Jharkhand | ಹೋಮ್ ಗಾರ್ಡ್ ಆಗುವ ಕನಸಿಗಾಗಿ ಸೀರೆ ಧರಿಸಿ ಬರಿಗಾಲಿನಲ್ಲಿ ಓಡಿದ ಮಹಿಳೆ

ರಾಮ್‌ಗಢ, ಅ.8: ಹೋಮ್ ಗಾರ್ಡ್ ಆಗುವ ಕನಸಿನೊಂದಿಗೆ ಜಾರ್ಖಂಡ್‌ನ 27 ವರ್ಷದ ಕವಿತಾ ಕುಮಾರಿ ನಡೆಸಿದ ಹೋರಾಟ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿದೆ. ಸೀರೆ ಧರಿಸಿ, ಬರಿಗಾಲಿನಲ್ಲಿ 1,600 ಮೀಟರ್ ಓಡಿದ ಅವರು ಕೇವಲ ಆರು ನಿಮಿಷಗಳಲ್ಲಿ ಗುರಿ ತಲುಪಿದ್ದಾರೆ.

ಕವಿತಾ ರಾಮ್‌ಗಢ ಜಿಲ್ಲೆಯ ಸೋಸೊ ಗ್ರಾಮದ ನಿವಾಸಿ. ಹೋಮ್ ಗಾರ್ಡ್ ನೇಮಕಾತಿಯ ದೈಹಿಕ ಪರೀಕ್ಷೆಯಲ್ಲಿ 1,600 ಮೀಟರ್ ಓಟವನ್ನು 10 ನಿಮಿಷಗಳಲ್ಲಿ ಪೂರ್ಣಗೊಳಿಸಬೇಕು. ಆದರೆ ಕವಿತಾ ಆರು ನಿಮಿಷಗಳಲ್ಲೇ ಓಟ ಪೂರ್ಣಗೊಳಿಸಿದ್ದಾರೆ.

ಪತಿಯ ಸಾವಿನ ಬಳಿಕ ಮಕ್ಕಳ ಜವಾಬ್ದಾರಿ

ಮೂರು ವರ್ಷಗಳ ಹಿಂದೆ ದೀರ್ಘಕಾಲದ ಅನಾರೋಗ್ಯದಿಂದ ಕವಿತಾ ಅವರ ಪತಿ ದೀಪಕ್ ಮಹ್ತೋ ಮೃತಪಟ್ಟಿದ್ದರು. ಬಳಿಕ ಇಬ್ಬರು ಚಿಕ್ಕ ಮಕ್ಕಳನ್ನು ಸಾಕುವ ಜವಾಬ್ದಾರಿ ಅವರ ಮೇಲಾಯಿತು.

ಕುಟುಂಬದ ನಿರ್ವಹಣೆಗಾಗಿ ಕವಿತಾ ಖಾಸಗಿ ಭದ್ರತಾ ಸಿಬ್ಬಂದಿಯಾಗಿ ಕೆಲಸ ಆರಂಭಿಸಿದರು. ಮಕ್ಕಳ ಭವಿಷ್ಯವನ್ನು ಭದ್ರಪಡಿಸಲು ಸರ್ಕಾರಿ ಉದ್ಯೋಗ ಪಡೆಯಬೇಕು ಎಂದು ನಿರ್ಧರಿಸಿದರು.

ಬೆಳಿಗ್ಗೆ 4ರಿಂದ ಅಭ್ಯಾಸ

ಪೊಲೀಸ್ ಅಥವಾ ಹೋಮ್ ಗಾರ್ಡ್ ನೇಮಕಾತಿಗೆ ಕವಿತಾ ಸಿದ್ಧತೆ ಆರಂಭಿಸಿದರು. ಪ್ರತಿದಿನ ಬೆಳಿಗ್ಗೆ 4 ಗಂಟೆಗೆ ಎದ್ದು ಓಟದ ಅಭ್ಯಾಸ ಮಾಡುತ್ತಿದ್ದರು. ಮಕ್ಕಳು ಏಳುವ ಮುನ್ನವೇ ಹಳ್ಳಿಯ ರಸ್ತೆಗಳಲ್ಲಿ ಓಡುತ್ತಿದ್ದರು.

ಓಟಕ್ಕೆ ಬೇಕಾದ ಬೂಟು ಮತ್ತು ಕ್ರೀಡಾ ಉಡುಪು ಖರೀದಿಸಲು ಅವರ ಬಳಿ ಹಣವಿರಲಿಲ್ಲ. ಆದ್ದರಿಂದ ತಮ್ಮ ಸಾಮಾನ್ಯ ಉಡುಪಿನಲ್ಲೇ ಅಭ್ಯಾಸ ನಡೆಸುತ್ತಿದ್ದರು.

ಬಿಸಿಯಾದ ನೆಲದ ಮೇಲೆ ಬರಿಗಾಲಿನ ಓಟ

ಅಧಿಕೃತ ನೇಮಕಾತಿಗೂ ಮುನ್ನ ಸ್ಥಳೀಯ ತರಬೇತಿ ಅಕಾಡೆಮಿಯೊಂದು ಪರೀಕ್ಷಾ ಓಟ ಆಯೋಜಿಸಿತ್ತು. ಕವಿತಾ ಇತರ ಅಭ್ಯರ್ಥಿಗಳೊಂದಿಗೆ ಅದರಲ್ಲಿ ಭಾಗವಹಿಸಿದರು.

ಸೀರೆ ಧರಿಸಿದ್ದ ಅವರು ಬರಿಗಾಲಿನಲ್ಲೇ ಬಿಸಿಯಾದ ನೆಲದ ಮೇಲೆ ಓಡಿದರು. ನೋವನ್ನು ಲೆಕ್ಕಿಸದೆ 1,600 ಮೀಟರ್ ದೂರವನ್ನು ಆರು ನಿಮಿಷಗಳಲ್ಲಿ ಕ್ರಮಿಸಿದರು. ಅವರ ಸಾಧನೆ ಸ್ಥಳದಲ್ಲಿದ್ದವರು ಮತ್ತು ತರಬೇತುದಾರರನ್ನು ಅಚ್ಚರಿಗೊಳಿಸಿತು.

ಕವಿತಾ ಅವರ ಓಟದ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ದೇಶದಾದ್ಯಂತ ಹಲವರು ಅವರ ಛಲವನ್ನು ಮೆಚ್ಚಿದ್ದಾರೆ.

284 ಹುದ್ದೆಗಳಿಗೆ ನೇಮಕಾತಿ

ಕವಿತಾ ಇದೀಗ ಜಾರ್ಖಂಡ್ ಹೋಮ್ ಗಾರ್ಡ್ ನೇಮಕಾತಿಯ ಅಧಿಕೃತ ದೈಹಿಕ ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿದ್ದಾರೆ. ಈ ಪರೀಕ್ಷೆ ಅಕ್ಟೋಬರ್ 24ರಿಂದ ನವೆಂಬರ್ 5ರವರೆಗೆ ನಡೆಯಲಿದೆ.

ರಾಮ್‌ಗಢ ಜಿಲ್ಲೆಯಲ್ಲಿ 284 ಹೋಮ್ ಗಾರ್ಡ್ ಹುದ್ದೆಗಳನ್ನು ಭರ್ತಿ ಮಾಡಲು ನೇಮಕಾತಿ ನಡೆಯಲಿದೆ. ಇದರಲ್ಲಿ ಶೇ 50ರಷ್ಟು ಹುದ್ದೆಗಳನ್ನು ಮಹಿಳೆಯರಿಗೆ ಮೀಸಲಿಡಲಾಗಿದೆ.

ವಿಧವೆ ಮತ್ತು ವಿಚ್ಛೇದಿತ ಮಹಿಳೆಯರಿಗೆ ಹೆಚ್ಚುವರಿಯಾಗಿ ಶೇ 5ರಷ್ಟು ಮೀಸಲಾತಿಯ ವಿಶೇಷ ಅವಕಾಶವನ್ನೂ ಕಲ್ಪಿಸಲಾಗಿದೆ.

ಪತಿಯ ಸಾವಿನ ಬಳಿಕ ಇಬ್ಬರು ಮಕ್ಕಳ ಜವಾಬ್ದಾರಿ ಹೊತ್ತುಕೊಂಡಿರುವ ಕವಿತಾ, ಆರ್ಥಿಕ ಸಂಕಷ್ಟದ ನಡುವೆಯೂ ಸರ್ಕಾರಿ ಉದ್ಯೋಗ ಪಡೆಯುವ ಗುರಿಯೊಂದಿಗೆ ಪ್ರಯತ್ನ ಮುಂದುವರಿಸಿದ್ದಾರೆ.