Bidar | ದಲಿತ ರೈತನ ಜಮೀನಿಗೆ ರಕ್ಷಣೆ ನೀಡಬೇಕು : ಅಂಬಾದಾಸ್ ಸೈನ್ಯ ಆಗ್ರಹ

ಬೀದರ್: ತಾಲೂಕಿನ ಅಮಲಾಪುರ ಗ್ರಾಮದಲ್ಲಿ ಪರಿಶಿಷ್ಟ ಜಾತಿ ಸಮುದಾಯಕ್ಕೆ ಹಿಂದೆ ಸ್ಮಶಾನಕ್ಕಾಗಿ ಮೀಸಲಾಗಿದ್ದ ಜಮೀನು ಒತ್ತುವರಿಯಾಗಿದ್ದು, ಇದೀಗ ಸ್ಮಶಾನ ಭೂಮಿ ನೀಡುವ ಹೆಸರಿನಲ್ಲಿ ದಲಿತ ರೈತನ ಖಾಸಗಿ ಜಮೀನನ್ನು ಕಬಳಿಸಲು ಪ್ರಯತ್ನ ನಡೆಯುತ್ತಿದೆ. ಸರ್ಕಾರ ಕೂಡಲೇ ಆ ಜಮೀನಿಗೆ ರಕ್ಷಣೆ ನೀಡಬೇಕು ಎಂದು ರೈತ ಅಂಬಾದಾಸ್ ಸೈನ್ಯ ಆಗ್ರಹಿಸಿದರು.

ನಗರದ ಜಿಲ್ಲಾ ಪತ್ರಿಕಾ ಭವನದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಗ್ರಾಮದಲ್ಲಿ ಪರಿಶಿಷ್ಟ ಜಾತಿ ಸಮುದಾಯಕ್ಕೆ ಸುಮಾರು 25–26 ವರ್ಷಗಳ ಹಿಂದೆ ಸರ್ವೆ ನಂ.72ರಲ್ಲಿ 1 ಎಕರೆ 39 ಗುಂಟೆ ಸ್ಮಶಾನ ಭೂಮಿ ಮಂಜೂರಾಗಿತ್ತು. ಆದರೆ, ಆ ಜಮೀನಿನಲ್ಲಿ ಪ್ರಭಾವಿಗಳು ಮನೆ ನಿರ್ಮಿಸಿಕೊಂಡು ಒತ್ತುವರಿ ಮಾಡಿದ್ದಾರೆ ಎಂದು ಆರೋಪಿಸಿದರು.

ಸ್ಮಶಾನ ಭೂಮಿ ಕೊರತೆಯನ್ನು ಉಲ್ಲೇಖಿಸಿ ಕಳೆದ ಒಂದು ವಾರದಿಂದ ಕೆಲವರು ತಹಶೀಲ್ದಾರ್ ಕಚೇರಿ ಎದುರು ಧರಣಿ ನಡೆಸುತ್ತಿದ್ದು, ಜನಸಂಖ್ಯೆಗೆ ಅನುಗುಣವಾಗಿ 5 ಎಕರೆ ಜಮೀನು ಮಂಜೂರು ಮಾಡುವಂತೆ ಆಗ್ರಹಿಸುತ್ತಿದ್ದಾರೆ. ಆದರೆ, ಸರ್ವೆ ನಂ.71ರಲ್ಲಿ ದಿವಂಗತ ತುಕ್ಕಪ್ಪ ಅವರಿಗೆ ಮಂಜೂರಾಗಿದ್ದ 4 ಎಕರೆ 38 ಗುಂಟೆ ಖಾಸಗಿ ಜಮೀನನ್ನೇ ಸ್ಮಶಾನಕ್ಕೆ ನೀಡಬೇಕು ಎಂದು ಒತ್ತಾಯಿಸಲಾಗುತ್ತಿದೆ ಎಂದು ದೂರಿದರು.

1993–94ರಲ್ಲಿ ಭೂರಹಿತ ಕುಟುಂಬಕ್ಕೆ ಲ್ಯಾಂಡ್ ಗ್ರಾಂಟ್ ಕಮಿಟಿಯ ಮೂಲಕ ಈ ಜಮೀನು ಮಂಜೂರಾಗಿದ್ದು, 2021–22ರಲ್ಲಿ ಪ್ರಧಾನ ಮಂತ್ರಿ ಆವಾಸ್ ಯೋಜನೆಯಡಿ ತುಕ್ಕಪ್ಪ ಅವರ ಸೊಸೆ ಲಕ್ಷ್ಮಿ ಅವರಿಗೆ ಮನೆ ಸಹ ಮಂಜೂರಾಗಿದೆ. ಮನೆ ನಿರ್ಮಾಣಕ್ಕೂ ಕೆಲವರು ಅಡ್ಡಿಪಡಿಸಿ ವಿವಾದ ಸೃಷ್ಟಿಸಿದ್ದಾರೆ ಎಂದು ಆರೋಪಿಸಿದರು.

ಹಿಂದೆ ಮಂಜೂರಾಗಿದ್ದ ಸ್ಮಶಾನ ಭೂಮಿಯನ್ನು ಪತ್ತೆಹಚ್ಚಿ ಸಮುದಾಯಕ್ಕೆ ಮುಕ್ತಗೊಳಿಸಬೇಕು. ಸರ್ಕಾರಿ ಜಮೀನು ಲಭ್ಯವಿಲ್ಲದಿದ್ದರೆ ಖಾಸಗಿ ಜಮೀನು ಖರೀದಿಸಿ ಸ್ಮಶಾನ ಭೂಮಿ ಒದಗಿಸಬೇಕು. ಬಡ ದಲಿತ ಕುಟುಂಬದ ಪಟ್ಟಾ ಜಮೀನನ್ನು ಕಸಿದುಕೊಳ್ಳುವುದು ಅನ್ಯಾಯವಾಗಿದ್ದು, ಅಧಿಕಾರಿಗಳು ಸೂಕ್ತ ತನಿಖೆ ನಡೆಸಿ ತುಕ್ಕಪ್ಪ ಅವರ ಕುಟುಂಬದ ಜಮೀನಿಗೆ ರಕ್ಷಣೆ ಹಾಗೂ ಹಕ್ಕು ಬದಲಾವಣೆ ಮಾಡಿಕೊಡಬೇಕು ಎಂದು ಅವರು ಮನವಿ ಮಾಡಿದರು.

ಸುದ್ದಿಗೋಷ್ಠಿಯಲ್ಲಿ ಅಮಲಾಪುರ ಗ್ರಾಮದ ಮಚ್ಚೆಂದ್ರ, ಶಂಕರ್, ಜಗನ್ನಾಥ್, ರಾಹುಲ್, ರಾಜಶೇಖರ್, ಸುಭಾಷ್, ರಾಕೇಶ್ ಹಾಗೂ ರಾಮಚಂದ್ರ ಉಪಸ್ಥಿತರಿದ್ದರು.