ಅಗ್ನಿಶ್ರೀಧರ್ ಬಂಧನ?

ಬೆಂಗಳೂರು, ಫೆ.7:  ಮಂಗಳವಾರ ಸತತ 6 ಗಂಟೆಗಳ ಕಾಲ ಪೊಲೀಸರು ಪತ್ರಕರ್ತ ಅಗ್ನಿಶ್ರೀಧರ್‌ನನ್ನು ವಿಚಾರಣೆ ನಡೆಸುತ್ತಿದ್ದ ವೇಳೆ ಬಿಪಿ ಹೆಚ್ಚಾಗಿ ಕುಸಿದು ಬಿದ್ದಿದ್ದಾರೆ ಎನ್ನಲಾಗಿದೆ. ಅಲ್ಲದೆ, ಎದೆನೋವು ಕಾರಣದಿಂದ ಬೆಂಗಳೂರಿನ ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಲಾಗಿದ್ದು, ಆರೋಗ್ಯದಲ್ಲಿ ಚೇತರಿಕೆ ಆದ ಬೆನ್ನಲ್ಲೇ ಬಂಧಿಸಲಾಗುವುದೆಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

 ನಿಯಮ ಉಲ್ಲಂಘಿಸಿ ಶಸ್ತ್ರಾಸ್ತ್ರ ಹಾಗೂ ಬಾಡಿಗಾರ್ಡ್‌ಗಳನ್ನು ಮನೆಯಲ್ಲಿಟ್ಟುಕೊಂಡಿದ್ದ ಆರೋಪದ ಮೇಲೆ ಹಳೇ ರೌಡಿಶೀಟರ್ ಬಚ್ಚನ್ ಸೇರಿ ಏಳು ಮಂದಿಯನ್ನು ಇಲ್ಲಿನ ಕುಮಾರಸ್ವಾಮಿ ಠಾಣಾ ಪೊಲೀಸರು ಬಂಧಿಸಿದ್ದಾರೆ.

ಬಂಧಿತ ಆರೋಪಿಗಳನ್ನು ಹಳೇ ರೌಡಿ ಶೀಟರ್ ಸೈಯದ್ ಅಮಾನುಲ್ಲಾ ಯಾನೆ ಬಚ್ಚನ್(54), ಬಾಡಿಗಾರ್ಡ್‌ಗಳಾದ ಉತ್ತರಪ್ರದೇಶ ಮೂಲದ ಬ್ರಿಜ್ ಭೂಷಣ್ ಹುಸೇನ್‌ಪಾಂಡೆ(38), ರಾಮ್‌ಕುಮಾರ್ ರಾಯ್(37), ಸಾಬೀರ್ ಅಲಿ(51), ಬನಶಂಕರಿ 2ನೆ ಹಂತದ ಕಾವೇರಿ ನಗರದ ತನ್ವೀರ್(34), ಕನಕಪುರ ಸಂತೆಕೋಡಹಳ್ಳಿಯ ಅರುಣ್‌ಕುಮಾರ್(24) ಹಾಗೂ ಕುಮಾರಸ್ವಾಮಿ ಲೇಔಟ್‌ನ ವೈಷ್ಣವಿನಗರದ ವರಣ್‌ಕುಮಾರ್(20) ಎಂದು ಪೊಲೀಸರು ತಿಳಿಸಿದ್ದಾರೆ.

ಪ್ರಕರಣವೊಂದರ ಆರೋಪಿಗಾಗಿ ನ್ಯಾಯಾಲಯದಿಂದ ಶೋಧನಾ ವಾರೆಂಟ್ ಪಡೆದು ಮಂಗಳವಾರ ಬೆಳಗ್ಗೆ 9:30 ಸುಮಾರಿಗೆ ನಗರದ ಕುಮಾರಸ್ವಾಮಿ ಲೇಔಟ್‌ನಲ್ಲಿರುವ ಪ್ರಶಾಂತಿನಗರದ 9ನೆ ಬಿ ಮುಖ್ಯ ರಸ್ತೆಯಲ್ಲಿರುವ ಬಚ್ಚನ್ ಮನೆ ಮೇಲೆ ದಾಳಿ ನಡೆಸಿದಾಗ, ಅಕ್ರಮ ಶಸ್ತ್ರಾಸ್ತ್ರಗಳಿರುವುದು ಪತ್ತೆಯಾಗಿದೆ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಏನೇನು ಪತ್ತೆ: ಆರೋಪಿ ಬಚ್ಚನ್ ಮನೆಯಲ್ಲಿ ನಾಲ್ಕು ರಿವಾಲ್ವರ್‌ಗಳು, ಜೀವಂತ ಮದ್ದುಗುಂಡುಗಳು, ಎರಡು ಲಾಂಗು, ಎರಡು ಬಟನ್‌ಚಾಕು, ನಾಲ್ಕು ಬೇಸ್‌ಬಾಲ್ ಬ್ಯಾಟ್, ಮೂರು ಡ್ರಾಗರ್, ಎರಡು ಪೋಕರ್, ಎರಡು ಕತ್ತಿ, 6.88 ಲಕ್ಷ ರೂ. ನಗದು ಹಣ ಹಾಗೂ 418 ಗ್ರಾಂ ಚಿನ್ನ, ಗಾಂಜಾ ಪತ್ತೆಯಾಗಿದೆ ಎಂದು ಪೊಲೀಸ್ ಅಧಿಕೃತ ಮೂಲಗಳು ಸಿಕ್ಕಿವೆ.

 ರೌಡಿಶೀಟರ್ ಬಾಡಿಗಾರ್ಡ್ ಹಾಗೂ ಪರವಾನಗಿ ಇಲ್ಲದೆ ಬಂದೂಕು ಇಟ್ಟುಕೊಳ್ಳುವಂತಿಲ್ಲ. ಹೀಗಾಗಿ, ಆರೋಪಿಗಳ ವಿರುದ್ಧ ಅಪರಾಧ ಸಂಖ್ಯೆ 51/2017 ಕಲಂ 20, 30 ಎಆರ್‌ಎಂಎಸ್ ಕಾಯ್ದೆ, ಮತ್ತು ವೈಲೇಷನ್ ಕಲಂ 4-10 ಪಿಎಸ್‌ಆರ್‌ಎ ಕಾಯ್ದೆ ರೀತ್ಯಾ ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರೆಸಲಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಪತ್ರಕರ್ತ ಅಗ್ನಿಶ್ರೀಧರ್ ಮನೆ ಮೇಲೆ ದಾಳಿ: ದಾಸನಪುರ ಎಪಿಎಂಸಿ ಅಧ್ಯಕ್ಷ ಕಡಬಗೆರೆ ಶ್ರೀನಿವಾಸ್ ಆಪ್ತ ಕಾಂಗ್ರೆಸ್ ಮುಖಂಡ ಟಾಟಾ ರಮೇಶ್‌ಗೆ ಜೀವ ಬೆದರಿಕೆ ಹಾಕಿರುವ ಹಿನ್ನೆಲೆಯಲ್ಲಿ ಸತೀಶ್ ಎಂಬುವವನನ್ನು ಬಂಧಿಸಲಾಗಿತ್ತು. ಆತ ನೀಡಿದ ಮಾಹಿತಿ ಮೇರೆಗೆ ಸೈಲೆಂಟ್ ಸುನೀಲ ಮತ್ತು ಒಂಟೆ ಅಲಿಯಾಸ್ ರೋಹಿತ್‌ನನ್ನು ವಿಚಾರಣೆ ನಡೆಸಲು ಪೊಲೀಸರು ಸೋಮವಾರ ರಾತ್ರಿ ಸೈಲೆಂಟ್ ಸುನೀಲನ ಎರಡು ಅಪಾರ್ಟ್‌ಮೆಂಟ್‌ನಲ್ಲಿ ಕಾರ್ಯಾಚರಣೆ ನಡೆಸಿದ್ದರು.

ಆದರೆ, ಅವರಿಬ್ಬರೂ ಪರಾರಿಯಾಗಿದ್ದರು. ಈ ವೇಳೆ ಆರೋಪಿಗಳ ಮೊಬೈಲ್ ಕರೆಗಳ ಮಾಹಿತಿ ಸಂಗ್ರಹಿಸಿದಾಗ ಹಲವರೊಂದಿಗೆ ಸಂಪರ್ಕವಿರುವುದು ಬೆಳಕಿಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಬೆಂಗಳೂರಿನ ಕುಮಾರಸ್ವಾಮಿ ಲೇಔಟ್‌ನಲ್ಲಿರುವ ಅಗ್ನಿಶ್ರೀಧರ್, ಆಪ್ತ ಬಚ್ಚನ್ ಮನೆಯ ಮೇಲೆ ಹೇಮಂತ್ ನಿಂಬಾಳ್ಕರ್ ಅವರ ತಂಡ ಡಿಸಿಪಿ ಹರ್ಷಾ, ಡಿಸಿಪಿ ಶರಣಪ್ಪ, ಡಿಸಿಪಿ ನಾರಾಯಣ ಅವರ ನೇತೃತ್ವದಲ್ಲಿ ನ್ಯಾಯಾಲಯದಿಂದ ಸರ್ಚ್ ವಾರೆಂಟ್ ಪಡೆದು ದಾಳಿ ನಡೆಸಿ ಪರಿಶೀಲನೆ ನಡೆಸಿದರು.

 ಅಗ್ನಿಶ್ರೀಧರ್ ಮನೆಯಲ್ಲೂ ಪತ್ತೆ: ಅಗ್ನಿಶ್ರೀಧರ್ ಮನೆಯಲ್ಲಿ ಪರವಾನಗಿ ಇಲ್ಲದ ಪಿಸ್ತೂಲ್, ಮಾರಕಾಸ್ತ್ರಗಳು ಮತ್ತು 3 ಲಕ್ಷ ರೂ. ನಗದು, 6 ಲಕ್ಷ ರೂ. ಮೌಲ್ಯದ ಚಿನ್ನಾಭರಣ, ಹೊರದೇಶಗಳ ದುಬಾರಿ ಮದ್ಯ ವಶಪಡಿಸಿಕೊಂಡಿದ್ದಾರೆ. ಕಡಬಗೆರೆ ಶ್ರೀನಿವಾಸ್ ಶೂಟೌಟ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿ ಒಂಟೆ ಅಲಿಯಾಸ್ ರೋಹಿತ್‌ಗೆ ಅಗ್ನಿಶ್ರೀಧರ್ ಮತ್ತು ಬಚ್ಚನ್ ಆಶ್ರಯ ನೀಡಿದ್ದಾರೆ ಎಂಬ ಆರೋಪ ಕೇಳಿಬಂದಿತ್ತು.

3 ಕೋಟಿ ಸುಪಾರಿ: ದಾಸನಪುರ ಎಪಿಎಂಸಿ ಅಧ್ಯಕ್ಷ ಕಡಬಗೆರೆ ಶ್ರೀನಿವಾಸ್ ಮೇಲಿನ ಶೂಟೌಟ್ ಪ್ರಕರಣ ಸಂಬಂಧ ಆರೋಪಿಯೊಬ್ಬನನ್ನು ಬಂಧಿಸಿ ತೀವ್ರ ವಿಚಾರಣೆಗೊಳಪಡಿಸಲಾಗಿದ್ದು, ರೋಹಿತ್ ಈ ಕೃತ್ಯಕ್ಕೆ 3 ಕೋಟಿ ರೂ. ಸುಪಾರಿ ಪಡೆದುಕೊಂಡಿದ್ದು, ಆತ ಸುನೀಲನೊಂದಿಗೆ ಸೇರಿ ಸ್ಕೆಚ್ ತಯಾರಿಸಿರುವುದಾಗಿಬಾಯಿಬಿಟ್ಟಿದ್ದಾನೆ ಎಂದು ಹೇಳಲಾಗಿದೆ.

ಶ್ರೀನಿವಾಸ್ ಚೇತರಿಕೆ: ಪ್ರಕರಣಕ್ಕೆ ಸಂಬಂಧಿಸಿದಂತೆ ಈಗಾಗಲೇ ನೂರಕ್ಕೂ ಅಧಿಕ ಮಂದಿ ರೌಡಿ ಶೀಟರ್‌ಗಳನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿರುವ ಪೊಲೀಸರು, ತನಿಖೆ ಚುರುಕುಗೊಳಿಸಿದ್ದಾರೆ. ಗುಂಡೇಟಿನಿಂದ ಗಾಯಗೊಂಡಿರುವ ಶ್ರೀನಿವಾಸ್ ಅವರ ಆರೋಗ್ಯದಲ್ಲಿ ಚೇತರಿಕೆ ಕಂಡು ಬಂದಿದ್ದು, ಸದ್ಯದಲ್ಲೆ ಶ್ರೀನಿವಾಸ್ ಅವರನ್ನು ಸಾಮಾನ್ಯ ವಾರ್ಡ್‌ಗೆ ಹಸ್ತಾಂತರಿಸಲಾಗುವುದು ಎಂದು ವೈದ್ಯರು ತಿಳಿಸಿದ್ದಾರೆ.

ಕೋರ್ಟ್‌ನಲ್ಲಿ ಸರ್ಚ್‌ವಾರೆಂಟ್ ಪಡೆದು ಅಗ್ನಿಶ್ರೀಧರ್ ಅವರ ಮನೆಯ ಮೇಲೆ ದಾಳಿ ನಡೆಸಿದಾಗ ಪಿಸ್ತೂಲ್, ಮಾರಕಾಸ್ತ್ರಗಳು ಪತ್ತೆಯಾಗಿವೆ. ಆರೋಪಿ ಒಂಟೆ ಅಲಿಯಾಸ್ ರೋಹಿತ್ ಪತ್ತೆಯಾದರೆ ಕಡಬಗೆರೆ ಶ್ರೀನಿವಾಸ್ ಮೇಲೆ ನಡೆದ ಗುಂಡಿನ ದಾಳಿ ಪ್ರಕರಣ ಸಂಪೂರ್ಣ ಮಾಹಿತಿ ಹೊರ ಬೀಳಲಿದೆ.

-ಹೇಮಂತ್ ನಿಂಬಾಳ್ಕರ್, ಹೆಚ್ಚುವರಿ ಪೊಲೀಸ್ ಆಯುಕ್ತ