ಭಾರತದ ಮೊದಲ ಸ್ವದೇಶಿ ಬುಲೆಟ್ ರೈಲು ನಿರ್ಮಾಣ ಪ್ರಗತಿಯಲ್ಲಿ : ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್

ಬೆಂಗಳೂರು : ಭಾರತದ ಸ್ವದೇಶಿ ಹೈಸ್ಪೀಡ್ ರೈಲು ತಂತ್ರಜ್ಞಾನ ಕ್ಷೇತ್ರದಲ್ಲಿ ಮಹತ್ವದ ಮೈಲಿಗಲ್ಲು ಸಾಧಿಸಲಾಗುತ್ತಿದೆ. ದೇಶದ ಮೊದಲ ಸ್ವದೇಶಿ ಬುಲೆಟ್ ರೈಲು ನಿರ್ಮಾಣ ಕಾರ್ಯ ಬೆಂಗಳೂರಿನ ಬಿಇಎಂಎಲ್ ಘಟಕದಲ್ಲಿ ಪ್ರಗತಿಯಲ್ಲಿದ್ದು, ಇದರ ವಿನ್ಯಾಸ ಪೂರ್ಣಗೊಂಡಿದೆ. ಮೊದಲ ರೈಲು ಮೂಲಮಾದರಿ 2027ರ ಆರಂಭದಲ್ಲಿ ಸಿದ್ಧವಾಗುವ ನಿರೀಕ್ಷೆಯಿದೆ ಎಂದು ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ತಿಳಿಸಿದ್ದಾರೆ.

ಬೆಂಗಳೂರಿನ ಬಿಇಎಂಎಲ್‍ನ ಆದಿತ್ಯ ರೈಲು ಉತ್ಪಾದನಾ ಘಟಕಕ್ಕೆ ಭೇಟಿ ನೀಡಿದ ಅವರು, ಮುಂಬೈ-ಅಹಮದಾಬಾದ್ ಹೈಸ್ಪೀಡ್ ರೈಲು ಕಾರಿಡಾರ್ ಗಾಗಿ ನಿರ್ಮಿಸಲಾಗುತ್ತಿರುವ ಭಾರತದ ಮೊದಲ ಸ್ವದೇಶಿ ಬುಲೆಟ್ ರೈಲು ‘ಭಾರತ್ ಬುಲೆಟ್ ಟ್ರೈನ್' (ಬಿ-28) ಉತ್ಪಾದನಾ ಪ್ರಕ್ರಿಯೆಯನ್ನು ಪರಿಶೀಲಿಸಿದರು.

ಈ ಸಂದರ್ಭದಲ್ಲಿ ರೈಲಿನ ವಿನ್ಯಾಸ, ಬೋಗಿಗಳ ನಿರ್ಮಾಣ, ಎಂಜಿನಿಯರಿಂಗ್ ತಂತ್ರಜ್ಞಾನ, ಸುರಕ್ಷತಾ ವ್ಯವಸ್ಥೆ ಹಾಗೂ ಪ್ರಯಾಣಿಕರ ಅನುಕೂಲಕ್ಕಾಗಿ ಅಳವಡಿಸಲಾಗುತ್ತಿರುವ ಸೌಲಭ್ಯಗಳ ಕುರಿತು ಅಧಿಕಾರಿಗಳಿಂದ ಅವರು ಮಾಹಿತಿ ಪಡೆದರು.

ರೈಲಿನ ಬೋಗಿಗಳ ರಚನಾತ್ಮಕ ಬಲ ಮತ್ತು ಸುರಕ್ಷತೆಯನ್ನು ಪರೀಕ್ಷಿಸುವ ‘ಸ್ಕ್ವೀಝ್ ಟೆಸ್ಟ್' ಪ್ರಕ್ರಿಯೆಯನ್ನು ವೀಕ್ಷಿಸಿದ ಅವರು, ಈ ಪರೀಕ್ಷೆಯಲ್ಲಿ ಬೋಗಿಯ ದೇಹದ ಮೇಲೆ ನಿಯಂತ್ರಿತ ಒತ್ತಡ ಮತ್ತು ಎಳೆಯುವ ಬಲವನ್ನು ಪ್ರಯೋಗಿಸಿ ಅದರ ದೃಢತೆ, ಸ್ಥಿರತೆ ಹಾಗೂ ರಚನಾತ್ಮಕ ಸಾಮರ್ಥ್ಯವನ್ನು ಪರಿಶೀಲಿಸಲಾಗುತ್ತದೆ. ಪರೀಕ್ಷೆಯ ಅಂತಿಮ ಹಂತ ಪೂರ್ಣಗೊಂಡ ಬಳಿಕ ಮುಂದಿನ ಉತ್ಪಾದನಾ ಪ್ರಕ್ರಿಯೆಗಳಿಗೆ ಚಾಲನೆ ದೊರೆಯಲಿದೆ ಎಂದು ತಿಳಿಸಿದರು.

ಗಂಟೆಗೆ 280 ಕಿ.ಮೀ. ವೇಗದ ಸಾಮರ್ಥ್ಯ :

ಬಿ-28 ಮಾದರಿಯ ಸ್ವದೇಶಿ ಬುಲೆಟ್ ರೈಲು ಗಂಟೆಗೆ ಗರಿಷ್ಠ 280 ಕಿ.ಮೀ. ಪರೀಕ್ಷಾರ್ಥ ವೇಗವನ್ನು ಹೊಂದಿದ್ದು, ಕಾರ್ಯಾಚರಣೆಯ ವೇಗ ಗಂಟೆಗೆ 249 ಕಿ.ಮೀ. ಆಗಿರಲಿದೆ. ಸುಮಾರು 202 ಮೀಟರ್ ಉದ್ದದ ಈ ರೈಲಿನಲ್ಲಿ ಎಂಟು ಬೋಗಿಗಳಿದ್ದು, ಏಕಕಾಲದಲ್ಲಿ ಸುಮಾರು 557 ಪ್ರಯಾಣಿಕರು ಸಂಚರಿಸಬಹುದಾಗಿದೆ ಎಂದು ಅವರು ಹೇಳಿದರು.

ರೈಲಿನಲ್ಲಿ ಏಳು ಸಾಮಾನ್ಯ ದರ್ಜೆಯ ಬೋಗಿಗಳು ಮತ್ತು ಒಂದು ಎಕ್ಸಿಕ್ಯೂಟಿವ್ ದರ್ಜೆಯ ಬೋಗಿ ಇರಲಿವೆ. ಅಂಗವಿಕಲರು ಹಾಗೂ ವಿಶೇಷ ಚಲನವಲನದ ಅಗತ್ಯವಿರುವ ಪ್ರಯಾಣಿಕರಿಗೂ ಅನುಕೂಲವಾಗುವಂತೆ ವಿಶೇಷ ಸೌಲಭ್ಯಗಳನ್ನು ಕಲ್ಪಿಸಲಾಗುತ್ತಿದೆ ಎಂದು ಅಶ್ವಿನಿ ವೈಷ್ಣವ್ ತಿಳಿಸಿದರು.

ಆಧುನಿಕ ಪ್ರಯಾಣಿಕ ಸೌಲಭ್ಯಗಳು :

ಪ್ರಯಾಣಿಕರ ಅನುಕೂಲಕ್ಕಾಗಿ ಆರಾಮದಾಯಕ ಆಸನಗಳು, ವಿಶಾಲ ಕಿಟಕಿಗಳು, ಎಲ್‍ಇಡಿ ಬೆಳಕಿನ ವ್ಯವಸ್ಥೆ, ಲಗೇಜ್ ಇಡುವ ಸ್ಥಳ, ಮೊಬೈಲ್ ಮತ್ತು ಲ್ಯಾಪ್‍ಟಾಪ್ ಚಾರ್ಜಿಂಗ್ ಸೌಲಭ್ಯ ಹಾಗೂ ಆಧುನಿಕ ಬಯೋ-ಡೈಜೆಸ್ಟರ್ ಶೌಚಾಲಯಗಳನ್ನು ಅಳವಡಿಸಲಾಗುತ್ತಿದೆ ಎಂದು ಅವರು ಹೇಳಿದರು.

ಇಂಗ್ಲಿಷ್‌, ಹಿಂದಿ ಮತ್ತು ಪ್ರಾದೇಶಿಕ ಭಾಷೆಗಳಲ್ಲಿ ಪ್ರಯಾಣದ ಮಾಹಿತಿ ನೀಡುವ ಎಲ್‍ಸಿಡಿ ಪರದೆಗಳು, ಸ್ವಯಂಚಾಲಿತ ಧ್ವನಿ ಪ್ರಕಟಣೆ, ತುರ್ತು ಸಂವಹನ ವ್ಯವಸ್ಥೆ ಹಾಗೂ ವೈ-ಫೈ ಆಧಾರಿತ ಮನರಂಜನಾ ಸೌಲಭ್ಯಗಳೂ ಇರಲಿವೆ. ಅಂಗವಿಕಲ ಪ್ರಯಾಣಿಕರಿಗಾಗಿ ಗಾಲಿಕುರ್ಚಿ ಸಂಚಾರಕ್ಕೆ ಅನುಕೂಲಕರ ಬಾಗಿಲುಗಳು, ವಿಶೇಷ ಆಸನಗಳು, ಶೌಚಾಲಯಗಳು ಮತ್ತು ಬ್ರೈಲ್ ಲಿಪಿಯ ಮಾಹಿತಿ ಫಲಕಗಳನ್ನು ಅಳವಡಿಸಲಾಗುತ್ತಿದೆ ರೈಲ್ವೆ ಸಚಿವರು ಮಾಹಿತಿ ನೀಡಿದರು.

ಸ್ವದೇಶಿ ತಂತ್ರಜ್ಞಾನಕ್ಕೆ ಆದ್ಯತೆ :

ಈ ಯೋಜನೆಯು ಭಾರತದ ಸ್ವದೇಶಿ ಎಂಜಿನಿಯರಿಂಗ್ ಮತ್ತು ಹೈಸ್ಪೀಡ್ ರೈಲು ತಂತ್ರಜ್ಞಾನ ಅಭಿವೃದ್ಧಿಗೆ ಮಹತ್ವದ ಕೊಡುಗೆ ನೀಡಲಿದೆ. ಬಿಇಎಂಎಲ್ ಮತ್ತು ಮೆಧಾ ಸರ್ವೋ ಡ್ರೈವ್ಸ್ ಸಂಸ್ಥೆಗಳ ಒಕ್ಕೂಟವು ಇಂಟಿಗ್ರಲ್ ಕೋಚ್ ಫ್ಯಾಕ್ಟರಿ ಮೂಲಕ ಎರಡು ಸ್ವದೇಶಿ ಹೈಸ್ಪೀಡ್ ರೈಲು ಸೆಟ್‍ಗಳ ನಿರ್ಮಾಣದ ಗುತ್ತಿಗೆ ಪಡೆದಿದೆ ಎಂದು ಅವರು ನುಡಿದರು.

ರೈಲಿನಲ್ಲಿ 25 ಕೆವಿ ವಿದ್ಯುತ್ ಚಾಲನಾ ವ್ಯವಸ್ಥೆ ಹಾಗೂ ಬ್ರೇಕ್ ಹಾಕುವ ಸಂದರ್ಭದಲ್ಲಿ ವಿದ್ಯುತ್ ಶಕ್ತಿಯನ್ನು ಮರುಪಡೆಯುವ ಪುನರುತ್ಪಾದಕ ಬ್ರೇಕಿಂಗ್ ತಂತ್ರಜ್ಞಾನವನ್ನು ಬಳಸಲಾಗುತ್ತಿದೆ. ವಾಯು ಪ್ರತಿರೋಧ, ಶಬ್ದ ಮತ್ತು ಕಂಪನವನ್ನು ಕಡಿಮೆ ಮಾಡುವ ವಿಶೇಷ ವಿನ್ಯಾಸವನ್ನೂ ಅಳವಡಿಸಲಾಗಿದೆ ಎಂದು ಅಶ್ವಿನಿ ವೈಷ್ಣವ್ ಹೇಳಿದರು.

ಈ ರೈಲಿನ ನಿರ್ಮಾಣದ ಮೂಲಕ ಭಾರತವು ಹೈಸ್ಪೀಡ್ ರೈಲು ತಂತ್ರಜ್ಞಾನದಲ್ಲಿ ತನ್ನದೇ ಆದ ಉತ್ಪಾದನಾ ಸಾಮರ್ಥ್ಯವನ್ನು ಅಭಿವೃದ್ಧಿಪಡಿಸುವತ್ತ ಮುನ್ನಡೆಯುತ್ತಿದೆ. ಮುಂದಿನ ದಿನಗಳಲ್ಲಿ ದೇಶದ ಇತರ ಹೈಸ್ಪೀಡ್ ರೈಲು ಕಾರಿಡಾರ್‍ಗಳಿಗೂ ಸ್ವದೇಶಿ ತಂತ್ರಜ್ಞಾನವನ್ನು ಬಳಸುವ ಉದ್ದೇಶವಿದೆ ಎಂದು ಅವರು ತಿಳಿಸಿದರು.