ಯಾಂತ್ರೀಕೃತ ಕೃಷಿಗೆ ಉತ್ತೇಜನ; ಲೋಪರಹಿತವಾಗಿ ‘ನೇಗಿಲ ಯೋಗಿ ಯೋಜನೆ’ ಅನುಷ್ಟಾನಕ್ಕೆ : ಸಚಿವ ನರೇಂದ್ರಸ್ವಾಮಿ ಸೂಚನೆ

ಬೆಂಗಳೂರು, ಅ.19: ರಾಜ್ಯದ ಸಣ್ಣ ಹಾಗೂ ಅತಿ ಸಣ್ಣ ರೈತರ ನೆರವಿಗೆ ಧಾವಿಸಲು ಕೃಷಿ ಇಲಾಖೆ ಆರಂಭಿಸುತ್ತಿರುವ ಮುಖ್ಯಮಂತ್ರಿ ನೇಗಿಲ ಯೋಗಿ ಯೋಜನೆಯನ್ನು ಯಾವುದೇ ಲೋಪಗಳಿಲ್ಲದೆ ಅನುಷ್ಠಾನಗೊಳಿಸಬೇಕು ಎಂದು ಕೃಷಿ ಸಚಿವ ಪಿ.ಎಂ.ನರೇಂದ್ರಸ್ವಾಮಿ ಅವರು ಅಧಿಕಾರಿಗಳಿಗೆ ಸೂಚನೆ ನೀಡಿದರು.

ಸೋಮವಾರ ನಗರದಲ್ಲಿ ಕೃಷಿ ಇಲಾಖೆ ಕಚೇರಿಯಲ್ಲಿ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ ಅವರು, ನೇಗಿಲ ಯೋಗಿ ಯೋಜನೆಯ ಮಾರ್ಗಸೂಚಿಗಳು, ಆಯ್ಕೆಯಾಗಿರುವ ತಾಲೂಕುಗಳಲ್ಲಿ ಭೂಮಿಯ ವಿಸ್ತೀರ್ಣ, ಟ್ರ್ಯಾಕ್ಟರ್ ಗಳ ಲಭ್ಯತೆ ಹಾಗೂ ಬುಕ್ಕಿಂಗ್ ಮಾಡುವ ವಿಧಾನಗಳ ಕುರಿತು ಮಾಹಿತಿ ಪಡೆದರು.

3 ಎಕರೆ ಹಾಗೂ ಅದಕ್ಕಿಂತ ಕಡಿಮೆ ಜಮೀನು ಹೊಂದಿರುವ ರೈತರಿಗೆ ವರ್ಷಕ್ಕೆ ಗರಿಷ್ಠ 3 ಕೃಷಿ ಚಟುವಟಿಕೆಗಳಿಗೆ ಪ್ರೋತ್ಸಾಹಧನ ನೀಡಬೇಕು. ಸಚಿವ ಸಂಪುಟದ ತೀರ್ಮಾನದಂತೆ ಜಿಲ್ಲೆಗೆ ಒಂದು ತಾಲೂಕನ್ನು ಪ್ರಾಯೋಗಿಕವಾಗಿ ಆಯ್ಕೆ ಮಾಡಲು ಸೂಚಿಸಲಾಗಿತ್ತು. ಆದರೆ, ಮುಖ್ಯಮಂತ್ರಿ ಇಲಾಖೆಯ ಪ್ರಗತಿ ಪರಿಶೀಲನೆ ವೇಳೆ ಒಂದು ಜಿಲ್ಲೆಗೆ ಎರಡು ತಾಲೂಕುಗಳನ್ನು ಆಯ್ಕೆ ಮಾಡುವಂತೆ ಸೂಚಿಸಿದ ಹಿನ್ನೆಲೆಯಲ್ಲಿ ತಾಲೂಕುಗಳ ಅಂತಿಮ ಪಟ್ಟಿ ಕಳುಹಿಸಲಾಗಿದೆ ಎಂದು ಅವರು ಹೇಳಿದರು.

ಮುಖ್ಯಮಂತ್ರಿ ನೇಗಿಲ ಯೋಗಿ ಯೋಜನೆಯು ರೈತ ಉತ್ತೇಜನ ಕಾರ್ಯಕ್ರಮವಾಗಿದೆ. ಹಾಗಾಗಿ, ಸ್ಪಷ್ಟತೆಯೊಂದಿಗೆ ಯೋಜನೆ ಆರಂಭಿಸಬೇಕು. ಯಾವುದೇ ಗೊಂದಲಗಳಿಗೆ ಆಸ್ಪದ ನೀಡಬಾರದು. ಯೋಜನೆಯಡಿ ಕೈಗೊಳ್ಳುವ ಚಟುವಟಿಕೆಗಳ ಮೇಲ್ವಿಚಾರಣೆ, ಪ್ರೋತ್ಸಾಹಧನ ಪಾವತಿ ಸೇರಿದಂತೆ ಪ್ರತಿಯೊಂದು ಪ್ರಕ್ರಿಯೆಯೂ ವಿಳಂಬವಿಲ್ಲದಂತೆ ನೋಡಿಕೊಳ್ಳಬೇಕು. ಯಾವುದೇ ಸಣ್ಣ ಲೋಪ ಎದುರಾದರೂ ಸರಕಾರ ಜವಾಬ್ದಾರಿ ಆಗಬೇಕಾಗುತ್ತದೆ. ಹಾಗಾಗಿ, ಯೋಜನೆ ಕುರಿತು ರೈತರಿಗೆ ಮನವರಿಕೆ ಮಾಡಿಕೊಡಬೇಕು ಎಂದು ಸಲಹೆ ನೀಡಿದರು.

ಏನೆಲ್ಲಾ ಸಮಸ್ಯೆ ಬರಬಹುದು ಎಂಬುದನ್ನು ಗ್ರಹಿಸಿ ಮುನ್ನೆಚ್ಚರಿಕೆ ವಹಿಸಬೇಕು. ಮುಂದಿನ ಸೋಮವಾರದೊಳಗೆ ಯೋಜನೆ ಕುರಿತು ಸ್ಪಷ್ಟ ಚಿತ್ರಣ ನೀಡಬೇಕು. ದಸರಾ ಬಳಿಕ ಯೋಜನೆ ಕುರಿತು ವ್ಯಾಪಕ ಪ್ರಚಾರ ಆರಂಭಿಸಬೇಕು. ರಾಜಕೀಯ ಟೀಕೆಗಳಿಗೆ ಆಸ್ಪದ ನೀಡದಂತೆ ಪಾರದರ್ಶಕವಾಗಿ ಕಾರ್ಯನಿರ್ವಹಿಸಬೇಕು ಎಂದು ಅಧಿಕಾರಿಗಳಿಗೆ ಕಿವಿ ಮಾತು ಹೇಳಿದರು.

ಜಿಲ್ಲೆಗೆ ಎರಡೆರಡು ತಾಲೂಕುಗಳನ್ನು ಆಯ್ಕೆ ಮಾಡಿರುವುದರಿಂದ ಹೆಚ್ಚುವರಿ ಅನುದಾನಕ್ಕೆ ಹಣಕಾಸು ಇಲಾಖೆಯ ಅನುಮೋದನೆ ಪಡೆಯಬೇಕು ಎಂದು ಅಧಿಕಾರಿಗಳಿಗೆ ಸೂಚಿಸಿದರು.

ಇದಕ್ಕೆ ಪ್ರತಿಕ್ರಿಯಿಸಿದ ಹಣಕಾಸು ಇಲಾಖೆ ಅಧಿಕಾರಿ, ಯೋಜನೆಗೆ ತಗಲುವ ಹೆಚ್ಚುವರಿ ಅನುದಾನವನ್ನು ಒದಗಿಸಲಾಗುವುದು ಎಂದು ಹೇಳಿದರು.

ರಾಜ್ಯದಲ್ಲಿ ಸದ್ಯ 45 ಲಕ್ಷ ಸಣ್ಣ ರೈತರ ಒಟ್ಟು 19.15 ಲಕ್ಷ ಎಕರೆ ಜಮೀನಿದೆ. ಈಗ ಪ್ರಾಯೋಗಿಕವಾಗಿ ಜಾರಿ ಮಾಡಲು ಆಯ್ಕೆಯಾಗಿರುವ ತಾಲೂಕುಗಳಲ್ಲಿ ಒಂದು ಚಟುವಟಿಕೆಗೆ 500 ರೂ.ಗಳಂತೆ ಮೂರು ಎಕರೆಗೆ 1500 ರೂ. ಆಗಲಿದೆ. ಇದಕ್ಕೆ ಒಟ್ಟು 287 ಕೋಟಿ ರೂ. ವೆಚ್ಚವಾಗುವ ಅಂದಾಜಿದೆ. ರೈತರಿಗೆ ಭೂಮಿ ಸಿದ್ಧತೆ, ಬಿತ್ತನೆ ಅಥವಾ ನಾಟಿ, ಯಾಂತ್ರೀಕೃತ ಅಂತರ ಬೇಸಾಯ, ಯಾಂತ್ರೀಕೃತ ಕಟಾವು ಹಾಗೂ ಬೆಳೆ ತ್ಯಾಜ್ಯ ನಿರ್ವಹಣೆ ಚಟುವಟಿಕೆಗಳು ನೇಗಿಲ ಯೋಗಿ ಯೋಜನೆ ವ್ಯಾಪ್ತಿಯಲ್ಲಿ ಬರಲಿವೆ ಎಂದು ವಿವರಿಸಿದರು.

ಯಂತ್ರೋಪಕರಣ ಕೊರತೆ ನೀಗಿಸಲು ಕ್ರಮ: ಬಿತ್ತನೆ ಅಥವಾ ಕಟಾವು ಋತುವಿನಲ್ಲಿ ಒಂದೇ ಬಾರಿಗೆ ಬೇಡಿಕೆ ಹೆಚ್ಚಾದರೆ ಏನೆಲ್ಲಾ ಸಮಸ್ಯೆ ಎದುರಾಗಬಹುದು, ಅವುಗಳನ್ನು ಇತ್ಯರ್ಥಪಡಿಸುವುದು ಹೇಗೆ ಎಂಬ ಬಗ್ಗೆ ಅಧಿಕಾರಿಗಳು ನಿಗಾ ವಹಿಸಬೇಕು. ಟ್ರ್ಯಾಕ್ಟರ್ ಗಳ ಕೊರತೆ ಎದುರಾದರೆ 'ಟಫೆ' ಟ್ರ್ಯಾಕ್ಟರ್ ಕಂಪನಿಯೊಂದಿಗೆ ಮಾತುಕತೆ ನಡೆಸಿ ಸೇವೆ ಒದಗಿಸಲು ಕ್ರಮ ಕೈಗೊಳ್ಳಬೇಕು. ಸದ್ಯ ಕಡಿಮೆ ಪ್ರಮಾಣದ ಟ್ರ್ಯಾಕ್ಟರ್ ಮಾಲಕರು ನೋಂದಣಿ ಮಾಡಿಕೊಂಡಿರಬಹುದು. ಯೋಜನೆ ಜಾರಿಯಾದ ಬಳಿಕ ಟ್ರ್ಯಾಕ್ಟರ್ ನೋಂದಣಿ ಹೆಚ್ಚಬಹುದು. ಪ್ರತಿಯೊಬ್ಬ ಅಧಿಕಾರಿಯೂ ಯೋಜನೆಯ ಸಾಧಕ-ಬಾಧಕಗಳನ್ನು ಖುದ್ದು ಪರಿಶೀಲಿಸಿ, ರೈತರಿಗೆ ಉಪಯೋಗವಾಗುವ ನಿಟ್ಟಿನಲ್ಲಿ ಯೋಜನೆ ಅನುಷ್ಟಾನಗೊಳಿಸಬೇಕು ಎಂದು ನರೇಂದ್ರ ಸ್ವಾಮಿ ಸೂಚಿಸಿದರು.

ಮುಖ್ಯಮಂತ್ರಿ ‘ರೈತ ಚೈತನ್ಯ' ಯೋಜನೆ: ರೈತರಿಗೆ ಬೆಳೆವಾರು ಮಾಹಿತಿ, ಎಸ್ಎಂಎಸ್ ಹಾಗೂ ವಿಡಿಯೋ ಸಂದೇಶಗಳನ್ನು ತಲುಪಿಸಲು ಮುಖ್ಯಮಂತ್ರಿ ರೈತ ಚೈತನ್ಯ ಯೋಜನೆ ಅನುಷ್ಟಾನಗೊಳಿಸಲಾಗುತ್ತಿದೆ. ರೈತರ ಮೊಬೈಲ್ ಸಂಖ್ಯೆಗೆ ಈಗಾಗಲೇ ಲಕ್ಷಾಂತರ ಎಸ್ಎಂಎಸ್ ಗಳನ್ನು ಕಳುಹಿಸಲಾಗಿದೆ. ವಾಟ್ಸಪ್ ಖಾತೆ ಹಾಗೂ ಎಐ ಟೂಲ್ ಬಳಕೆಗೆ ಸಂಬಂಧಿಸಿದಂತೆ ಮೆಟಾ ಸಂಸ್ಥೆಯೊಂದಿಗೆ ವ್ಯವಹರಿಸಲಾಗುತ್ತಿದೆ. ಮುಂದಿನ 15 ದಿನಗಳಲ್ಲಿ ವಿಡಿಯೋ ಸಂದೇಶ ಕಳುಹಿಸಲು ಕ್ರಮ ಜರುಗಿಸಲಾಗುವುದು ಎಂದು ಯೋಜನೆಯ ಅಧಿಕಾರಿಗಳು ಸಚಿವರ ಗಮನಕ್ಕೆ ತಂದರು.

ಚಾಟ್ಬಾಟ್ ಸೇವೆಯ ಜೊತೆಗೆ ‘ವಾಟ್ಸ್ ಬಾಟ್' ಸೇರ್ಪಡೆಗೊಳಿಸಲಾಗುತ್ತಿದ್ದು, ಬಿಎಸ್ಎನ್ಎಲ್ ಸಹಯೋಗದಲ್ಲಿ ದೂರವಾಣಿ ಕರೆಗಳ ಮೂಲಕ ರೈತರಿಗೆ ಮಾಹಿತಿ ನೀಡಲಾಗುವುದು. ಎರಡನೇ ಹಂತದಲ್ಲಿ ರಿಮೋಟ್ ಸೆನ್ಸಿಂಗ್ ಬಳಸಿ ಬೆಳೆ ವಿಸ್ತೀರ್ಣ ಹಾಗೂ ಬೆಳೆ ನಾಶದ ಮಾಹಿತಿ ಪಡೆಯಲಾಗುವುದು. ಕೃಷಿ ಮತ್ತು ತೋಟಗಾರಿಕೆ ಉತ್ಪನ್ನಗಳ ರಫ್ತು ಉತ್ತೇಜನಕ್ಕಾಗಿ ಕ್ಲಸ್ಟರ್ ಆಧಾರಿತ ತರಬೇತಿ ನೀಡಲಾಗುತ್ತದೆ. ಕೆಪೆಕ್ ಸಂಸ್ಥೆಯನ್ನು ಪುನರ್ ರಚಿಸಲು ತೀರ್ಮಾನಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದರು.

ಆಂಧ್ರದಲ್ಲಿ ಸಿಎಸ್ಆರ್ ಹಾಗೂ ಕೇಂದ್ರ ಸರ್ಕಾರದ ನೆರವಿನಿಂದ ಕೋಲ್ಡ್ ಸ್ಟೋರೇಜ್ ಗಳನ್ನು ನಿರ್ಮಿಸಿ ರೈತ ಸಂಘಟನೆಗಳಿಗೆ ಹಸ್ತಾಂತರಿಸಲಾಗಿದೆ. ಅಲ್ಲಿಗೆ ಭೇಟಿ ನೀಡಿ ಪರಿಶೀಲಿಸುವಂತೆ ಅಧಿಕಾರಿಗಳಿಗೆ ಸಲಹೆ ನೀಡಿದ ನರೇಂದ್ರ ಸ್ವಾಮಿ, ಒಣ ಭೂಮಿಯಲ್ಲಿ ಜಮೀನಿಗೆ ದಾರಿ ಮಾಡಿಕೊಡಲು ಕಾನೂನಿನಲ್ಲಿ ಅವಕಾಶ ಕಲ್ಪಿಸಲಾಗಿದೆ. ಆದರೆ, ನೀರಾವರಿ ಅಥವಾ ಗದ್ದೆಗಳಿಗೆ ರಸ್ತೆ ಸಮಸ್ಯೆ ಹೆಚ್ಚಾಗಿದೆ. ನಕಾಶೆಯಲ್ಲಿ ದಾರಿಯಿದ್ದರೆ, ಅದನ್ನು ಸುಸ್ಥಿತಿಗೆ ತಂದು ರಸ್ತೆ ಮಾಡಿಕೊಡಲು ಕಾನೂನುಬದ್ಧ ಚಿಂತನೆ ನಡೆಸಬೇಕು ಎಂದು ಸೂಚಿಸಿದರು.

ಸಭೆಯಲ್ಲಿ ಇಲಾಖೆಯ ಕಾರ್ಯದರ್ಶಿ ಕೆ.ವಿ.ತ್ರಿಲೋಕಚಂದ್ರ, ಕೃಷಿ ಆಯುಕ್ತ ಬಿ.ಸಿ.ಸತೀಶ್, ಕೃಷಿ ಸಚಿವರ ಆಪ್ತ ಕಾರ್ಯದರ್ಶಿ ಕೆ.ಸಿ.ವಿರೂಪಾಕ್ಷ ಹಾಗೂ ಇತರೆ ಅಧಿಕಾರಿಗಳು ಭಾಗವಹಿಸಿದ್ದರು.