ನಾಳೆ ಮೂರನೇ ಏಕದಿನ | ಸರಣಿ ಸೋಲಿನಿಂದ ಪಾರಾಗುವ ವಿಶ್ವಾಸದಲ್ಲಿ ಭಾರತ
ಕೊಲಂಬೊ : ಶ್ರೀಲಂಕಾ ವಿರುದ್ಧ ಸುಮಾರು 3 ದಶಕಗಳ ನಂತರ ಮೊದಲ ಬಾರಿ ಸರಣಿ ಸೋಲಿನಿಂದ ಪಾರಾಗಲು ಭಾರತೀಯ ಬ್ಯಾಟ್ಸ್ಮನ್ಗಳು ಬುಧವಾರ ನಡೆಯಲಿರುವ ಮೂರನೇ ಹಾಗೂ ಅಂತಿಮ ಏಕದಿನ ಪಂದ್ಯದಲ್ಲಿ ಸ್ಪಿನ್ ಸವಾಲನ್ನು ದಿಟ್ಟವಾಗಿ ಎದುರಿಸಬೇಕಾಗಿದೆ.
ನಾಯಕ ರೋಹಿತ್ ಶರ್ಮಾ ಇದಕ್ಕೆ ದಾರಿ ಕೊಡಬಲ್ಲರು. ಆದರೆ ಉಳಿದ ಆಟಗಾರರು ನಾಯಕನ ಹಾದಿಯನ್ನು ಅನುಸರಿಸಬೇಕಾಗಿದೆ.
ಮುಖ್ಯ ಕೋಚ್ ಆಗಿ ತನ್ನ ಚೊಚ್ಚಲ ಏಕದಿನ ಸರಣಿಯಲ್ಲಿ ಗೌತಮ್ ಗಂಭೀರ್ ಸದ್ಯ ಉತ್ತಮ ಆರಂಭ ಪಡೆದಂತೆ ಕಾಣುತ್ತಿಲ್ಲ.
ಭಾರತವು 1997ರಲ್ಲಿ ಶ್ರೀಲಂಕಾ ವಿರುದ್ಧ ಕೊನೆಯ ಬಾರಿ ದ್ವಿಪಕ್ಷೀಯ ಏಕದಿನ ಸರಣಿಯನ್ನು ಸೋತಿತ್ತು. ಆನಂತರ ಉಭಯ ತಂಡಗಳ ನಡುವೆ ನಡೆದಿದ್ದ 11 ಏಕದಿನ ಅಂತರ್ರಾಷ್ಟ್ರೀಯ ಸರಣಿಯಲ್ಲಿ ಭಾರತವು ಸೋತಿಲ್ಲ.
ಮೊದಲ ಪಂದ್ಯ ಟೈ ಗೊಂಡ ನಂತರ ಎರಡನೇ ಪಂದ್ಯದಲ್ಲಿ 32 ರನ್ನಿಂದ ಸೋತಿರುವ ಭಾರತವು ಸದ್ಯ ಸಂಕಷ್ಟದಲ್ಲಿದೆ. ಬುಧವಾರ ಪ್ರೇಮದಾಸ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ಭಾರತಕ್ಕೆ ಸರಣಿ ಸೋಲಿನಿಂದ ಪಾರಾಗುವ ಕಠಿಣ ಸವಾಲು ಎದುರಾಗಿದೆ.
ಸರಣಿಯಲ್ಲಿ ಭಾರತದ ಬ್ಯಾಟರ್ಗಳು, ಸ್ಪಿನ್ನರ್ಗಳ ಸ್ನೇಹಿ ಪಿಚ್ನಲ್ಲಿ ರನ್ ಗಳಿಸಲು ಪರದಾಡುತ್ತಿದ್ದಾರೆ. ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ 2 ಪಂದ್ಯಗಳಲ್ಲಿ ಕೇವಲ 38 ರನ್ ಗಳಿಸಿದ್ದಾರೆ. ಕೊಹ್ಲಿ ಔಟಾಗಿರುವ ರೀತಿಯು ಕಳವಳಕಾರಿಯಾಗಿದೆ.
ಎರಡು ಪಂದ್ಯಗಳಲ್ಲಿ ರೋಹಿತ್ ಉತ್ತಮ ಆರಂಭ ಒದಗಿಸಿದ್ದರೂ ಅದನ್ನು ಸದುಪಯೋಗಪಡಿಸಿಕೊಳ್ಳುವಲ್ಲಿ ಕೊಹ್ಲಿ ವಿಫಲರಾಗಿದ್ದಾರೆ. ರೋಹಿತ್ ಅವರು ಸರಣಿಯಲ್ಲಿ ಒಟ್ಟು 122 ರನ್ ಗಳಿಸಿದ್ದು, ಬೌಂಡರಿ ಹಾಗೂ ಸಿಕ್ಸರ್ಗಳ ಮೂಲಕವೇ 90 ರನ್ ಸಿಡಿಸಿದ್ದರು.
ಮಾಸ್ಟರ್ ಬ್ಯಾಟರ್ ಕೊಹ್ಲಿ ಮೊದಲ ಪಂದ್ಯದಲ್ಲಿ ಲೆಗ್ ಸ್ಪಿನ್ನರ್ ವನಿಂದು ಹಸರಂಗ ಹಾಗೂ ಎರಡನೇ ಪಂದ್ಯದಲ್ಲಿ 6 ವಿಕೆಟ್ ಗೊಂಚಲು ಪಡೆದಿದ್ದ ಜೆಫ್ರಿ ವಾಂಡರ್ಸೆ ವಿರುದ್ಧ ಪರದಾಟ ನಡೆಸಿದ್ದರು. ಮಧ್ಯಮ ಓವರ್ಗಳಲ್ಲಿ ಭಾರತದ ಯಶಸ್ಸು ಕೊಹ್ಲಿ ಅವರನ್ನು ಹೆಚ್ಚು ಅವಲಂಬಿಸಿದೆ. ಕೊಹ್ಲಿ ಭಾರತದ ಪರ ಎಲ್ಲ ಮಾದರಿಯ ಕ್ರಿಕೆಟ್ನಲ್ಲಿ ಹಿಂದಿನ 15 ಇನಿಂಗ್ಸ್ಗಳಲ್ಲಿ ಒಂದು ಬಾರಿ ಮಾತ್ರ ಅರ್ಧಶತಕ ಗಳಿಸಿದ್ದಾರೆ.
ಶಿವಂ ದುಬೆ ಎರಡನೇ ಏಕದಿನ ಪಂದ್ಯದಲ್ಲಿ ವಾಂಡರ್ಸೆ ಅವರ ಸರಳ ಲೆಗ್ ಬ್ರೇಕ್ ಗುರುತಿಸುವಲ್ಲಿ ವಿಫಲರಾಗಿ ಎಲ್ಬಡಬ್ಲ್ಯು ಬಲೆಗೆ ಬಿದ್ದಿದ್ದರು. ಸ್ಪಿನ್ನರ್ಗಳ ಎದುರು ಉತ್ತಮವಾಗಿ ಆಡಬಲ್ಲ ಶ್ರೇಯಸ್ ಅಯ್ಯರ್ ಹಾಗೂ ಕೆ.ಎಲ್.ರಾಹುಲ್ ಲಂಕಾದ ಸ್ಪಿನ್ನರ್ಗಳ ಎದುರು ಪರದಾಡಿದ್ದಾರೆ.
ರೋಹಿತ್ ಅವರು ಲಂಕಾದ ಸ್ಪಿನ್ ಹಾಗೂ ವೇಗದ ಬೌಲಿಂಗ್ನ್ನು ಸಮರ್ಥವಾಗಿ ಎದುರಿಸುತ್ತಿದ್ದಾರೆ. 2ನೇ ಪಂದ್ಯದಲ್ಲಿ 44 ಎಸೆತಗಳಲ್ಲಿ 64 ರನ್ ಗಳಿಸಿದ್ದರು.
ಬುಧವಾರ ಆಡುವ 11ರ ಬಳಗ ನಿರ್ಧರಿಸುವಾಗ ಟೀಮ್ ಮ್ಯಾನೇಜ್ಮೆಂಟ್ ದುಬೆ ಅವರನ್ನು ಕೈಬಿಡುವ ಕುರಿತು ಯೋಚಿಸಬೇಕಾಗಿದೆ. ಕೊಲಂಬೊದ ಪಿಚ್ ಅನ್ನು ಪರಿಗಣಿಸಿದರೆ ಬ್ಯಾಟಿಂಗ್ ಆಲ್ರೌಂಡರ್ ರಿಯಾನ್ ಪರಾಗ್ಗೆ ಅವಕಾಶ ನೀಡಿದರೆ ಹೆಚ್ಚು ಉಪಯುಕ್ತವಾಗಲಿದೆ.
ಭಾರತದ ಬೌಲರ್ಗಳು ಪಂದ್ಯದ ನಿರ್ಣಾಯಕ ಹಂತದಲ್ಲಿ ಉತ್ತಮ ಪ್ರದರ್ಶನ ನೀಡುವ ಅಗತ್ಯವಿದೆ. ಹಿಂದಿನ ಪಂದ್ಯದಲ್ಲಿ ಲಂಕಾವು 142 ರನ್ಗೆ 6 ವಿಕೆಟ್ಗಳನ್ನು ಕಳೆದುಕೊಂಡಿದ್ದರೂ ಆತಿಥೇಯರನ್ನು ಕಟ್ಟಿಹಾಕುವಲ್ಲಿ ವಿಫಲರಾಗಿದ್ದರು.
2ನೇ ಪಂದ್ಯದಲ್ಲಿ ವಿಕೆಟ್ ನಷ್ಟವಿಲ್ಲದೆ 97 ರನ್ ಗಳಿಸಿದ್ದ ಭಾರತ 147 ರನ್ಗೆ 6 ವಿಕೆಟ್ ಕಳೆದುಕೊಳ್ಳಲು ಕಾರಣವಾಗಿದ್ದ ಸ್ಪಿನ್ನರ್ಗಳ ಮೇಲೆ ಶ್ರೀಲಂಕಾ ಭಾರೀ ವಿಶ್ವಾಸ ಇರಿಸಿಕೊಂಡಿದೆ. ನಾಯಕ ಚರಿತ್ ಅಸಲಂಕಾ 61 ಪಂದ್ಯಗಳಲ್ಲಿ 11 ವಿಕೆಟ್ ಪಡೆದಿದ್ದಾರೆ. 10 ವಿಕೆಟ್ ಅನ್ನು ಭಾರತ ವಿರುದ್ಧವೇ ಕಬಳಿಸಿದ್ದರು. ಆರು ವಿಕೆಟ್ ಪ್ರಸಕ್ತ ಸರಣಿಯಲ್ಲಿ ಉರುಳಿಸಿದ್ದರು.
ಪಂದ್ಯದ ಸಮಯ: ಮಧ್ಯಾಹ್ನ 2:30
