ಫೇಸ್‌ಬುಕ್‌ಗೆ 34 ಸಾವಿರ ಕೋಟಿ ರೂ. ದಂಡ !: ಕಾರಣವೇನು ಗೊತ್ತಾ ?
Update: 2019-07-13 18:43 GMT
ವಾಶಿಂಗ್ಟನ್, ಜು. 13: ಖಾಸಗಿತನ ಉಲ್ಲಂಘನೆಗಳಿಗಾಗಿ ಫೇಸ್‌ಬುಕ್‌ಗೆ 5 ಬಿಲಿಯ ಡಾಲರ್ (ಸುಮಾರು 34,280 ಕೋಟಿ ರೂಪಾಯಿ) ದಂಡ ವಿಧಿಸುವ ಪ್ರಸ್ತಾಪದ ಪರವಾಗಿ ಅಮೆರಿಕದ ಫೆಡರಲ್ ಟ್ರೇಡ್ ಕಮಿಶನ್ (ಎಫ್‌ಟಿಸಿ) ಈ ವಾರ ಮತ ಹಾಕಿದೆ ಎಂದು ‘ವಾಲ್ ಸ್ಟ್ರೀಟ್ ಜರ್ನಲ್’ ಪತ್ರಿಕೆ ಶುಕ್ರವಾರ ವರದಿ ಮಾಡಿದೆ.
ಇದಕ್ಕೆ ಪ್ರತಿಕ್ರಿಯಿಸಲು ಫೇಸ್‌ಬುಕ್ ಮತ್ತು ಎಫ್‌ಟಿಸಿ ನಿರಾಕರಿಸಿವೆ.
ದಂಡ ವಿಧಿಸುವ ಪ್ರಸ್ತಾಪವು 3-2ರಿಂದ ಅಂಗೀಕೃತವಾಗಿದೆ ಹಾಗೂ ಮತದಾನವು ಪಕ್ಷಾಧಾರಿತವಾಗಿ ನಡೆಯಿತು. ರಿಪಬ್ಲಿಕನ್ ಪಕ್ಷವು ದಂಡ ವಿಧಿಸುವ ಪ್ರಸ್ತಾಪದ ಪರವಾಗಿ ಮತ ಹಾಕಿದರೆ, ಡೆಮಾಕ್ರಟಿಕ್ ಪಕ್ಷದವರು ವಿರೋಧವಾಗಿ ಮತ ಚಲಾಯಿಸಿದರು.
ಈ ದಂಡವು ತಂತ್ರಜ್ಞಾನ ಕಂಪೆನಿಯೊಂದರ ಮೇಲೆ ಎಫ್‌ಟಿಸಿ ವಿಧಿಸಿರುವ ದಂಡಗಳಲ್ಲೇ ಅಧಿಕವಾಗಿದೆ.
ಆದರೆ, ಇದು ಫೇಸ್‌ಬುಕ್ ಮೇಲೆ ಹೆಚ್ಚಿನ ಪರಿಣಾಮ ಬೀರಲಾರದು. ಯಾಕೆಂದರೆ, ಅದು ಕಳೆದ ವರ್ಷ ಸುಮಾರು 56 ಬಿಲಿಯ ಡಾಲರ್ (ಸುಮಾರು 3.84 ಲಕ್ಷ ಕೋಟಿ ರೂಪಾಯಿ) ಆದಾಯ ಗಳಿಸಿದೆ.