ಅಂತರರಾಷ್ಟ್ರೀಯ ಲೆವೆಲ್ ಕ್ರಾಸಿಂಗ್ ಜಾಗೃತಿ ದಿನ: ಸೋಲಾಪುರ ವಿಭಾಗದಿಂದ ವ್ಯಾಪಕ ಸುರಕ್ಷತಾ ಅಭಿಯಾನ

ಕಲಬುರಗಿ: ಕೇಂದ್ರ ರೈಲ್ವೆಯ ಸೋಲಾಪುರ ವಿಭಾಗವು ಅಂತರರಾಷ್ಟ್ರೀಯ ಲೆವೆಲ್ ಕ್ರಾಸಿಂಗ್ ಜಾಗೃತಿ ದಿನ (ILCAD-2026) ಅಂಗವಾಗಿ ಮಂಗಳವಾರ ವಿಭಾಗದಾದ್ಯಂತ ವ್ಯಾಪಕ ಸುರಕ್ಷತಾ ಜಾಗೃತಿ ಹಾಗೂ ಸಾರ್ವಜನಿಕ ಸಂಪರ್ಕ ಕಾರ್ಯಕ್ರಮಗಳನ್ನು ಯಶಸ್ವಿಯಾಗಿ ಆಯೋಜಿಸಿತು.

ಸೋಲಾಪುರ–ವಾಡಿ, ಸೋಲಾಪುರ–ದೌಂಡ್, ಕುರ್ದುವಾಡಿ–ಲಾತೂರ್ ಹಾಗೂ ಕುರ್ದುವಾಡಿ–ಮಿರಾಜ್ ಮಾರ್ಗಗಳನ್ನು ಒಳಗೊಂಡ ಈ ಅಭಿಯಾನದ ಉದ್ದೇಶ ಲೆವೆಲ್ ಕ್ರಾಸಿಂಗ್‌ಗಳಲ್ಲಿ ಸುರಕ್ಷತಾ ಕ್ರಮಗಳ ಬಗ್ಗೆ ಸಾರ್ವಜನಿಕರು, ರಸ್ತೆ ಬಳಕೆದಾರರು ಹಾಗೂ ರೈಲ್ವೆ ಸಿಬ್ಬಂದಿಯಲ್ಲಿ ಅರಿವು ಮೂಡಿಸುವುದಾಗಿತ್ತು.

ಅಭಿಯಾನದ ಭಾಗವಾಗಿ 5,217 ರಸ್ತೆ ಬಳಕೆದಾರರಿಗೆ ಸುರಕ್ಷಿತವಾಗಿ ಲೆವೆಲ್ ಕ್ರಾಸಿಂಗ್ ದಾಟುವ ಕುರಿತು ಮಾರ್ಗದರ್ಶನ ನೀಡಲಾಯಿತು. ಜೊತೆಗೆ 201 ಗೇಟ್‌ಮೆನ್ ಹಾಗೂ ರೈಲ್ವೆ ಸಿಬ್ಬಂದಿಗೆ ಸುರಕ್ಷತಾ ಕಾರ್ಯವಿಧಾನಗಳು ಮತ್ತು ಕಾರ್ಯಾಚರಣಾ ಜಾಗರೂಕತೆ ಕುರಿತು ವಿಶೇಷ ಸಮಾಲೋಚನೆ ನಡೆಸಲಾಯಿತು. ಸುರಕ್ಷತಾ ಮಾನದಂಡಗಳ ಅನುಸರಣೆಯನ್ನು ಪರಿಶೀಲಿಸಲು 26 ಲೆವೆಲ್ ಕ್ರಾಸಿಂಗ್ ಗೇಟ್‌ಗಳ ತಪಾಸಣೆ ಮಾಡಲಾಯಿತು.

ಇದರೊಂದಿಗೆ, ರೈಲ್ವೆ ನೌಕರರು ಮತ್ತು ವಿವಿಧ ಪಾಲುದಾರರಿಗೆ ಸುರಕ್ಷತಾ ಅರಿವು ಮೂಡಿಸಲು 15 ಆನ್‌ಲೈನ್ ಸಭೆಗಳು ಹಾಗೂ ವಿಚಾರ ಸಂಕಿರಣಗಳನ್ನು ಆಯೋಜಿಸಲಾಯಿತು. ಸಾರ್ವಜನಿಕರಲ್ಲಿ ಪರಿಣಾಮಕಾರಿ ಸಂದೇಶ ರವಾನಿಸುವ ಉದ್ದೇಶದಿಂದ ಸೋಲಾಪುರ ರೈಲು ನಿಲ್ದಾಣ ಮತ್ತು ಲೆವೆಲ್ ಕ್ರಾಸಿಂಗ್ ಗೇಟ್ ಸಂಖ್ಯೆ 61ರಲ್ಲಿ ಒಟ್ಟು ನಾಲ್ಕು ನುಕ್ಕಡ್ ನಾಟಕ (ಬೀದಿ ನಾಟಕ) ಪ್ರದರ್ಶನಗಳನ್ನು ಹಮ್ಮಿಕೊಳ್ಳಲಾಯಿತು.

ಅಭಿಯಾನದ ವೇಳೆ ವಿಭಾಗದ 26 ಲೆವೆಲ್ ಕ್ರಾಸಿಂಗ್ ಗೇಟ್‌ಗಳು ಮತ್ತು ರೈಲು ನಿಲ್ದಾಣಗಳಲ್ಲಿ ಸುಮಾರು 6,500 ಸುರಕ್ಷತಾ ಕರಪತ್ರಗಳನ್ನು ವಿತರಿಸಲಾಯಿತು. ಈ ಕಾರ್ಯದಲ್ಲಿ ರೈಲ್ವೆ ಅಧಿಕಾರಿಗಳು, ಸ್ಟೇಷನ್ ಮಾಸ್ಟರ್‌ಗಳು, ಸಂಚಾರ ನಿರೀಕ್ಷಕರು, ಶಾಶ್ವತ ಮಾರ್ಗ ನಿರೀಕ್ಷಕರು, ಸಿಗ್ನಲ್ ಮೇಲ್ವಿಚಾರಕರು ಹಾಗೂ ವಿಭಾಗೀಯ ಸುರಕ್ಷತಾ ತಂಡ ಸಕ್ರಿಯವಾಗಿ ಪಾಲ್ಗೊಂಡಿದ್ದರು.

ಕಾರ್ಯಕ್ರಮಗಳ ಸಂದರ್ಭದಲ್ಲಿ ಸಾರ್ವಜನಿಕರಿಗೆ ರೈಲ್ವೆ ಹಳಿಗಳನ್ನು ದಾಟುವ ಮೊದಲು ನಿಲ್ಲಿಸಿ, ನೋಡಿ ಹಾಗೂ ಆಲಿಸುವ ಅಭ್ಯಾಸ ಬೆಳೆಸಿಕೊಳ್ಳುವಂತೆ ಸಲಹೆ ನೀಡಲಾಯಿತು. ಗೇಟ್‌ಗಳು ಮುಚ್ಚಿರುವಾಗ ಅಥವಾ ಮುಚ್ಚುವ ಪ್ರಕ್ರಿಯೆಯಲ್ಲಿರುವಾಗ ಹಳಿ ದಾಟದಂತೆ, ಮೊಬೈಲ್ ಫೋನ್ ಹಾಗೂ ಇಯರ್‌ಫೋನ್‌ಗಳಂತಹ ಗಮನ ವಿಚಲಿತಗೊಳಿಸುವ ಸಾಧನಗಳನ್ನು ಬಳಸದೇ ಇರಲು ಹಾಗೂ ಗೇಟ್‌ಕೀಪರ್‌ಗಳ ಸೂಚನೆಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ತಿಳಿಸಲಾಯಿತು. ವಿದ್ಯುದ್ದೀಕೃತ ಮಾರ್ಗಗಳಲ್ಲಿ ಓವರ್‌ಲೋಡ್ ಹಾಗೂ ಎತ್ತರದ ವಾಹನಗಳ ಸಂಚಾರ ವೇಳೆ ವಿಶೇಷ ಎಚ್ಚರಿಕೆ ವಹಿಸುವ ಅಗತ್ಯವನ್ನೂ ಒತ್ತಿ ಹೇಳಲಾಯಿತು.

ತಿಲಾಟಿ ಸಮೀಪದ ಲೆವೆಲ್ ಕ್ರಾಸಿಂಗ್ ಗೇಟ್ ಸಂಖ್ಯೆ 61ರಲ್ಲಿ ವಿಭಾಗೀಯ ಸುರಕ್ಷತಾ ತಂಡವು ವಿಶೇಷ ಜಾಗೃತಿ ಕಾರ್ಯಕ್ರಮವನ್ನು ಆಯೋಜಿಸಿತು. ಈ ಕಾರ್ಯಕ್ರಮದಲ್ಲಿ ರೈಲ್ವೆ ಅಧಿಕಾರಿಗಳು, ಸ್ಥಳೀಯ ಸಮುದಾಯದ ಮುಖಂಡರು, ಶಿಕ್ಷಣ ಸಂಸ್ಥೆಗಳ ಪ್ರತಿನಿಧಿಗಳು ಹಾಗೂ ರಸ್ತೆ ಬಳಕೆದಾರರು ಭಾಗವಹಿಸಿದ್ದರು.

ವಿಭಾಗೀಯ ಸುರಕ್ಷತಾ ತಂಡ ಮತ್ತು ವಿಭಾಗೀಯ ಸಾಂಸ್ಕೃತಿಕ ಅಕಾಡೆಮಿಯ ಸದಸ್ಯರು ಜಂಟಿಯಾಗಿ ನಡೆಸಿದ ನುಕ್ಕಡ್ ನಾಟಕವು ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿತ್ತು. ಈ ನಾಟಕದ ಮೂಲಕ ಲೆವೆಲ್ ಕ್ರಾಸಿಂಗ್‌ಗಳಲ್ಲಿ ಜವಾಬ್ದಾರಿಯುತ ನಡವಳಿಕೆ ಹಾಗೂ ಸುರಕ್ಷತಾ ನಿಯಮಗಳ ಮಹತ್ವವನ್ನು ಪರಿಣಾಮಕಾರಿಯಾಗಿ ಜನರಿಗೆ ತಲುಪಿಸಲಾಯಿತು.

ಇದೇ ವೇಳೆ 25 ಕೆವಿ ಓವರ್‌ಹೆಡ್ ಎಲೆಕ್ಟ್ರಿಕ್ ಉಪಕರಣಗಳಿಗೆ (OHE) ಸಂಬಂಧಿಸಿದ ಅಪಾಯಗಳ ಕುರಿತು ವಿಶೇಷ ಜಾಗೃತಿ ಕಾರ್ಯಕ್ರಮ ಹಮ್ಮಿಕೊಳ್ಳಲಾಯಿತು. ಟ್ರಕ್ ಚಾಲಕರು, ಭಾರೀ ವಾಹನ ನಿರ್ವಾಹಕರು ಹಾಗೂ ರೈಲ್ವೆ ಸಿಬ್ಬಂದಿಗೆ ಲೈವ್ ವಿದ್ಯುತ್ ಉಪಕರಣಗಳಿಂದ ಕನಿಷ್ಠ ಎರಡು ಮೀಟರ್ ಸುರಕ್ಷತಾ ಅಂತರ ಕಾಯ್ದುಕೊಳ್ಳುವ ಅಗತ್ಯ ಹಾಗೂ ಅನಧಿಕೃತ ಸಂಪರ್ಕದಿಂದ ಉಂಟಾಗಬಹುದಾದ ಅಪಾಯಗಳ ಕುರಿತು ಮಾಹಿತಿ ನೀಡಲಾಯಿತು.

ಈ ಅಭಿಯಾನವನ್ನು ಸುರಕ್ಷತಾ ಇಲಾಖೆಯ ನೇತೃತ್ವದಲ್ಲಿ ಆಯೋಜಿಸಲಾಗಿದ್ದು, ವಿಭಾಗೀಯ ರೈಲ್ವೆ ವ್ಯವಸ್ಥಾಪಕರು (DRM), ವಿವಿಧ ಶಾಖೆಗಳ ಅಧಿಕಾರಿಗಳು ಹಾಗೂ ರೈಲ್ವೆ ಸಿಬ್ಬಂದಿ ಪಾಲ್ಗೊಂಡಿದ್ದರು.