ಜಪಾನ್ ವಿರುದ್ಧ ಡ್ರಾ ಸಾಧಿಸಿದ ಕ್ಯಾಲೆಡೋನಿಯ

ಕೋಲ್ಕತಾ, ಅ.14: ಚೊಚ್ಚಲ ಅಂಡರ್-17 ವಿಶ್ವಕಪ್ ಪಂದ್ಯವನ್ನಾಡುತ್ತಿರುವ ಕ್ಯಾಲೆಡೋನಿಯ ತಂಡ ಶನಿವಾರ ನಡೆದ ‘ಎಫ್’ ಗುಂಪಿನ ತನ್ನ ಕೊನೆಯ ಪಂದ್ಯದಲ್ಲಿ ಏಷ್ಯಾದ ಬಲಿಷ್ಠ ತಂಡ ಜಪಾನ್ ವಿರುದ್ಧ 1-1 ರಿಂದ ಡ್ರಾ ಸಾಧಿಸಿ ಗಮನ ಸೆಳೆದಿದೆ. ಫಿಫಾ ಟೂರ್ನಮೆಂಟ್‌ನಲ್ಲಿ ಮೊದಲ ಬಾರಿ ಅಂಕ ಗಳಿಸಿದೆ.

ಡ್ರಾ ಸಾಧಿಸಿದ ಹೊರತಾಗಿಯೂ ಜಪಾನ್ ತಂಡ ನಾಲ್ಕನೆ ಬಾರಿ ಅಂತಿಮ-16ರ ಸುತ್ತಿಗೆ ತೇರ್ಗಡೆಯಾಗಿದೆ. 8ನೆ ಬಾರಿ ವಿಶ್ವಕಪ್‌ನಲ್ಲಿ ಭಾಗವಹಿಸಿರುವ ಜಪಾನ್ 2003ರ ಬಳಿಕ ಮೊದಲ ಬಾರಿ ವಿಶ್ವಕಪ್‌ನಲ್ಲಿ ಪ್ರಿ-ಕ್ವಾರ್ಟರ್ ಫೈನಲ್ ಹಂತ ತಲುಪಿದೆ. ಜಪಾನ್ ‘ಎಫ್’ ಗುಂಪಿನಲ್ಲಿ 4 ಅಂಕ ಗಳಿಸಿ 2ನೆ ಸ್ಥಾನ ಪಡೆದಿದೆ. ಕೋಲ್ಕತಾದಲ್ಲಿ ಅ.17 ರಂದು ನಡೆಯಲಿರುವ ನಾಕೌಟ್ ಪಂದ್ಯದಲ್ಲಿ ‘ಎಫ್’ ಗುಂಪಿನ ವಿಜೇತ ತಂಡ ಇಂಗ್ಲೆಂಡ್ ಅಥವಾ ಇರಾಕ್ ತಂಡವನ್ನು ಎದುರಿಸಲಿದೆ. ಕೆಟೊ ನಕಮುರ ಮೊದಲಾರ್ಧದ 7ನೆ ನಿಮಿಷದಲ್ಲಿ ಜಪಾನ್‌ಗೆ 1-0 ಮುನ್ನಡೆ ಒದಗಿಸಿಕೊಟ್ಟರು. ನಕಮುರ ಪ್ರಸ್ತುತ ಟೂರ್ನಮೆಂಟ್‌ನಲ್ಲಿ ನಾಲ್ಕನೆ ಗೋಲು ಬಾರಿಸಿದರು.

 83ನೆ ನಿಮಿಷದಲ್ಲಿ ಗೋಲು ಬಾರಿಸಿದ ಜೇಕಬ್ ಜೆನೊ ಕ್ಯಾಲೆಡೋನಿಯಾ 1-1 ಪಂದ್ಯ ಡ್ರಾಗೊಳಿಸಲು ಕಾರಣರಾದರು.

ಫ್ರಾನ್ಸ್ ಹಾಗೂ ಹೊಂಡುರಾಸ್ ವಿರುದ್ದ ಆಡಿರುವ ಮೊದಲೆರಡು ಪಂದ್ಯಗಳಲ್ಲಿ ಹೀನಾಯವಾಗಿ ಸೋತಿದ್ದ ಕ್ಯಾಲೆಡೊನಿಯಾ ತಂಡ ಜಪಾನ್ ವಿರುದ್ಧ ಪ್ರಬುದ್ಧ ಪ್ರದರ್ಶನ ನೀಡಿತು.

ಫ್ರಾನ್ಸ್ ವಿರುದ್ಧದ ಪಂದ್ಯದಲ್ಲಿ ಗೋಲು ಬಾರಿಸಿದ್ದ ಕ್ಯಾಲೆಡೋನಿಯ ಇದೀಗ ಟೂರ್ನಿಯಲ್ಲಿ 2ನೆ ಗೋಲು ಬಾರಿಸಿತು.