ರಾಮಾಯಣ ನಿರ್ಮಾಪಕರ ಮುಂದಿದೆ ಅಗ್ನಿಪರೀಕ್ಷೆ; ಬರೋಬ್ಬರಿ 5000 ಕೋಟಿ ರೂ. ಗಳಿಕೆ ಸಾಧಿಸುವ ಸವಾಲು!

ರಾಮಾಯಣದ ಹೂಡಿಕೆಯನ್ನು ಮರಳಿ ಪಡೆಯಬೇಕೆಂದರೆ ಅಂದಾಜು 5000 ಕೋಟಿ ರೂ. ಗಳಿಸಬೇಕಿದೆ. ಆದರೆ, ಒಂದು ಚಲನಚಿತ್ರ ಆರಂಭದಲ್ಲಿ ತುಂಬಿದ ಚಿತ್ರಮಂದಿರಗಳಲ್ಲಿ ತೆರೆಕಾಣಬಹುದು. ಸಾಮಾಜಿಕ ಮಾಧ್ಯಮದಲ್ಲಿ ಪ್ರಾಬಲ್ಯ ಸಾಧಿಸಬಹುದು. ಆದರೆ ಆರ್ಥಿಕವಾಗಿ ಯಶಸ್ಸು ಸಾಧಿಸುವುದು ಸರಳವಲ್ಲ. ರಾಮಾಯಣದ ಗಳಿಕೆಯ ಗಣಿತ ಹೇಗಿರುತ್ತದೆ?

ಸುಮಾರು 2000 ಕೋಟಿ ರೂ. ಬಜೆಟ್ ಹೊಂದಿರುವ ‘ರಾಮಾಯಣ ಭಾಗ 1’ ಭಾರತೀಯ ಚಿತ್ರರಂಗದಲ್ಲಿ ಕೆಲವೇ ಚಿತ್ರಗಳು ಎದುರಿಸಲು ಮುಂದಾಗಿರುವ ಬಾಕ್ಸ್ ಆಫೀಸ್‌ ನ ಬೃಹತ್ ಸವಾಲನ್ನು ಎದುರಿಸುತ್ತಿದೆ. ಬಿಡುಗಡೆಯ ಮೊದಲ ದಿನವೇ 100 ಕೋಟಿ ರೂ. ಗಳಿಸುವ ಗುರಿ ಹೊಂದಿರುವ ಚಿತ್ರ, ಹೂಡಿಕೆಯನ್ನು ಮರಳಿ ಪಡೆಯಬೇಕೆಂದರೆ ಅಂದಾಜು 5000 ಕೋಟಿ ರೂ. ಗಳಿಸಬೇಕಿದೆ.

ಆದರೆ, ಒಂದು ಚಲನಚಿತ್ರ ಆರಂಭದಲ್ಲಿ ತುಂಬಿದ ಚಿತ್ರಮಂದಿರಗಳಲ್ಲಿ ತೆರೆಕಾಣಬಹುದು. ಸಾಮಾಜಿಕ ಮಾಧ್ಯಮದಲ್ಲಿ ಪ್ರಾಬಲ್ಯ ಸಾಧಿಸಬಹುದು. ಆದರೆ ಆರ್ಥಿಕವಾಗಿ ಯಶಸ್ಸು ಸಾಧಿಸುವುದು ಸರಳವಲ್ಲ. ‘ರಾಮಾಯಣ ಭಾಗ 1: ರೈಸ್ ಆಫ್ ಲೆಜೆಂಡ್’ ಚಿತ್ರದ ಬಜೆಟ್ ಬರೋಬ್ಬರಿ 2000 ಕೋಟಿ ರೂ. ಚಿತ್ರಕ್ಕೆ ಮುಂಗಡ ಟಿಕೆಟ್ ಬುಕಿಂಗ್ ಅನ್ನು 14 ದಿನಗಳ ಮುಂಚಿತವಾಗಿ ತೆರೆಯಲಾಗಿದೆ. ಹೀಗಾಗಿ ಬೃಹತ್ ಬಜೆಟ್‌ ಗೆ ತಕ್ಕ ಆರಂಭಿಕ ವೇಗವನ್ನು ನಿರ್ಮಿಸಲು ಪ್ರೇಕ್ಷಕರಿಗೆ ಅವಕಾಶ ಸಿಗಲಿದೆ. ಆದರೆ, ಬಾಕ್ಸ್ ಆಫೀಸ್‌ ನಲ್ಲಿ ಸಂಚಲನ ಸೃಷ್ಟಿಸುವ ಮಟ್ಟಿಗೆ ಸಿನಿಮಾ ಸಿದ್ಧವಾಗಿದೆಯೇ ಎಂಬುದೇ ಪ್ರಶ್ನೆ.

ಮಾಧ್ಯಮಗಳ ವರದಿಗಳ ಪ್ರಕಾರ, ಅಕ್ಟೋಬರ್ 22ರ ಗುರುವಾರ ಮಧ್ಯಾಹ್ನದ ವೇಳೆಗೆ ‘ರಾಮಾಯಣ’ದ 1.33 ಲಕ್ಷ ಟಿಕೆಟ್‌ಗಳು ಮಾರಾಟವಾಗಿದ್ದವು. ಸ್ಯಾಕ್ನಿಲ್ಕ್ ವರದಿಯ ಪ್ರಕಾರ, ಭಾರತದಲ್ಲಿ 3,749 ಪ್ರದರ್ಶನಗಳ ಮೂಲಕ 7.52 ಕೋಟಿ ರೂ. ಗಳಿಕೆ ದಾಖಲಾಗಿತ್ತು. ಹಲವು ಕಡೆಗಳಲ್ಲಿ ಇನ್ನೂ ಮುಂಗಡ ಬುಕಿಂಗ್ ಆರಂಭವಾಗಿರಲಿಲ್ಲ. ಆದರೂ, ಆರಂಭಿಕ ಅಂಕಿ-ಅಂಶಗಳು ಸಿನಿಮಾ ಸರಿಯಾದ ಹಾದಿಯಲ್ಲಿರುವುದನ್ನು ಸೂಚಿಸುತ್ತವೆ. ಆದರೆ, ಈ ವೇಗವನ್ನು ಉಳಿಸಿಕೊಳ್ಳಲಿದೆಯೇ ಎಂಬುದನ್ನು ಮುಂಬರುವ ವಾರವೇ ನಿರ್ಧರಿಸಲಿದೆ.

ಅಂಕಿ-ಅಂಶಗಳ ಪ್ರಕಾರ, ಸಿನಿಮಾ ಬಿಡುಗಡೆಯ ಮೊದಲ ದಿನಕ್ಕೆ ದೇಶೀಯ ಮುಂಗಡ ಬುಕಿಂಗ್‌ ನಿಂದ ಸುಮಾರು 75ರಿಂದ 100 ಕೋಟಿ ರೂ. ಗಳಿಸುವ ಅಗತ್ಯವಿದೆ. 2000 ಕೋಟಿ ರೂ. ಹೂಡಿಕೆಯ ‘ರಾಮಾಯಣ’ಕ್ಕೆ ಬೃಹತ್ ಆರಂಭದ ಅಗತ್ಯವಿದೆ. ವಿಶ್ವಾದ್ಯಂತ ಮುಂಗಡ ಬುಕಿಂಗ್ 150ರಿಂದ 200 ಕೋಟಿ ರೂ.ಗೆ ಏರಿದರೆ, ಮಾರಾಟವು ಭಾರಿ ವೇಗ ಪಡೆದುಕೊಳ್ಳಲಿದೆ.

‘ರಾಮಾಯಣ’ದ ಯಶಸ್ಸಿನಲ್ಲಿ ಬಾಯಿ ಮಾತಿನ ಪ್ರಚಾರ ನಿರ್ಣಾಯಕ ಪಾತ್ರ ವಹಿಸಲಿದೆ. ‘ಪುಷ್ಪ’, ‘ಕೆಜಿಎಫ್’ ಮತ್ತು ‘ಬಾಹುಬಲಿ’ ಸೇರಿದಂತೆ ಭಾರತೀಯ ಚಿತ್ರರಂಗದಲ್ಲಿ ಛಾಪು ಮೂಡಿಸಿದ ಹಲವು ಬೃಹತ್ ಬಜೆಟ್ ಚಿತ್ರಗಳಿಗಿಂತ ಭಿನ್ನವಾಗಿ, ‘ರಾಮಾಯಣ’ಕ್ಕೆ ಪ್ರೇಕ್ಷಕರಿಂದ ಸಿಗುವ ಪ್ರತಿಕ್ರಿಯೆ ಮತ್ತು ಬಾಯಿ ಮಾತಿನ ಪ್ರಚಾರ ಅತ್ಯಂತ ಮುಖ್ಯ. ಏಕೆಂದರೆ, ಇದು ಈವರೆಗಿನ ಭಾರತದ ಅತ್ಯಂತ ದುಬಾರಿ ಸಿನಿಮಾ. ವಾರಾಂತ್ಯದ ಬಳಿಕವೂ ಬಾಕ್ಸ್ ಆಫೀಸ್‌ ನಲ್ಲಿ ಗಳಿಕೆಯ ವೇಗವನ್ನು ಉಳಿಸಿಕೊಳ್ಳಲು ಬಲವಾದ ಬಾಯಿ ಮಾತಿನ ಪ್ರಚಾರ ಅಗತ್ಯವಿದೆ.

ಚಿತ್ರದ ತಾರಾಗಣ, ಸಾರ್ವತ್ರಿಕ ಆಕರ್ಷಣೆ ಮತ್ತು ಜಾಗತಿಕ ಮಾರುಕಟ್ಟೆಯನ್ನು ತಲುಪುವ ಸಾಮರ್ಥ್ಯವು ಐತಿಹಾಸಿಕ ಆರಂಭಕ್ಕೆ ನೆರವಾಗಬಹುದು. ಆದರೆ, ದೀರ್ಘಾವಧಿಯ ಯಶಸ್ಸಿಗೆ ಬಾಯಿ ಮಾತಿನ ಪ್ರಚಾರ ನಿರ್ಣಾಯಕವಾಗಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

“ಮುಂಗಡ ಬುಕಿಂಗ್‌ ನ ಬಹುತೇಕ ವ್ಯಾಪಾರವು ಪ್ರಸ್ತುತ ಹಿಂದಿ ಮಾರುಕಟ್ಟೆಯಿಂದ ಬರುತ್ತಿದೆ. ‘ರಾಮಾಯಣ’ ದೇಶೀಯ ಬಾಕ್ಸ್ ಆಫೀಸ್ ಸಾಮರ್ಥ್ಯವನ್ನು ಹೆಚ್ಚಿಸಬೇಕೆಂದರೆ ದಕ್ಷಿಣ ಭಾರತದ ಮಾರುಕಟ್ಟೆಗಳಿಂದಲೂ ಬಲವಾದ ಬೆಂಬಲ ಅಗತ್ಯ. ಇಂತಹ ಪ್ಯಾನ್ ಇಂಡಿಯಾ ಸಿನಿಮಾಗಳು ಆರಂಭಿಕ ದಿನದ ಗಳಿಕೆಯಾಚೆಗೆ ಬೆಳೆಯಲು ಒಂದೇ ಮಾರುಕಟ್ಟೆಯನ್ನು ಅವಲಂಬಿಸಲು ಸಾಧ್ಯವಿಲ್ಲ” ಎಂದು ತಜ್ಞರು ಹೇಳಿದ್ದಾರೆ.

ಒಟ್ಟು ದೇಶೀಯ ಮುಂಗಡ ಬುಕಿಂಗ್‌ ನಲ್ಲಿ ದಕ್ಷಿಣ ಭಾರತದ ಮಾರುಕಟ್ಟೆಗಳ ಪಾಲು ಶೇ. 35ರಿಂದ 40ರಷ್ಟಿರಬೇಕು. ಅಂದರೆ, ದೇಶೀಯವಾಗಿ 100 ಕೋಟಿ ರೂ. ಮುಂಗಡ ಬುಕಿಂಗ್ ಗುರಿ ಹೊಂದಿದ್ದರೆ, ಅದರಲ್ಲಿ ಸುಮಾರು 35ರಿಂದ 40 ಕೋಟಿ ರೂ. ದಕ್ಷಿಣದ ಮಾರುಕಟ್ಟೆಗಳಿಂದಲೇ ಬರಬೇಕಾಗುತ್ತದೆ. ಇದೊಂದು ಬೃಹತ್ ಸವಾಲು.

ಏಕೆಂದರೆ, ಅಲ್ಲು ಅರ್ಜುನ್ ಅಭಿನಯದ ‘ಪುಷ್ಪ 2’ ದೇಶೀಯ ಮುಂಗಡ ಬುಕಿಂಗ್‌ ಗೆ ಮಾನದಂಡವಾಗಿದೆ. ಆ ಸಿನಿಮಾ 91.24 ಕೋಟಿ ರೂ. ಮೊತ್ತದ ಮುಂಗಡ ಬುಕಿಂಗ್ ದಾಖಲಿಸಿತ್ತು. ಈ ಪೈಕಿ 53.94 ಕೋಟಿ ರೂ. ದಕ್ಷಿಣ ಭಾರತದ ಮಾರುಕಟ್ಟೆಗಳಿಂದಲೇ ಬಂದಿತ್ತು.

ಯಶ್ ಅವರ ಜನಪ್ರಿಯತೆ ಮತ್ತು ಚಿತ್ರದ ಸಾರ್ವತ್ರಿಕ ಆಕರ್ಷಣೆಯಿಂದಾಗಿ ‘ರಾಮಾಯಣ’ದ ದೇಶೀಯ ಮುಂಗಡ ಬುಕಿಂಗ್‌ನಲ್ಲಿ ದಕ್ಷಿಣದ ಪಾಲು ಗಣನೀಯವಾಗಿರಬಹುದು. ಮುಖ್ಯವಾಗಿ ಕರ್ನಾಟಕ ಮತ್ತು ತೆಲುಗು ರಾಜ್ಯಗಳು ಪ್ರಮುಖ ಪಾತ್ರ ವಹಿಸಲಿವೆ.

ವಿದೇಶಿ ಮಾರುಕಟ್ಟೆಯ ಪ್ರತಿಕ್ರಿಯೆಯೂ ಮತ್ತೊಂದು ಪ್ರಮುಖ ಅಂಶವಾಗಲಿದೆ. ‘ರಾಮಾಯಣ’ ಆರಂಭದಿಂದಲೇ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಬಲವಾದ ಅಸ್ತಿತ್ವ ಕಂಡುಕೊಳ್ಳಬೇಕಿದೆ. ನವೆಂಬರ್ 4ರಂದು ನಡೆಯಲಿರುವ ಜಾಗತಿಕ ಪ್ರಿವ್ಯೂಗಳಿಂದ ಭಾರತದ ಹೊರಗೆ ಚಿತ್ರಕ್ಕೆ ಯಾವ ರೀತಿಯ ಪ್ರತಿಕ್ರಿಯೆ ಸಿಗಬಹುದು ಎಂಬುದರ ಕುರಿತು ಮುಂಚಿತ ಸುಳಿವು ದೊರೆಯಲಿದೆ. ವಿದೇಶಗಳಲ್ಲಿ ಚಿತ್ರಕ್ಕೆ ಉತ್ತಮ ಆರಂಭ ಸಿಕ್ಕರೆ, ಜಾಗತಿಕ ಬಾಕ್ಸ್ ಆಫೀಸ್‌ನಲ್ಲಿ ಯಶಸ್ಸು ಸಾಧಿಸುವ ಸಾಧ್ಯತೆಗಳು ಗಮನಾರ್ಹವಾಗಿ ಹೆಚ್ಚಲಿವೆ.

‘ರಾಮಾಯಣ’ದ ಮೊದಲ ಭಾಗವಷ್ಟೇ ಬಿಡುಗಡೆಯಾಗುತ್ತಿದೆ. ಹೀಗಾಗಿ, ಲಾಭದಾಯಕವಾಗಿ ಹೊರಹೊಮ್ಮಲು ಚಿತ್ರದ ಸಂಪೂರ್ಣ ಪ್ರದರ್ಶನದ ಅವಧಿಯಲ್ಲಿ ಗಳಿಸಬೇಕಾದ ಮೊತ್ತ ಬೆರಗುಗೊಳಿಸುವಷ್ಟು ದೊಡ್ಡದಾಗಿದೆ. ಚಿತ್ರದ ಗಳಿಕೆ ವೆಚ್ಚವನ್ನು ಸರಿದೂಗಿಸುವ ಹಂತ ತಲುಪಬೇಕಾದರೆ, ಜಾಗತಿಕ ಬಾಕ್ಸ್ ಆಫೀಸ್‌ ನಲ್ಲಿ ಅಂದಾಜು 5000 ಕೋಟಿ ರೂ. ಗಳಿಸಬೇಕಾಗುತ್ತದೆ. ಜಾಗತಿಕ ಮಾನದಂಡಗಳ ಪ್ರಕಾರವೂ ಇದೊಂದು ಅಸಾಧಾರಣ ಗುರಿ. ಪ್ರಸಿದ್ಧ ತಾರಾಗಣ, ಎಲ್ಲರಿಗೂ ಪರಿಚಿತವಾದ ಕಥಾವಸ್ತು ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪ್ರೇಕ್ಷಕರನ್ನು ತಲುಪುವ ಸಾಮರ್ಥ್ಯ ಚಿತ್ರಕ್ಕೆ ದೊಡ್ಡ ಪ್ಲಸ್ ಪಾಯಿಂಟ್‌ಗಳಾಗಿವೆ. ಆದರೂ, ಇಷ್ಟು ದೊಡ್ಡ ಮೊತ್ತ ಗಳಿಸುವುದು ಅತ್ಯಂತ ಸವಾಲಿನ ಸಂಗತಿಯಾಗಿದೆ.

ನಿತೀಶ್ ತಿವಾರಿ ನಿರ್ದೇಶನದ ‘ರಾಮಾಯಣ: ರೈಸ್ ಆಫ್ ಲೆಜೆಂಡ್’ ಚಿತ್ರದಲ್ಲಿ ರಣಬೀರ್ ಕಪೂರ್ ಭಗವಾನ್ ರಾಮನಾಗಿ, ಸಾಯಿ ಪಲ್ಲವಿ ಸೀತೆಯಾಗಿ, ರವಿ ದುಬೆ ಲಕ್ಷ್ಮಣನಾಗಿ ಮತ್ತು ಯಶ್ ರಾವಣನಾಗಿ ನಟಿಸಿದ್ದಾರೆ. ಈ ವರ್ಷದ ದೀಪಾವಳಿಯ ಪ್ರಮುಖ ಬಿಡುಗಡೆಯಾಗಿ ಚಿತ್ರದ ಮೊದಲ ಭಾಗ ನವೆಂಬರ್ 5ರಂದು ಚಿತ್ರಮಂದಿರಗಳಲ್ಲಿ ತೆರೆಕಾಣಲಿದೆ. ನವೆಂಬರ್ 4ರಂದು ವಿಶ್ವಾದ್ಯಂತ ವಿಶೇಷ ಪ್ರಿವ್ಯೂ ನಿಗದಿಯಾಗಿದೆ. ಯಶ್ ಅವರ ಮಾನ್‌ಸ್ಟರ್ ಮೈಂಡ್ ಕ್ರಿಯೇಶನ್ಸ್ ಮತ್ತು ನಮಿತ್ ಮಲ್ಹೋತ್ರ ಅವರ ಪ್ರೈಮ್ ಫೋಕಸ್ ಸ್ಟುಡಿಯೋಸ್ ಚಿತ್ರಕ್ಕೆ ಬಂಡವಾಳ ಹೂಡಿವೆ.