ಒಝೆಂಪಿಕ್‌ ನಂತಹ GLP-1 ಔಷಧಿಗಳು ದೃಷ್ಟಿದೋಷಕ್ಕೆ ಕಾರಣವಾಗಬಹುದೇ?

ಒಝೆಂಪಿಕ್ ಮತ್ತು ಮೌಂಜಾರೋದಂತಹ ಜನಪ್ರಿಯ ತೂಕ ಇಳಿಸುವ ಔಷಧಿಗಳನ್ನು ತಯಾರಿಸುವ GLP-1 ಕಂಪೆನಿಗಳ ವಿರುದ್ಧ ಅಮೆರಿಕದಲ್ಲಿ ಹಲವರು ಮೊಕದ್ದಮೆ ಹೂಡಿದ್ದಾರೆ. ತಮ್ಮ ಉತ್ಪನ್ನಗಳಿಂದ ಶಾಶ್ವತ ದೃಷ್ಟಿ ಕಳೆದುಕೊಳ್ಳುವುದಕ್ಕೆ ಕಾರಣವಾಗಬಹುದಾದ ಅಪರೂಪದ ಕಾಯಿಲೆ ಉಂಟಾಗಿದೆ ಎಂದು ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ.

ಅಮೆರಿಕದಲ್ಲಿ ಲಕ್ಷಾಂತರ ಜನರು ಈ ಔಷಧಿಗಳನ್ನು ಸೇವಿಸುತ್ತಿದ್ದು, ದೇಶದಲ್ಲಿ ವ್ಯಾಪಕವಾಗಿ ಹಬ್ಬಿರುವ ಬೊಜ್ಜನ್ನು ತಡೆಯಲು ಇವು ನೆರವಾಗುತ್ತಿವೆ. ಮುಂದಿನ 10 ವರ್ಷಗಳಲ್ಲಿ ಈ ಉದ್ಯಮವು ಸುಮಾರು 100 ಬಿಲಿಯನ್ ಡಾಲರ್ ವಾರ್ಷಿಕ ಮಾರಾಟವನ್ನು ಗಳಿಸುವ ನಿರೀಕ್ಷೆಯಿದೆ ಎಂದು ವಿಶ್ಲೇಷಕರು ಅಂದಾಜಿಸಿದ್ದಾರೆ. ಆದರೆ ಪ್ರಸ್ತುತ ಎದುರಾಗಿರುವ ಈ ಪ್ರಕರಣಗಳು ಮತ್ತು ಸಂಭಾವ್ಯ ಅಪಾಯಗಳು ಈ ಹೊಸ ಉದ್ಯಮಕ್ಕೆ ದೊಡ್ಡ ಸವಾಲಾಗಿ ಪರಿಣಮಿಸಬಹುದು.

ಈ ಮೊಕದ್ದಮೆಗಳಿಗೆ ಯಾವುದೇ ಆಧಾರವಿಲ್ಲ ಮತ್ತು ಕಂಪೆನಿಯು ಇದನ್ನು ಬಲವಾಗಿ ವಿರೋಧಿಸುತ್ತಿದೆ ಎಂದು ವೆಗೋವಿ ಮತ್ತು ಒಝೆಂಪಿಕ್ ತಯಾರಿಸುವ ಪ್ರಮುಖ ಔಷಧೀಯ ಕಂಪೆನಿಯಾದ ನೊವೊ ನಾರ್ಡಿಸ್ಕ್ ಸಂಸ್ಥೆಯ ವಕ್ತಾರರು ಹೇಳಿರುವುದಾಗಿ 'ದಿ ವಾಲ್ ಸ್ಟ್ರೀಟ್ ಜರ್ನಲ್' ವರದಿ ಮಾಡಿದೆ. ಮತ್ತೊಂದೆಡೆ, ಜೆಪ್ಬೌಂಡ್ ಉತ್ಪಾದಿಸುವ ಎಲಿ ಲಿಲ್ಲಿ ಸಂಸ್ಥೆಯು ಕಾನೂನು ಹೋರಾಟದ ಕುರಿತು ಯಾವುದೇ ಪ್ರತಿಕ್ರಿಯೆ ನೀಡಿಲ್ಲವಾದರೂ, ಸಂಭಾವ್ಯ ಆರೋಗ್ಯ ಅಪಾಯಗಳ ಕುರಿತ ಮಾಹಿತಿಯನ್ನು ಪರಿಶೀಲಿಸುತ್ತಿರುವುದಾಗಿ ತಿಳಿಸಿದೆ.

ಈ ಔಷಧಿಗಳು ನಾನ್ಆರ್ಟೆರಿಟಿಕ್ ಆಂಟೀರಿಯರ್ ಇಸ್ಕೆಮಿಕ್ ಆಪ್ಟಿಕ್ ನ್ಯೂರೋಪತಿ (NAION) ಎಂಬ ಕಣ್ಣಿನ ಕಾಯಿಲೆಗೆ ಕಾರಣವಾಗುತ್ತವೆ ಎಂದು ಮೊಕದ್ದಮೆಗಳಲ್ಲಿ ಆರೋಪಿಸಲಾಗಿದೆ. ಈ ಸ್ಥಿತಿಯು ಕಣ್ಣಿಗೆ ಸರಿಯಾದ ರಕ್ತಪರಿಚಲನೆಯನ್ನು ತಡೆಯುತ್ತದೆ ಮತ್ತು ದೃಷ್ಟಿನಾಳಕ್ಕೆ ಹಾನಿ ಮಾಡುತ್ತದೆ, ಇದು ಅಂತಿಮವಾಗಿ ಶಾಶ್ವತ ದೃಷ್ಟಿ ನಷ್ಟಕ್ಕೆ ದಾರಿ ಮಾಡಿಕೊಡಬಹುದು.

ಪೆನ್ಸಿಲ್ವೇನಿಯಾದ ಮಹಿಳೆಯೊಬ್ಬರು 'ದಿ ವಾಷಿಂಗ್ಟನ್ ಪೋಸ್ಟ್'ಗೆ ವಿವರಿಸಿದಂತೆ, ತಮ್ಮ ಮಧುಮೇಹಕ್ಕೆ ಔಷಧಿಯನ್ನು ಸೇವಿಸಿದ ಬಳಿಕ ತಮಗೆ ಫಿಶ್ ಬೌಲ್ ಮೂಲಕ ನೋಡಿದಂತೆ ದೃಷ್ಟಿ ಮಂದವಾಯಿತು ಎಂದು ತಿಳಿಸಿದ್ದಾರೆ. ಎರಡು ವಾರಗಳ ನಂತರ ಅವರಿಗೆ NAION ಇರುವುದು ಪತ್ತೆಯಾಯಿತು.

ಈ ಕಾಯಿಲೆ ಮತ್ತು ತೂಕ ಇಳಿಸುವ ಔಷಧಿಗಳ ನಡುವಿನ ಸಂಭಾವ್ಯ ಸಂಬಂಧದ ಬಗ್ಗೆ ವಿಜ್ಞಾನಿಗಳು ವರ್ಷಗಳಿಂದ ಸಂಶೋಧನೆ ನಡೆಸುತ್ತಿದ್ದಾರೆ, ಆದರೆ ಅವರ ಸಂಶೋಧನೆಯ ಫಲಿತಾಂಶಗಳು ವಿಭಿನ್ನವಾಗಿವೆ.

►NAION ಎಂದರೇನು?

ದೃಷ್ಟಿನಾಳಕ್ಕೆ ರಕ್ತಪರಿಚಲನೆಯು ನೋವಿಲ್ಲದೆ ಹಠಾತ್ತನೆ ಕಡಿಮೆಯಾಗುವುದರಿಂದ ದೃಷ್ಟಿ ಕಳೆದುಕೊಳ್ಳುವ ಸ್ಥಿತಿಯನ್ನು NAION ಎನ್ನಲಾಗುತ್ತದೆ. ಇದನ್ನು ಸಾಮಾನ್ಯವಾಗಿ "ಕಣ್ಣಿನ ಪಾರ್ಶ್ವವಾಯು" ಎಂದೂ ಕರೆಯಲಾಗುತ್ತದೆ.

ಈ ಹಾನಿಯು ಸಾಮಾನ್ಯವಾಗಿ ಗುಣಪಡಿಸಲು ಅಸಾಧ್ಯವಾದದ್ದು ಮತ್ತು ಇದು ಅತ್ಯಂತ ಅಪರೂಪ. GLP-1 ಔಷಧಿಗಳನ್ನು ಸೇವಿಸಿದ ರೋಗಿಗಳಲ್ಲಿ ಈ ಕಾಯಿಲೆ ಕಾಣಿಸಿಕೊಳ್ಳುವ ಸಾಧ್ಯತೆ ಹೆಚ್ಚು ಎಂಬುದನ್ನು ವೈಜ್ಞಾನಿಕ ಸಂಶೋಧನೆಗಳು ತೋರಿಸಿವೆ. ಆದರೆ ಈ ಔಷಧಿಗಳು ಈ ಸಮಸ್ಯೆಗಳಿಗೆ ಹೇಗೆ ಅಥವಾ ನಿಜಕ್ಕೂ ಕಾರಣವಾಗುತ್ತವೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಈ ಮಧ್ಯೆ, GLP-1 ಔಷಧಿಯನ್ನು ಸೇವಿಸಲು ಪ್ರಾರಂಭಿಸಿದ ಮೊದಲ ಆರು ತಿಂಗಳಿಂದ ಹದಿನೆಂಟು ತಿಂಗಳ ಒಳಗೆ ಈ ಕಾಯಿಲೆ ಕಾಣಿಸಿಕೊಳ್ಳುತ್ತದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.

►ಯಾವೆಲ್ಲಾ ಮೊಕದ್ದಮೆಗಳನ್ನು ಹೂಡಲಾಗಿದೆ?

ತಮ್ಮ ಉತ್ಪನ್ನಗಳನ್ನು ಸೇವಿಸುತ್ತಿರುವಾಗ NAION ಕಾಯಿಲೆಗೆ ತುತ್ತಾದ ರೋಗಿಗಳ ಪರವಾಗಿ, ಅಮೆರಿಕದ ನ್ಯೂಜೆರ್ಸಿ ರಾಜ್ಯ ನ್ಯಾಯಾಲಯದಲ್ಲಿ 2025ರಿಂದ ನೊವೊ ನಾರ್ಡಿಸ್ಕ್ ಸಂಸ್ಥೆಯ ವಿರುದ್ಧ 'Weitz & Luxembourg' ಎಂಬ ವೈಯಕ್ತಿಕ ಹಾನಿಗೆ ಸಂಬಂಧಿಸಿದ ಕಾನೂನು ಸಂಸ್ಥೆ 90ಕ್ಕೂ ಹೆಚ್ಚು ಮೊಕದ್ದಮೆಗಳನ್ನು ದಾಖಲಿಸಿದೆ.

ಜೊತೆಗೆ, GLP-1 ಚಿಕಿತ್ಸೆಗಳು NAIONಗೆ ಕಾರಣವಾಗಿವೆ ಮತ್ತು ಔಷಧ ತಯಾರಕ ಕಂಪೆನಿಗಳು ತಮ್ಮ ಉತ್ಪನ್ನಗಳ ಅಪಾಯಗಳ ಬಗ್ಗೆ ಸರಿಯಾಗಿ ಎಚ್ಚರಿಕೆ ನೀಡಿಲ್ಲ ಎಂದು ಆರೋಪಿಸಿ ಪೆನ್ಸಿಲ್ವೇನಿಯಾದ ಪೂರ್ವ ಜಿಲ್ಲೆಯ ಯುಎಸ್ ಜಿಲ್ಲಾ ನ್ಯಾಯಾಲಯದಲ್ಲಿಯೂ ಪ್ರತ್ಯೇಕ ಮೊಕದ್ದಮೆಗಳನ್ನು ಹೂಡಲಾಗಿದೆ.

ನೊವೊ ನಾರ್ಡಿಸ್ಕ್ ಕಂಪೆನಿಯು ಧನಸಹಾಯ ನೀಡಿ GLP-1 ರೋಗಿಗಳ ಮೇಲೆ ನಡೆಸಿದ ಯಾದೃಚ್ಛಿಕ ಅಧ್ಯಯನದಲ್ಲಿ, ಈ ಔಷಧಿಗಳು NAION ಅಪಾಯವನ್ನು ಹೆಚ್ಚಿಸುವುದಿಲ್ಲ ಎಂದು ಕಂಡುಬಂದಿದೆ ಎಂದು ತಿಳಿಸಲಾಗಿದೆ.

ನೊವೊ ನಾರ್ಡಿಸ್ಕ್ನ ಹಿರಿಯ ವೈದ್ಯಕೀಯ ಅಧಿಕಾರಿಯೂ ಮತ್ತು ಆ ಅಧ್ಯಯನದ ಮುಖ್ಯ ಲೇಖಕರೂ ಆಗಿರುವ ಡಾ. ಟೀನಾ ವಿಲ್ಸ್ಬೋಲ್ ಮಾತನಾಡಿ, ಇಲ್ಲಿ "ಯಾವುದೇ ಕಾರಣ-ಪರಿಣಾಮದ ಸಂಬಂಧ" ಕಂಡುಬಂದಿಲ್ಲ ಮತ್ತು "ನಾವು NAION ಬಗ್ಗೆ ಅಷ್ಟೊಂದು ಆತಂಕಗೊಳ್ಳುವ ಅಗತ್ಯವಿದೆ ಎಂಬುದಕ್ಕೆ ಯಾವುದೇ ಸೂಚನೆಗಳಿಲ್ಲ" ಎಂದು ಹೇಳಿದ್ದಾರೆ.

ಅಪಾಯದಲ್ಲಿ ಸ್ವಲ್ಪ ಮಟ್ಟಿನ ಸಂಭಾವ್ಯ ಹೆಚ್ಚಳವಿದೆ ಎಂಬ ವರದಿಗಳಿದ್ದರೂ, ಯಾವುದೇ ಸಂಬಂಧವಿಲ್ಲ ಎಂದು ಹೇಳುವ ಅಧ್ಯಯನಗಳೂ ಇವೆ. "NAION ಅಪಾಯದ ಒಟ್ಟಾರೆ ಪ್ರಮಾಣವು ಕಡಿಮೆಯಾಗಿಯೇ ಇದೆ" ಎಂದು ನಾರ್ತ್ ಅಮೆರಿಕನ್ ನ್ಯೂರೋ-ಆಫ್ತಾಲ್ಮಾಲಜಿ ಸೊಸೈಟಿ ಮತ್ತು ಅಮೆರಿಕನ್ ಅಕಾಡೆಮಿ ಆಫ್ ಆಫ್ತಾಲ್ಮಾಲಜಿ ತಿಳಿಸಿವೆ.

ಮೊಕದ್ದಮೆಗಳು ದಾಖಲಾಗಿದ್ದರೂ, ಅಮೆರಿಕವು GLP-1 ಔಷಧಿಗಳ ಮೇಲೆ ಯಾವುದೇ ಹೊಸ ಎಚ್ಚರಿಕೆಗಳನ್ನು ಸೇರಿಸಿಲ್ಲ.

2024ರಲ್ಲಿ ಈ ಸಂಬಂಧದ ಕುರಿತು ಆರಂಭಿಕ ವರದಿಗಳು ಬಂದ ನಂತರ, ಅಮೆರಿಕದ ಆಹಾರ ಮತ್ತು ಔಷಧ ಆಡಳಿತ (FDA) ಸಂಸ್ಥೆಯು ಈ ಸಂಪರ್ಕದ ಬಗ್ಗೆ ತನಿಖೆ ನಡೆಸುತ್ತಿದೆ.

ಸೌಜನ್ಯ: Aljazeera.com