Ballari | ನಾಲೆಗೆ ತಕ್ಷಣ 50 ಕ್ಯೂಸೆಕ್ ನೀರು ಹರಿಸಲು ರೈತರ ಆಗ್ರಹ

ಬಳ್ಳಾರಿ/ಕಂಪ್ಲಿ: ತಾಲೂಕಿನ ಅಚ್ಚುಕಟ್ಟು ಪ್ರದೇಶದ ಕೃಷಿ ಭೂಮಿಗೆ ಸಮರ್ಪಕವಾಗಿ ನೀರು ಒದಗಿಸಬೇಕು ಹಾಗೂ ನಾಲೆಗೆ ತಕ್ಷಣವೇ 50 ಕ್ಯೂಸೆಕ್ ನೀರು ಹರಿಸಬೇಕು ಎಂದು ಒತ್ತಾಯಿಸಿ ಕರ್ನಾಟಕ ರಾಜ್ಯ ರೈತ ಸಂಘದ ಪದಾಧಿಕಾರಿಗಳು ಹಾಗೂ ಸ್ಥಳೀಯ ರೈತರು ನೀರಾವರಿ ನಿಗಮದ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ರೈತ ಸಂಘದ ತಾಲೂಕು ಅಧ್ಯಕ್ಷ ವಿ. ವೀರೇಶ್, ಪ್ರಸಕ್ತ ಹಂಗಾಮಿನಲ್ಲಿ ರೈತರು ಅಲ್ಪಾವಧಿ ಜೋಳದ ಬೆಳೆ ಬೆಳೆದಿದ್ದಾರೆ. ಬೆಳೆ ಕೈಗೆ ಬರುವ ಪ್ರಮುಖ ಹಂತದಲ್ಲಿ ನಾಲೆಯಲ್ಲಿ ನೀರು ಬಿಟ್ಟು ಐದು ದಿನಗಳಾಗಿದ್ದರೂ, ನಾಲೆಯ ಕೊನೆಯ ಭಾಗದ ಜಮೀನುಗಳಿಗೆ ಇನ್ನೂ ನೀರು ತಲುಪಿಲ್ಲ ಎಂದು ಹೇಳಿದರು.

ನಾಲೆಯ ಮೇಲ್ಭಾಗದ ಜಮೀನುಗಳ ಮಾಲೀಕರು ಸೈಫಾನ್ ಪೈಪುಗಳು, ನೆಲದೊಳಗಿನ ಪೈಪ್‌ಲೈನ್‌ಗಳು ಹಾಗೂ ಮೋಟಾರ್‌ಗಳನ್ನು ಅಳವಡಿಸಿಕೊಂಡು ಕಾನೂನುಬಾಹಿರವಾಗಿ ನೀರು ಪಡೆಯುತ್ತಿದ್ದಾರೆ. ಇದರಿಂದ ಕೆಳಭಾಗದ ರೈತರಿಗೆ ಅನ್ಯಾಯವಾಗುತ್ತಿದ್ದು, ಈ ನೀರು ಕಳ್ಳತನಕ್ಕೆ ಅಧಿಕಾರಿಗಳು ತಕ್ಷಣ ಕಡಿವಾಣ ಹಾಕಬೇಕು ಎಂದು ಅವರು ಒತ್ತಾಯಿಸಿದರು.

ರೈತರ ಅಹವಾಲು ಸ್ವೀಕರಿಸಿ ಮಾತನಾಡಿದ ನೀರಾವರಿ ನಿಗಮದ ಸಹಾಯಕ ಕಾರ್ಯಪಾಲಕ ಎಂಜಿನಿಯರ್ (ಎಇಇ) ಎ. ಶ್ರೀನಿವಾಸ, ಪ್ರಸಕ್ತ ವರ್ಷ ಮಳೆ ಕೊರತೆ ಇರುವುದರಿಂದ ಜಲಾಶಯದಲ್ಲಿನ ಲಭ್ಯವಿರುವ ನೀರನ್ನು ರೈತರು ಅತ್ಯಂತ ಜಾಗರೂಕತೆಯಿಂದ ಸದುಪಯೋಗಪಡಿಸಿಕೊಳ್ಳಬೇಕು ಎಂದು ಹೇಳಿದರು.

ನಾಲೆಯ ಮೇಲ್ಭಾಗದಲ್ಲಿ ನಡೆಯುತ್ತಿರುವ ನೀರು ಕಳವು ಪ್ರಕರಣಗಳನ್ನು ಗಂಭೀರವಾಗಿ ಪರಿಗಣಿಸಲಾಗುವುದು. ಇಂತಹ ಅಕ್ರಮಗಳನ್ನು ತಡೆದು, ನಾಲೆಯ ಕೊನೆಯ ಭಾಗದ (ಟೇಲ್‌ಎಂಡ್) ವರೆಗೂ ನೀರು ತಲುಪಿಸಲು ಇಲಾಖೆಯಿಂದ ಅಗತ್ಯ ಕ್ರಮ ಕೈಗೊಳ್ಳಲಾಗುವುದು ಎಂದು ಭರವಸೆ ನೀಡಿದರು.

ಈ ಸಂದರ್ಭದಲ್ಲಿ ಪ್ರಮುಖ ರೈತರಾದ ಕೆ. ಖಾಸಿಂಸಾಬ್, ಬುರೆಡ್ಡಿ ಸಣ್ಣ ಜಡೆಪ್ಪ, ಬುರೆಡ್ಡಿ ಬಸವರಾಜ, ಸುಮಂತಸ್ವಾಮಿ, ಪಾರ್ಥನವರ ಜಡೆಪ್ಪ, ಹುಲೆಪ್ಪ ಪಿಂಜಾರ, ಗಾಣಿಗರ ಜಡೆಪ್ಪ, ಗಾಣಿಗರ ರಾಜಶೇಖರ ಸೇರಿದಂತೆ ಹಲವು ರೈತರು ಉಪಸ್ಥಿತರಿದ್ದರು.