ಮಂಗಳೂರು: 'ಎ ಹೋಲ್ ಇನ್ ದಿ ಬೋಟ್' ಪುಸ್ತಕ ಬಿಡುಗಡೆ

ಮಂಗಳೂರು, ಆ.10: ಡಾ.ಅಬ್ದುಲ್ ಹಮೀದ್ ಅಥರ್ ನದ್ವಿ ಬರೆದ 'ಎ ಹೋಲ್ ಇನ್ ದಿ ಬೋಟ್' (A Hole in the Boat) ಪುಸ್ತಕದ ಬಿಡುಗಡೆ ಕಾರ್ಯಕ್ರಮ ಶನಿವಾರ ಮಂಗಳೂರಿನ ಮೇಲಿನಮೊಗೇರುವಿನಲ್ಲಿರುವ ಇಕ್ರಾ ಬಾಲಕಿಯರ ಅರಬಿಕ್ ಶಾಲೆಯಲ್ಲಿ ನಡೆಯಿತು.

ಇಕ್ರಾ ಅಕಾಡಮಿ ಆಫ್ ರಿಸರ್ಚ್ ಆಂಡ್ ಪಬ್ಲಿಕೇಷನ್ (IARP) ಪ್ರಕಟಿಸಿರುವ ಕೃತಿಯನ್ನು ವೇದಿಕೆಯಲ್ಲಿದ್ದ ಗಣ್ಯರು ಬಿಡುಗಡೆ ಮಾಡಿದರು.

ಈ ಸಂದರ್ಭ ಮಾತನಾಡಿದ ಅನುವಾದಕಿ ಝೈನಬ್, ಭಾಷೆಯ ಅಡೆತಡೆಗಳ ಕಾರಣಕ್ಕೆ ಮೌಲ್ಯಯುತವಾದ ಅನೇಕ ಇಸ್ಲಾಮಿಕ್ ಕೃತಿಗಳು ಜನರನ್ನು ತಲುಪಲು ಸಾಧ್ಯವಾಗುತ್ತಿಲ್ಲ. ಆದ್ದರಿಂದ ಅಧಿಕೃತ ಇಸ್ಲಾಮಿಕ್ ಸಾಹಿತ್ಯವನ್ನು ಇಂಗ್ಲಿಷ್, ಕನ್ನಡ, ಮಲಯಾಳಂ, ತಮಿಳು ಮತ್ತು ಹಿಂದಿ ಮುಂತಾದ ಭಾಷೆಗಳಿಗೆ ಅನುವಾದಿಸುವುದು ತುಂಬಾ ಅವಶ್ಯ ಎಂದವರು ಅಭಿಪ್ರಾಯಪಟ್ಟರು.

ಉತ್ತಮ ಮಾರ್ಗದರ್ಶಕರ ಮತ್ತು ಉಲಮಾಗಳ ಮಾರ್ಗದರ್ಶನದಲ್ಲಿ ಪಡೆದಾಗ ಮಾತ್ರ ಜ್ಞಾನವು ನಿಜವಾಗಿಯೂ ಪ್ರಯೋಜನಕಾರಿಯಾಗುತ್ತವೆ. ತನ್ನ ತಂದೆ ಚಿಕ್ಕ ವಯಸ್ಸಿನಿಂದಲೇ ಇಸ್ಲಾಮಿಕ್ ನೈತಿಕತೆ, ಇತಿಹಾಸ, ಸೀರಾ ಮತ್ತು ವ್ಯಕ್ತಿತ್ವ ನಿರ್ಮಾಣಕ್ಕೆ ಸಂಬಂಧಿಸಿದ ಸಾಹಿತ್ಯವನ್ನು ಓದುವಂತೆ ಪ್ರೋತ್ಸಾಹಿಸುತ್ತಿದ್ದರು ಎಂದು ಹೇಳಿದರು.

ವಿದ್ಯಾರ್ಥಿಗಳು ತಮ್ಮನ್ನು ತಾವು ಭವಿಷ್ಯದ ಅನುವಾದಕರು, ಲೇಖಕರು, ಸಂಶೋಧಕರು, ಪ್ರಕಾಶಕರು ಮತ್ತು ಇಸ್ಲಾಮಿಕ್ ಜ್ಞಾನದ ರಾಯಭಾರಿಗಳಾಗಿ ಕಾಣಬೇಕು ಎಂದು ಕರೆ ನೀಡಿದ ಅವರು, ಯುವಜನತೆ ಮೊಬೈಲ್ ಫೋನ್ ಗಳು ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ ವ್ಯರ್ಥ ಮಾಡುವ ಅನಗತ್ಯ ಸಮಯವನ್ನು ಕಡಿಮೆ ಮಾಡಬೇಕು. ದಿನಕ್ಕೆ ಕನಿಷ್ಠ ಇಪ್ಪತ್ತು ನಿಮಿಷಗಳನ್ನಾದರೂ ಉತ್ತಮ ಓದಿಗಾಗಿ ಮೀಸಲಿಡುವಂತೆ ಮನವಿ ಮಾಡಿದರು.

ಇಕ್ರಾ ಸಂಸ್ಥೆಯಲ್ಲಿ ತಮ್ಮ 14 ವರ್ಷಗಳ ಶೈಕ್ಷಣಿಕ ಪ್ರಯಾಣವನ್ನು ಸ್ಮರಿಸಿದ ಝೈನಬ್, ಇದು ತನ್ನ ಕಲಿಕೆ, ವ್ಯಕ್ತಿತ್ವ ನಿರ್ಮಾಣ ಮತ್ತು ಆಧ್ಯಾತ್ಮಿಕ ಬೆಳವಣಿಗೆಯ ಅವಧಿ ಎಂದು ಅಭಿಪ್ರಾಯಿಸಿದರು.

ಇಕ್ರಾ ಅರಬಿಕ್ ಸ್ಕೂಲ್ ಪ್ರಾಂಶುಪಾಲ ಮೌಲಾನ ಸಾಲಿಂ ನದ್ವಿ, ಉಪ ಪ್ರಾಂಶುಪಾಲ ಮೌಲಾನ ದಾವೂದ್ ನದ್ವಿ, ಅರಬಿಕ್ ವಿಭಾಗದ ಮುಖ್ಯಸ್ಥ ಮೌಲಾನ ಅಬ್ದುಲ್ ರಫಿ ನದ್ವಿ, ಮೊಹಮ್ಮದ್ ಫರ್ಹಾನ್ ನದ್ವಿ, ಅಬ್ದುಲ್ ಹಮೀದ್ ಖಲೀಫಾ ವೇದಿಕೆಯಲ್ಲಿ ಉಪಸ್ಥಿತರಿದ್ದರು.

ಕಾರ್ಯಕ್ರಮದಲ್ಲಿ ಉಲಮಾಗಳು, ಶಿಕ್ಷಕರು, ಪೋಷಕರು, ವಿದ್ಯಾರ್ಥಿಗಳು ಹಾಗೂ ಹಿತೈಷಿಗಳು ಭಾಗವಹಿಸಿದ್ದರು.