81 ಗಂಟೆಗಳಲ್ಲಿ 2,400 ಟನ್ ಕ್ಯಾಟೋಫಿನ್ ವೇಗವರ್ಧಕ ಇಳಿಸಿ ವಿಶ್ವ ದಾಖಲೆ ನಿರ್ಮಿಸಿದ ಅಲ್ ಮುಝೈನ್
ಅಟೈರಾವ್ (ಕಝಾಕಿಸ್ತಾನ್): ಕಝಾಕಿಸ್ತಾನ್ ನ ಅಟೈರಾವ್ನಲ್ಲಿರುವ ಕೆಪಿಐನ ಪಿಡಿಹೆಚ್ ಸ್ಥಾವರದಲ್ಲಿ 2,400 ಟನ್ ಕ್ಯಾಟೋಫಿನ್ ವೇಗವರ್ಧಕ (Catalyst)ವನ್ನು ಕೇವಲ 81 ಗಂಟೆಗಳಲ್ಲಿ ಇಳಿಸುವ ಮೂಲಕ ಅಲ್ ಮುಝೈನ್ ವಿಶ್ವ ದಾಖಲೆ ನಿರ್ಮಿಸಿದೆ.
ಕ್ಯಾಟೋಫಿನ್ ತಂತ್ರಜ್ಞಾನ ಆಧಾರಿತ ಈ ಸ್ಥಾವರದಲ್ಲಿ ರಿಯಾಕ್ಟರ್ ಗಳಲ್ಲಿದ್ದ ವೇಗವರ್ಧಕವನ್ನು ಹೊರತೆಗೆದು ಬದಲಿಸುವ ಕಾರ್ಯದ ಭಾಗವಾಗಿ ಈ ಕಾರ್ಯಾಚರಣೆ ನಡೆಸಲಾಯಿತು. ಕಂಪೆನಿಯ ಪ್ರಕಾರ, ಸೆಪ್ಟೆಂಬರ್ 8ರಂದು ಕಾರ್ಯಾಚರಣೆ ಪೂರ್ಣಗೊಂಡಿದ್ದು, 3.4 ದಿನಗಳಲ್ಲಿ (81 ಗಂಟೆ) 2,400 ಟನ್ ಕ್ಯಾಟೋಫಿನ್ ವೇಗವರ್ಧಕವನ್ನು ಇಳಿಸಲಾಗಿದೆ. ವೇಗವರ್ಧಕ ಇಳಿಸುವ ಕಾರ್ಯಾಚರಣೆಯಲ್ಲಿ ಇದು ವಿಶ್ವ ದಾಖಲೆಯಾಗಿದೆ ಎಂದು ಕಂಪೆನಿ ತಿಳಿಸಿದೆ.
ಪಿಡಿಹೆಚ್ ಸ್ಥಾವರದಲ್ಲಿ ಪೆಟ್ರೋಕೆಮಿಕಲ್ ಉದ್ಯಮಕ್ಕೆ ಪ್ರಮುಖ ಕಚ್ಚಾ ವಸ್ತುವಾಗಿರುವ ಪ್ರೊಪೇನ್ ಅನ್ನು ಪ್ರೊಪಿಲೀನ್ ಆಗಿ ಪರಿವರ್ತಿಸಲಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ಕ್ಯಾಟೋಫಿನ್ ತಂತ್ರಜ್ಞಾನವನ್ನು ಬಳಸಲಾಗುತ್ತದೆ.
ಇಷ್ಟು ದೊಡ್ಡ ಪ್ರಮಾಣದ ವೇಗವರ್ಧಕವನ್ನು ಕಡಿಮೆ ಅವಧಿಯಲ್ಲಿ ಹೊರತೆಗೆಯಲು ನಿಖರವಾದ ಯೋಜನೆ, ವಿವಿಧ ತಂಡಗಳ ಸಮನ್ವಯ, ವಿಶೇಷ ಉಪಕರಣಗಳ ಬಳಕೆ ಹಾಗೂ ಕಟ್ಟುನಿಟ್ಟಿನ ಸುರಕ್ಷತಾ ಕ್ರಮಗಳ ಪಾಲನೆ ಅಗತ್ಯವಾಗಿತ್ತು. ವೇಗವರ್ಧಕ ಬದಲಿಸುವ ಕಾರ್ಯವನ್ನು ತ್ವರಿತವಾಗಿ ಪೂರ್ಣಗೊಳಿಸುವುದರಿಂದ ಸ್ಥಾವರದ ನಿರ್ವಹಣೆಗಾಗಿ ಬೇಕಾಗುವ ಶಟ್ ಡೌನ್ ಅವಧಿಯನ್ನು ಕಡಿಮೆ ಮಾಡಬಹುದು. ಇದರಿಂದ ಸ್ಥಾವರದ ಕಾರ್ಯಾಚರಣೆಯನ್ನು ನಿಗದಿತ ಸಮಯದಲ್ಲಿ ಪುನರಾರಂಭಿಸಲು ನೆರವಾಗುತ್ತದೆ.
ಮುಝೈನ್ ನ ಸಿಇಒ ಝಕರಿಯಾ ಜೋಕಟ್ಟೆ ಮತ್ತು ಕಂಪೆನಿಯ ಯೋಜನಾ ನಿರ್ವಹಣಾ ತಂಡವು ಅಟೈರಾವ್ ಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಕೆಪಿಐ ಕಝಾಕಿಸ್ತಾನ್ ನ ಪ್ರತಿನಿಧಿಗಳನ್ನು ಭೇಟಿ ಮಾಡಿತು.