ಕೊರಗ ಸಮುದಾಯದ ಯುವತಿ ಅಶ್ವಿತಾ ಬಾರ್ಕೂರುಗೆ ಪಿಎಚ್‌ಡಿ

ಬಾರಕೂರು ರಂಗನಕೆರೆಯ ಅಶ್ವಿತಾ ಅವರು ಮೈಸೂರಿನ ಸೈಂಟ್ ಫಿಲೋಮಿನಾ ಕಾಲೇಜಿನ ಡಾ.ನೂರ್ ಮುಬಾಶಿರ್ ಸಿ.ಎ. ಮಾರ್ಗದರ್ಶನದಲ್ಲಿ ‘ಎ ಸ್ಟಡಿ ಆನ್ ಹಾಸ್ಪಿಟಲ್ ಆಂಕ್ಸೈಂಟಿ ಆ್ಯಂಡ್ ಸೈಕೋ ಸೋಶಿಯಲ್ ಸ್ಟೇಟಸ್ ಆಫ್ ವುಮೆನ್ ಅಂಡರ್ ಗೋಯಿಂಗ್ ಕೀಮೋ ಥೆರಪಿ ಫಾರ್ ಬ್ಲಡ್ ಕ್ಯಾನ್ಸರ್’ ಎಂಬ ಮಹಾಪ್ರಬಂಧವನ್ನು ಸಮಾಜಕಾರ್ಯ ವಿಷಯದಲ್ಲಿ ಮಂಡಿಸಿ ಈ ಪ್ರಬಂಧಕ್ಕೆ ಮೈಸೂರು ವಿವಿಯಿಂದ ಡಾಕ್ಟರೇಟ್ ಪದವಿ ಪಡೆದಿದ್ದಾರೆ.

ಅಶ್ವಿತಾ ಅವರು ಉಡುಪಿ ಜಿಲ್ಲೆಯ ಕೊರಗ ಸಂಘಟನೆಯಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಗಣೇಶ್ ಬಾರ್ಕೂರು, ಅನಿತಾ ದಂಪತಿಯ ಕಿರಿಯ ಪುತ್ರಿ. ಶ್ರೀದುರ್ಗಾಪರಮೇಶ್ವರಿ ಖಾಸಗಿ ಹಿರಿಯ ಪ್ರಾಥಮಿಕ ಶಾಲೆ ರಂಗನಕೆರೆಯಲ್ಲಿ ಅಂಗನವಾಡಿಯಿಂದ ಒಂದನೇ ತರಗತಿ

ಯವರೆಗೆ, ಪ್ರಾಥಮಿಕ ಶಿಕ್ಷಣವನ್ನು ಬಾರಕೂರು ಮೇರಿನೊಲ್ ಶಾಲೆಯಲ್ಲಿ, ಪ್ರೌಢ ಹಾಗೂ ಪಿಯುಸಿ ಶಿಕ್ಷಣವನ್ನು ಬಾರಕೂರಿನ ನ್ಯಾಷನಲ್ ಜೂನಿಯರ್ ಕಾಲೇಜಿನಲ್ಲಿ ಪಡೆದಿದ್ದ ಅಶ್ವಿತಾ, ಬಾರ್ಕೂರು ರುಕ್ಮಿಣಿ ಶೆಡ್ತಿ ಸ್ಮಾರಕ ನ್ಯಾಷನಲ್ ಸರಕಾರಿ ಪದವಿ ಕಾಲೇಜು ಮತ್ತು ಅಧ್ಯಯನ ಕೇಂದ್ರದಲ್ಲಿ ಬ್ಯಾಚುಲರ್ ಆಫ್ ಸೋಶಿಯಲ್ ವರ್ಕ್ (ಬಿಎಸ್‌ಡಬ್ಲ್ಯು)ಮತ್ತು ಮಾಸ್ಟರ್ ಆಫ್ ಸೋಶಿಯಲ್ ವರ್ಕ್ (ಎಂಎಸ್‌ಡಬ್ಲ್ಯು) ಸ್ನಾತಕೋತ್ತರ ಪದವಿ ಪಡೆದಿದ್ದರು.

ಸರಕಾರ ಸ್ಪಂದಿಸಬೇಕು: ಸಂಶೋಧನಾ ಅಧ್ಯಯನ ಮಾಡುವಾಗ ನಾಲ್ಕು ಜಿಲ್ಲೆಗಳಲ್ಲಿರುವ ಆಸ್ಪತ್ರೆಗೆ ಭೇಟಿ ಮಾಡಿದ್ದ ಅಶ್ವಿತಾ, ಅಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ರಕ್ತ ಕ್ಯಾನ್ಸರ್‌ನಿಂದ ಬಳಲುತ್ತಿರುವ ರೋಗಿಗಳನ್ನು ನೋಡಿ ಅವರು ಹಾಗೂ ಕುಟುಂಬಿಕರು ಪಡುವ ಸಂಕಷ್ಟಗಳನ್ನು ಖುದ್ದಾಗಿ ಕಂಡು, ಮಾಹಿತಿ ಪಡೆದುಕೊಂಡಿದ್ದರು. ಸರಕಾರ ಇಂತಹ ರೋಗಿಗಳ ಚಿಕಿತ್ಸೆಗೆ ಯಾವುದೇ ಮಾನದಂಡಗಳಿಲ್ಲದೆ ಸ್ಪಂದನೆ ನೀಡಬೇಕು. ಆರ್ಥಿಕವಾಗಿ ಅವರ ನೆರವಿಗೆ ನಿಲ್ಲಬೇಕು. ಸಮಾಜವು ಅವರ ಜೊತೆಯಾಗಬೇಕು ಎಂಬ ಚಿಂತನೆಯನ್ನು ಇವರು ವ್ಯಕ್ತಪಡಿಸುತ್ತಾರೆ.

ಕೊರಗ ಸಮುದಾಯದಲ್ಲಿ ಐದನೇ ಪಿಎಚ್‌ಡಿ :

ಶತಶತಮಾನಗಳಿಂದ ಶೋಷಣೆಗೆ ಸಿಲುಕಿ ನಲುಗಿದ್ದ ತೀರಾ ಹಿಂದುಳಿದ, ಈಗಲೂ ಸಮಾಜದ ಮುಖ್ಯ ವಾಹಿನಿಗೆ ಬರಲು ಹಿಂಜರಿಯುತ್ತಿರುವ ಕರಾವಳಿಯ ಕೊರಗ ಸಮುದಾಯದಲ್ಲಿ ವಿದ್ಯಾಭ್ಯಾಸ ಪಡೆದವರ ಸಂಖ್ಯೆ ತೀರಾ ವಿರಳ. ಈಗಲೂ ಕೈಬೆರಳೆಣಿಕೆಯ ವೈದ್ಯರು, ಇಂಜಿನಿಯರ್‌ಗಳು ಸಮುದಾಯದಲ್ಲಿದ್ದಾರೆ.

ಅಶ್ವಿತಾ ಕೊರಗ ಸಮುದಾಯದಲ್ಲಿ ಡಾಕ್ಟರೇಟ್ ಪಡೆದ ಐದನೇ ಸಾಧಕಿಯಾಗಿದ್ದಾರೆ. ಅತಿ ಕಿರಿಯ ವಯಸ್ಸಿನಲ್ಲಿ ಈ ಸಾಧನೆ ಮಾಡಿದ ಹೆಗ್ಗಳಿಕೆಯೂ ಇವರಿಗಿದೆ. ಕೊರಗ ಸಮುದಾಯದಲ್ಲಿ ಇದುವರೆಗೆ ಒಟ್ಟು ನಾಲ್ವರು ವಿವಿಧ ವಿಷಯಗಳಲ್ಲಿ ಅಧ್ಯಯನ ನಡೆಸಿ ಪಿಎಚ್ಡಿ ಪಡೆದಿದ್ದಾರೆ. ಡಾ.ಬಾಬು ಕೊರಗ ಬೆಳ್ತಂಗಡಿ, ಡಾ.ಸಬೀತಾ ಗುಂಡ್ಮಿ ಹಾಗೂ ಅವರ ಪತಿ ದಿನಕರ ಕೆಂಜೂರು ಅಲ್ಲದೇ ಕಲಾವತಿ ಇದುವರೆಗೆ ಡಾಕ್ಟರೆಟ್ ಪಡೆದ ಕೊರಗ ಸಮುದಾಯದ ಸಾಧಕರು. ಇದೀಗ ಕಿರಿಯ ವಯಸ್ಸಿನಲ್ಲಿ ಅಶ್ವಿತಾ ಪಿಎಚ್ಡಿ ಪದವಿ ಪಡೆಯುವ ಮೂಲಕ ಐದನೇ ಸಾಧಕಿಯಾಗಿದ್ದು ಸಮುದಾಯಕ್ಕೆ ಹೆಮ್ಮೆ ತಂದಿದ್ದಾರೆ.

ರಾಜಕೀಯ ಬಲವಿಲ್ಲದ ಕೊರಗ ಸಮುದಾಯ :

ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಗಳಲ್ಲಿ ಕಾಡಂಚಿನಲ್ಲಿ ತೀರಾ ಹಿಂದುಳಿದ ಸ್ಥಿತಿಯಲ್ಲಿ ಈಗಲೂ ಬದುಕಿರುವ ಮೂಲ ನಿವಾಸಿ ಕೊರಗಸಮುದಾಯದ ಜನಸಂಖ್ಯೆ 10ರಿಂದ 20 ಸಾವಿರ ನಡುವೆ ಇದೆ. ಪ್ರತಿ ಗಣತಿಯ ಸಂದರ್ಭದಲ್ಲೂ ಸಮುದಾಯದ ಜನಸಂಖ್ಯೆ ಕುಸಿಯುತ್ತಿರುವುದು ಕಳವಳಕ್ಕೆ ಕಾರಣವಾಗಿದೆ. ಸರಕಾರದ ವಿಶೇಷ ಪ್ರಯತ್ನದ ಹೊರತಾಗಿ ಅಪೌಷ್ಟಿಕತೆಯಿಂದ ಬಳಲುತ್ತಿರುವ ಈ ಸಮುದಾಯ ಈಗಲೂ ಸಮಾಜದ ವಿಶೇಷ ನಿಗಾಕ್ಕೆ ಅರ್ಹವಾಗಿದೆ.

ನಗಣ್ಯ ಜನಸಂಖ್ಯೆಯ ಕಾರಣ ಇವರು ರಾಜಕೀಯವಾಗಿ, ಆರ್ಥಿಕವಾಗಿ, ಸಾಮಾಜಿಕವಾಗಿ ಈಗಲೂ ದುರ್ಬಲರೆಂದೇ ಹೇಳಬಹುದು. ಮೀಸಲಾತಿಯೊಳಗೆ ಸಮುದಾಯ ಬಂದರೂ ರಾಜಕೀಯ ಶಕ್ತಿಯ ಬೆಂಬಲ ಇಲ್ಲದೇ ಇರುವ ಕಾರಣ, ಕೆಲವೇ ಕೆಲವು ಪದವೀಧರರಿಗೆ ಈಗಲೂ ಪೌರಕಾರ್ಮಿಕ ಹುದ್ದೆಗಿಂತ ಮೇಲಿನ ಹುದ್ದೆಪಡೆಯಲು ಹರಸಾಹಸ ಪಡಬೇಕು. ಪಿಎಚ್‌ಡಿ ಪಡೆದಿರುವ ಐವರು ಸಾಧಕರಲ್ಲಿ ಖಾಯಂ ನೌಕರಿ ಸಿಕ್ಕಿರುವುದು ಇಬ್ಬರಿಗೆ ಮಾತ್ರ ಎಂಬುದು ಅಚ್ಚರಿ ಎನಿಸಿದರೂ ನಿಜ. ಕೊರಗರ ಉದ್ಧಾರ ಎಂಬುದು ಅಧಿಕಾರಿಗಳು ಹಾಗೂ ರಾಜಕಾರಣಿಗಳಲ್ಲಿ ಬಾಯಿ ಮಾತಿಗೆ ಮಾತ್ರ ಸೀಮಿತವಾಗುಳಿದಿದೆ.

ಕೊರಗ ಸಮುದಾಯಕ್ಕೆ ಸರಕಾರ ವಿಶೇಷ ಸವಲತ್ತು, ಸೌಲಭ್ಯ ಘೋಷಿಸುತಿದ್ದರೂ ಸಮುದಾಯಕ್ಕೆ ತಲುಪದಿರಲು ಆಡಳಿತದ ಇಚ್ಛಾಶಕ್ತಿಯ ಕೊರತೆಯೇ ಕಾರಣ ಎಂಬುದು ಸುಳ್ಳಲ್ಲ. ಇಲ್ಲದಿದ್ದರೆ ಕೆಲವೇ ಸಾವಿರ ಜನಸಂಖ್ಯೆ ಸಮುದಾಯವೊಂದರ ಪದವೀಧರರಲ್ಲಿ ಅಧಿಕಾಂಶ ಮಂದಿ ಸರಕಾರಿ ನೌಕರಿಗೆ ಪರಿಗಣಿತ ವಾಗದೇ ನಿರುದ್ಯೋಗಿಗಳಾಗಿ ಇರುತ್ತಿರಲಿಲ್ಲ.