ವಚನ ಸಂಸ್ಕೃತಿ ಉಳಿವಿಗೆ ಲಿಂಗಾಯತ ಧರ್ಮಕ್ಕೆ ಮಾನ್ಯತೆ ಅಗತ್ಯ: ಸಿದ್ದರಾಮೇಶ್ವರ ಸ್ವಾಮೀಜಿ

ಬೆಂಗಳೂರು, ಆ.30: ಜಾತಿ, ಲಿಂಗ, ಭಾಷೆಯ ಭೇದ ಭಾವ ಮಾಡದೆ ಜಗತ್ತಿಗೆ ಸಮಾನತೆಯ ಸಾರವನ್ನು ಬೋಧಿಸುವ ವಚನಗಳ ಸಂಸ್ಕೃತಿ ಉಳಿಯಬೇಕಾದರೆ ಲಿಂಗಾಯತ ಧರ್ಮಕ್ಕೆ ಸಾಂವಿಧಾನಿಕ ಸ್ಥಾನಮಾನ ಅಗತ್ಯವೆಂದು ರುದ್ರಾಕ್ಷಿ ಮಠದ ಸಿದ್ದರಾಮೇಶ್ವರ ಸ್ವಾಮೀಜಿ ಒತ್ತಾಯಿಸಿದ್ದಾರೆ.

ಬುಧವಾರ ಜನ ಸಾಮಾನ್ಯರ ವೇದಿಕೆ ನಗರದ ಬಸವ ಭವನದಲ್ಲಿ ಲಿಂಗಾಯತ ಧರ್ಮ-ಸ್ವತಂತ್ರ ಧರ್ಮ ನಿರ್ಣಾಯಕ ಸಭೆಯಲ್ಲಿ ಮಾತನಾಡಿದ ಅವರು, ವೈದಿಕ ಧರ್ಮದ ಶ್ರೇಣೀಕರಣ ವ್ಯವಸ್ಥೆಯಿಂದ ನಲುಗಿದ್ದ ಜನತೆಗೆ ಬಸವಣ್ಣ ಲಿಂಗಾಯತ ಧರ್ಮವನ್ನು ಸ್ಥಾಪಿಸುವ ಮೂಲಕ ಸಮಾನತೆ, ವೈಜ್ಞಾನಿಕ ಚಿಂತನೆ ಮೂಡಿಸಿದರು. ಹೀಗಾಗಿ ಲಿಂಗಾಯತ ಧರ್ಮವನ್ನು ವಿಶ್ವವ್ಯಾಪಿಗೊಳಿಸಬೇಕಾದರೆ ಸಾಂವಿಧಾನಿಕ ಸ್ಥಾನಮಾನ ಅಗತ್ಯವೆಂದು ತಿಳಿಸಿದರು.

ಲಿಂಗಾಯತ ಧರ್ಮವು ದಕ್ಷಿಣ ಭಾರತದ ಮೊಟ್ಟ ಮೊದಲ ಧರ್ಮವಾಗಿದೆ. ಆದರೆ, ಕೆಲವು ಪಟ್ಟಭದ್ರ ಹಿತಾಸಕ್ತಿಗಳು ಅದರ ವಿಚಾರಗಳನ್ನು ಜಗತ್ತಿಗೆ ತಲುಪದಂತೆ ಇಲ್ಲಿಯವರೆಗೆ ತಡೆಯಲಾಗಿತ್ತು. ಆದರೆ, ಜನತೆ ವಿದ್ಯಾವಂತರಾದಂತೆ ವಚನಗಳ ನಿಜವಾದ ಸಾರ ಏನೆಂದು ಅರ್ಥವಾಗಿದೆ. ಹೀಗಾಗಿ ಜಾಗೃತಗೊಂಡ ಸಾಮಾನ್ಯ ಜನತೆ ಲಿಂಗಾಯತ ಧರ್ಮಕ್ಕೆ ಸಾಂವಿಧಾನಿಕ ಸ್ಥಾನಮಾನಕ್ಕೆ ಒತ್ತಾಯಿಸುತ್ತಿದ್ದಾರೆ ಎಂದು ಹೇಳಿದರು.

ವೈದಿಕ ಧರ್ಮದ ಪ್ರಮುಖರ ಅಂಗವಾಗಿರುವ ವೀರಶೈವರು ಲಿಂಗಾಯತ ಧರ್ಮದ ಸಾರವನ್ನು ತಿರುಚಲು ಪ್ರಯತ್ನಿಸುತ್ತಿದ್ದಾರೆ. ಲಿಂಗಾಯತ ಧರ್ಮ ಹಾಗೂ ವೀರಶೈವಕ್ಕೂ ಸಾಕಷ್ಟು ವ್ಯತ್ಯಾಸಗಳಿವೆ. ಅದರ ಅರಿವಿದ್ದೇ ವೀರಶೈವ ಮಠಾಧೀಶರು ಲಿಂಗಾಯತ ಧರ್ಮಕ್ಕೆ ಸಾಂವಿಧಾನಿಕ ಸ್ಥಾನಮಾನ ನೀಡದಂತೆ ಅಡ್ಡಗಾಲು ಹಾಕುತ್ತಿದ್ದಾರೆ ಎಂದು ಅವರು ಟೀಕಿಸಿದರು.

ಬೇಲಿಮಠದ ಶಿವರುದ್ರ ಮಹಾಸ್ವಾಮೀಜಿ ಮಾತನಾಡಿ, ವೀರಶೈವದಲ್ಲಿ ಜಾತಿ ಆಧಾರದ ಮೇಲೆ ಲಿಂಗವನ್ನು ವಿಂಗಡನೆ ಮಾಡಿದರು. ಬ್ರಾಹ್ಮಣರಿಗೆ ಸ್ಫಟಿಕ, ಕ್ಷತ್ರಿಯರಿಗೆ ಬಂಗಾರ, ಶೂದ್ರರಿಗೆ ಮಣ್ಣಿನ ಲಿಂಗ ಕೊಟ್ಟ ಅವಿವೇಕದ ಪರಮಾವಧಿಯನ್ನು ಹೇಳಿಕೊಟ್ಟಿದೆ. ಆದರೆ, ಅಪ್ಪ ಬಸವಣ್ಣ ಕಾಯಕ ಹಾಗೂ ಬದುಕಿನಲ್ಲಿಯೇ ಶಿವಲಿಂಗವನ್ನು ಕಂಡುಕೊಳ್ಳಬೇಕೆಂದು ಕರೆ ನೀಡಿದ್ದರು ಎಂದರು.

ಕೆಲವರು ಉದ್ದೇಶ ಪೂರ್ವಕವಾಗಿಯೇ ಬಸವಣ್ಣನವರ ಬೆಳಕನ್ನು ಹಾಳು ಮಾಡಬೇಕೆಂದು ಸಾಕಷ್ಟು ಪುಸ್ತಕ ಬರೆದಿದ್ದಾರೆ. ಆದರೆ, ಬಸವಣ್ಣ ಬೆಳಕು ಕಡಿಮೆಯಾಗಿಲ್ಲ. ಈಗ ನಮಗೆಲ್ಲಾ ಬಸವಣ್ಣ ವಿರೋಧಿ ಅಂತಾ ಹಣೆಪಟ್ಟಿ ಕಟ್ಟುತ್ತಿದ್ದಾರೆ. ಆದರೆ, ಮನುವಾದಿಗಳ ಕೈಗೊಂಬೆಗಳಾಗಿರುವ ಪಟ್ಟಭದ್ರ ವೀರಶೈವ ಮುಖಂಡರ ಷಡ್ಯಂತ್ರಗಳು ಜನತೆಗೆ ತಿಳಿಸಿದಿದೆ. ಹೀಗಾಗಿ ಯಾರು ಬಸವಣ್ಣನ ನಿಜವಾದ ಅನುಯಾಯಿಗಳು ಯಾರೆಂದು ಮುಂದಿನ ದಿನಗಳಲ್ಲಿ ತಿಳಿದು ಬರಲಿದೆ ಎಂದರು.

ಪ್ರಗತಿಪರ ಹೋರಾಟಗಾರ, ನಟ ಚೇತನ್ ಮಾತನಾಡಿ, ರಾಜ್ಯದಲ್ಲಿ 12ನೆ ಶತಮಾನ ಶರಣ ನಾಡಾಗಿತ್ತು. ಆದರೆ, 21ನೆ ಶತಮಾನದಲ್ಲಿ ಪುರೋಹಿತರ ನಾಡಾಗಿ ಪರಿವರ್ತನೆಯಾಗಿದೆ. ಈ ಬೆಳವಣಿಗೆ ರಾಜ್ಯಕ್ಕೆ, ದೇಶಕ್ಕೆ ಒಳ್ಳೆಯದಲ್ಲ. ಹೀಗಾಗಿ ಪುನಃ ಶರಣರ ತತ್ವಕ್ಕೆ ನಾವೆಲ್ಲರು ಹೋಗಬೇಕಾಗಿದೆ ಎಂದು  ಹೇಳಿದರು.

ಕಾರ್ಯಕ್ರಮದಲ್ಲಿ ನಿಷ್ಕಲ ಮಂಟಪದ ನಿಜಗುಣಾನಂದ ಸ್ವಾಮೀಜಿ, ಪಂಚಮಸಾಲಿ ಪೀಠದ ಜಯಮೃತ್ಯುಂಜಯ ಸ್ವಾಮೀಜಿ, ಬಸವಜ್ಞಾನ ಮಂದಿರ ಪೀಠಾಧ್ಯಕ್ಷೆ ಶರಣೆ ಮಹಾಲಿಂಗ, ಬಿಎಸ್ಪಿ ರಾಜ್ಯಾಧ್ಯಕ್ಷ ಎನ್.ಮಹೇಶ್, ವಕೀಲ ಅನಂತ್‌ನಾಯಕ್ ಮತ್ತಿತರರಿದ್ದರು.

ಇವತ್ತು ರಾಜ್ಯದಲ್ಲಿ ಲಿಂಗಾಯತ ಧರ್ಮವನ್ನು ಎಲ್ಲ ರಾಜಕೀಯ ಪಕ್ಷಗಳು ಸ್ವಾರ್ಥಕ್ಕೆ ಬಳಸಿಕೊಳ್ಳಲಾಗುತ್ತಿವೆ. ತಾನು ಲಿಂಗಾಯತ ಧರ್ಮದವನೆಂದು ಹೇಳಿಕೊಳ್ಳುವ ಬಿ.ಎಸ್.ಯಡಿಯೂರಪ್ಪ ವೈದಿಕ ಧರ್ಮದ ಅಪ್ಪಟ ಆರಾಧಕರಾಗಿದ್ದಾರೆ. ಇಂತವರಿಂದ ಲಿಂಗಾಯತ ಧರ್ಮದ ನಿಜವಾದ ಆಶಯಗಳನ್ನು ನಿರೀಕ್ಷಿಸಲು ಸಾಧ್ಯವೇ.
-ಚೇತನ್, ಚಿತ್ರನಟ, ಪ್ರಗತಿಪರ ಹೋರಾಟಗಾರ