲಾಗುತ್ತದೆ.

ಸಾಮಾನ್ಯವಾಗಿ ಇಂತಹ ಆಕಾಶ ಬಲೂನ್‌ಗಳು ಕೆಳಮಟ್ಟದಲ್ಲಿ, ಅಂದರೆ 1,000 ಅಡಿಗಳಿಗಿಂತ ಕೆಳಮಟ್ಟದಲ್ಲಿ ಹಾರಾಟ ನಡೆಸುತ್ತವೆ. ಕೆಲವು ಬಾರಿ ಅವುಗಳಲ್ಲಿ ಯಾವುದಾದರೂ ವಿಶೇಷ ಉಪಕರಣಗಳನ್ನು ಅಳವಡಿಸಲಾಗುತ್ತದೆ. ಅವುಗಳು ರೇಡಾರ್ ಅಥವಾ ಸೌರ ಶಕ್ತಿಯಿಂದ ಬಲೂನ್ 24,000 ಮೀಟರ್ ಅಥವಾ 37,000 ಮೀಟರ್ ಎತ್ತರದಲ್ಲಿ ಹಾರಾಟ ನಡೆಸುವಂತೆ ಮಾಡುತ್ತವೆ. ವಿಮಾನಯಾನ ಸಂಸ್ಥೆಗಳೂ 12,000 ಮೀಟರ್ ಎತ್ತರದಿಂದ ಮೇಲೆ ಹಾರಾಟ ನಡೆಸದ ಕಾರಣ, ಈ ಎತ್ತರದಲ್ಲಿ ವಾಣಿಜ್ಯಿಕ ವಿಮಾನಗಳ ಮಾರ್ಗವೂ ಇರುವುದಿಲ್ಲ.

ಈ ಕಾರಣದಿಂದ ಬಲೂನ್‌ಗಳು ಯಾರ ಕಣ್ಣಿಗೂ ಕಾಣಿಸಿಕೊಳ್ಳುವುದಿಲ್ಲ. ಆ ಮೂಲಕ ರಹಸ್ಯವಾಗಿ ಮಾಹಿತಿ ಕಲೆ ಹಾಕಲು ಸಾಧ್ಯವಾಗುತ್ತದೆ. ಇಂತಹ ಬಲೂನ್‌ಗಳಲ್ಲಿ ನ್ಯಾವಿಗೇಶನ್ ವ್ಯವಸ್ಥೆ ಅಳವಡಿಸಲಾಗಿದ್ದು, ಅವುಗಳು ಈ ಬಲೂನ್‌ಗಳು ಪೂರ್ವ ನಿಗದಿತ ಪಥದಲ್ಲಿ ಚಲಿಸುವಂತೆ ನೋಡಿಕೊಳ್ಳುತ್ತವೆ. ಅವುಗಳಿಗೆ ಹೀಲಿಯಂ ಅಥವಾ ಹೈಡ್ರೋಜನ್ ಅನಿಲ ತುಂಬಿಸಿ, ಶಕ್ತಿ ನೀಡಲಾಗುತ್ತದೆ.

ಈ ಬಲೂನಿಗೆ ರೇಡಾರ್, ಇನ್‌ಫ್ರಾರೆಡ್ ಸೆನ್ಸರ್, ಹಾಗೂ ಸೋನಾರ್‌ಗಳನ್ನು ಅಳವಡಿಸಬಹುದಾಗಿದ್ದು, ಅವುಗಳು ನೆಲದ ಮೇಲಿನ ಚಟುವಟಿಕೆಗಳನ್ನು ಗಮನಿಸಬಹುದು. ಬಲೂನ್‌ಗಳಲ್ಲಿ ರಾತ್ರಿ ದೃಷ್ಟಿಯ ಕ್ಯಾಮರಾಗಳನ್ನು ಹಾಗೂ ಇತರ ಸೆನ್ಸರ್‌ಗಳನ್ನೂ ಅಳವಡಿಸಬಹುದಾಗಿದೆ. ನೆಲದ ಮೇಲಿರುವ ವಸ್ತುಗಳು, ವಾಹನಗಳನ್ನು ಗುರುತಿಸಲು ಸಾಧ್ಯವಾಗುವಂತಹ ಸೆನ್ಸರ್‌ಗಳನ್ನು ಅಳವಡಿಸಲು ಸಾಧ್ಯವಿದೆ.

ಈ ಬಲೂನ್‌ಗಳನ್ನು ರೇಡಿಯೋ ಕಂಟ್ರೋಲ್ ಹೊಂದಿರುವ ವಿಮಾನಗಳು, ಅಥವಾ ಕಂಪ್ಯೂಟರ್ ವ್ಯವಸ್ಥೆಗಳ ಮೂಲಕ ದೂರದಿಂದಲೇ ನಿಯಂತ್ರಿಸುತ್ತದೆ. ಇದರ ಮೂಲಕ ಕಲೆಹಾಕುವ ಮಾಹಿತಿಗಳನ್ನು ಮಿಷನ್ ಕಂಟ್ರೋಲ್ ಸೆಂಟರ್‌ಗೆ ಕಳುಹಿಸಲಾಗುತ್ತದೆ. ಅಲ್ಲಿ ಮಾಹಿತಿಗಳನ್ನು ವಿಶ್ಲೇಷಿಸಿ, ಕಾರ್ಯತಂತ್ರದ ನಿರ್ಧಾರಗಳಿಗೆ ಬಳಸಬಹುದು.

ಗೂಢಚರ್ಯೆಯ ಬಲೂನ್‌ಗಳು ವಿಚಕ್ಷಣೆಯ ಅತ್ಯಂತ ಪ್ರಬಲ ಉಪಕರಣಗಳಾಗಿವೆ. ಇವುಗಳನ್ನು ನೆಲದ ಮೇಲಿನ ಗುಪ್ತಚರ ಮಾಹಿತಿ ಕಲೆಹಾಕಲು ಬಳಸಲಾಗುತ್ತದೆ. ಇವುಗಳ ಬೆಲೆಯೂ ಸಾಕಷ್ಟು ಕಡಿಮೆಯೇ ಇರುವ ಕಾರಣ, ಹಲವು ಗುಪ್ತಚರ ಇಲಾಖೆಗಳು ಮತ್ತು ಇತರ ಸಂಸ್ಥೆಗಳಿಗೆ ಇವು ಸುಲಭದ ಆಯ್ಕೆಗಳಾಗಿವೆ.

(ಗಿರೀಶ್ ಲಿಂಗಣ್ಣ, ಬಾಹ್ಯಾಕಾಶ ಮತ್ತು ರಕ್ಷಣಾ ವಿಶ್ಲೇಷಕ)