'ಇವಿಎಂ ಹ್ಯಾಕ್' ಆಗಿದೆ ಎಂದು ಸುಳ್ಳು ಸುದ್ದಿ ಹಬ್ಬಿಸಿದ್ದ ಆರೋಪಿಯ ಬಂಧನ

ಬೆಂಗಳೂರು, ಮೇ 12: ‘ವಿದ್ಯುನ್ಮಾನ ಮತಯಂತ್ರ(ಇವಿಎಂ)ಹ್ಯಾಕ್ ಆಗಿದೆ, ಒಂದು ಪಕ್ಷಕ್ಕೆ ಮತ ಹಾಕಿದರೇ ಬೇರೆ ಪಕ್ಷಕ್ಕೆ ಮತ ಬಿದ್ದಿದೆ’ ಎಂದು ಸುಳ್ಳು ಸುದ್ದಿ ಹಬ್ಬಿಸಿದ್ದ ವ್ಯಕ್ತಿ ವಿರುದ್ಧ ಆಡುಗೋಡಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. 

ಕಾಂಗ್ರೆಸ್ ಕಾರ್ಯಕರ್ತ ಸೈಯದ್ ಎಂಬಾತ ಮೇ 10ರ ಮಧ್ಯಾಹ್ನ 2:40ಕ್ಕೆ ಮತದಾನ ಮಾಡಲು ಆಡುಗೋಡಿಯ ಚಿನ್ನಯ್ಯನಪಾಳ್ಯದ ಮತದಾನ ಕೇಂದ್ರಕ್ಕೆ ಆಗಮಿಸಿ, ಮತ ಚಲಾಯಿಸಿದ್ದಾರೆ. ಮತದಾನದ ಬಳಿಕ ನಾನು ಒಂದು ಪಕ್ಷದ ಚಿಹ್ನೆಗೆ ಮತ ಹಾಕಿದರೇ ಬೇರೆ ಪಕ್ಷಕ್ಕೆ ಮತ ಬಿದ್ದಿದೆ, ಇವಿಎಂ ಹ್ಯಾಕ್ ಆಗಿದೆ ಅಂತ ಕೆಲ ಮುಖಂಡರನ್ನು ಕರೆಸಿ ರಂಪಾಟ ಮಾಡಿದ್ದಾರೆ. 

ತಕ್ಷಣವೇ ಅಲರ್ಟ್ ಆದ ಚುನಾವಣಾ ಅಧಿಕಾರಿಗಳು, ಕೂಡಲೇ ಮತದಾನವನ್ನು ನಿಲ್ಲಿಸಿ ಇವಿಎಂ ಅನ್ನು ಪರಿಶೀಲನೆ ಮಾಡಿದ್ದಾರೆ. ಸುಮಾರು ಒಂದು ಗಂಟೆ ಪರಿಶೀಲನೆ ಬಳಿಕ ಇವಿಎಂ ಸರಿಯಾಗಿ ಇದೆ, ನೀವು ಮತ ಹಾಕಿರುವ ಪಕ್ಷಕ್ಕೆನೇ ನಿಮ್ಮ ಮತ ಹೋಗಿದೆ ಎಂದು ತಿಳಿಸಿದ್ದಾರೆ.

ಇದರಿಂದ ಸುಮಾರು 1 ಗಂಟೆ ಮತದಾನ ಪ್ರಕ್ರಿಯೆ ಸ್ಥಗಿತಗೊಂಡಿತ್ತು. ಚುನಾವಣಾ ಕರ್ತವ್ಯಕ್ಕೆ ಅಡ್ಡಿ, ಸುಳ್ಳು ಸುದ್ದಿ ಪ್ರಚಾರ ಮಾಡಿದ ಆರೋಪದ ಮೇಲೆ ಐಪಿಸಿ 177 ಅಡಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಸೈಯದ್‍ನನ್ನು ಬಂಧಿಸಿದ್ದಾರೆ. ಪೊಲೀಸ್ ಠಾಣೆಗೆ ಕರೆದೊಯ್ದು ವಿಚಾರಣೆ ನಡೆಸಿದಾಗ ನಾಟಕ ಆಡಿರುವುದು ಬೆಳಕಿಗೆ ಬಂದಿದೆ.