ಬ್ಯಾಡ್ಮಿಂಟನ್‌ನಲ್ಲಿ ಹೊಸ ಸಂಚಲನ ಮೂಡಿಸುತ್ತಿರುವ ಶ್ರೀಕಾಂತ್ ಬಳಗ

ಹೊಸದಿಲ್ಲಿ, ಜೂ.27: ದೀರ್ಘ ಸಮಯದಿಂದ ಸೈನಾ ನೆಹ್ವಾಲ್ ಹಾಗೂ ಪಿ.ವಿ.ಸಿಂಧು ಬ್ಯಾಡ್ಮಿಂಟನ್‌ನಲ್ಲಿ ಭಾರತ ಯಶಸ್ವಿ ಪ್ರದರ್ಶನ ನೀಡಲು ಕಾರಣರಾಗಿದ್ದರು. ಇದೀಗ ಕೆ. ಶ್ರೀಕಾಂತ್ ನೇತೃತ್ವದ ಪುರುಷ ಶಟ್ಲರ್‌ಗಳು ಬ್ಯಾಡ್ಮಿಂಟನ್ ಲೋಕದಲ್ಲಿ ಹೊಸ ಸಂಚಲನ ಮೂಡಿಸುತ್ತಿದ್ದಾರೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹಲವು ಅಗ್ರ ಆಟಗಾರರನ್ನು ಮಣಿಸಿ ಹೊಸ ಅಲೆ ಸೃಷ್ಟಿಸಿದ್ದಾರೆ.

ಹಂಟಿಂಗ್ ಇನ್ ಪ್ಯಾಕ್ಸ್ ಎನ್ನುವುದು ಭಾರತೀಯ ಪುರುಷರ ಬ್ಯಾಡ್ಮಿಂಟನ್‌ನ ಹೊಸ ಮಂತ್ರವಾಗಿದೆ. ಕಿಡಂಬಿ ಶ್ರೀಕಾಂತ್, ಸಾಯಿ ಪ್ರಣೀತ್ ಹಾಗೂ ಎಚ್.ಎಸ್. ಪ್ರಣಯ್ ಪುರುಷರ ಸಿಂಗಲ್ಸ್‌ನಲ್ಲಿ ಈ ಹಿಂದಿಗಿಂತಲೂ ಹೆಚ್ಚಾಗಿ ಪ್ರಾಬಲ್ಯ ಸಾಧಿಸುವ ಮೂಲಕ ಭಾರತೀಯ ಬ್ಯಾಡ್ಮಿಂಟನ್‌ನ್ನು ಹೊಸ ಎತ್ತರಕ್ಕೆ ಕೊಂಡೊಯ್ದಿದ್ದಾರೆ.

 ಶ್ರೀಕಾಂತ್ ನೇತೃತ್ವದ ಭಾರತದ ಬ್ಯಾಡ್ಮಿಂಟನ್ ಆಟಗಾರರು ಸೂಪರ್ ಸಿರೀಸ್‌ನಲ್ಲಿ ಹ್ಯಾಟ್ರಿಕ್ ಪ್ರಶಸ್ತಿ ಪಡೆದು ಅಪರೂಪದ ಸಾಧನೆ ಮಾಡಿದ್ದಲ್ಲದೆ ಕಳೆದ ಐದು ಪ್ರಮುಖ ಅಂತಾರಾಷ್ಟ್ರೀಯ ಟೂರ್ನಿಗಳಲ್ಲಿ ನಾಲ್ಕರಲ್ಲಿ ಪ್ರಶಸ್ತಿಗಳನ್ನು ಬಾಚಿಕೊಂಡಿದ್ದಾರೆ. ಶ್ರೀಕಾಂತ್ ಇಂಡೋನೇಷ್ಯಾ ಹಾಗೂ ಆಸ್ಟ್ರೇಲಿಯ ಓಪನ್ ಸೂಪರ್ ಸರಣಿಯಲ್ಲಿ ಪ್ರಶಸ್ತಿಗಳನ್ನು ಜಯಿಸಿದ್ದರೆ, ಸಾಯಿ ಪ್ರಣೀತ್ ಸಿಂಗಾಪುರ ಸೂಪರ್ ಸರಣಿ ಹಾಗೂ ಥಾಯ್ಲೆಂಡ್ ಜಿಪಿ ಗೋಲ್ಡ್ ಕಿರೀಟವನ್ನು ಧರಿಸಿದ್ದರು.

ಪ್ರಣಯ್ ಹಾಗೂ ಪಿ.ಕಶ್ಯಪ್ ಪ್ರಶಸ್ತಿಯನ್ನು ಜಯಿಸಿಲ್ಲ. ಆದರೆ, ಹಾದಿ ಸುಗಮಗೊಳಿಸುವ ಮೂಲಕ ತಮ್ಮ ಸ್ನೇಹಿತರಿಗೆ ನೆರವಾಗಿದ್ದಾರೆ. ಜಕಾರ್ತದಲ್ಲಿ ಪ್ರಣಯ್ ಲೆಜಂಡರಿ ಆಟಗಾರ ಲೀ ಚೊಂಗ್ ವೀ ಹಾಗೂ ಒಲಿಂಪಿಕ್ಸ್ ಚಾಂಪಿಯನ್ ಚೆನ್ ಲಾಂಗ್ ಅವರನ್ನು ಸೋಲಿಸಿದ್ದರು. ಈ ಹಿನ್ನೆಲೆಯಲ್ಲಿ ಶ್ರೀಕಾಂತ್‌ಗೆ ಫೈನಲ್‌ನಲ್ಲಿ ಸುಲಭ ಎದುರಾಳಿ ಲಭಿಸಿದ್ದರು.

ಆಸ್ಟ್ರೇಲಿಯದಲ್ಲಿ ಕಶ್ಯಪ್ ಅವರು ಇಂಡೋನೇಷ್ಯಾ ಓಪನ್ ಫೈನಲಿಸ್ಟ್ ಕಝುಮಸ ಸಕೈ ಅವರನ್ನು ಅರ್ಹತಾ ಸುತ್ತಿನಲ್ಲಿ ಮಣಿಸಿ ಶಾಕ್ ನೀಡಿದ್ದರು.

ಕಳೆದ ಎರಡು ತಿಂಗಳಲ್ಲಿ ಅದ್ಭುತ ಪ್ರದರ್ಶನ ನೀಡಿರುವ ಭಾರತದ ಹುಡುಗರು ವಿಶ್ವ ಬ್ಯಾಡ್ಮಿಂಟನ್‌ನಲ್ಲಿ ಎದುರಾಳಿ ಆಟಗಾರರಿಗೆ ಭಯ ಹುಟ್ಟಿಸಿದ್ದಾರೆ. ಭಾರತದ ಈ ಮೂವರು ಆಟಗಾರರ ವಯಸ್ಸು 22 ರಿಂದ 24. ಮುಂಬರುವ ಒಲಿಂಪಿಕ್ಸ್ ಹಾಗೂ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಈ ಆಟಗಾರರಿಗೆ ಉಜ್ವಲ ಭವಿಷ್ಯವಿದೆ.

ಈ ನಾಲ್ವರು ಆಟಗಾರರಲ್ಲದೆ ಇತರ ಪ್ರತಿಭಾವಂತ ಶಟ್ಲರ್‌ಗಳಾದ ಅಜಯ್ ಜಯಆ್ಮ, ಸಮೀರ್ ವರ್ಮ ಹಾಗೂ ಸೌರಭ್ ವರ್ಮ ಭಾರತದ ಯಶಸ್ಸನ್ನು ಉತ್ತುಂಗಕ್ಕೇರಿಸಿದ್ದಾರೆ.

 ಭಾರತದ ಬ್ಯಾಡ್ಮಿಂಟನ್‌ನ ಪುರುಷರ ಸಿಂಗಲ್ಸ್‌ನಲ್ಲಿ ಇದೊಂದು ಶ್ರೇಷ್ಠ ಹಂತವಾಗಿದೆ ಎನ್ನುವುದರಲ್ಲಿ ಸಂಶಯವಿಲ್ಲ. ಈ ಹಿಂದೆ ಪ್ರಕಾಶ್ ಪಡುಕೋಣೆ(1980ರಲ್ಲಿ ಆಲ್ ಇಂಗ್ಲೆಂಡ್ ಪ್ರಶಸ್ತಿ) ಹಾಗೂ ಪುಲ್ಲೆಲ ಗೋಪಿಚಂದ್(ಆಲ್ ಇಂಗ್ಲೆಂಡ್ ಪ್ರಶಸ್ತಿ 2001)ಅವರ ಯಶಸ್ಸಿಗಷ್ಟೇ ಸೀಮಿತವಾಗಿತ್ತು.

  ಭಾರತಕ್ಕೆ 20 ವರ್ಷಗಳ ಅಂತರದಲ್ಲಿ(1980-2001) ಎರಡು ಪ್ರಮುಖ ಪ್ರಶಸ್ತಿಗಳು ಲಭಿಸಿದ ಬಳಿಕ 2014ರಲ್ಲಿ ಮತ್ತೊಮ್ಮೆ ಉತ್ತಮ ಸಾಧನೆ ಮಾಡಿತ್ತು. ಕಶ್ಯಪ್ ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಚಿನ್ನದ ಪದಕ ಜಯಿಸಿದ್ದರೆ, ಶ್ರೀಕಾಂತ್ ಚೀನಾ ಓಪನ್ ಪ್ರಶಸ್ತಿಯನ್ನು ಜಯಿಸಿದ್ದರು. 2015ರಲ್ಲಿ ಶ್ರೀಕಾಂತ್ ಇಂಡಿಯನ್ ಓಪನ್ ಸೂಪರ್ ಸರಣಿಯನ್ನು ಗೆದ್ದುಕೊಂಡಿದ್ದರು. ಜಯರಾಮ್ ಹಾಗೂ ಸಾಯಿ ಪ್ರಣೀತ್ ಗ್ರಾನ್‌ಪ್ರಿ ಗೋಲ್ಡ್ ಟೂರ್ನಿಗಳಲ್ಲಿ ಚಾಂಪಿಯನ್ ಆಗಿದ್ದರು. ಆದರೆ, ಕಳೆದ ಎರಡು ತಿಂಗಳ ಅವಧಿಯಲ್ಲಿ ಭಾರತದ ಪುರುಷರ ತಂಡ ಗಮನಾರ್ಹ ಸಾಧನೆ ಮಾಡಿದೆ.

ಪ್ರಮುಖ ಟೂರ್ನಿಗಳಲ್ಲಿ ಭಾರತದ ಆಟಗಾರರು ಅರ್ಹತಾ ಸುತ್ತಿನಲ್ಲಿ ದಾಟುವುದು ಕಷ್ಟವಾಗಿತ್ತು. ಅಗ್ರ-50ರಲ್ಲಿ ಸ್ಥಾನ ಪಡೆಯುವುದು ದುರ್ಲಭವಾಗಿತ್ತು. ಇದೀಗ ಪುರುಷ ಆಟಗಾರರು ಇಲೈಟ್ ಗ್ರೂಪ್‌ನಲ್ಲಿದ್ದಾರೆ. ಕಠಿಣ ಪರಿಶ್ರಮ, ತ್ಯಾಗ ಹಾಗೂ ಯೋಜನೆಯಿಂದ ಈ ಬದಲಾವಣೆ ಸಾಧ್ಯವಾಗಿದೆ. ಬದಲಾವಣೆಯ ಎಲ್ಲ ಶ್ರೇಯಸ್ಸು ರಾಷ್ಟ್ರೀಯ ಕೋಚ್ ಗೋಪಿಚಂದ್‌ಗೆ ಸಲ್ಲಬೇಕಾಗಿದೆ.

ಪ್ರಸ್ತುತ ವಿಶ್ವ ರ್ಯಾಂಕಿಂಗ್‌ನಲ್ಲಿ ಆರು ಆಟಗಾರರು ಅಗ್ರ-35ರಲ್ಲಿ ಸ್ಥಾನ ಪಡೆದಿದ್ದಾರೆ. ಆಟಗಾರರು ತಮ್ಮ ಪ್ರದರ್ಶನವನ್ನು ಸುಧಾರಿಸಿದರೆ ಜಾಗತಿಕ ಶಕ್ತಿಯಾಗಿ ಹೊರಹೊಮ್ಮಬಹುದು.

ಆಧುನಿಕ ತರಬೇತಿ ಪದ್ದತಿಯು ಆಟಗಾರರ ಪ್ರದರ್ಶನ ಮಟ್ಟವನ್ನು ಉತ್ತಮಪಡಿಸಿದೆ. ಶ್ರೀಕಾಂತ್ ಹಾಗೂ ಅವರ ಬಳಗ ಇನ್ನು ಐದು ವರ್ಷ ಬ್ಯಾಡ್ಮಿಂಟನ್‌ನಲ್ಲಿ ಮುಂದುವರಿದರೆ ಭಾರತವನ್ನು ಉನ್ನತ ಮಟ್ಟಕ್ಕೇರಿಸುವುದು ಖಚಿತ.

 ನಮ್ಮ ದೇಶದಲ್ಲಿ ಪ್ರತಿಭಗಳಿಗೆ ಕೊರತೆಯಿಲ್ಲ. ನಾನು ಆಡುತ್ತಿದ್ದ ಸಮಯದಲ್ಲಿ ಚೇತನ್ ಆನಂದ್, ಅನೂಪ್ ಶ್ರೀಧರ್, ಅರವಿಂದ್ ಭಟ್, ನಿಖಿಲ್ ಕಾನೇಟ್ಕರ್ ಅವರಂತ ಪ್ರತಿಭಾವಂತ ಆಟಗಾರರಿದ್ದರು. ಆದರೆ ಎಲ್ಲರಲ್ಲೂ ಫಿಟ್‌ನೆಸ್ ಕೊರತೆಯಿತ್ತು. ನಮ್ಮ ಕಾಲದಲ್ಲಿ ಸರಿಯಾದ ಕೋಚಿಂಗ್ ವ್ಯವಸ್ಥೆಯಿರಲಿಲ್ಲ. ಫಿಜಿಯೋ ಕಲ್ಪನೆಯೇ ಇರಲಿಲ್ಲ. ಈಗಿನಂತೆ ಏನೂ ಇರಲಿಲ್ಲ. ಈ ಎಲ್ಲ ಅಗತ್ಯತೆಯನ್ನು ಪೂರೈಸಿದ್ದಕ್ಕೆ ನಮಗೆ ಸಂತೋಷವಾಗುತ್ತಿದೆ ಎಂದು ಪಿ.ಗೋಪಿಚಂದ್ ಹೇಳಿದ್ದಾರೆ.