ದಾರಿತಪ್ಪಿಸುವ ಜಾಹೀರಾತು ಆರೋಪ | ವಶಪಡಿಸಿಕೊಂಡ 73.24 ಲಕ್ಷ ರೂ. ಮೌಲ್ಯದ ಔಷಧಗಳಲ್ಲಿ 51.41 ಲಕ್ಷ ರೂ. ಮೌಲ್ಯದ ಪತಂಜಲಿ ಉತ್ಪನ್ನಗಳು!

ಮುಂಬೈ, ಜೂನ್ 1: ದಾರಿತಪ್ಪಿಸುವ ಜಾಹೀರಾತುಗಳ ಮೂಲಕ ಪ್ರಚಾರ ಮಾಡಲಾಗುತ್ತಿದೆ ಎಂಬ ಆರೋಪದ ಮೇರೆಗೆ ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತ (FDA) ರಾಜ್ಯದ ವಿವಿಧ ಭಾಗಗಳಲ್ಲಿ ನಡೆಸಿದ ದಾಳಿಯಲ್ಲಿ 73.24 ಲಕ್ಷ ರೂ. ಮೌಲ್ಯದ ಔಷಧ ದಾಸ್ತಾನುಗಳನ್ನು ವಶಪಡಿಸಿಕೊಂಡಿದೆ. ಇದರಲ್ಲಿ ಪತಂಜಲಿ ಸಂಸ್ಥೆಗೆ ಸಂಬಂಧಿಸಿದ ಹರಿದ್ವಾರದ ದಿವ್ಯಾ ಫಾರ್ಮಸಿ ತಯಾರಿಸಿದ 51.41 ಲಕ್ಷ ರೂ. ಮೌಲ್ಯದ ಆಯುರ್ವೇದ ಉತ್ಪನ್ನಗಳೂ ಸೇರಿವೆ.

FDAಯ ನೂತನ ಆಯುಕ್ತ ತುಕಾರಾಮ್ ಮುಂಡೆ ಅವರ ನಿರ್ದೇಶನದಂತೆ ಮುಂಬೈ, ಕೊಂಕಣ, ಪುಣೆ, ನಾಸಿಕ್, ಅಮರಾವತಿ, ನಾಗ್ಪುರ ಹಾಗೂ ಛತ್ರಪತಿ ಸಂಭಾಜಿನಗರ ವಿಭಾಗಗಳಲ್ಲಿ ಏಕಕಾಲಕ್ಕೆ ಈ ಕಾರ್ಯಾಚರಣೆ ನಡೆಸಲಾಗಿದೆ. ಔಷಧಗಳು ಮತ್ತು ಆಕ್ಷೇಪಾರ್ಹ ಜಾಹೀರಾತುಗಳು ಕಾಯ್ದೆ–1954ರ ಅಡಿಯಲ್ಲಿ ದಾಳಿ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ರಾಜ್ಯದ 12 ಆಯುರ್ವೇದ ಔಷಧ ಸಂಸ್ಥೆಗಳ ಮೇಲೆ ದಾಳಿ ನಡೆಸಿದ ತಂಡಗಳು, ಗಂಭೀರ ಕಾಯಿಲೆಗಳಿಗೆ ಖಚಿತ ಚಿಕಿತ್ಸೆ, ಅದ್ಭುತ ಫಲಿತಾಂಶ ಹಾಗೂ ಸಂಪೂರ್ಣ ಗುಣಮುಖತೆಯ ಭರವಸೆ ನೀಡುವ ಜಾಹೀರಾತುಗಳ ಮೂಲಕ ಮಾರಾಟ ಮಾಡಲಾಗುತ್ತಿದ್ದ ಔಷಧಿಗಳನ್ನು ವಶಪಡಿಸಿಕೊಂಡಿವೆ.

ವಶಪಡಿಸಿಕೊಂಡ ದಿವ್ಯಾ ಫಾರ್ಮಸಿ ಉತ್ಪನ್ನಗಳ ಮೌಲ್ಯ ಕೊಂಕಣ ವಿಭಾಗದಲ್ಲಿ 18.58 ಲಕ್ಷ ರೂ., ಪುಣೆಯಲ್ಲಿ 14.68 ಲಕ್ಷ ರೂ., ನಾಗ್ಪುರದಲ್ಲಿ 7.26 ಲಕ್ಷ ರೂ., ನಾಸಿಕ್‌ನಲ್ಲಿ 7.10 ಲಕ್ಷ ರೂ., ಮುಂಬೈನಲ್ಲಿ 1.85 ಲಕ್ಷ ರೂ., ಅಮರಾವತಿಯಲ್ಲಿ 1.42 ಲಕ್ಷ ರೂ. ಹಾಗೂ ಛತ್ರಪತಿ ಸಂಭಾಜಿನಗರದಲ್ಲಿ 48,718 ರೂ. ಆಗಿದೆ.

ದೃಷ್ಟಿ ಐ ಡ್ರಾಪ್, ಗಿಲೋಯ್ ಘನ್ ವಟಿ, ಕುತಾಜ್ ಘನ್ ವಟಿ, ಸಿಸ್ಟೋಗ್ರಿಟ್ ಡೈಮಂಡ್ ಟ್ಯಾಬ್ಲೆಟ್‌ ಗಳು, ನ್ಯೂರೋಗ್ರಿಟ್ ಗೋಲ್ಡ್ ಕ್ಯಾಪ್ಸುಲ್‌ ಗಳು, ಮಧುಗ್ರಿಟ್ ಟ್ಯಾಬ್ಲೆಟ್‌ ಗಳು ಹಾಗೂ ಮೆಮೊರಿಗ್ರಿಟ್ ಟ್ಯಾಬ್ಲೆಟ್‌ಗಳು ವಶಪಡಿಸಿಕೊಂಡ ಉತ್ಪನ್ನಗಳಲ್ಲಿ ಸೇರಿವೆ.

ಇದರ ಜೊತೆಗೆ, ಪುಣೆ ವಿಭಾಗದಲ್ಲಿ 21.83 ಲಕ್ಷ ರೂ. ಮೌಲ್ಯದ ಸುಳ್ಳು ಬ್ರಾಂಡ್ ಮಾಡಿದ ಅಲೋಪತಿ ಔಷಧಿಗಳನ್ನೂ FDA ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.

ರಾಜ್ಯದಾದ್ಯಂತ ವಶಪಡಿಸಿಕೊಂಡ ಆಯುರ್ವೇದ ಮತ್ತು ಅಲೋಪತಿ ಔಷಧಿಗಳ ಒಟ್ಟು ಮೌಲ್ಯ 73,24,656 ರೂ. ಆಗಿದೆ. ಔಷಧ ಕ್ಷೇತ್ರದಲ್ಲಿ ದಾರಿತಪ್ಪಿಸುವ ಜಾಹೀರಾತುಗಳು ಹಾಗೂ ನಿಯಮ ಉಲ್ಲಂಘನೆಗಳ ವಿರುದ್ಧ ಇತ್ತೀಚಿನ ವರ್ಷಗಳಲ್ಲಿ ಕೈಗೊಂಡ ಪ್ರಮುಖ ಜಾರಿ ಕ್ರಮಗಳಲ್ಲಿ ಇದೂ ಒಂದಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ತಪ್ಪುದಾರಿಗೆಳೆಯುವ ಜಾಹೀರಾತುಗಳು, ಅಕ್ರಮ ಉತ್ಪಾದನೆ ಮತ್ತು ನಿಯಮಬಾಹಿರ ಔಷಧ ಮಾರಾಟದ ವಿರುದ್ಧ ಕಠಿಣ ಕ್ರಮ ಮುಂದುವರಿಸಲಾಗುವುದು ಎಂದು ತುಕಾರಾಮ್ ಮುಂಡೆ ತಿಳಿಸಿದ್ದಾರೆ.

‘ಸಾರ್ವಜನಿಕ ಆರೋಗ್ಯದೊಂದಿಗೆ ಆಟವಾಡುವ ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಯನ್ನು ಬಿಡುವುದಿಲ್ಲ. ತಪ್ಪಿತಸ್ಥರ ವಿರುದ್ಧ ಕಾನೂನು ಹಾಗೂ ನ್ಯಾಯಾಂಗ ಕ್ರಮ ಕೈಗೊಳ್ಳಲಾಗುವುದು’ ಎಂದು ಅವರು ಎಚ್ಚರಿಕೆ ನೀಡಿದ್ದಾರೆ.

ಔಷಧಗಳಿಗೆ ಸಂಬಂಧಿಸಿದ ದಾರಿತಪ್ಪಿಸುವ ಜಾಹೀರಾತುಗಳನ್ನು ನಂಬಬಾರದು ಹಾಗೂ ವೈದ್ಯರ ಸಲಹೆಯಿಲ್ಲದೆ ಔಷಧ ಸೇವಿಸಬಾರದು ಎಂದು ಸಾರ್ವಜನಿಕರಿಗೆ ಅವರು ಮನವಿ ಮಾಡಿದ್ದಾರೆ.

ಔಷಧಿಗಳ ಅಕ್ರಮ ಮಾರಾಟ, ಕಲಬೆರಕೆ ಮತ್ತು ದಾರಿತಪ್ಪಿಸುವ ಜಾಹೀರಾತುಗಳ ಕುರಿತು ದೂರು ಸಲ್ಲಿಸಲು ಶೀಘ್ರದಲ್ಲೇ ವಿಶೇಷ ಮೊಬೈಲ್ ಆ್ಯಪ್ ಹಾಗೂ ಟೋಲ್-ಫ್ರೀ ಸಹಾಯವಾಣಿ ಆರಂಭಿಸಲಾಗುವುದು ಎಂದು FDA ತಿಳಿಸಿದೆ.