ಮಾರ್ಷಲ್ ಗಸ್ತು ಪಡೆಗಳನ್ನು ನಿಯೋಜಿಸಿದ ಬಿಬಿಎಂಪಿ: ರಾತ್ರಿಯಿಡೀ ಗಸ್ತು ತಿರುಗಲಿರುವ 8 ತಂಡಗಳು
Update: 2020-10-03 21:47 IST
ಬೆಂಗಳೂರು, ಅ.3: ನಗರದಲ್ಲಿ ರಾತ್ರಿ ವೇಳೆ ಎಲ್ಲೆಂದರಲ್ಲಿ ಕಸ ಹಾಕುವ, ಮೂತ್ರ ವಿಸರ್ಜಿಸುವ, ಕಟ್ಟಡಗಳ ಅವಶೇಷಗಳನ್ನು ಸುರಿಯುವವರ ಮೇಲೆ ಕಣ್ಗಾವಲಿಡಲು ಬಿಬಿಎಂಪಿಯು ಮಾರ್ಷಲ್ ಗಸ್ತು ಪಡೆಗಳನ್ನು ನಿಯೋಜಿಸಿದೆ. ಒಟ್ಟು 8 ತಂಡಗಳು ರಾತ್ರಿಯಿಡೀ ಗಸ್ತು ತಿರುಗಲಿವೆ.
ಪಾಲಿಕೆಯ ಆಡಳಿತಾಧಿಕಾರಿ ಗೌರವ್ ಗುಪ್ತಾ ಮತ್ತು ಆಯುಕ್ತ ಎನ್.ಮಂಜುನಾಥ ಪ್ರಸಾದ್ ಮಾರ್ಷಲ್ ಗಸ್ತು ಪಡೆ ವಾಹನಗಳಿಗೆ ಚಾಲನೆ ನೀಡಿದ್ದಾರೆ. ರಾತ್ರಿ ಗಸ್ತಿಗಾಗಿ 55 ನಿವೃತ್ತ ಸೈನಿಕರು ಮತ್ತು ಎನ್ಸಿಸಿಯಿಂದ 'ಸಿ' ಪ್ರಮಾಣಪತ್ರ ಪಡೆದವರನ್ನು ನೇಮಕ ಮಾಡಲಾಗಿದೆ. ಎಂಟು ಪಡೆಗಳು ನಗರಾದ್ಯಂತ ಗಸ್ತು ತಿರುಗಲಿವೆ. ಪ್ರತಿ ವಾಹನದಲ್ಲಿ ಚಾಲಕ ಸೇರಿ ಐವರು ಮಾರ್ಷಲ್ಗಳು ಕಾರ್ಯನಿರ್ವಹಿಸಲಿದ್ದಾರೆ.
ಗಸ್ತು ಪಡೆಗಳು ರಾತ್ರಿ 9 ರಿಂದ ಬೆಳಗ್ಗೆ 6 ಗಂಟೆಯವರೆಗೆ ಎಲ್ಲಎಂಟು ವಲಯಗಳಲ್ಲಿ ಸುತ್ತಾಡಿ, ಎಲ್ಲೆಂದರಲ್ಲಿ ಕಸ ಸುರಿಯುವವರನ್ನು ಪತ್ತೆ ಮಾಡಿ ದಂಡ ವಿಧಿಸಲಿವೆ. ರಸ್ತೆಯುದ್ದಕ್ಕೂ ಜಲ್ಲಿ, ಮರಳು, ಮಣ್ಣು, ಸಿಮೆಂಟ್, ಕಾಂಕ್ರೀಟ್ ಅನ್ನು ಸೋರಿಕೆ ಮಾಡಿಕೊಂಡು ಹೋಗುವ ವಾಹನಗಳನ್ನು ಪತ್ತೆ ಮಾಡಿ ದಂಡ ಹಾಕಲಿವೆ.
ಪ್ರತಿಯೊಂದು ಗಸ್ತು ಪಡೆ ವಾಹನ ಖರೀದಿಗೆ 7.65 ಲಕ್ಷ ರೂ. ವೆಚ್ಚ ಮಾಡಲಾಗಿದೆ. ಈ ವಾಹನದಲ್ಲಿ ತುರ್ತು ಸಲಕರಣೆಗಳಿರಲಿವೆ. ಮಾರ್ಷಲ್ಗಳಿಗೆ ತಲಾ 25 ಸಾವಿರ ರೂ., ಮೇಲ್ವಿಚಾರಕ ಜೆಸಿಒಗಳಿಗೆ 45,475 ರೂ. ವೇತನ ನಿಗದಿಪಡಿಸಲಾಗಿದೆ.