ಅಮೆರಿಕದಲ್ಲಿ ಇತಿಹಾಸ ಬರೆದ ಕೀಶಾ ಲ್ಯಾನ್ಸ್ ಬಾಟಮ್ಸ್

ಅಟ್ಲಾಂಟಾ: ಅಮೆರಿಕದ ರಾಜಕೀಯ ಇತಿಹಾಸದಲ್ಲಿ ಹೊಸ ಅಧ್ಯಾಯವೊಂದು ತೆರೆದುಕೊಂಡಿದೆ. ಜಾರ್ಜಿಯಾ ರಾಜ್ಯದ ಗವರ್ನರ್ ಚುನಾವಣೆಯಲ್ಲಿ ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿ ಕೀಶಾ ಲ್ಯಾನ್ಸ್ ಬಾಟಮ್ಸ್ ಗೆಲುವು ಸಾಧಿಸಿದ್ದು, ಅಮೆರಿಕದಲ್ಲಿ ಗವರ್ನರ್ ಆಗಿ ಆಯ್ಕೆಯಾದ ಮೊದಲ ಕಪ್ಪು ವರ್ಣೀಯ ಮಹಿಳೆ ಎಂಬ ಐತಿಹಾಸಿಕ ದಾಖಲೆ ನಿರ್ಮಿಸಿದ್ದಾರೆ.

ಅಟ್ಲಾಂಟಾದ ಮಾಜಿ ಮೇಯರ್ ಆಗಿರುವ ಬಾಟಮ್ಸ್, ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿ ಹಾಗೂ ಬಿಲಿಯನೇರ್ ಉದ್ಯಮಿ ರಿಕ್ ಜಾಕ್ಸನ್ ಅವರನ್ನು ಸೋಲಿಸಿದ್ದಾರೆ. ಜನಪ್ರಿಯ ರಿಪಬ್ಲಿಕನ್ ಗವರ್ನರ್ ಬ್ರಿಯಾನ್ ಕೆಂಪ್ ಅವರ ಉತ್ತರಾಧಿಕಾರಿಯಾಗುವ ಗುರಿಯೊಂದಿಗೆ ಕಣಕ್ಕಿಳಿದಿದ್ದ ಜಾಕ್ಸನ್, ಚುನಾವಣಾ ಪ್ರಚಾರಕ್ಕಾಗಿ ತಮ್ಮ ಸ್ವಂತ ಹಣದಿಂದಲೇ 200 ಮಿಲಿಯನ್ ಡಾಲರ್‌ ಗಿಂತಲೂ ಹೆಚ್ಚು ಖರ್ಚು ಮಾಡಿದ್ದರು.

ಅಮೆರಿಕದ ಮಾಜಿ ಅಧ್ಯಕ್ಷ ಜೋ ಬೈಡನ್ ಅವರ ಸಲಹೆಗಾರ್ತಿಯಾಗಿ ಕಾರ್ಯನಿರ್ವಹಿಸಿದ್ದ ಬಾಟಮ್ಸ್ ಅವರ ಗೆಲುವಿನಲ್ಲಿ ಜಾರ್ಜಿಯಾದ ಕಪ್ಪು ವರ್ಣೀಯ ಮತದಾರರ ಬೆಂಬಲ ಪ್ರಮುಖ ಪಾತ್ರ ವಹಿಸಿದೆ. ಈ ಸಮುದಾಯದ ಮತದಾರರು ಆರಂಭಿಕ ಮತದಾನದ ಹಂತದಲ್ಲೇ ಹೆಚ್ಚಿನ ಸಂಖ್ಯೆಯಲ್ಲಿ ಮತ ಚಲಾಯಿಸಿದ್ದರು.

ಚುನಾವಣಾ ಪ್ರಚಾರದ ವೇಳೆ ಬಾಟಮ್ಸ್ ಅವರು ಅಟ್ಲಾಂಟಾದ ಮೇಯರ್ ಆಗಿದ್ದ ಅವಧಿಯನ್ನು ರಿಪಬ್ಲಿಕನ್ ಪಕ್ಷದವರು ಗುರಿಯಾಗಿಸಿಕೊಂಡಿದ್ದರು. ಅವರ ಆಡಳಿತದಲ್ಲಿ ನಗರವು ಅಪರಾಧಗಳಿಂದ ತುಂಬಿ, ಅವನತಿಯತ್ತ ಸಾಗಿತ್ತು ಎಂಬ ಆರೋಪದ ಮೂಲಕ ಮತದಾರರ ಗಮನ ಸೆಳೆಯಲು ಪ್ರಯತ್ನಿಸಿದ್ದರು.

ಇದಕ್ಕೆ ಪ್ರತಿಕ್ರಿಯಿಸಿದ್ದ ಬಾಟಮ್ಸ್, "ಅಟ್ಲಾಂಟಾವನ್ನು ಒಂದು ದೊಡ್ಡ, ಕೆಟ್ಟ ಸ್ಥಳವೆಂದು ಬಿಂಬಿಸುವುದು ಅವರ ಹಳೆಯ ತಂತ್ರವಾಗಿದೆ" ಎಂದು ಅಸೋಸಿಯೇಟೆಡ್ ಪ್ರೆಸ್ (AP) ಸುದ್ದಿ ಸಂಸ್ಥೆಗೆ ತಿಳಿಸಿದ್ದರು.

ಮೂರನೇ ಪ್ರಯತ್ನದಲ್ಲಿ ಡೆಮಾಕ್ರಟಿಕ್ ಪಕ್ಷಕ್ಕೆ ಯಶಸ್ಸು

ಜಾರ್ಜಿಯಾದ ಗವರ್ನರ್ ಚುನಾವಣೆಗೆ ಕಪ್ಪು ವರ್ಣೀಯ ಮಹಿಳೆಯನ್ನು ಡೆಮಾಕ್ರಟಿಕ್ ಪಕ್ಷ ಅಭ್ಯರ್ಥಿಯನ್ನಾಗಿ ಕಣಕ್ಕಿಳಿಸಿದ್ದು ಇದು ಸತತ ಮೂರನೇ ಬಾರಿ. 2018 ಮತ್ತು 2022ರ ಚುನಾವಣೆಗಳಲ್ಲಿ ಸ್ಟೇಸಿ ಅಬ್ರಾಮ್ಸ್ ಅವರು ಪಕ್ಷದ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದರು. ಆದರೆ, ಎರಡೂ ಬಾರಿಯೂ ರಿಪಬ್ಲಿಕನ್ ಪಕ್ಷದ ಬ್ರಿಯಾನ್ ಕೆಂಪ್ ವಿರುದ್ಧ ಸೋಲು ಅನುಭವಿಸಿದ್ದರು.

ಎಂಟು ವರ್ಷಗಳ ಅಧಿಕಾರಾವಧಿ ಪೂರ್ಣಗೊಳಿಸಿರುವ ಕೆಂಪ್ ಅವರು ನಿಯಮದ ಪ್ರಕಾರ ಮುಂದಿನ ಜನವರಿಯಲ್ಲಿ ಗವರ್ನರ್ ಹುದ್ದೆಯಿಂದ ಕೆಳಗಿಳಿಯಲಿದ್ದಾರೆ.

ಸೌಜನ್ಯ: Aljazeerá