FIFA World Cup 2026 | ಕೆನಡಾಗೆ 3-0 ಗೋಲುಗಳಿಂದ ಸೋಲುಣಿಸಿದ ಮೊರಾಕ್ಕೊ; ಸತತ ಎರಡನೇ ಬಾರಿ ಕ್ವಾರ್ಟರ್‌ ಫೈನಲ್‌ಗೆ ಪ್ರವೇಶ

ಹೂಸ್ಟನ್: ಅಝ್ಝೆದಿನ್ ಔನಾಹಿ ಅವರ ಎರಡು ಗೋಲುಗಳು ಹಾಗೂ ಸೌಫಿಯಾನೆ ರಹಿಮಿ ಅವರ ಹೆಚ್ಚುವರಿ ಅವಧಿಯ ಗೋಲಿನ ನೆರವಿನಿಂದ ಮೊರಾಕ್ಕೊ ತಂಡವು ಸಹ-ಆತಿಥೇಯ ಕೆನಡಾವನ್ನು 3-0 ಗೋಲುಗಳಿಂದ ಮಣಿಸಿ, ಫಿಫಾ ವಿಶ್ವಕಪ್ ಫುಟ್‌ಬಾಲ್ ಟೂರ್ನಿಯ ಕ್ವಾರ್ಟರ್‌ ಫೈನಲ್‌ಗೆ ಸತತ ಎರಡನೇ ಬಾರಿ ಪ್ರವೇಶಿಸಿತು. ಇದರೊಂದಿಗೆ ಕೆನಡಾದ ಐತಿಹಾಸಿಕ ವಿಶ್ವಕಪ್ ಪಯಣ ಅಂತ್ಯಗೊಂಡಿತು.

16ರ ಸುತ್ತಿನ ಪಂದ್ಯದಲ್ಲಿ ಮೊದಲಾರ್ಧದ ಬಹುಪಾಲು ಸಮಯ ಕೆನಡಾ ಮೇಲುಗೈ ಸಾಧಿಸಿದ್ದರೂ, ದ್ವಿತೀಯಾರ್ಧದಲ್ಲಿ ಮೊರಾಕ್ಕೊ ತೋರಿದ ಪರಿಣಾಮಕಾರಿ ಆಟ ಪಂದ್ಯದ ಚಿತ್ರಣವನ್ನೇ ಬದಲಿಸಿತು. ಅಜ್ಜೆಡಿನ್ ಔನಾಹಿ ದ್ವಿತೀಯಾರ್ಧದಲ್ಲಿ ಎರಡು ಗೋಲುಗಳನ್ನು ಗಳಿಸಿದರೆ, ಸೌಫಿಯಾನೆ ರಹಿಮಿ ಹೆಚ್ಚುವರಿ ಅವಧಿಯಲ್ಲಿ ಮತ್ತೊಂದು ಗೋಲು ಸೇರಿಸಿ ಮೊರಾಕ್ಕೊದ ಭರ್ಜರಿ ಗೆಲುವಿಗೆ ಕಾರಣರಾದರು.

ಕೆನಡಾ ತಂಡವು ಆರಂಭದಿಂದಲೇ ಆಕ್ರಮಣಕಾರಿ ಆಟ ಪ್ರದರ್ಶಿಸಿತು. ಐದನೇ ನಿಮಿಷದಲ್ಲೇ ಜೊನಾಥನ್ ಡೇವಿಡ್ ಅವರಿಗೆ ಗೋಲು ಗಳಿಸುವ ಅವಕಾಶ ದೊರೆತರೂ, ಮೊರಾಕ್ಕೊ ಗೋಲ್‌ಕೀಪರ್ ಯಾಸಿನ್ ಬೌನೌ ಅತ್ಯುತ್ತಮ ಸೇವ್‌ ಮಾಡುವ ಮೂಲಕ ತಂಡವನ್ನು ಸಂಕಷ್ಟದಿಂದ ಪಾರು ಮಾಡಿದರು. ಬಳಿಕ ಸ್ಟೀಫನ್ ಯುಸ್ಟಾಕ್ವಿಯೊ ಅವರ ಅಪಾಯಕಾರಿ ಕಾರ್ನರ್ ಪ್ರಯತ್ನವನ್ನೂ ಬೌನೌ ವಿಫಲಗೊಳಿಸಿದರು.

12ನೇ ನಿಮಿಷದಲ್ಲಿ ಮೊರಾಕ್ಕೊ ರಕ್ಷಣಾ ವಿಭಾಗದ ತಪ್ಪಿನಿಂದ ಕೆನಡಾಗೆ ಮತ್ತೊಂದು ಉತ್ತಮ ಅವಕಾಶ ದೊರೆಯಿತು. ಟ್ಯಾನಿ ಒಲುವಾಸೇಯಿ ಗೋಲಿನತ್ತ ಕಡಿಮೆ ಎತ್ತರದ ಶಾಟ್ ಹೊಡೆದರೂ, ಬೌನೌ ಎಡಗಾಲು ಚಾಚಿ ಅದ್ಭುತವಾಗಿ ತಡೆದರು.

ಹೈಡ್ರೇಶನ್ ಬ್ರೇಕ್ ವೇಳೆಗೆ ಕೆನಡಾ ನಾಲ್ಕು ಶಾಟ್‌ಗಳನ್ನು ಪ್ರಯತ್ನಿಸಿದ್ದರೆ, ಮೊರಾಕ್ಕೊ ಪರಿಣಾಮಕಾರಿ ಪ್ರಯತ್ನವೊಂದನ್ನೂ ದಾಖಲಿಸಿರಲಿಲ್ಲ. ಅಝ್ಝೆದಿನ್ ಔನಾಹಿ, ಅಚ್ರಾಫ್ ಹಕಿಮಿ ಹಾಗೂ ಬ್ರಾಹಿಂ ಡಯಾಝ್ ಮೊದಲಾರ್ಧದಲ್ಲಿ ನಿರೀಕ್ಷಿತ ಪ್ರದರ್ಶನ ನೀಡಲು ವಿಫಲರಾದರು.

22ನೇ ನಿಮಿಷದಲ್ಲಿ ಟೂರ್ನಿಯ ಅಗ್ರ ಗೋಲು ಗಳಿಕೆದಾರ ಇಸ್ಮಾಯಿಲ್ ಸೈಬಾರಿ ಮಂಡಿರಜ್ಜು ಗಾಯದಿಂದ ಮೈದಾನ ತೊರೆದಿದ್ದು, ಮೊರಾಕ್ಕೊಗೆ ಹಿನ್ನಡೆಯಾಯಿತು. ಆದರೂ, ಕೆನಡಾ ತನ್ನ ಮೇಲುಗೈಯನ್ನು ಗೋಲಾಗಿ ಪರಿವರ್ತಿಸಲು ವಿಫಲವಾದ ಕಾರಣ ಮೊರಾಕ್ಕೊ ಪಂದ್ಯದ ಆಸೆ ಜೀವಂತವಾಯಿತು.

ವಿರಾಮದ ಬಳಿಕ ಮೊರಾಕ್ಕೊ ಸಂಪೂರ್ಣವಾಗಿ ವಿಭಿನ್ನ ತಂಡವಾಗಿ ಕಣಕ್ಕಿಳಿಯಿತು. ದ್ವಿತೀಯಾರ್ಧ ಆರಂಭವಾಗಿ ಐದು ನಿಮಿಷಗಳಲ್ಲೇ ತಂಡಕ್ಕೆ ಮುನ್ನಡೆ ದೊರೆಯಿತು. ಸೌಫಿಯಾನೆ ರಹಿಮಿ ಮೇಲೆ ನಡೆದ ಫೌಲ್‌ನಿಂದ ದೊರೆತ ಫ್ರೀ-ಕಿಕ್ ಸಂದರ್ಭವನ್ನು ಅಚ್ರಾಫ್ ಹಕಿಮಿ ಚತುರವಾಗಿ ಬಳಸಿಕೊಂಡು, ಬಾಕ್ಸ್‌ನ ಅಂಚಿನಲ್ಲಿ ನಿಂತಿದ್ದ ಅಝ್ಝೆದಿನ್ ಔನಾಹಿಗೆ ಪಾಸ್ ನೀಡಿದರು. ಔನಾಹಿ ಮೊದಲ ಸ್ಪರ್ಶದಲ್ಲೇ ಚೆಂಡನ್ನು ಗೋಲುಪೆಟ್ಟಿಗೆಯ ಕೆಳ ಮೂಲೆಗೆ ಅಚ್ಚುಕಟ್ಟಾಗಿ ಸೇರಿಸಿದರು.

ಈ ಗೋಲಿನ ಬಳಿಕ ಪಂದ್ಯದ ದಿಕ್ಕು ಸಂಪೂರ್ಣ ಬದಲಾಯಿತು. ಸಮಬಲದ ಗೋಲಿಗಾಗಿ ಕೆನಡಾ ಮುನ್ನುಗ್ಗಿದ ಪರಿಣಾಮ ರಕ್ಷಣೆಯಲ್ಲಿ ಖಾಲಿ ಜಾಗಗಳು ಸೃಷ್ಟಿಯಾದವು. ಇದರ ಸದುಪಯೋಗ ಮಾಡಿಕೊಂಡ ಮೊರಾಕ್ಕೊ ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿತು.

ಆದರೂ, ಕೆನಡಾಗೆ ಸಮಬಲ ಸಾಧಿಸುವ ಅವಕಾಶಗಳು ದೊರೆಯುತ್ತಲೇ ಇದ್ದವು. ಜೊನಾಥನ್ ಡೇವಿಡ್ ಅವರ ಫ್ರೀ-ಕಿಕ್ ಗೋಲುಕಂಬದ ಮೇಲ್ಭಾಗದಿಂದ ಹೊರಹೋದರೆ, ತಾಜೋನ್ ಬುಕಾನನ್ ಅವರ ಪ್ರಬಲ ದೂರದ ಶಾಟ್ ಅನ್ನು ಬೌನೌ ಮತ್ತೊಮ್ಮೆ ಅದ್ಭುತವಾಗಿ ತಡೆದರು.

82ನೇ ನಿಮಿಷದಲ್ಲಿ ಬ್ರಾಹಿಂ ಡಯಾಝ್ ಅವರ ಪಾಸ್ ಸ್ವೀಕರಿಸಿದ ಅಝ್ಝೆದಿನ್ ಔನಾಹಿ, ಪ್ರಬಲ ಶಾಟ್ ಮೂಲಕ ತಮ್ಮ ಎರಡನೇ ಗೋಲು ದಾಖಲಿಸಿ ಮೊರಾಕ್ಕೊದ ಮುನ್ನಡೆಯನ್ನು 2-0ಕ್ಕೆ ಹೆಚ್ಚಿಸಿದರು.

ಸ್ಟಾಪೇಜ್ ಟೈಮ್‌ನಲ್ಲಿ ಮತ್ತೊಂದು ವೇಗದ ಪ್ರತಿದಾಳಿಯನ್ನು ಯಶಸ್ವಿಯಾಗಿ ಮುಗಿಸಿದ ಸೌಫಿಯಾನೆ ರಹಿಮಿ ಮೂರನೇ ಗೋಲು ಗಳಿಸಿ ಮೊರಾಕ್ಕೊದ ಭರ್ಜರಿ ಗೆಲುವನ್ನು ಖಚಿತಪಡಿಸಿದರು.

ಈ ಗೆಲುವಿನೊಂದಿಗೆ ಮೊರಾಕ್ಕೊ ವಿಶ್ವಕಪ್ ಕ್ವಾರ್ಟರ್‌ ಫೈನಲ್‌ಗೆ ಸತತ ಎರಡನೇ ಬಾರಿ ಪ್ರವೇಶಿಸಿದೆ. ಕ್ವಾರ್ಟರ್‌ ಫೈನಲ್‌ನಲ್ಲಿ ಮೊರಾಕ್ಕೊ ತಂಡವು ಫ್ರಾನ್ಸ್ ತಂಡವನ್ನು ಎದುರಿಸಲಿದೆ. ಆದರೆ ಗಾಯಗೊಂಡಿರುವ ಇಸ್ಮಾಯಿಲ್ ಸೈಬಾರಿ ಅವರ ಫಿಟ್‌ನೆಸ್ ತಂಡಕ್ಕೆ ಪ್ರಮುಖ ಚಿಂತೆಯ ವಿಷಯವಾಗಿದೆ.

ಕೆನಡಾ ಪಾಲಿಗೆ ಈ ಸೋಲು ಐತಿಹಾಸಿಕ ವಿಶ್ವಕಪ್ ಅಭಿಯಾನದ ಅಂತ್ಯವಾಗಿದೆ. ತನ್ನ ಇತಿಹಾಸದಲ್ಲಿ ಮೊದಲ ಬಾರಿಗೆ ನಾಕೌಟ್ ಹಂತ ತಲುಪಿದ್ದ ಕೆನಡಾ, ಟೂರ್ನಿಯಲ್ಲಿ ಗಮನಾರ್ಹ ಪ್ರದರ್ಶನ ನೀಡಿದ್ದರೂ ನಿರ್ಣಾಯಕ ಕ್ಷಣಗಳನ್ನು ಸದುಪಯೋಗಪಡಿಸಿಕೊಳ್ಳುವಲ್ಲಿ ವಿಫಲವಾಯಿತು.

ಮೊದಲಾರ್ಧದಲ್ಲಿ ಮೇಲುಗೈ ಸಾಧಿಸಿದ್ದ ಕೆನಡಾ, ದ್ವಿತೀಯಾರ್ಧದಲ್ಲಿ ಮೊರಾಕ್ಕೊದ ಅನುಭವ ಮತ್ತು ಪರಿಣಾಮಕಾರಿ ಆಟದ ಎದುರು ನಿರಾಸೆ ಅನುಭವಿಸಿತು. ಮತ್ತೊಂದೆಡೆ, ಮೊರಾಕ್ಕೊ ಮತ್ತೊಮ್ಮೆ ನಾಕೌಟ್ ಹಂತದಲ್ಲಿ ತನ್ನ ಸಾಮರ್ಥ್ಯವನ್ನು ಪ್ರದರ್ಶಿಸಿ ವಿಶ್ವಕಪ್ ಪ್ರಶಸ್ತಿಯ ಕನಸನ್ನು ಜೀವಂತವಾಗಿರಿಸಿಕೊಂಡಿದೆ.