ಸಾಹಿತ್ಯ ಕೃತಿ ಬದುಕನ್ನು ಸೂಕ್ಷ್ಮವಾಗಿ ಅರ್ಥೈಸಲು ಸಹಕಾರಿ: ಡಾ.ಬನ್ನಾಡಿ

ಉಡುಪಿ, ಅ.9:ಕರಾವಳಿ ಸಮೃದ್ಧ ಸಾಂಸ್ಕೃತಿಕ ಹಾಗೂ ಮೌಖಿಕ ಪರಂಪರೆ ಹೊಂದಿದೆ. ಇಲ್ಲಿನ ಪರಂಪರೆಯನ್ನು ಕಥೆ ಕವನಗಳಲ್ಲಿ ಕಾಣಬಹುದು. ಸಾಹಿತ್ಯ ಕೃತಿಗಳು ಬದುಕನ್ನು ಸೂಕ್ಷ್ಮವಾಗಿ ಅರ್ಥೈಸಲು ಸಹಕಾರಿ. ಆದರೆ ಇಂದು ಹೇಳುವ ಹಾಗೂ ಕೇಳುವ ಅಭ್ಯಾಸ ಕ್ಷೀಣವಾಗಿದೆ. ಸಾಹಿತ್ಯವನ್ನು ಆಸ್ವಾದಿಸುವ ಮನಸ್ಸುಗಳು ಕಡಿಮೆ ಯಾಗಿದೆ. ಯುವ ಜನರು ಸಾಹಿತ್ಯ ಕೃತಿಗಳನ್ನು ಹೆಚ್ಚು ಓದಬೇಕು ಎಂದು ಖ್ಯಾತ ಸಾಹಿತಿ ಡಾ. ರೇಖಾ ಬನ್ನಾಡಿ ಹೇಳಿದ್ದಾರೆ.

ಸಾರ್ವಜನಿಕ ಗ್ರಂಥಾಲಯ ಇಲಾಖೆ, ನಗರ ಕೇಂದ್ರ ಗ್ರಂಥಾಲಯ ಉಡುಪಿ ಹಾಗೂ ಕನ್ನಡ ಸಾಹಿತ್ಯ ಪರಿಷತ್ ಉಡುಪಿ ತಾಲೂಕು ಘಟಕದ ಸಹಯೋಗದಲ್ಲಿ ಅಜ್ಜರಕಾಡಿನ ವಿದ್ಯಾವಾಚಸ್ಪತಿ ಬನ್ನಂಜೆ ಗೋವಿಂದಾ ಚಾರ್ಯ ನಗರ ಕೇಂದ್ರ ಗ್ರಂಥಾಲಯದಲ್ಲಿ ನಡೆದ ‘ಗ್ರಂಥಾಲಯದಲ್ಲಿ ನಮ್ಮ ಸಾಹಿತಿ’ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡುತಿದ್ದರು.

ಹಿಂದೆಲ್ಲಾ ಗ್ರಂಥಾಲಯಗಳು ತುಂಬಿ ತಳುಕುತ್ತಿದ್ದವು ಆದರೆ ಈಗ ಬಿಕೋ ಎನ್ನುತ್ತಿವೆ. ಕುವೆಂಪು, ಕಾರಂತ, ವೈದೇಹಿ, ಸಾರಾ, ಲಂಕೇಶ್, ತೇಜಸ್ವಿ, ದೇವನೂರ ಅಂತಹ ಮೇರು ಸಾಹಿತಿಗಳ ನಾಡು ನಮ್ಮದು. ಪುಸ್ತಕಗಳು ಇಂದು ಕಪಾಟಿನ ಒಳಗೆ ಸೀಮಿತವಾಗಿವೆ. ಇದಕ್ಕೆ ಬದಲಾಗುತ್ತಿರುವ ಸಮಾಜದ ಆದ್ಯತೆ ಕಾರಣ. ಇಂತಹ ಸಂದರ್ಭದಲ್ಲಿ ಸಾಹಿತಿಗಳನ್ನು ಜನರಿಗೆ ಪರಿಚಯಿಸುವ ಉದ್ದೇಶದಿಂದ ಜಿಲ್ಲಾಧಿಕಾರಿ ಹಾಗೂ ಗ್ರಂಥಾಲಯ ನಡೆಸುವ ಕಾರ್ಯಕ್ರಮಗಳು ಅಪೂರ್ವ ಎಂದರು.

ಇಂದಿನ ಲಾಭ-ನಷ್ಟದ ಲೆಕ್ಕಾಚಾರದ ಜಗತ್ತಿನಲ್ಲಿ ಸಾಹಿತ್ಯ ಪ್ರೀತಿ ಕಡಿಮೆ ಯಾಗಿದೆ. ಮಾನಸಿಕ ಒತ್ತಡದ ಬದುಕನ್ನು ಧೈರ್ಯ, ಸಂಯಮದಿಂದ ಎದುರಿಸಲು ಸಾಹಿತ್ಯ ಸಹಾಯಕ. ಜೀವನದಲ್ಲಿ ಗೆಲುವಿನ ಜೊತೆ ಸೋಲನ್ನು ಹೇಗೆ ಸವಾಲಾಗಿ ಸ್ವೀಕರಿಸಬೇಕು ಎಂಬುದನ್ನು ಹಾಗೂ ಮೂಲಭೂತ ಮಾನವಿಕ ಮೌಲ್ಯಗಳನ್ನು ವೈಚಾರಿಕ ಸಾಹಿತ್ಯದ ಮೂಲಕ ಅರಿಯಬಹುದು. ಸಾಹಿತ್ಯವು ಎಲ್ಲರನ್ನೂ ಸಮಾನತೆ, ಸಹಾನುಭೂತಿಯಿಂದ ನೋಡಲು ಕಲಿಸಿ ಕೊಡುತ್ತದೆ ಎಂದು ರೇಖಾ ಬನ್ನಾಡಿ ಹೇಳಿದರು.

ಕಾರ್ಯಕ್ರಮದಲ್ಲಿ ಕನ್ನಡ ಸಾಹಿತ್ಯ ಪರಿಷತ್ತಿನ ತಾಲೂಕು ಘಟಕದ ಅಧ್ಯಕ್ಷ ರವಿರಾಜ್ ಹೆಚ್.ಪಿ, ಗೌರವ ಕಾರ್ಯದರ್ಶಿ ರಂಜನಿ ವಸಂತ್ ಉಪಸ್ಥಿತ ರಿದ್ದರು. ಇಲಾಖೆ ಸಿಬ್ಬಂದಿ ಶಕುಂತಲ ಕಾಯಕ್ರಮ ನಿರೂಪಿಸಿದರು.