ಅರಣ್ಯಾಧಿಕಾರಿಗಳ ನಿರ್ಲಕ್ಷ್ಯಕ್ಕೆ ಪಾಳುಬಿದ್ದ ಸಸ್ಯೋದ್ಯಾನ

ಲಿಂಗಸುಗೂರು: ಸಾರ್ವಜನಿಕರಿಗೆ ಹಸಿರಿನ ವಾತಾವರಣ, ಮಕ್ಕಳಿಗೆ ಆಟ-ಮನರಂಜನೆ ಹಾಗೂ ಪರಿಸರ ಜಾಗೃತಿ ಮೂಡಿಸುವ ಉದ್ದೇಶದಿಂದ ತಾಲೂಕಿನ ಅಡವಿಭಾವಿ ಗ್ರಾಮದ ಬಳಿ ಕೋಟ್ಯಂತರ ರೂ. ವೆಚ್ಚದಲ್ಲಿ ನಿರ್ಮಿಸಲಾದ ಸಸ್ಯೋದ್ಯಾನವನವು ನಿರ್ವಹಣೆಯ ಕೊರತೆಯಿಂದ ಪಾಳುಬಿದ್ದ ಸ್ಥಿತಿಗೆ ತಲುಪಿದೆ.

ಒಮ್ಮೆ ಹಸಿರಿನಿಂದ ಕಂಗೊಳಿಸುತ್ತಿದ್ದ ಉದ್ಯಾನವನದಲ್ಲಿ ಇದೀಗ ಒಣಗಿದ ಗಿಡಗಳು, ಕಳೆಗಿಡಗಳು, ನೀರಿಲ್ಲದ ತೊಟ್ಟಿಗಳು ಹಾಗೂ ಮುರಿದು ಬಿದ್ದ ಮಕ್ಕಳ ಆಟಿಕೆಗಳೇ ಕಾಣಿಸುತ್ತಿವೆ. ಸಸಿಗಳಿಗೆ ನೀರುಣಿಸುವ ವ್ಯವಸ್ಥೆ ಸಮರ್ಪಕವಾಗಿಲ್ಲದ ಪರಿಣಾಮ ಹಲವು ಗಿಡಗಳು ಒಣಗಿದ್ದು, ಉದ್ಯಾನವನದ ಸೌಂದರ್ಯವೇ ಮರೆಯಾಗಿದೆ.

ನೀರಿನ ತೊಟ್ಟಿಗಳಿವೆ, ನೀರಿಲ್ಲ!: ಸಸ್ಯಗಳ ಸಂರಕ್ಷಣೆಗಾಗಿ ನಿರ್ಮಿಸಿರುವ ನೀರಿನ ತೊಟ್ಟಿಗಳು ಖಾಲಿಯಾಗಿ ಬಣಗುಡುತ್ತಿವೆ. ಸಸಿಗಳಿಗೆ ಸಮರ್ಪಕವಾಗಿ ನೀರುಣಿಸುವ ವ್ಯವಸ್ಥೆಯಿಲ್ಲದೆ ಹಸಿರು ಪ್ರದೇಶ ಒಣಭೂಮಿಯಂತಾಗಿದೆ. ಉದ್ಯಾನವನದ ಸೌಂದರ್ಯ ಹೆಚ್ಚಿಸಬೇಕಿದ್ದ ಆಕಾಶಮಲ್ಲಿಗೆ ಎಂಬ ನಾಮಫಲಕದ ಮುಂದೆಯೇ ಒಣಗಿದ ಮರಗಳು ಸಾಲುಗಟ್ಟಿ ನಿಂತಿರುವುದು ನಿರ್ವಹಣೆಯ ಸ್ಥಿತಿಗೆ ಕನ್ನಡಿ ಹಿಡಿದಂತಿದೆ.

ಮಕ್ಕಳ ಮನರಂಜನೆಗಾಗಿ ಅಳವಡಿಸಲಾಗಿದ್ದ ಜಾರುಬಂಡಿ, ಜೋಕಾಲಿ ಸೇರಿದಂತೆ ವಿವಿಧ ಆಟಿಕೆಗಳು ನಿರ್ವಹಣೆಯ ಕೊರತೆಯಿಂದ ಮುರಿದು ಬಿದ್ದಿವೆ. ಕೆಲವು ಆಟಿಕೆಗಳು ತುಕ್ಕು ಹಿಡಿದಿದ್ದು, ಇನ್ನು ಕೆಲವು ಅಪಾಯಕಾರಿ ಸ್ಥಿತಿಯಲ್ಲಿವೆ. ಇದರಿಂದ ಮಕ್ಕಳನ್ನು ಉದ್ಯಾನವನಕ್ಕೆ ಕರೆತರುವ ಪೋಷಕರು ಆತಂಕಪಡುವಂತಾಗಿದೆ.

ಸಾರ್ವಜನಿಕರ ಹಣದಲ್ಲಿ ನಿರ್ಮಿಸಲಾದ ಉದ್ಯಾನವನವನ್ನು ನಿರಂತರವಾಗಿ ನಿರ್ವಹಿಸುವ ಜವಾಬ್ದಾರಿ ಅರಣ್ಯ ಇಲಾಖೆಯ ಮೇಲಿದೆ. ಆದರೆ, ನಿಯಮಿತ ಸ್ವಚ್ಛತೆ, ಸಸಿಗಳಿಗೆ ನೀರುಣಿಸುವುದು, ಆಟಿಕೆಗಳ ದುರಸ್ತಿ ಹಾಗೂ ಮೂಲಸೌಕರ್ಯಗಳ ನಿರ್ವಹಣೆಗೆ ಗಮನಹರಿಸದಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ. ಪ್ರವಾಸಿಗರನ್ನು ಆಕರ್ಷಿಸಬೇಕಿದ್ದ ಉದ್ಯಾನವನ ಇದೀಗ ನಿರ್ಲಕ್ಷ್ಯದ ತಾಣವಾಗಿ ಮಾರ್ಪಟ್ಟಿದೆ.

ಪುನಶ್ಚೇತನಕ್ಕೆ ಸಾರ್ವಜನಿಕರ ಆಗ್ರಹ

ಅರಣ್ಯ ಇಲಾಖೆ ಅಧಿಕಾರಿಗಳು ಕೂಡಲೇ ಸ್ಥಳ ಪರಿಶೀಲನೆ ನಡೆಸಿ, ಒಣಗಿದ ಗಿಡಗಳ ಬದಲಿಗೆ ಹೊಸ ಸಸಿಗಳನ್ನು ನೆಡಬೇಕು. ನೀರಿನ ವ್ಯವಸ್ಥೆ ಕಲ್ಪಿಸುವುದರ ಜೊತೆಗೆ ಮುರಿದ ಆಟಿಕೆಗಳನ್ನು ದುರಸ್ತಿಗೊಳಿಸಬೇಕು. ಉದ್ಯಾನವನದ ಸ್ವಚ್ಛತೆ ಹಾಗೂ ನಿರಂತರ ನಿರ್ವಹಣೆಗೆ ಅಗತ್ಯ ಸಿಬ್ಬಂದಿಯನ್ನು ನಿಯೋಜಿಸಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.

‘ಸಸ್ಯೋದ್ಯಾನವನ’ ಎಂಬ ಹೆಸರಿನಲ್ಲೇ ಪಾಳುಬಿದ್ದ ಪ್ರದೇಶವನ್ನು ಉಳಿಸಿಕೊಳ್ಳಲಾಗುತ್ತದೆಯೇ ಅಥವಾ ಅಧಿಕಾರಿಗಳು ಎಚ್ಚೆತ್ತುಕೊಂಡು ಅದಕ್ಕೆ ಮರುಜೀವ ನೀಡುತ್ತಾರೆಯೇ ಎಂಬುದನ್ನು ಕಾದು ನೋಡಬೇಕಿದೆ.