ಅದಾನಿಯನ್ನು ಹಿಂದಿಕ್ಕಿದ ಟಿಕ್ ಟಾಕ್ ಸಂಸ್ಥಾಪಕ ಜಾಂಗ್ ಯಿಮಿಂಗ್; ಈಗ ಏಷ್ಯಾದ ನಂ.1 ಶ್ರೀಮಂತ

ಹೊಸದಿಲ್ಲಿ: ಟಿಕ್ಟಾಕ್ ನ ಮಾತೃಸಂಸ್ಥೆ ಬೈಟ್ಡ್ಯಾನ್ಸ್ ನ ಸಂಸ್ಥಾಪಕ ಜಾಂಗ್ ಯಿಮಿಂಗ್ ಅವರು ಭಾರತೀಯ ಉದ್ಯಮಿ ಗೌತಮ್ ಅದಾನಿ ಅವರನ್ನು ಹಿಂದಿಕ್ಕಿ ಏಷ್ಯಾದ ಅತ್ಯಂತ ಶ್ರೀಮಂತ ವ್ಯಕ್ತಿಯಾಗಿದ್ದಾರೆ.

ಬ್ಲೂಮ್ಬರ್ಗ್ ಬಿಲಿಯನೇರ್ಸ್ ಸೂಚ್ಯಂಕದ ಇತ್ತೀಚಿನ ಶ್ರೇಯಾಂಕದ ಪ್ರಕಾರ, ಜಾಂಗ್ ಅವರ ಸಂಪತ್ತು 105 ಬಿಲಿಯನ್ ಡಾಲರ್ ಗಿಂತ ಹೆಚ್ಚಾಗಿದೆ. ಇದೇ ಮೊದಲ ಬಾರಿಗೆ ಅವರು ಏಷ್ಯಾದ ಶ್ರೀಮಂತರ ಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದ್ದಾರೆ. ಏಷ್ಯಾದ ಬಿಲಿಯನೇರ್ ಗಳ ಸಂಪತ್ತು ಮತ್ತು ಶ್ರೇಯಾಂಕದಲ್ಲಿ ಕೃತಕ ಬುದ್ಧಿಮತ್ತೆ (AI) ಹಾಗೂ ಗ್ರಾಹಕ ವೇದಿಕೆಗಳ ಹೆಚ್ಚುತ್ತಿರುವ ಪ್ರಭಾವವನ್ನು ಈ ಬೆಳವಣಿಗೆ ಬೆಳಕು ಚೆಲ್ಲಿದೆ.

ಬ್ಲೂಮ್ ಬರ್ಗ್ 2019ರ ಮಾರ್ಚ್ ನಲ್ಲಿ ಜಾಂಗ್ ಅವರ ಸಂಪತ್ತನ್ನು ಲೆಕ್ಕಹಾಕಲು ಆರಂಭಿಸಿದಾಗ ಅವರ ಆಸ್ತಿ ಮೌಲ್ಯ 13 ಬಿಲಿಯನ್ ಡಾಲರ್ ನಷ್ಟಿತ್ತು. ಇದೀಗ ಅದು ಎಂಟು ಪಟ್ಟು ಹೆಚ್ಚಾಗಿದೆ. ಬೈಟ್ ಡ್ಯಾನ್ಸ್ ನ ಹೆಚ್ಚಿದ ಮೌಲ್ಯಮಾಪನ ಮತ್ತು ಸಂಸ್ಥೆಯ AI ಉತ್ಪನ್ನಗಳತ್ತ ಹೂಡಿಕೆದಾರರ ಹೆಚ್ಚುತ್ತಿರುವ ಆಸಕ್ತಿ ಅವರ ಸಂಪತ್ತು ಹೆಚ್ಚಳಕ್ಕೆ ಪ್ರಮುಖ ಕಾರಣವಾಗಿದೆ.

ಬೈಟ್ ಡ್ಯಾನ್ಸ್ ನ ಡೌಬಾವೊ (Doubao) ಚಾಟ್ಬಾಟ್ ಮತ್ತು ಸೀಡಾನ್ಸ್ (Seedance) ವೀಡಿಯೊ-ಜನರೇಷನ್ ಟೂಲ್ ಗಳು AI ಕ್ಷೇತ್ರದಲ್ಲಿ ಸಂಸ್ಥೆಯ ವಿಸ್ತರಣೆಗೆ ಪ್ರಮುಖ ಉದಾಹರಣೆಗಳಾಗಿವೆ. ಟಿಕ್ ಟಾಕ್ ಜಾಗತಿಕವಾಗಿ ಪ್ರಮುಖ ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಒಂದಾಗಿ ಬೆಳೆದಿರುವುದರ ಜತೆಗೆ, ಬೈಟ್ಡ್ಯಾನ್ಸ್ AI ಕ್ಷೇತ್ರದಲ್ಲಿಯೂ ತನ್ನ ಅಸ್ತಿತ್ವವನ್ನು ವೇಗವಾಗಿ ವಿಸ್ತರಿಸುತ್ತಿದೆ.

ಜಾಂಗ್ ಅವರ ಸಂಪತ್ತು ಬೈಟ್ ಡ್ಯಾನ್ಸ್ ನೊಂದಿಗೆ ನಿಕಟವಾಗಿ ಸಂಬಂಧ ಹೊಂದಿದೆ. ಸಂಸ್ಥೆಯ ಬೆಳವಣಿಗೆ, ಟಿಕ್ ಟಾಕ್ ನ ಜಾಗತಿಕ ವ್ಯಾಪ್ತಿ ಮತ್ತು ವಿಸ್ತರಿಸುತ್ತಿರುವ AI ವ್ಯವಹಾರವು ಅವರ ಸಂಪತ್ತಿನ ಏರಿಕೆಗೆ ಕಾರಣವಾಗಿವೆ.

ಅಮೆರಿಕದಲ್ಲಿ ಟಿಕ್ಟಾಕ್ ತೀವ್ರ ಪರಿಶೀಲನೆಗೆ ಒಳಗಾಗಿದ್ದರೂ, ಜಾಂಗ್ ಅವರು AI ಕ್ಷೇತ್ರದಲ್ಲಿನ ಹೂಡಿಕೆಯನ್ನು ಮುಂದುವರಿಸಿದ್ದಾರೆ. ಈ ವರ್ಷದ ಆರಂಭದಲ್ಲಿ ಬೈಟ್ ಡ್ಯಾನ್ಸ್ ತನ್ನ ಟಿಕ್ಟಾಕ್ ನ ಅಮೆರಿಕದ ಕಾರ್ಯಾಚರಣೆಯ ಕೆಲವು ಭಾಗಗಳನ್ನು ಅಮೆರಿಕದ ಹೂಡಿಕೆದಾರರಿಗೆ ವರ್ಗಾಯಿಸಿತು. ಇದರಿಂದ ಅಮೆರಿಕದಲ್ಲಿ ಟಿಕ್ ಟಾಕ್ ನ ಭವಿಷ್ಯದ ಕುರಿತು ಇದ್ದ ಅನಿಶ್ಚಿತತೆ ಕಡಿಮೆಯಾಯಿತು.

ಏಷ್ಯಾದ ಶ್ರೀಮಂತರ ಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರುವ ಮುನ್ನವೇ ಜಾಂಗ್ ಅವರು ಚೀನಾದ ಅತ್ಯಂತ ಶ್ರೀಮಂತರಲ್ಲಿ ಒಬ್ಬರಾಗಿದ್ದರು. ಟಿಕ್ಟಾಕ್ ನ ಜಾಗತಿಕ ವ್ಯಾಪ್ತಿ ಮತ್ತು ಬೈಟ್ಡ್ಯಾನ್ಸ್ನ ಬೆಳೆಯುತ್ತಿರುವ AI ವ್ಯವಹಾರವು ಅವರ ಸಂಪತ್ತಿನ ಹೆಚ್ಚಳಕ್ಕೆ ಪ್ರಮುಖ ಕಾರಣಗಳಾಗಿವೆ.