ಏಷ್ಯನ್ ಗೇಮ್ಸ್ ಫೈನಲ್ | ಟಾಸ್‌ ಬಳಿಕ ಹಸ್ತಲಾಘವ ಮಾಡದ ಭಾರತ - ಪಾಕ್ ನಾಯಕರು

ಟೋಕಿಯೊ, ಅ.3: ಏಷ್ಯನ್ ಗೇಮ್ಸ್ ಕ್ರಿಕೆಟ್ ಫೈನಲ್‌ನಲ್ಲಿ ಪಾಕಿಸ್ತಾನ ವಿರುದ್ಧ ಭಾರತ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ಟಾಸ್ ವೇಳೆ ಭಾರತ ತಂಡದ ನಾಯಕ ಶ್ರೇಯಸ್ ಅಯ್ಯರ್ ಮತ್ತು ಪಾಕಿಸ್ತಾನ ತಂಡದ ನಾಯಕ ಸಾಹಿಬ್‌ ಝಾದಾ ಫರ್ಹಾನ್ ಪರಸ್ಪರ ಹಸ್ತಲಾಘವ ಮಾಡಿಕೊಳ್ಳಲಿಲ್ಲ.

ಕೊರೋಗಿ ಸ್ಪೋರ್ಟ್ಸ್ ಪಾರ್ಕ್‌ ನಲ್ಲಿ ಶನಿವಾರ ನಡೆದ ಫೈನಲ್‌ನ ಟಾಸ್ ವೇಳೆ ಈ ಬೆಳವಣಿಗೆ ಕಂಡುಬಂದಿದೆ. ಕಳೆದ ವರ್ಷದ ಏಷ್ಯಾ ಕಪ್‌ ನಿಂದ ಭಾರತ–ಪಾಕಿಸ್ತಾನ ಕ್ರಿಕೆಟ್ ಮುಖಾಮುಖಿಗಳಲ್ಲಿ ಟಾಸ್ ವೇಳೆ ಮತ್ತು ಪಂದ್ಯದ ಬಳಿಕ ಹಸ್ತಲಾಘವ ಮಾಡದಿರುವ ಪದ್ಧತಿ ಮುಂದುವರಿದಿದ್ದು, ಏಷ್ಯನ್ ಗೇಮ್ಸ್ ಫೈನಲ್‌ ನಲ್ಲಿಯೂ ಅದು ಮುಂದುವರಿಯಿತು.

2025ರ ಏಷ್ಯಾ ಕಪ್‌ ನಿಂದ ಭಾರತ ಮತ್ತು ಪಾಕಿಸ್ತಾನ ತಂಡಗಳು ಟಾಸ್ ವೇಳೆ ಹಾಗೂ ಪಂದ್ಯಗಳ ಬಳಿಕ ವಾಡಿಕೆಯಂತೆ ಮಾಡುತ್ತಿದ್ದ ಹಸ್ತಲಾಘವವನ್ನು ತಪ್ಪಿಸುತ್ತಿವೆ. ಮಹಿಳಾ ವಿಶ್ವಕಪ್, ಅಂಡರ್–19 ಏಷ್ಯಾ ಕಪ್ ಮತ್ತು 2026ರ ಸೆಪ್ಟೆಂಬರ್‌ನಲ್ಲಿ ನಡೆದ ಮಹಿಳಾ ಏಷ್ಯಾ ಕಪ್‌ ನಲ್ಲಿಯೂ ಇದೇ ಬೆಳವಣಿಗೆ ಕಂಡುಬಂದಿತ್ತು.

ಪಹಲ್ಗಾಮ್ ದಾಳಿ ಬಳಿಕ ಬಿಗಡಾಯಿಸಿದ ಸಂಬಂಧ

2025ರ ಎಪ್ರಿಲ್‌ ನಲ್ಲಿ ನಡೆದ ಪಹಲ್ಗಾಮ್ ಭಯೋತ್ಪಾದಕ ದಾಳಿ ಹಾಗೂ ನಂತರ ಉಭಯ ದೇಶಗಳ ನಡುವೆ ಉಂಟಾದ ಮಿಲಿಟರಿ ಉದ್ವಿಗ್ನತೆಯಿಂದ ಭಾರತ–ಪಾಕಿಸ್ತಾನ ಸಂಬಂಧ ಹದಗೆಟ್ಟಿದೆ.

2025ರ ಏಷ್ಯಾ ಕಪ್‌ ನಲ್ಲಿ ಭಾರತ ಮತ್ತು ಪಾಕಿಸ್ತಾನ ಮೂರು ಬಾರಿ ಮುಖಾಮುಖಿಯಾಗಿದ್ದವು. ಈ ಮೂರೂ ಪಂದ್ಯಗಳಲ್ಲಿ ಟಾಸ್ ವೇಳೆ ಅಥವಾ ಪಂದ್ಯಗಳ ಬಳಿಕ ಎರಡೂ ತಂಡಗಳ ಆಟಗಾರರು ಹಸ್ತಲಾಘವ ಮಾಡಿರಲಿಲ್ಲ.

ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ ಅಧ್ಯಕ್ಷರೂ ಆಗಿರುವ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಅಧ್ಯಕ್ಷ ಮೊಹ್ಸಿನ್ ನಖ್ವಿ ಅವರಿಂದ ಏಷ್ಯಾ ಕಪ್ ಟ್ರೋಫಿಯನ್ನು ಸ್ವೀಕರಿಸಲು ಭಾರತ ನಿರಾಕರಿಸಿತ್ತು.

ಆದರೆ, ಹಸ್ತಲಾಘವ ಮಾಡದಿರುವ ಪದ್ಧತಿ ಹೆಚ್ಚಾಗಿ ಕ್ರಿಕೆಟ್‌ ಗೆ ಮಾತ್ರ ಸೀಮಿತವಾಗಿದೆ. ಏಷ್ಯನ್ ಗೇಮ್ಸ್‌ನಲ್ಲಿ ಭಾರತೀಯ ಮತ್ತು ಪಾಕಿಸ್ತಾನಿ ಕ್ರೀಡಾಪಟುಗಳು ಇತರ ಕ್ರೀಡೆಗಳಲ್ಲಿ ಪರಸ್ಪರ ಹಸ್ತಲಾಘವ ಮಾಡಿ, ಶುಭಾಶಯ ವಿನಿಮಯ ಮಾಡಿಕೊಳ್ಳುತ್ತಿದ್ದಾರೆ.

ಭಾರತೀಯ ಮತ್ತು ಪಾಕಿಸ್ತಾನಿ ಟೇಬಲ್ ಟೆನಿಸ್ ಆಟಗಾರರು ಪಂದ್ಯಗಳ ಬಳಿಕ ಹಸ್ತಲಾಘವ ಮಾಡಿಕೊಂಡಿದ್ದರು.

‘ಹಸ್ತಲಾಘವಕ್ಕೆ ಒತ್ತಾಯಿಸುವುದಿಲ್ಲ’

ಈ ಬೆಳವಣಿಗೆ ಕುರಿತು ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯೂ ಪ್ರತಿಕ್ರಿಯಿಸಿತ್ತು. 2025ರ ಡಿಸೆಂಬರ್‌ ನಲ್ಲಿ ಮಾತನಾಡಿದ್ದ ಮೊಹ್ಸಿನ್ ನಖ್ವಿ, ಭಾರತಕ್ಕೆ ಹಸ್ತಲಾಘವ ಮಾಡುವುದು ಇಷ್ಟವಿಲ್ಲದಿದ್ದರೆ ಪಾಕಿಸ್ತಾನವು ಅದಕ್ಕೆ ಒತ್ತಾಯಿಸುವುದಿಲ್ಲ ಎಂದು ಹೇಳಿದ್ದರು. ಕ್ರಿಕೆಟ್‌ ನಲ್ಲಿ ರಾಜಕೀಯವನ್ನು ಬೆರೆಸಬಾರದು ಎಂದೂ ಅವರು ಅಭಿಪ್ರಾಯಪಟ್ಟಿದ್ದರು.

ಕಿರಿಯರ ತಂಡಗಳಲ್ಲಿಯೂ ಇದೇ ಮಾದರಿ ಮುಂದುವರಿದಿದೆ. 2025ರ ಡಿಸೆಂಬರ್‌ ನಲ್ಲಿ ನಡೆದ ಅಂಡರ್–19 ಏಷ್ಯಾ ಕಪ್ ಮತ್ತು 2026ರ ಅಂಡರ್–19 ವಿಶ್ವಕಪ್‌ ನಲ್ಲಿ ಟಾಸ್ ವೇಳೆ ಭಾರತದ ನಾಯಕ ಆಯುಷ್ ಮಹಾತ್ರೆ ಮತ್ತು ಪಾಕಿಸ್ತಾನದ ಫರ್ಹಾನ್ ಯೂಸುಫ್ ಪರಸ್ಪರ ಹಸ್ತಲಾಘವ ಮಾಡಿರಲಿಲ್ಲ.

ಟಾಸ್ ಗೆದ್ದ ಶ್ರೇಯಸ್ ಅಯ್ಯರ್ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದ್ದು, ಪಾಕಿಸ್ತಾನ ವಿರುದ್ಧದ ಫೈನಲ್‌ ನಲ್ಲಿ ಭಾರತ ದೊಡ್ಡ ಮೊತ್ತ ಕಲೆಹಾಕುವ ಗುರಿಯೊಂದಿಗೆ ಕಣಕ್ಕಿಳಿದಿದೆ.