ʼEgypt ತಂಡಕ್ಕೆ ಅನ್ಯಾಯವಾಗಿದೆʼ : ಅರ್ಜೆಂಟೀನಾ ಎದುರು ಸೋಲಿನ ಬಳಿಕ ಈಜಿಪ್ಟ್ ಕೋಚ್ ಆರೋಪ

ಅಟ್ಲಾಂಟಾ : ಫಿಫಾ ವಿಶ್ವಕಪ್ ಪ್ರೀ ಕ್ವಾರ್ಟರ್ಫೈನಲ್‌ನಲ್ಲಿ ಹಾಲಿ ಚಾಂಪಿಯನ್ ಅರ್ಜೆಂಟೀನಾ ವಿರುದ್ಧ 3-2 ಗೋಲುಗಳ ಅಂತರದಲ್ಲಿ ಸೋಲಿನ ಬೆನ್ನಲ್ಲೆ ಈಜಿಪ್ಟ್‌ ಮುಖ್ಯ ಕೋಚ್ ಹೊಸಮ್ ಹಸನ್, ಪಂದ್ಯದ ತೀರ್ಪುಗಾರರು ಲಿಯೋನೆಲ್ ಮೆಸ್ಸಿ ಮತ್ತು ಅರ್ಜೆಂಟೀನಾ ಪರವಾಗಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. 

ಆರಂಭದಲ್ಲಿ 2-0 ಮುನ್ನಡೆ ಸಾಧಿಸಿದ ನಂತರ ಈಜಿಪ್ಟ್ ಐತಿಹಾಸಿಕ ವಿಶ್ವಕಪ್ ಕ್ವಾರ್ಟರ್ ಫೈನಲ್‌ಗೆ ತಲುಪುವ ಅಂಚಿನಲ್ಲಿತ್ತು. ಆದರೆ ಅರ್ಜೆಂಟೀನಾ ನಾಟಕೀಯವಾಗಿ ಮರಳುವ ಮೂಲಕ ಪ್ರಮುಖ ಆಘಾತವನ್ನು ತಪ್ಪಿಸಿತು.

ಪಂದ್ಯದಲ್ಲಿ ನಿರ್ಣಾಯಕವಾದ ಮೂರನೇ ಗೋಲನ್ನು VAR ತೀರ್ಪಿನ ಮೂಲಕ ರದ್ದುಗೊಳಿಸಲಾಯಿತು. ಇದರಿಂದ ಈಜಿಪ್ಟ್‌ಗೆ ಅನ್ಯಾಯವಾಗಿದೆ. ಅಧಿಕಾರಿಗಳು, ಪಂದ್ಯದ ನಿರ್ವಾಹಕರು ಲಿಯೋನೆಲ್ ಮೆಸ್ಸಿ ಮತ್ತು ಅರ್ಜೆಂಟೀನಾ ಪರವಾಗಿದ್ದಾರೆ ಎಂದು ಹೊಸಮ್ ಹಸನ್ ಆರೋಪಿಸಿದ್ದಾರೆ.

ಯಾಸರ್ ಇಬ್ರಾಹಿಂ ಮತ್ತು ಮೊಸ್ತಫಾ ಜಿಕೊ ಅವರ ಮೂಲಕ ಈಜಿಪ್ಟ್ 2-0 ಮುನ್ನಡೆ ಸಾಧಿಸಿತು, ಆದರೆ ಮೊಹಮ್ಮದ್ ಸಲಾಹ್ ಹಾಕಿದ್ದ ಮೂರನೇ ಗೋಲನ್ನು VAR ಮೂಲಕ ಅಮಾನ್ಯಗೊಳಿಸಲಾಯಿತು. ಅದಾದ ಬಳಿಕ ಅರ್ಜೆಂಟೀನಾ ಅದ್ಭುತ ಪುನರಾಗಮನ ಮಾಡಿ ಕ್ರಿಸ್ಟಿಯನ್ ರೊಮೆರೊ, ಲಿಯೋನೆಲ್ ಮೆಸ್ಸಿ ಮತ್ತು ಎಂಜೊ ಫೆರ್ನಾಂಡಿಸ್ ಗಳಿಸಿದ ಗೋಲುಗಳ ನೆರವಿನಿಂದ 3-2 ಅಂತರದಲ್ಲಿ ರೋಚಕ ಜಯ ಸಾಧಿಸಿತು.

ಈಜಿಪ್ಟ್‌ ಮುಖ್ಯ ಕೋಚ್ ಹೊಸಮ್ ಹಸನ್ ಪಂದ್ಯದ ವೇಳೆ ವರ್ಣಭೇದದ ದೌರ್ಜನ್ಯವನ್ನು ವರದಿ ಮಾಡಲು ಫಿಫಾ ಮಾನ್ಯತೆ ನೀಡಿರುವ 'X' ಸಂಕೇತವನ್ನು ಎರಡೂ ಕೈಗಳನ್ನು ಅಡ್ಡವಾಗಿ ಜೋಡಿಸಿ, ಫ್ರೆಂಚ್ ರೆಫರಿ ಫ್ರಾಂಕೋಯಿಸ್ ಲೆಟೆಕ್ಸಿಯರ್ ಅವರ ಎದುರು ಪ್ರದರ್ಶಿಸಿದ್ದರು. 

ಈಜಿಪ್ಟ್ ಕೋಚ್ ಮಾಡಿದ 'X' ಚಿಹ್ನೆಯ ಅರ್ಥವೇನು?

ಈಜಿಪ್ಟ್ ತಂಡದ ಕೋಚ್ ಕೈಗಳನ್ನು ಮಣಿಕಟ್ಟಿನ ಬಳಿ ಅಡ್ಡವಾಗಿ ಜೋಡಿಸಿ 'X' ಆಕಾರದ ಸಂಕೇತವನ್ನು ತೋರಿಸಿದ್ದು, ಇದು ವರ್ಣಭೇದ ಅಥವಾ ತಾರತಮ್ಯವನ್ನು ಅಧಿಕೃತವಾಗಿ ವರದಿ ಮಾಡುವ ಫಿಫಾದ ಸಂಕೇತವಾಗಿದೆ.

ಆಟಗಾರರು ಅಥವಾ ತಂಡದ ಅಧಿಕಾರಿಗಳು ಪಂದ್ಯ ನಡೆಯುವ ವೇಳೆ ವರ್ಣಭೇದದ ನಿಂದನೆ ಅಥವಾ ತಾರತಮ್ಯಕ್ಕೆ ಒಳಗಾದರೆ ತಮ್ಮ ಕೈಗಳನ್ನು ಮಣಿಕಟ್ಟಿನ ಬಳಿ ಅಡ್ಡವಾಗಿ ಜೋಡಿಸಿ 'X' ಸಂಕೇತವನ್ನು ತೋರಿಸಬಹುದಾಗಿದೆ.