ಮಹಾತ್ಮಾ ಗಾಂಧೀಜಿ ಸತ್ಯವನ್ನು ಅನುಸರಿಸಲು ಬಯಸಿದ ಆಧ್ಯಾತ್ಮಿಕ ಸಾಧಕ : ಶ್ರೀಕೃಷ್ಣ ಗಜಾನನ ಕುಲಕರ್ಣಿ

ಮಂಗಳೂರು: ಮಹಾತ್ಮಾ ಗಾಂಧೀಜಿಯವರು ಮೂಲತಃ ಸತ್ಯವನ್ನು ಅನುಸರಿಸಲು ಬಯಸಿದ ಆಧ್ಯಾತ್ಮಿಕ ಸಾಧಕರಾಗಿದ್ದರು ಎಂದು ಮಹಾತ್ಮಾ ಗಾಂಧೀಜಿಯವರ ಮರಿಮಗ ಶ್ರೀಕೃಷ್ಣ ಗಜಾನನ ಕುಲಕರ್ಣಿ ಅಭಿಪ್ರಾಯಪಟ್ಟಿದ್ದಾರೆ.

ಕರ್ನಾಟಕ ಗಾಂಧಿ ಸ್ಮಾರಕ ನಿಧಿ ಬೆಂಗಳೂರು, ಮಂಗಳೂರು ವಿಶ್ವವಿದ್ಯಾನಿಲಯ ಕಾಲೇಜು, ತುಳು ಅಧ್ಯಯನ ಪೀಠ ಮಂಗಳೂರು ,ಕುಂಬ್ರ ಜತ್ತಪ್ಪ ರೈ ಪ್ರತಿಷ್ಠಾನ ಪುತ್ತೂರು, ಮಂಗಳೂರು ವಿಶ್ವ ವಿದ್ಯಾನಿಲಯದ ರಾಷ್ಟ್ರೀಯ ಸೇವಾ ಯೋಜನೆ ಇವುಗಳ ಸಂಯುಕ್ತ ಆಶ್ರಯದಲ್ಲಿ ನಗರದ ವಿಶ್ವವಿದ್ಯಾ ನಿಲಯ ಕಾಲೇಜಿನ ರವೀಂದ್ರ ಕಲಾಭ ವನದಲ್ಲಿ ಗುರುವಾರ ನಡೆದ ಗಾಂಧಿವಾದಿ, ಸ್ವಾತಂತ್ರ್ಯ ಹೋರಾಟಗಾರ ಕುಂಬ್ರ ಜತ್ತಪ್ಪರೈಯವರ ಜೀವನದ ಬಗೆಗಿನ ಕೃತಿ ‘ಗಾಂಧಿ ಪಜ್ಜೆದ ಸಾದಿ ಪತ್ತೊಂದು’ ತುಳು ಭಾಷಾಂತರ ಪುಸ್ತಕದ ಬಿಡುಗಡೆ ಹಾಗೂ ವಿಚಾರ ಸಂಕಿರಣ ಕಾರ್ಯಕ್ರಮದಲ್ಲಿ ಗಾಂಧಿ ಮತ್ತು ವಿಶ್ವಶಾಂತಿ’ ವಿಷಯದ ಬಗ್ಗೆ ಉಪನ್ಯಾಸ ನೀಡಿದರು.

ಸನ್ನಿವೇಶಗಳು ಅವರನ್ನು ಸಾಮಾಜಿಕ ಮತ್ತು ರಾಜಕೀಯ ರಂಗಕ್ಕೆ ತಳ್ಳಿದವು. ಗಾಂಧೀಜಿಯವರ ಚಿಂತನೆಗಳು ಉಪನಿಷತ್ತುಗಳು, ವೇದಗಳು ಮತ್ತು ಭಗವದ್ಗೀತೆಯಲ್ಲಿ ಆಳವಾಗಿ ಬೇರೂರಿದ್ದವು. ಗೀತೆ ಅವರ ಆಧ್ಯಾತ್ಮಿಕ ತಾಯಿಯಾಗಿತ್ತು ಎಂದರು.

ಅಹಂಕಾರ ಪ್ರೇರಿತ ಹಾಗೂ ಸ್ವಾರ್ಥದಿಂದ ಕೂಡಿದ ಕಥನಗಳನ್ನು ಎಂದಿಗೂ ಸತ್ಯವೆಂದು ಪರಿಗಣಿಸಲು ಸಾಧ್ಯವಿಲ್ಲ. ಗಾಂಧೀಜಿಯವರ ಪ್ರಕಾರ ಸತ್ಯ ಎಂಬುದು ಕೇವಲ ದೈನಂದಿನ ಅಥವಾ ವೈಯಕ್ತಿಕ ಸತ್ಯವಲ್ಲ, ಅದು ಶಾಶ್ವತವಾದ ಅಂತಿಮ ಸತ್ಯ. ಇಡೀ ಜಗತ್ತೇ ನಿಮ್ಮ ವಿರುದ್ಧ ನಿಂತರೂ, ನೀವು ನಿಂತಿರುವುದು ಸತ್ಯದ ಪರವಾಗಿ ಎಂಬ ನಂಬಿಕೆ ನಿಮಗಿದ್ದರೆ, ನೀವು ಆ ಸತ್ಯದ ಪರವಾಗಿ ಮಾತ್ರವೇ ಗಟ್ಟಿಯಾಗಿ ನಿಲ್ಲಬೇಕು ಎಂದು ಅವರು ಹೇಳಿದರು.

ಗಾಂಧೀಜಿಯವರ ಅಹಿಂಸಾ ತತ್ವವನ್ನು ಪ್ರಸ್ತಾಪಿಸಿದ ಅವರು, ಭಗವದ್ಗೀತೆಯಲ್ಲಿ ಉಲ್ಲೇಖಿಸಲಾದ ಅಹಿಂಸೆ, ಸತ್ಯ, ಕ್ರೋಧಮುಕ್ತಿ, ತ್ಯಾಗ ಮತ್ತು ಶಾಂತಿಯ ಮೌಲ್ಯಗಳನ್ನು ಸ್ಮರಿಸಿದರು.

ಬೆಂಗಳೂರು ಇದರ ಕರ್ನಾಟಕ ಗಾಂಧಿ ಸ್ಮಾರಕನಿಧಿ ಅಧ್ಯಕ್ಷ ನಾಡೋಜ ಡಾ.ವೂಡೇ ಪಿ. ಕೃಷ್ಣ ಕಾರ್ಯಕ್ರಮ ವನ್ನು ಉದ್ಘಾಟಿಸಿ, ದಿಕ್ಚೂಚಿ ಭಾಷಣ ಮಾಡಿ ' ಸೇವೆ ಮತ್ತು ತ್ಯಾಗ, ಸತ್ಯ ಮತ್ತು ಅಹಿಂಸೆಯ ತತ್ವಗಳ ಮೇಲೆ ಭಾರತ ವನ್ನು ಸ್ವಾತಂತ್ರ ಹೋರಾಟಗಾರರು ಕಟ್ಟಿದರು. ಅವರ ಕನಸನ್ನು ನನಸು ಮಾಡಬೇಕಾಗಿರುವುದು ನಮ್ಮ ಜವಾಬ್ದಾರಿಯಾಗಿದೆ ಎಂದು ನುಡಿದರು. ಮಹಾತ್ಮಾ ಗಾಂಧಿ ತಮ್ಮ ಬದುಕಿನಲ್ಲಿ ಮೂಲಭೂತವಾದಿಗಳ ವಿರುದ್ಧ , ಹಿಂಸೆಪ್ರತಿವಾದಿಗಳ ಮತ್ತು ಕೋಮವಾದಿಗಳ ವಿರುದ್ಧ ಹೋರಾಡಿದರು. ಭಾರತ ಇರುವವರೆಗೆ ಗಾಂಧಿ ಬೇಕು. ಗಾಂಧಿಯನ್ನು ಬಿಟ್ಟು ಭಾರತ ಇಲ್ಲ , ಗಾಂಧಿ ಬಿಟ್ಟು ಭಾರತ ಇಲ್ಲ. ಅವರ ಬದುಕೇ ಅವರ ಸಂದೇಶವಾಗಿದೆ. ಗಾಂಧಿಯನ್ನು ಅಧ್ಯಯನ ಮಾಡಿ, ಅರ್ಥಮಾಡಿಕೊಂಡರೆ ಭಾರತದ ಆತ್ಮವನ್ನು ಅರಿತುಕೊಂಡಂತೆ ಎಂದು ನಾವು ಅರ್ಥ ಮಾಡಿಕೊಳ್ಳಬೇಕಾಗಿದೆ ಎಂದು ಹೇಳಿದರು. ವಿಶ್ರಾಂತ ಕುಲಪತಿ ಪ್ರೊ.ಬಿ.ಎ. ವಿವೇಕ ರೈ ಪುಸ್ತಕ ಬಿಡುಗಡೆ ಮಾಡಿದರು. ಮಂಗಳೂರು ವಿಶ್ವವಿದ್ಯಾನಿಲಯದ ಉಪಕುಲಪತಿ ಪ್ರೊ.ಪಿ.ಎಲ್.ಧರ್ಮ ಅಧ್ಯಕ್ಷತೆ ವಹಿಸಿದ್ದರು.

ಕುಪ್ಪ ದ್ರಾವಿಡಿಯನ್ ವಿಶ್ವವಿದ್ಯಾನಿಲಯದ ಕುಲಪತಿ ಪ್ರೊ.ಎಲ್.ಸಿ. ಮಲ್ಲಯ್ಯ, ಮಂಗಳೂರು ಡಿಐಜಿಪಿ ಆರ್.ಚೇತನ್,  ಹಿರಿಯ ಗಾಂಧಿ ಚಿಂತಕ ಪ್ರೊ. ಜಿ. ಶಿವರಾಜ್ ಉಪಸ್ಥಿತರಿದ್ದರು.

ಪುತ್ತೂರಿನ ಕುಂಬ್ರ ಜತ್ತಪ್ಪ ರೈ ಪ್ರತಿಷ್ಠಾನ ಕಜೆಮಾರು ಸಂಸ್ಥಾಪಕ ಕೆ. ಪ್ರಮೋದ್ ಕುಮಾರ್ ರೈ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಂಗಳೂರು ವಿವಿ ಕಾಲೇಜಿನ ಪ್ರಾಂಶುಪಾಲ ಪ್ರೊ. ಜಯವಂತ ನಾಯಕ್ ಸ್ವಾಗತಿಸಿದರು. ಮಂಗಳೂರು ವಿವಿ ಎನ್‌ಎನ್‌ಎಸ್ ಸಂಯೋಜನಾಧಿಕಾರಿ ಡಾ.ಶೇಷಪ್ಪ ಅಮಿನ್ ಕೆ ವಂದಿಸಿದರು. ಎಸ್‌ಡಿಎಂ ಕಾಲೇಜಿನ ಎನ್‌ಎಸ್‌ಎಸ್ ಕಾರ್ಯದರ್ಶಿ ವಾರಿಣಿ ನಾಗರಾಜ್ ಕಾರ್ಯಕ್ರಮ ನಿರೂಪಿಸಿದರು.