ಬುರ್ಕಿನಾ ಫಾಸೋ ಸರಕಾರ ವಿಸರ್ಜನೆ

ಅಬಿಡ್ಜಾನ್ : ಬುರ್ಕಿನಾ ಫಾಸೋದ ಆಡಳಿತಾರೂಢ ಮಿಲಿಟರಿ ನಾಯಕ ಕ್ಯಾಪ್ಟನ್ ಇಬ್ರಾಹಿಂ ಟ್ರೇರ್ ಶುಕ್ರವಾರ ದೇಶದ ಪ್ರಧಾನಿಯನ್ನು ವಜಾಗೊಳಿಸಿ ಸರಕಾರವನ್ನು ವಿಸರ್ಜಿಸಿರುವುದಾಗಿ ಮೂಲಗಳನ್ನು ಉಲ್ಲೇಖಿಸಿ ಎಎಫ್‍ಪಿ ಸುದ್ದಿಸಂಸ್ಥೆ ವರದಿ ಮಾಡಿದೆ.

ವಜಾಗೊಂಡ ಪ್ರಧಾನಿ ಅಪೊಲಿನಯರ್ ಜೋಕಿಂ ಕೀಲೆಮ್‍ಡೆ ತಂಬೆಲಾ ಸತತ ಮೂರು ಸರ್ಕಾರಗಳ ಮುಖ್ಯಸ್ಥರಾಗಿ ಕಾರ್ಯ ನಿರ್ವಹಿಸಿದ್ದು ಪ್ರತೀ ಬಾರಿ ಸರ್ಕಾರ ಪುನರ್ರಚನೆಗೊಂಡಾಗಲೂ ತಮ್ಮ ಹುದ್ದೆ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದರು. ಇದೀಗ ತಂಬೇಲಾರನ್ನು ಯಾವುದೇ ಕಾರಣ ನೀಡದೆ ವಜಾಗೊಳಿಸಲಾಗಿದೆ. ಪ್ರಧಾನಮಂತ್ರಿಯ ಅಧಿಕೃತ ಕಾರ್ಯಕ್ರಮಗಳನ್ನು ರದ್ದುಗೊಳಿಸಲಾಗಿದೆ. ನೂತನ ಸರಕಾರ ರಚನೆಯಾಗುವವರೆಗೆ ವಿಸರ್ಜಿತ ಸರಕಾರ ಕಾರ್ಯ ನಿರ್ವಹಿಸುತ್ತದೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.

2022ರ ಜನವರಿಯಲ್ಲಿ ಚುನಾಯಿತ ಅಧ್ಯಕ್ಷ ರೋಚ್ ಮಾರ್ಕ್ ಕ್ರಿಶ್ಚಿಯನ್ ಕಬೋರೆಯನ್ನು ಕ್ಷಿಪ್ರ ದಂಗೆಯಲ್ಲಿ ಪದಚ್ಯುತಗೊಳಿಸಿದ್ದ ಸೇನಾ ಮುಖ್ಯಸ್ಥ ಲೆ|ಕ| ಸಾಂಡೊಗೊ ಡಮಿಬಾ ಅಧಿಕಾರ ವಶಪಡಿಸಿಕೊಂಡಿದ್ದರು. ಆದರೆ ಕೇವಲ 8 ತಿಂಗಳಲ್ಲಿ (2022ರ ಅಕ್ಟೋಬರ್‍ನಲ್ಲಿ) ನಡೆದ ಮತ್ತೊಂದು ದಂಗೆಯಲ್ಲಿ ಕ್ಯಾಪ್ಟನ್ ಇಬ್ರಾಹಿಂ ಟೇರ್ ಅಧಿಕಾರ ವಶಪಡಿಸಿಕೊಂಡಿದ್ದರು.