Mysuru | ಬರಗಾಲದಲ್ಲಿ ಕಂಬಳ ಆಯೋಜಿಸಿರುವ ಸರಕಾರದ ನಡೆ ಖಂಡಿಸಿ ಪ್ರತಿಭಟನೆ

ಮೈಸೂರು : ನಾಡಹಬ್ಬ ಮೈಸೂರು ದಸರಾ ಮಹೋತ್ಸವದಲ್ಲಿ ಕಂಬಳ ಮಾಡಲೇಬೇಕು ಎಂಬ ಸರಕಾರದ ಹಠಮಾರಿ ಧೋರಣೆಯನ್ನು ಖಂಡಿಸಿ ನಗರದ ಸಮೀಪದ ಸಾತಗಳ್ಳಿಯ ಕಂಬಳ ನಡೆಯುವ ಜಾಗದಲ್ಲಿ ರೈತ ಸಂಘ, ದಸಂಸ, ‘ಪರಿಸರಕ್ಕಾಗಿ ನಾವು’ ಸಂಘಟನೆ, ಕನ್ನಡಪರ ಮತ್ತು ಪ್ರಗತಿಪರ ಸಂಘಟನೆಗಳು ಸೇರಿದಂತೆ ಹಲವಾರು ಸಂಘ ಸಂಸ್ಥೆಗಳ ಸಹಯೋಗದಲ್ಲಿ ಪ್ರತಿಭಟನೆ ನಡೆಸಿ ತೀವ್ರ ಬರಗಾಲದಲ್ಲಿ ಕಂಬಳ ಆಯೋಜಿಸುವುದನ್ನು ಖಂಡಿಸಿದರು.

ಈ ವೇಳೆ ಪರಿಸರಕ್ಕಾಗಿ ನಾವು’ ಸಂಘಟನೆಯ ರಾಜ್ಯಾಧ್ಯಕ್ಷ ಎ.ಟಿ.ರಾಮಸ್ವಾಮಿ ಮಾತನಾಡಿ, ತೀವ್ರ ಬರಗಾಲದಲ್ಲಿ ರಾಜ್ಯ ಸರಕಾರ ಕಂಬಳವನ್ನು ಆಯೋಜಿಸಲು ಪ್ರತಿಷ್ಠೆಯಾಗಿ ಸ್ವೀಕರಿಸಿದೆ. ಕಂಬಳ ಮೈಸೂರಿನ ಸಾಂಸ್ಕೃತಿಕತೆಯನ್ನು ಹಾಳು ಮಾಡುತ್ತದೆ ಎಂದು ಹೇಳಿದರು.

ಕಂಬಳಕ್ಕೆ ತಡೆ: ವಿರೋಧದ ನಡುವೆಯೂ ಕಂಬಳ ಆಯೋಜಿಸುತ್ತಿರುವ ಸರಕಾರ ಮೋಜಿಗಾಗಿ ಕಂಬಳ ಆಯೋಜಿಸುತ್ತಿದೆ. ಸರಕಾರವೂ ಸರ್ವಾಧಿಕಾರಿಯಾಗಿ ವರ್ತಿಸುತ್ತಿದೆ. ದಸರಾದಲ್ಲಿ ಕಂಬಳ ಆಯೋಜಿಸಲು ಪ್ರತಿಷ್ಠೆ ಯಾಕೇ ಎಂದು ರಾಜ್ಯ ಕಬ್ಬು ಬೆಳೆಗಾರರ ಸಂಘದ ರಾಜ್ಯಾಧ್ಯಕ್ಷ ಕುರುಬೂರು ಶಾಂತಕುಮಾರ್ ಪ್ರಶ್ನಿಸಿದರು.

ಕರ್ನಾಟಕ ರಾಜ್ಯ ರೈತ ಸಂಘದ ರಾಜ್ಯಾಧ್ಯಕ್ಷ ಬಡಗಲಪುರ ನಾಗೇಂದ್ರ ಮಾತನಾಡಿ, ಮೈಸೂರು ಪ್ರವೇಶಿಸುವ ಕೋಣಗಳನ್ನು ಪಿರಿಯಾಪಟ್ಟಣದಲ್ಲಿ ತಡೆಯುವ ಹೋರಾಟ ರೂಪಿಸಬೇಕು. ಈ ಹೋರಾಟಕ್ಕೆ ಸಾವಿರ ರೈತರನ್ನು ಸೇರಿಸುತ್ತೇವೆ. ಕಂಬಳ ಬೇಡವೆಂದು ಸಿಎಂ, ಉಸ್ತುವಾರಿ ಸಚಿವರು, ನಿಕಟಪೂರ್ವ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಮನವಿ ಸಲ್ಲಿಸಿದೆವು. ಈ ಸರಕಾರ ಯಾರ ಮನವಿಯನ್ನು ಕೇಳಿಸಿಕೊಳ್ಳುತ್ತಿಲ್ಲ. ಹೋರಾಟ, ಸತ್ಯಾಗ್ರಹಕ್ಕೆ ಬೆಲೆ ಕೊಡದಂತೆ ಅನಾಗರಿಕವಾಗಿ ವರ್ತಿಸುತ್ತಿದೆ ಎಂದರು.

ದಸಂಸ ರಾಜ್ಯ ಸಂಚಾಲಕ ಗುರುಪ್ರಸಾದ್ ಕೆರಗೋಡು, ದಸಂಸ ಮುಖಂಡ ಬೆಟ್ಟಯ್ಯ ಕೋಟೆ, ಕೆಆರ್‌ಎಸ್ ಪಕ್ಷದ ರವಿಕುಮಾರ್, ರೈತ ಮುಖಂಡ ಕೆ.ಎಸ್.ನಂಜುಂಡೇಗೌಡ, ರೈತ ಮುಖಂಡ ಕೆಂಪೂಗೌಡ ಎ.ಎಲ್. ಮಾತನಾಡಿದರು.

ಪ್ರತಿಭಟನೆಯಲ್ಲಿ ಪರಶುರಾಮೇಗೌಡ, ಇತಿಹಾಸ ತಜ್ಞ ಪ್ರೊ.ಎನ್.ಎಸ್ ರಂಗರಾಜು, ಮ.ಗು.ಸದಾನಂದಯ್ಯ, ಮನ್ಸೂರ್ ಅಹ್ಮದ್, ಕೆ.ಬಿ.ಗುರುಸ್ವಾಮಿ, ಲೀಲಾ ಶಿವಕುಮಾರ್, ಭಾಗ್ಯ ಶಂಕರ್, ಅಂಜನಾ, ಸ್ಮಿತಾ, ಮಧುಶ್ರೀ, ವರ್ಷಿಣಿ, ಪವಿತ್ರ, ಸುಶೀಲಾ, ಅಕ್ಬರ್, ಭಾನುಪ್ರಶಾಂತ್, ಶೈಲಜೇಶ್, ವಿಶ್ವನಾಥ್, ಗಣೇಶ್, ಗೋಪಾಲ್, ವಿದ್ವತ್, ರಾಕೇಶ್, ಐಶ್ವರ್ಯ, ಜಯಲಕ್ಷ್ಮೀ, ಸುಲೋಚನಾ, ಸೃಷ್ಟಿ, ಶ್ರೇಷ್ಠ, ಚೇತನ್, ಮಾದೇಗೌಡ, ಪ್ರೊ.ಎಂ.ಆರ್.ಜನಾರ್ದನ್, ಹೊಸೂರು ಕುಮಾರ್, ಪಿ.ಮರಂಕಯ್ಯ, ದಸಂಸ ಮೈಸೂರು ತಾಲೂಕು ಸಂಚಾಲಕ ಕಲ್ಲಹಳ್ಳಿ ಕುಮಾರ್ ಉಮೇಶ್ ಗೌಡ, ಕೃಷ್ಣ, ಕೆ.ಟಿ.ಗೋವಿಂದೇಗೌಡ, ಸ್ವರ್ಣ, ರೂಪಾ, ಮಾಲತೇಶ್ ಹಲವರು ಭಾಗವಹಿಸಿದ್ದರು.