ಬೆಂಗಳೂರು : ಜೇಬಿನಿಂದ ದಂಡ ಕಟ್ಟಿದರೆ ಮಾತ್ರ ನೀರಿನ ಮಹತ್ವದ ಬಗ್ಗೆ ಜನರಲ್ಲಿ ಜಾಗೃತಿ ಉಂಟಾಗುತ್ತದೆ - ವಿಜಯ ಭಾಸ್ಕರ್

ಬೆಂಗಳೂರು ಫೆ.11: ಜೇಬಿನಿಂದ ದಂಡ ಕಟ್ಟಿದರೆ ಮಾತ್ರ ನೀರಿನ ಮಹತ್ವದ ಬಗ್ಗೆ ಜನರಲ್ಲಿ ಜಾಗೃತಿ ಉಂಟಾಗುತ್ತದೆ ಎಂದು ಬೆಂಗಳೂರು ಜಲಮಂಡಳಿ ಅಧ್ಯಕ್ಷ ಟಿ.ಎಂ. ವಿಜಯ ಭಾಸ್ಕರ್ ಇಂದಿಲ್ಲಿ ಹೇಳಿದ್ದಾರೆ. ನಗರದಲ್ಲಿಂದು ಸಿಐಐ ಆಯೋಜಿಸಿದ್ದ "ಸುಸ್ಥಿರ ನೀರು ನಿರ್ವಹಣೆಯಲ್ಲಿ ಕೈಗಾರಿಕೆ, ಸರ್ಕಾರ ಮತ್ತು ಸಮುದಾಯಗಳ ಪಾತ್ರ" ಕುರಿತ ವಾರ್ಷಿಕ ಜಲ ಸಮಾವೇಶದಲ್ಲಿ ಮಾತನಾಡಿದ ಅವರು, 

ನಗರದ 65 ಸಾವಿರ ಮನೆಗಳಲ್ಲಿ ಮಳೆ ನೀರು ಕೊಯ್ಲು ಯೋಜನೆಯನ್ನು ಅಳವಡಿಸಲಾಗಿದೆ. ಇನ್ನು ಸಾವಿರಾರು ಮನೆಗಳು ಈ ಯೋಜನೆಯನ್ನು ಅನುಷ್ಠಾನ ಮಾಡಿಲ್ಲ. ಇದಕ್ಕಾಗಿ ಇಂತಹ ಮನೆಗಳಿಗೆ ದಂಡ ವಿಧಿಸಲು ನಿರ್ಧರಿಸಲಾಗಿದ್ದು, ಪ್ರಥಮ ಹಂತದಲ್ಲಿ ಅವರ ನೀರಿನ ಬಿಲ್‌ನ ಶೇಕಡಾ 25ರಷ್ಟು ಹಾಗು ಮೂರು ತಿಂಗಳುಗಳ ಬಳಿಕ ಶೇಕಡಾ 50ರಷ್ಟು ದಂಡ ವಿಧಿಸಲಾಗುವುದು. ದಂಡ ಪಾವತಿಸಿದಾಗ ಮಾತ್ರ ಜಲದ ಮಹತ್ವ ಅರಿವಿಗೆ ಬರಲಿದೆ ಎಂದರು. ಬೆಂಗಳೂರಿಗೆ ಶೇಕಡಾ 90ರಷ್ಟು ನೀರು ಕಾವೇರಿ ನದಿಯಿಂದ ಬರುತ್ತದೆ. ಆದರೆ ಹವಾಮಾನ ಬದಲಾವಣೆ, ಸಕಾಲಕ್ಕೆ ಮಳೆ ಬಾರದಿರುವುದು ಮುಂತಾದ ಸಮಸ್ಯೆಗಳಿಂದ ಕೆಲವು ಋತುಮಾನಗಳಲ್ಲಿ ನೀರಿನ ಕೊರತೆ ಉಂಟಾಗುತ್ತದೆ. ಅದಕ್ಕಾಗಿ ಉಪಯೋಗಿಸಿದ ನೀರಿನ ಮರುಬಳಕೆ, ಮಳೆ ನೀರು ಕೊಯ್ಲು ಮುಂತಾದ ಉಪಕ್ರಮಗಳನ್ನು ಕೈಗೊಳ್ಳಲಾಗಿದೆ 

ಎಂದು ಹೇಳಿದರು. ಕಾವೇರಿ ನೀರಿನ ಜಾಲ ಎಲ್ಲವೂ ಬೆಂಗಳೂರು ದಕ್ಷಿಣದಲ್ಲಿರುವುದರಿಂದ ಬೆಂಗಳೂರು ಉತ್ತರದಲ್ಲಿ ನೀರಿನ ಒತ್ತಡ ಜಾಸ್ತಿಯಿದೆ. ಕಾವೇರಿ 5ನೇ ಹಂತದ ಮೂಲಕ ಪ್ರತಿದಿನ 750 ದಶಲಕ್ಷ ಹೆಚ್ಚುವರಿ ನೀರು ಪೂರೈಸುವ ಸಂಬಂಧ ಈಗಾಗಲೇ ಸರ್ಕಾರಕ್ಕೆ ವಿಸ್ತತ ಯೋಜನಾ ವರದಿ ಸಲ್ಲಿಸಲಾಗಿದೆ. ಯೋಜನೆಗೆ 3200 ಕೋಟಿ ರೂ.ಅಗತ್ಯವಿದ್ದು, ಸರ್ಕಾರ ಶೀಘ್ರವೇ ತೀರ್ಮಾನ ಕೈಗೊಳ್ಳಲಿದೆ. ಹೆಬ್ಬಾಳ, ಯಲಹಂಕ ಮುಂತಾದ ಕಡೆಗಳಲ್ಲಿ ಮಳೆ ನೀರನ್ನು ಸಂಗ್ರಹಿಸಿ ಅಲ್ಲಿನ ಜನರಿಗೆ ಪೂರೈಸುವ ಕುರಿತು ಚಿಂತನೆ ನಡೆಸಲಾಗಿದ್ದು, ಈ ಬಗ್ಗೆ ಸಿಂಗಾಪುರ ಸಂಸ್ಥೆಗೆ ಜವಾಬ್ದಾರಿ ವಹಿಸಲಾಗಿದೆ ಎಂದು ತಿಳಿಸಿದರು.

ಕೈ ಗಾರಿಕೆಗಳು ಹಾಗೂ ಕಟ್ಟಡ ನಿರ್ಮಾಣ ವಲಯ ಸಂಸ್ಕರಣೆಗೊಳಿಸಿದ ನೀರನ್ನು ಬಳಸುವ ಮೂಲಕ ನೀರಿನ ಸಮಸ್ಯೆ ತಗ್ಗಿಸಲು ಪ್ರಯತ್ನಿಸಬೇಕು. ಕೈಗಾರಿಕೆಗಳಿಗೆ ಸಂಸ್ಕರಣೆ ಮಾಡಿದ ನೀರನ್ನು ಬಳಸುವ ಸಂಬಂಧ ಕ್ರೆಡಾಯ್ ಸಂಸೆ್ಥಯೊಂದಿಗೆ ಮಾತುಕತೆ ನಡೆಸಲಾಗಿದೆ. ಕೆಲವೊಂದು ನಿಯಮಗಳ ಸರಳೀಕರಣಕ್ಕೆ ಮನವಿ ಬಂದಿದ್ದು, ಶೀಘ್ರವೇ ಈ ಬಗ್ಗೆ ತೀರ್ಮಾನ ಕೈಗೊಳ್ಳಲಾಗುವುದು ಎಂದು ತಿಳಿಸಿದರು.

ಬೆಂಗಳೂರಿನಲ್ಲಿ ಶೇಕಡಾ 46ರಷ್ಟು ನೀರು ಪೋಲಾಗುತ್ತಿದ್ದು, ಈ ನಷ್ಟವನ್ನು ಶೇಕಡಾ 16ಕ್ಕೆ ಇಳಿಸುವ ಗುರಿ ಹೊಂದಲಾಗಿದೆ ಆದರೆ ಇದು ಕಷ್ಟ ಸಾಧ್ಯ. ಆದರೂ ಕನಿಷ್ಠ ಶೇಕಡಾ 25ಕ್ಕೆ ಇಳಿಸುವ ಪ್ರಾಮಾಣಿಕ ಪ್ರಯತ್ನ ಮಾಡುತ್ತೇವೆ. ಇದಕ್ಕಾಗಿ ಮೊದಲ ಹಂತದಲ್ಲಿ ಬೆಂಗಳೂರು ದಕ್ಷಿಣದಲ್ಲಿರುವ ಎಲ್ಲಾ ತುಕ್ಕು ಹಿಡಿದ ಪೈಪ್‌ಗಳನ್ನು ಬದಲಾಯಿಸಲು ನಿರ್ಧರಿಸಲಾಗಿದೆ. ಹೊಸ ಮೀಟರ್ ಅಳವಡಿಕೆ, ಬಲ್ಕ್ ಮೀಟರ್ ಜೋಡಣೆಗೂ ಕ್ರಮಕೈಗೊಳ್ಳಲಾಗಿದೆ. ನಗರದ ಯಾವುದೇ ಕಡೆ ನೀರಿನ ಪೋಲು ಕಂಡು ಬಂದರೆ ತಕ್ಷಣ ಕಾರ್ಯಪವೃತ್ತರಾಗಲು 22238888 ಎಂಬ ಸಹಾಯವಾಣಿ ಆರಂಭಿಸಲಾಗಿದೆ. ಒಂದು ವಾರದಲ್ಲಿ ಇದನ್ನು 1916 ಸಂಖ್ಯೆಗೆ ಬದಲಾಯಿಸಲಾಗುವುದು. ಸಾರ್ವಜನಿಕರು ನೀರು ಪೋಲು ಮತ್ತು ಒಳಚರಂಡಿ ಸಮಸ್ಯೆಗಳಿಗೆ ಈ ಸಂಖ್ಯೆಗೆ ಕರೆ ಮಾಡಬಹುದು ಎಂದು ವಿವರಿಸಿದರು.

ಬೆಂಗಳೂರಿಗೆ ಪ್ರತಿದಿನ 1650 ದಶಲಕ್ಷ ಲೀಟರ್ ಪೂರೈಕೆಯಾಗುತ್ತಿದೆ. ಅದರಲ್ಲಿ 1300 ದಶಲಕ್ಷ ಲೀಟರ್ ಮತ್ತೆ ಒಳಚರಂಡಿ ಮೂಲಕ ಹೊರಬರುತ್ತಿದೆ. ಆದರೆ ಕೇವಲ 600 ದಶಲಕ್ಷ ಲೀಟರ್ ನೀರನ್ನು ಮಾತ್ರ ಶುದ್ಧೀಕರಿಸುವ ವ್ಯವಸ್ಥೆ ನಮ್ಮಲ್ಲಿದೆ. ಅದಕ್ಕಾಗಿ ಹೆಚ್ಚುವರಿಯಾಗಿ 500 ದಶಲಕ್ಷ ಲೀಟರ್ ಶುದ್ಧೀಕರಣ ಘಟಕ ಸ್ಥಾಪನೆಗೆ ಕ್ರಮಕೈಗೊಳ್ಳಲಾಗಿದ್ದು, ಈ ವರ್ಷಾಂತ್ಯಕ್ಕೆ ಈ ಘಟಕ ಕಾರ್ಯಾರಂಭ ಮಾಡಲಿದೆ ಎಂದು ತಿಳಿಸಿದರು.

ಬೆಂಗಳೂರು ಅಭಿವೃದ್ಧಿ ಸಚಿವ ಕೆ.ಜೆ.ಜಾರ್ಜ್ ಮಾತನಾಡಿ, ಸುಸ್ಥಿರ ನೀರಿನ ನಿರ್ವಹಣೆಯಲ್ಲಿ ಸಮುದಾಯ, ಕೈಗಾರಿಕೋದ್ಯಮಿಗಳ ಪಾತ್ರ ಅಪಾರ.ಪ್ರತಿಯೊಬ್ಬರಿಗೂ ಶುದ್ಧ್ ಕುಡಿಯುವ ನೀರು ಪೂರೈಕೆಯಾಗಬೇಕು ಎಂಬುದು ಸರ್ಕಾರದ ಉದ್ದೇಶ. ಇದಕ್ಕಾಗಿ ರಾಜ್ಯ ಸರ್ಕಾರ ಮುಂದಿನ ಮೂರು ವರ್ಷಗಳಲ್ಲಿ 10 ಸಾವಿರ ಕೋಟಿ ರೂ. ಖರ್ಚು ಮಾಡಲಿದೆ. ನೀರಿನ ಸಂರಕ್ಷಣೆಗೆ ಪ್ರತಿಯೊಬ್ಬರ ಜವಾಬ್ದಾರಿ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಸಿಐಐ ಉಪಾಧ್ಯಕ್ಷ ರವಿ ರಾಘವನ್, ಸಿಐಐ ಸಂಚಾಲಕ ಹರಿಪ್ರಸಾದ್ ಹೆಗ್ಡೆ, ಜರ್ಮನಿಯ ಕೌನ್ಸಲ್ ಜನರಲ್ ಜಾನ್ ರೋಡ್, ಮೊಯಿನುದ್ದೀನ್ ಮತ್ತಿತರರು ಹಾಜರಿದ್ದರು.