ಪಾಕಿಸ್ತಾನದಲ್ಲಿರುವ ಹಿಂದೂಗಳು ಭಾರತಕ್ಕೆ ತೆರಳಲು ಬಯಸುವುದಿಲ್ಲ: ಆಸಿಫ್ ಅಲಿ ಜರ್ದಾರಿ

ಇಸ್ಲಮಾಬಾದ್, ಆ.15: ಪಾಕಿಸ್ತಾನದಲ್ಲಿರುವ ಹಿಂದೂಗಳು ಭಾರತಕ್ಕೆ ತೆರಳುವುದಕ್ಕಿಂತ ಪಾಕಿಸ್ತಾನದಲ್ಲೇ ಉಳಿಯಲು ಇಷ್ಟಪಡುತ್ತಾರೆ ಎಂದು ಪಾಕಿಸ್ತಾನದ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ಪ್ರತಿಪಾದಿಸಿದ್ದಾರೆ.

ಆಗಸ್ಟ್ 14ರಂದು ನಡೆದ ಸ್ವಾತಂತ್ರ್ಯ ದಿನಾಚರಣೆಯ ಕಾರ್ಯಕ್ರಮದಲ್ಲಿ ಮಾತನಾಡಿದ ಜರ್ದಾರಿ `ಪಾಕಿಸ್ತಾನಿಗಳು ಮತ್ತು ಭಾರತೀಯರ ಚಿಂತನೆಗಳು ವಿಭಿನ್ನವಾಗಿವೆ. ಪಾಕಿಸ್ತಾನದಲ್ಲಿರುವ ಹಿಂದೂಗಳು ತಮ್ಮ ಧರ್ಮವನ್ನು ಆಚರಿಸಲು ಸಂಪೂರ್ಣ ಸ್ವತಂತ್ರರಾಗಿದ್ದಾರೆ . ಭಾರತೀಯರು ಅಖಂಡ ಭಾರತವನ್ನು ನಂಬುತ್ತಾರೆ. ಆದರೆ ನಾವು ಸಹಿಷ್ಣುತೆಯ ಮನೋಭಾವ ಹೊಂದಿರುವ ಮುಸ್ಲಿಮರು. ಪಾಕಿಸ್ತಾನದಲ್ಲಿ ಶೇ. 4 ರಷ್ಟು ಹಿಂದೂ ಜನಸಂಖ್ಯೆಯಿದೆ. ಅವರು ಬೇರೆಲ್ಲೇ ಇರುವುದಕ್ಕಿಂತ ಇಲ್ಲೇ ಅತ್ಯಂತ ಸ್ವತಂತ್ರರಾಗಿದ್ದಾರೆ. ಅವರು ಭಾರತಕ್ಕೆ ಹೋಗುವುದಕ್ಕಿಂತ ನಮ್ಮೊಂದಿಗಿರಲು ಬಯಸುತ್ತಾರೆ' ಎಂದು ಪ್ರತಿಪಾದಿಸಿದ್ದಾರೆ.

ಬ್ರಿಟಿಷ್ ಭಾರತದ ವಿಭಜನೆಯ ಮೂಲಕ ರಚನೆಯಾದ ಪಾಕಿಸ್ತಾನವು, ಭಾರತಕ್ಕಿಂತ ಒಂದು ದಿನ ಮುಂಚಿತವಾಗಿ ತನ್ನ ಸ್ವಾತಂತ್ರ್ಯ ದಿನಾಚರಣೆಯನ್ನು ಆಚರಿಸುತ್ತದೆ.